Norka Care കുവൈത്ത്: പ്രവാസി മലയാളികൾക്ക് കേരള സർക്കാരിന്റെ ഓണസമ്മാനം. പ്രവാസി കേരളീയർക്ക് ഓണസമ്മാനമായി സർക്കാർ നൽകുന്നത് സമഗ്ര ഇൻഷുറൻസ് പരിരക്ഷ ഒരുക്കുന്ന നോർക്ക കെയർ പദ്ധതിയാണ്. 5 ലക്ഷം രൂപയുടെ പണരഹിത ചികിത്സ ലഭിക്കുന്നതും ഏറ്റവും കുറഞ്ഞ പ്രീമിയമുള്ളതുമാണ് പദ്ധതി. 10 ലക്ഷം രൂപയുടെ അപകട ഇൻഷുറൻസ് കവറേജും ലഭിക്കുമെന്നതാണ് പദ്ധതിയുടെ മറ്റൊരു പ്രത്യേകത. സംസ്ഥാന സർക്കാരും നോർക്ക റൂട്‌സും ചേർന്ന് പ്രവാസി മലയാളികൾക്കായി ആവിഷ്‌കരിച്ച പദ്ധതിയാണിത്. ഇന്ത്യയിലെ 14,200 ആശുപത്രികളിൽ ചികിത്സ തേടാം. കേരളത്തിലെ 410 ആശുപത്രികളും ഇതിൽ ഉൾപ്പെടുന്നു. നവംബർ ഒന്നു മുതലാണ് നോർക്ക കെയർ പദ്ധതി പ്രാബല്യത്തിൽ വരുന്നത്. പദ്ധതിയുടെ ഔപചാരിക ഉദ്ഘാടനം സെപ്റ്റംബർ 22ന് മുഖ്യമന്ത്രി പിണറായി വിജയൻ തിരുവനന്തപുരത്ത് നിർവഹിക്കും. വിദേശ മലയാളികളിൽ നോർക്ക പ്രവാസി ഐഡി കാർഡ് ഉള്ളവർക്കും സ്റ്റുഡന്റ് ഐഡി കാർഡുളളവർക്കും, നോർക്ക കെയർ പ്രയോജനപ്പെടുത്താം. സെപ്റ്റംബർ 22 മുതൽ ഒക്ടോബർ 21 വരെയാണ് നോർക്ക കെയറിലേക്കുള്ള രജിസ്‌ട്രേഷൻ. നിലവിൽ അംഗത്വമെടുക്കുന്ന പ്രവാസിയുടെ ജീവിത പങ്കാളി, മക്കൾ എന്നിവരെയാണു പദ്ധതിയിൽ ഉൾപ്പെടുത്താൻ കഴിയുന്നത്. രോഗാടിസ്ഥാനത്തിലുള്ള നിയന്ത്രണങ്ങളോടെ അഞ്ചു ലക്ഷം രൂപയുടെ ആരോഗ്യ അപകട ഇൻഷുറൻസ് പരിരക്ഷയാണ് നോർക്ക കെയർ വഴി ലഭ്യമാക്കുന്നത്. ഭർത്താവ്, ഭാര്യ രണ്ടു കുട്ടികൾ എന്നിവരുൾപ്പെടുന്ന കുടുംബത്തിന് ജിഎസ്ടി ഉൾപ്പെടെ 13,275 രൂപയാണ് വാർഷിക പ്രീമിയം. വ്യക്തിഗത ഇൻഷുറൻസിന് 7,965 രൂപയാണ് വാർഷിക പ്രീമിയം. അധികമായി ചേർക്കുന്ന ഒരോ കൂട്ടിക്കും 4,130 രൂപ വീതമാണ് തുക. നോർക്ക കെയർ’ പദ്ധതിയുടെ ഔദ്യോഗിക ലോഗോ പ്രകാശനം കഴിഞ്ഞ ദിവസം അബുദാബിയിൽ വെച്ചാണ് നടന്നത്. കൂടുതൽ വിവരങ്ങൾക്ക് നോർക്ക റൂട്ട്‌സ് ഐ.ഡി കാർഡ് വിഭാഗത്തിലെ 0471-2770543,528 (പ്രവൃത്തി ദിവസങ്ങളിൽ, ഓഫീസ് സമയത്ത്) നമ്പറുകളിൽ ബന്ധപ്പെടാവുന്നതാണ്. https://norkaroots.kerala.gov.in/ എന്ന വെബ്‌സൈറ്റ് സന്ദർശിച്ചും വിവരങ്ങൾ അറിയാൻ കഴിയും.
INFO