കുവൈത്ത് സിറ്റി: രാജ്യത്ത് ഡ്രൈവിങ് ലൈസന്‍സ് യോഗ്യതാ മാനദണ്ഡങ്ങള്‍ പാലിക്കാത്ത പ്രവാസികള്‍ക്ക് എട്ടിന്‍റെ പണി. ഓട്ടോമേറ്റഡ് ഡാറ്റ ഷെയറിങ് സംവിധാനങ്ങളുടെ സഹായത്തോടെ, മിനിമം ശമ്പളം അല്ലെങ്കിൽ സാധുവായ റെസിഡൻസി സ്റ്റാറ്റസ് പോലുള്ള യോഗ്യതാ മാനദണ്ഡങ്ങൾ പാലിക്കാത്ത പ്രവാസികളുടെ ഡ്രൈവിങ് ലൈസൻസുകൾ ജനറൽ ട്രാഫിക് വകുപ്പ് റദ്ദാക്കാൻ തുടങ്ങി. റദ്ദാക്കിയ ലൈസൻസുമായി വാഹനമോടിക്കുന്ന വ്യക്തികളെ ലൈസൻസില്ലാത്ത ഡ്രൈവർമാരായി കണക്കാക്കുകയും നിയമപരമായ അധികാരികൾക്ക് റഫർ ചെയ്യുകയും ചെയ്യുമെന്ന് അധികൃതര്‍ മുന്നറിയിപ്പ് നൽകി. കുവൈത്ത് മൊബൈൽ ഐഡി അല്ലെങ്കിൽ “സഹേൽ” ആപ്പ് വഴി പ്രവാസികൾ അവരുടെ ഡ്രൈവിങ് ലൈസൻസുകളുടെ സാധുത പതിവായി പരിശോധിക്കാൻ നിര്‍ദേശിച്ചു. സാധുത പരിശോധിക്കാത്തത് നിയമപരമായ ഉത്തരവാദിത്തത്തിൽ നിന്ന് അവരെ ഒഴിവാക്കില്ല.
