Murder Case കുവൈത്ത് സിറ്റി: കുവൈത്തിൽ കാമുകിയെ കഴുത്തുഞെരിച്ചു കൊലപ്പെടുത്തി മൃതദേഹം സ്യൂട്ട്‌കേസിലാക്കി വിദേശത്തേക്കു കടത്താൻ ശ്രമിച്ച കേസിലെ പ്രതിക്ക് വധശിക്ഷ. കുവൈത്ത് ക്രിമിനൽ കോടതി വിധിച്ച വധശിക്ഷ അപ്പീൽ കോടതിയും ശരിവച്ചു. 2025 മെയ് മാസമാണ് കേസിനാസ്പദമായ സംഭവം നടന്നത്. അതിർത്തിയിലെ കർശന പരിശോധനയിലാണ് സ്യൂട്ട്‌കേസിൽ മൃതദേഹം കണ്ടെത്തിയത്.

പിന്നീട് നടത്തിയ അന്വേഷണത്തിലാണ് സംഭവം പുറംലോകമറിഞ്ഞത്. പ്രതിയുടെ വധശിക്ഷ സുപ്രീംകോടതിയും ശരിവയ്ക്കുന്നതോടെ ശിക്ഷ നടപ്പാക്കും. അതേസമയം, കേസിലെ ഇരയുടെയും പ്രതിയുടെയും പേരുവിവരങ്ങൾ പുറത്തുവിട്ടിട്ടില്ല.

കുവൈത്തിലെ പുതിയ ജോലി അവസരങ്ങൾ ഇതാ

Red Palace Village Project പൈതൃക ടൂറിസം വികസനം; റെഡ് പാലസ് വില്ലേജ് പദ്ധതിക്കുള്ള ടെൻഡർ ആരംഭിച്ച് കുവൈത്ത് മുൻസിപ്പാലിറ്റി

Red Palace Village Project കുവൈത്ത് സിറ്റി: അൽ ജഹ്‌റ ഗവർണറേറ്റിലെ റെഡ് പാലസ് വില്ലേജ് പദ്ധതിയ്ക്കായി കൺസൾട്ടൻസി പഠനങ്ങൾ തയ്യാറാക്കുന്നതിനുള്ള ടെൻഡറിൽ പങ്കെടുക്കാൻ കൺസൾട്ടിംഗ് സ്ഥാപനങ്ങളെയും ഓഫീസുകളെയും ക്ഷണിച്ച് കുവൈത്ത് മുൻസിപ്പാലിറ്റി. അമീറിന്റെ നിർദ്ദേശങ്ങൾക്കനുസൃതമായും അൽ ജഹ്‌റയിലെ ടൂറിസം പുനരുജ്ജീവിപ്പിക്കാനുള്ള ശ്രമങ്ങളുടെ ഭാഗമായുമാണ് ടെൻഡർ പുറപ്പെടുവിച്ചിരിക്കുന്നതെന്ന് മുൻസിപ്പാലിറ്റിയിലെ പ്രോജക്ടുകൾക്കായുള്ള ഡെപ്യൂട്ടി ഡയറക്ടർ ജനറൽ മെയ്‌സ ബൗഷെഹ്‌രി വ്യക്തമാക്കി.

മേഖലയുടെ ചരിത്രപരവും പൈതൃകവുമായ പ്രാധാന്യത്തെ ഉയർത്തിക്കാട്ടുകയും ദേശീയ സ്ഥലങ്ങളെ കുവൈത്ത് ഐഡന്റിറ്റി ശക്തിപ്പെടുത്തുകയും സമൂഹത്തിന് പ്രയോജനപ്പെടുത്തുകയും ചെയ്യുന്ന സുസ്ഥിര വികസന പദ്ധതികളാക്കി മാറ്റുകയും ചെയ്യുക എന്നതാണ് ഈ ടെൻഡറിലൂടെ ലക്ഷ്യമിടുന്നതെന്ന് അദ്ദേഹം ചൂണ്ടിക്കാട്ടി.

സന്ദർശകർക്ക് സവിശേഷമായ അനുഭവം പ്രദാനം ചെയ്യുന്ന, പ്രദേശത്തിന്റെ ചരിത്രത്തെ പ്രതിഫലിപ്പിക്കുന്ന, സ്വകാര്യ മേഖലയുടെ പങ്കാളിത്തം പ്രോത്സാഹിപ്പിക്കുന്ന ഒരു സാംസ്‌കാരിക വിനോദസഞ്ചാര പൈതൃക കേന്ദ്രം സ്ഥാപിക്കുന്നതിനായി രൂപകല്പന ചെയ്ത സമഗ്ര സംരംഭമാണ് റെഡ് പാലസ് വില്ലേജ് പദ്ധതി. അപേക്ഷകർ ടെൻഡർ രേഖകൾ ശ്രദ്ധാപൂർവ്വം അവലോകനം ചെയ്യാനും എല്ലാ ആവശ്യകതകളും സമയപരിധികളും പാലിക്കാനും ശക്തവും പ്രായോഗികവുമായ സാങ്കേതിക നിർദ്ദേശങ്ങൾ സമർപ്പിക്കാനും അധികൃതർ ആവശ്യപ്പെട്ടു.

ജീവിതനിലവാരം ഉയർത്തുന്നതും ദേശീയ പൈതൃകം ഉയർത്തി കാട്ടുന്നതും ആയ പദ്ധതികൾ മുന്നോട്ട് കൊണ്ടുപോകുന്നതിൽ കുവൈത്ത് മുൻസിപ്പാലിറ്റി പ്രതിജ്ഞാബദ്ധമാണെന്ന് അധികൃതർ കൂട്ടിച്ചേർത്തു.

Road Closed അറ്റകുറ്റപ്പണി; കുവൈത്തിലെ പ്രധാന റോഡ് അടച്ചിടും, യാത്രക്കാർക്ക് മുന്നറിയിപ്പുമായി അധികൃതർ

Road Closed കുവൈത്ത് സിറ്റി: കുവൈത്തിൽ അറേബ്യൻ ഗൾഫ് സ്ട്രീറ്റ് അടച്ചിടുമെന്ന് മുന്നറിയിപ്പ്. സെക്കൻഡ് റിംഗ് റോഡ് ഇന്റർസെക്ഷൻ മുതൽ എഞ്ചിനീയേഴ്‌സ് അസോസിയേഷൻ ഇന്റർസെക്ഷൻ വരെ അറേബ്യൻ ഗൾഫ് സ്ട്രീറ്റ് പൂർണ്ണമായി അടച്ചിടുമെന്ന് ജനറൽ ട്രാഫിക് വകുപ്പ് വ്യക്തമാക്കി. റോഡ് അറ്റകുറ്റപ്പണികളുടെ ഭാഗമായാണ് അടച്ചിടൽ.

വ്യാഴാഴ്ച്ച വൈകിട്ട് ആറു മണി മുതൽ ജനുവരി 25 രാവിലെ ആറു മണി വരെയുള്ള ഈ ഭാഗത്ത് ഗതാഗതം നിയന്ത്രിക്കും. ഈ കാലയളവിൽ വാഹനങ്ങൾ ബദൽ വഴികൾ ഉപയോഗിക്കണമെന്നും ട്രാഫിക് നിർദ്ദേശങ്ങളും മുന്നറിയിപ്പ് ബോർഡുകളും കർശനമായി പാലിക്കണമെന്നും അധികൃതർ ഡ്രൈവർമാർക്ക് നിർദ്ദേശം നൽകി.

Iran- US Issue പരസ്പരം വാക്‌പോരുമായി ഇറാനും യുഎസും; അമേരിക്കൻ യുദ്ധക്കപ്പലുകൾ പശ്ചിമേഷ്യയിലേക്ക് നീങ്ങിത്തുടങ്ങി….

Iran- US Issue ടെഹ്‌റാൻ: പര്‌സ്പര വാക്‌പോര് തുടർന്ന് ഇറാനും യുഎസും. ഇതിനിടെ പസിഫിക് സമുദ്രമേഖലയിലുള്ള അമേരിക്കൻ യുദ്ധക്കപ്പലുകൾ പശ്ചിമേഷ്യയിലേക്ക് നീങ്ങിത്തുടങ്ങിയിട്ടുണ്ട്. സൗത്ത് ചൈന കടലിലായിരുന്ന പോർവിമാന വാഹിനി യുഎസ്എസ് ഏബ്രഹാം ലിങ്കണും അകമ്പടിയായി 3 യുദ്ധക്കപ്പലുകളുമാണ് പശ്ചിമേഷ്യയിലേക്കു നീങ്ങുന്നത്. ചൊവ്വാഴ്ച ഇന്ത്യൻ സമുദ്രമേഖലയിൽ പ്രവേശിച്ചെന്ന റിപ്പോർട്ടുകളും പുറത്തുവരുന്നുണ്ട്.

ജൂണിൽ അമേരിക്ക ആക്രമിച്ചപ്പോൾ ഇറാൻ നിയന്ത്രണം പാലിച്ചുവെന്നും എന്നാൽ ഇനിയൊരാക്രമണമുണ്ടായാൽ മുഴുവൻ കരുത്തുമെടുത്ത് തിരിച്ചടിക്കാൻ തങ്ങളുടെ സൈന്യം മടിക്കില്ലെന്നും ഇറാൻ വിദേശകാര്യ മന്ത്രി അബ്ബാസ് അറഗ്ചി മുന്നറിയിപ്പു നൽകിയിരിക്കുകയാണ്. ഇറാനിലെ പ്രക്ഷോഭം 72 മണിക്കൂർ മാത്രമാണു നീണ്ടതെന്നും സായുധ കലാപകാരികളാണ് പിന്നീടു രാജ്യമെങ്ങും പ്രശ്‌നമുണ്ടാക്കിയതെന്നും യുഎസ് ദിനപത്രമായ വോൾ സ്ട്രീറ്റ് ജേണലിൽ എഴുതിയ ലേഖനത്തിൽ അറഗ്ചി ആരോപിക്കുന്നു. സർക്കാർ വിരുദ്ധ പ്രക്ഷോഭകരെ കൂട്ടക്കൊല ചെയ്തതിന്റെ പേരിൽ, ലോക സാമ്പത്തിക ഫോറത്തിലേക്ക് ഇറാനുള്ള ക്ഷണം റദ്ദാക്കിയിരുന്നു.

അതേസമയം, ഇറാനെതിരെ ഭീഷണിയുമായി ഡോണാൾഡ് ട്രംപും രംഗത്തെത്തിയിട്ടുണ്ട്. തന്നെ വധിച്ചാൽ ഇറാനെ അമേരിക്ക ഭൂമുഖത്തുനിന്നു തുടച്ചുനീക്കുമെന്നും അതിനുള്ള ഉത്തരവുകൾ താൻ നൽകിയിട്ടുണ്ടെന്നും ഡോണൾഡ് ട്രംപ് പറഞ്ഞു. ഇതിനിടെ,ഇറാൻ പരമോന്നത നേതാവ് ആയത്തുല്ല ഖമനയിയെ ലക്ഷ്യമിട്ടാൽ പൂർണയുദ്ധമായിരിക്കും ഫലമെന്നു കഴിഞ്ഞദിവസം ഇറാൻ മുന്നറിയിപ്പു നൽകിയിരുന്നു. ഖമനയിക്കെതിരെ ഓങ്ങുന്ന കൈ വെട്ടുമെന്നും അവരുടെ ലോകം ചുട്ടുചാമ്പലാക്കുമെന്നുമായിരുന്നു ഇറാൻ സായുധസേനയുടെ വക്താവ് നടത്തിയ പ്രതികരണം.

Rowdy Kids കുവൈത്തിൽ കടയുടമയെ ആക്രമിച്ച് റൗഡികളായ കുട്ടികൾ; ദുരവസ്ഥ വെളിപ്പെടുത്തി വ്യാപാരികൾ

Rowdy Kids കുവൈത്ത് സിറ്റി: കുവൈത്തിലെ ഫഹാഹീൽ മാർക്കറ്റിൽ കടയുടമയെ ഭീഷണിപ്പെടുത്തി റൗഡികളായ കുട്ടികൾ. തിരക്കേറിയ സമയത്ത് കടയുടമയെ ആക്രമിക്കുന്ന റൗഡികൾ ആയ കുട്ടികളുടെ വീഡിയോയും പുറത്തുവന്നിട്ടുണ്ട്. പ്രാദേശിക വ്യാപാരികൾ നേരിടുന്ന പ്രധാനപ്പെട്ട ഒരു പ്രശ്‌നമാണിത്. വടികൾ ഉൾപ്പെടെയുള്ളവയുമായി എത്തിയ ഒരുകൂട്ടം അറബ് കുട്ടികളാണ് കടയുടമയെ ഭീഷണിപ്പെടുത്തിയത്.

മിക്കവാറും ദിവസങ്ങളിൽ ഇങ്ങനെ സംഭവിക്കാറുണ്ടെന്നാണ് വ്യാപാരികൾ വ്യക്തമാക്കുന്നത്. ഉത്സവ ദിവസങ്ങളിലും അവധി ദിവസങ്ങളിലും ഇത് കൂടുതലാണ്. തങ്ങളുടെ ചുവരുകൾ അശ്ലീല വാക്കുകളും അടയാളങ്ങളും കൊണ്ട് നിറഞ്ഞിരിക്കുകയാണെന്നും വ്യാപാരികൾ ചൂണ്ടിക്കാട്ടുന്നു. ഇത്തരത്തിലുള്ള പ്രവർത്തനങ്ങൾ കാരണം വ്യാപാരികൾ പലരും വലിയ നിരാശയിലാണ്. നശീകരണ പ്രവർത്തനങ്ങൾ നടത്തുന്ന കുട്ടികളുടെ വീഡിയോ മൊബൈലിൽ പകർത്താൻ ശ്രമിക്കുന്നതിനിടയാണ് ഇവർ വ്യാപാരിയെ മർദ്ദിച്ചത്.

Illegal Food Establishment ലൈസൻസില്ലാതെ ഭക്ഷ്യ ഉത്പന്നങ്ങൾ വിറ്റഴിച്ചു; കുവൈത്തിൽ വീടിനുള്ളിൽ നടത്തിയിരുന്ന അനധികൃത ഭക്ഷ്യസ്ഥാപനം പൂട്ടിച്ചു

Illegal Food Establishment കുവൈത്ത് സിറ്റി: കുവൈത്തിൽ ലൈസൻസില്ലാതെ ഭക്ഷ്യ ഉത്പന്നങ്ങൾ വിറ്റഴിച്ച സ്ഥാപനത്തിന് പൂട്ടുവീണു. വീടിനുള്ളിൽ നടത്തിയിരുന്ന അനധികൃത ഭക്ഷ്യ സ്ഥാപനത്തിനാണ് പൂട്ടുവീണത്. സാമൂഹ്യ മാദ്ധ്യമങ്ങളിൽ നിന്നും ലഭിച്ച സൂചനയെ തുടർന്ന് നടത്തിയ പരിശോധനയിലാണ് ഈ സ്ഥാപനം കണ്ടെത്തിയത്. കുവൈത്ത് പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷനാണ് പരിശോധന നടത്തിയത്.

റിപ്പോർട്ട് ലഭിച്ച ഉടൻ ഇൻസ്‌പെക്ടർമാർ സുരക്ഷാ ഏജൻസികളുടെ ഏകോപനത്തോടെ വസതി റെയ്ഡ് ചെയ്യാനുള്ള നടപടികൾ ആരംഭിക്കുകയായിരുന്നു. നിയമ ലംഘകർക്കെതിരെ തുടർ നടപടികൾ സ്വീകരിച്ചതായി പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷനിലെ ഇൻസ്‌പെക്ഷൻ ആൻഡ് കൺട്രോൾ ആക്ടിംഗ് ഡെപ്യൂട്ടി ജനറൽ ഡോ. സൗദ് അൽ ഹുദൈമി, അൽ ജലാൽ വ്യക്തമാക്കി. കേസ് പബ്ലിക് പ്രോസിക്യൂഷന് കൈമാറിയതായും അദ്ദേഹം പറഞ്ഞു.

നിയമ ലംഘകർക്കെതിരെ വിട്ടുവീഴ്ച്ചയില്ലാത്ത നടപടികൾ സ്വീകരിക്കുമെന്ന് അദ്ദേഹം ഓർമ്മിപ്പിച്ചു. ഉപഭോക്തൃ ആരോഗ്യത്തിനോ ഭക്ഷ്യസുരക്ഷയ്‌ക്കോ ഉള്ള ഏതൊരു ഭീഷണിയെയും വെച്ചുപൊറുപ്പിക്കില്ലെന്നും പൊതുജനാരോഗ്യ സംരക്ഷണവും സുരക്ഷിതമായ ഭക്ഷ്യനിലവാരം ഉറപ്പാക്കലും അതോറിറ്റിയുടെ മുൻഗണനയാണെന്നും അദ്ദേഹം കൂട്ടിച്ചേർത്തു.

അസ്ഥിരമായ കാലാവസ്ഥ; ഈയാഴ്ച അവസാനം കുവൈത്തില്‍ മഴയ്ക്കും ഇടിമിന്നലിനും സാധ്യത

Rain in Kuwait കുവൈത്ത് സിറ്റി: വ്യാഴാഴ്ച മുതൽ രാജ്യത്ത് കാലാവസ്ഥയിൽ മാറ്റങ്ങൾ ഉണ്ടാകുമെന്നും മഴയ്ക്കും ശക്തമായ കാറ്റിനും സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം ആക്ടിംഗ് ഡയറക്ടർ ദറാർ അൽ-അലി അറിയിച്ചു. ഉപരിതല ന്യൂനമർദ്ദത്തിന്റെ ഫലമായാണ് കാലാവസ്ഥയിൽ ഈ മാറ്റങ്ങൾ പ്രതീക്ഷിക്കുന്നത്. വ്യാഴാഴ്ച ഒറ്റപ്പെട്ട നേരിയ മഴയ്ക്ക് സാധ്യതയുണ്ട്. വെള്ളിയാഴ്ച മഴയുടെ ശക്തി വർദ്ധിക്കുകയും, ശനി വൈകുന്നേരവും ഞായറാഴ്ചയും ഇടിമിന്നലോടു കൂടിയ ശക്തമായ മഴ പെയ്യാൻ സാധ്യതയുണ്ടെന്നും റിപ്പോർട്ടുകൾ സൂചിപ്പിക്കുന്നു. ശനിയാഴ്ച കാറ്റിന്റെ വേഗത മണിക്കൂറിൽ 15 മുതൽ 50 കിലോമീറ്റർ വരെയാകാൻ സാധ്യതയുള്ളതിനാൽ കടൽ തിരമാലകൾ 6 അടിയിലധികം ഉയർന്നേക്കാം. ഞായറാഴ്ച പുലർച്ചെ മുതൽ കാറ്റിന്റെ ദിശ മാറി വടക്കുപടിഞ്ഞാറൻ ദിശയിൽ നിന്ന് മണിക്കൂറിൽ 65 കിലോമീറ്റർ വരെ വേഗതയിൽ വീശാൻ സാധ്യതയുണ്ട്.  ഞായറാഴ്ച ശക്തമായ കാറ്റ് വീശുന്നതോടെ അന്തരീക്ഷത്തിൽ പൊടിപടലങ്ങൾ നിറയാനും കാഴ്ചപരിധി കുറയാനും സാധ്യതയുണ്ട്. കടലിൽ തിരമാലകൾ 7 അടിയിലധികം ഉയർന്നേക്കാമെന്നതിനാൽ കടലിൽ പോകുന്നവർ ജാഗ്രത പാലിക്കണം. വ്യാഴം മുതൽ ഞായർ വരെ പരമാവധി താപനില 15 മുതൽ 21 ഡിഗ്രി സെൽഷ്യസ് വരെയും, കുറഞ്ഞ താപനില 5 മുതൽ 11 ഡിഗ്രി സെൽഷ്യസ് വരെയുമായിരിക്കും. ഞായറാഴ്ച ഉച്ചയോടെ മഴയ്ക്കുള്ള സാധ്യത കുറയുമെങ്കിലും പൊടിക്കാറ്റും തണുത്ത കാറ്റും തുടരാനാണ് സാധ്യത. കാലാവസ്ഥാ വ്യതിയാനങ്ങൾ കണക്കിലെടുത്ത് ആവശ്യമായ മുൻകരുതലുകൾ സ്വീകരിക്കാൻ അധികൃതർ നിർദ്ദേശിച്ചു.

ജഹ്‌റ കോർണിഷ് വികസനത്തിന് വഴിയൊരുങ്ങുന്നു; ദോഹയിലെ ചാലറ്റുകൾ നീക്കം ചെയ്യാനുള്ള തീരുമാനം കോടതി ശരിവെച്ചു

Chalets removal kuwait കുവൈത്ത് സിറ്റി: ജഹ്‌റ കോർണിഷ് വാട്ടർഫ്രണ്ട് പദ്ധതി നടപ്പിലാക്കുന്നതിന്റെ ഭാഗമായി വെസ്റ്റ് ദോഹയിലെ ചാലറ്റുകൾ നീക്കം ചെയ്യാനുള്ള കുവൈത്ത് മുനിസിപ്പാലിറ്റിയുടെ തീരുമാനത്തിനെതിരെ ഉടമകൾ നൽകിയ ഹർജികൾ കോടതി തള്ളി. പൊതുതാൽപ്പര്യം മുൻനിർത്തിയുള്ള സർക്കാരിന്റെ നടപടി നിയമപരമാണെന്ന് കോടതി നിരീക്ഷിച്ചു. വ്യക്തിഗത താൽപ്പര്യങ്ങളേക്കാൾ സമൂഹത്തിന്റെ പൊതുനന്മയ്ക്കാണ് മുൻഗണന നൽകേണ്ടതെന്ന് മുനിസിപ്പാലിറ്റിക്ക് വേണ്ടി ഹാജരായ ഫവാസ് അൽ കന്ദരി വാദിച്ചു. ഇത് കോടതി അംഗീകരിച്ചു. തർക്കത്തിലുള്ള ചാലറ്റുകൾ സർക്കാർ ഉടമസ്ഥതയിലുള്ള ഭൂമിയിലാണ് സ്ഥിതി ചെയ്യുന്നത്. 1980-ലെ 105-ാം നമ്പർ നിയമപ്രകാരം, പൊതുതാൽപ്പര്യം ആവശ്യപ്പെടുമ്പോൾ ഇത്തരം ഭൂമിയിലെ ലൈസൻസുകൾ റദ്ദാക്കാൻ ഭരണകൂടത്തിന് അധികാരമുണ്ട്.  ചാലറ്റ് ലൈസൻസ് കരാറുകളിൽ തന്നെ വ്യക്തമായ വ്യവസ്ഥകളുണ്ട്. പൊതു ആവശ്യങ്ങൾക്കായി ഭൂമി തിരിച്ചുചോദിക്കുമ്പോൾ നഷ്ടപരിഹാരം നൽകാതെ തന്നെ കരാർ റദ്ദാക്കാൻ സർക്കാരിന് അധികാരമുണ്ടെന്ന് പ്രതിഭാഗം ചൂണ്ടിക്കാട്ടി. രാജ്യത്തിന്റെ താൽപ്പര്യങ്ങളും പൊതു സ്വത്തുക്കളും സംരക്ഷിക്കാനും നിയന്ത്രിക്കാനും മന്ത്രിസഭയ്ക്കും മുനിസിപ്പാലിറ്റിക്കും പൂർണ്ണമായ അവകാശമുണ്ടെന്ന് കോടതി വിധിയിൽ വ്യക്തമാക്കി. പദ്ധതിയുടെ സുഗമമായ നടത്തിപ്പിന് ചാലറ്റുകൾ തടസ്സമാണെന്ന് ബോധ്യപ്പെട്ടതിനാലാണ് വികസന പ്രവർത്തനങ്ങളുമായി മുന്നോട്ട് പോകാൻ കോടതി അനുമതി നൽകിയത്. ഇതോടെ ജഹ്‌റ കോർണിഷ് പദ്ധതിയുടെ നിർമ്മാണ പ്രവർത്തനങ്ങൾ വേഗത്തിലാകും.

വാഹനങ്ങളിലെ അമിത ശബ്ദം നിയന്ത്രിക്കാൻ കുവൈത്ത്; എക്‌സ്‌ഹോസ്റ്റ് അറ്റകുറ്റപ്പണിക്ക് ഇനി ഔദ്യോഗിക അനുമതി വേണം

Vehicle Permit Exhaust Repairs കുവൈത്ത് സിറ്റി: ഗതാഗത സേവനങ്ങൾ മെച്ചപ്പെടുത്തുന്നതിന്റെയും നിയമലംഘനങ്ങൾ കുറയ്ക്കുന്നതിന്റെയും ഭാഗമായി വാഹനങ്ങളുടെ എക്‌സ്‌ഹോസ്റ്റ് സിസ്റ്റം നന്നാക്കുന്നതിന് പുതിയ സംവിധാനം ഏർപ്പെടുത്തി ജനറൽ ട്രാഫിക് ഡിപ്പാർട്ട്‌മെന്റ്. ഇനി മുതൽ ടെക്നിക്കൽ ഇൻസ്പെക്ഷൻ ഡിപ്പാർട്ട്‌മെന്റിൽ നിന്നുള്ള ഔദ്യോഗിക ‘റിപ്പയർ പെർമിറ്റ്’ ഉണ്ടെങ്കിൽ മാത്രമേ എക്‌സ്‌ഹോസ്റ്റ് അറ്റകുറ്റപ്പണികൾ നടത്താൻ സാധിക്കൂ. അനുവദനീയമായ പരിധിയിൽ കൂടുതൽ ശബ്ദമുണ്ടാക്കുന്നതോ സാങ്കേതിക മാനദണ്ഡങ്ങൾ ലംഘിക്കുന്നതോ ആയ വാഹനങ്ങൾക്കും മോട്ടോർ സൈക്കിളുകൾക്കുമാണ് ഇത്തരം റിപ്പയർ ഫോമുകൾ നൽകുക. ഈ പെർമിറ്റ് ലഭിച്ച ശേഷം മാത്രമേ അംഗീകൃത വർക്ക്‌ഷോപ്പുകളിലോ ഡീലർഷിപ്പുകളിലോ വാഹനം നന്നാക്കാൻ അനുവാദമുള്ളൂ.  അറ്റകുറ്റപ്പണികൾ പൂർത്തിയാക്കിയ ശേഷം വാഹനം വീണ്ടും ടെക്നിക്കൽ ഇൻസ്പെക്ഷൻ ഡിപ്പാർട്ട്‌മെന്റിൽ ഹാജരാക്കി പരിശോധന നടത്തണം. നിയമലംഘനം പരിഹരിച്ചുവെന്ന് ഉറപ്പാക്കിയാൽ മാത്രമേ തുടർന്ന് വാഹനം നിരത്തിലിറക്കാൻ അനുവദിക്കൂ. റോഡുകളിലെ ശബ്ദമലിനീകരണം കുറയ്ക്കാനും വാഹനങ്ങൾ സാങ്കേതിക നിലവാരം പാലിക്കുന്നുണ്ടെന്ന് ഉറപ്പുവരുത്താനും ഈ നീക്കം സഹായിക്കുമെന്ന് അധികൃതർ വ്യക്തമാക്കി. സേവനങ്ങളുടെ ഗുണനിലവാരവും കാര്യക്ഷമതയും വർദ്ധിപ്പിക്കാൻ പുതിയ മെക്കാനിസം ഉപകരിക്കും.

പോലീസിനെ കണ്ടയുടനെ ബാഗ് ദൂരത്തേക്ക് വലിച്ചെറിഞ്ഞു, പരിശോധനയില്‍ മാരകലഹരിമരുന്ന് കുവൈത്തിൽ പ്രവാസികള്‍ പിടിയിൽ

Drug Arrest kuwait കുവൈത്ത് സിറ്റി: കുവൈത്തിലെ അൽ-ഹസാവി പ്രദേശത്ത് വെച്ച് മാരക ലഹരിമരുന്നായ ക്രിസ്റ്റൽ മെത്തുമായി (മെത്താംഫെറ്റാമൈൻ) രണ്ട് അറബ് പൗരന്മാരെ സുരക്ഷാ ഉദ്യോഗസ്ഥർ അറസ്റ്റ് ചെയ്തു. ജലീബ് അൽ-ഷുയൂഖ് പോലീസ് സ്റ്റേഷനിലെ ഉദ്യോഗസ്ഥർ നടത്തിയ പട്രോളിങിനിടെയാണ് ഇവർ പിടിയിലായത്. പോലീസ് പട്രോളിങ് സംഘത്തെ കണ്ടയുടൻ ഇരുവരും ഓടി രക്ഷപ്പെടാൻ ശ്രമിച്ചത് സംശയത്തിനിടയാക്കി. ഇവരെ പിന്തുടർന്ന് പിടികൂടിയപ്പോൾ, ഒരാൾ കൈവശമുണ്ടായിരുന്ന ബാഗ് ദൂരേക്ക് വലിച്ചെറിഞ്ഞു. പരിശോധനയിൽ ഈ ബാഗിൽ നിന്ന് എട്ട് പാക്കറ്റ് ക്രിസ്റ്റൽ മെത്ത് കണ്ടെടുത്തു. പ്രാഥമിക ചോദ്യം ചെയ്യലിൽ, പ്രതികളിൽ ഒരാൾ മറ്റൊരാൾക്ക് ലഹരിമരുന്ന് വിൽക്കാൻ ശ്രമിക്കുകയായിരുന്നുവെന്ന് സമ്മതിച്ചു. ഇവരെ ദേഹപരിശോധന നടത്തിയപ്പോൾ ലഹരിമരുന്ന് ഉപയോഗിക്കാൻ ഉപയോഗിക്കുന്ന ഉപകരണങ്ങളും കൂടുതൽ അളവ് ലഹരിവസ്തുക്കളും കണ്ടെത്തി. ഇരുവരും ലഹരിമരുന്നിന് അടിമകളാണെന്നും ഉദ്യോഗസ്ഥർ സ്ഥിരീകരിച്ചു. പിടിച്ചെടുത്ത മയക്കുമരുന്നും പ്രതികളെയും തുടർനടപടികൾക്കായി ജനറൽ ഡയറക്ടറേറ്റ് ഫോർ ഡ്രഗ് കൺട്രോളിന് കൈമാറി. മയക്കുമരുന്നിനെതിരെയുള്ള പോരാട്ടം ശക്തമാക്കുമെന്ന് ആഭ്യന്തര മന്ത്രാലയം വ്യക്തമാക്കി.

പെട്ടി തുറന്നപ്പോള്‍ അമ്പരന്നു, ഐഫോണുകള്‍ക്ക് പകരം പഴയ ഇരുമ്പ് പൂട്ടുകള്‍, കുവൈത്തില്‍ ഇന്ത്യക്കാരന് നഷ്ടമായത് ലക്ഷങ്ങള്‍

Defrauding Indian in Kuwait കുവൈത്ത് സിറ്റി: അതിസമർഥമായി ആസൂത്രണം ചെയ്ത ഒരു തട്ടിപ്പിലൂടെ കുവൈത്തിലെ ഇന്ത്യൻ പ്രവാസിക്ക് നഷ്ടമായത് ലക്ഷങ്ങൾ. 9 ഐഫോൺ പ്രോ മാക്സ് ഫോണുകൾക്ക് പകരം പഴയ ഇരുമ്പ് പൂട്ടുകൾ നൽകിയാണ് തട്ടിപ്പ് സംഘം ഇന്ത്യൻ യുവാവിനെ കബളിപ്പിച്ചത്. മൊബൈൽ കടയിൽ ജോലി ചെയ്യുന്ന ഈജിപ്ഷ്യൻ പ്രവാസിയിൽ നിന്നാണ് ഇരയായ ഇന്ത്യൻ യുവാവ് 9 ഐഫോണുകൾ, ഒരു ആപ്പിൾ വാച്ച്, ഹെഡ്‌ഫോണുകൾ എന്നിവ വാങ്ങാൻ കരാറിലേർപ്പെട്ടത്. 5,000 ദിനാറിലധികം വിപണി വിലയുള്ള ഈ ഉപകരണങ്ങൾ വെറും 3,838 ദിനാറിന് (ഏകദേശം 10 ലക്ഷത്തിലധികം രൂപ) നൽകാമെന്നായിരുന്നു വാഗ്ദാനം. രാത്രി ജോലി കഴിഞ്ഞ ശേഷം പ്രതിയും യുവാവും തമ്മിൽ കൂടിക്കാഴ്ച നടത്തുകയും പണം കൈമാറി ഉപകരണങ്ങൾ അടങ്ങിയ പെട്ടികൾ വാങ്ങുകയും ചെയ്തു. എന്നാൽ ,വീട്ടിലെത്തി പെട്ടികൾ തുറന്നു നോക്കിയ യുവാവ് ഞെട്ടിപ്പോയി. ഐഫോണുകൾക്ക് പകരം പഴയ ഇരുമ്പ് പൂട്ടുകളും സ്മാർട്ട് വാച്ചിന് പകരം ഒരു ചെറിയ പൂട്ടുമായിരുന്നു പെട്ടിയിലുണ്ടായിരുന്നത്. ഹെഡ്‌ഫോൺ പാക്കറ്റ് കാലിയായിരുന്നു. തട്ടിപ്പിന് ശേഷം മണിക്കൂറുകൾക്കുള്ളിൽ തന്നെ 28-കാരനായ പ്രതി കുവൈത്തിൽ നിന്ന് വിദേശത്തേക്ക് കടന്നതായി പോലീസ് അന്വേഷണത്തിൽ കണ്ടെത്തി. തട്ടിപ്പിന് ഇരയായ 38-കാരനായ ഇന്ത്യൻ പ്രവാസി ജഹ്‌റ പോലീസ് സ്റ്റേഷനിൽ പരാതി നൽകി. അതീവ ജാഗ്രതയോടെ നടത്തിയ ഈ ‘ഐഫോൺ-ടു-ലോക്ക്’ തട്ടിപ്പ് കുവൈത്തിലെ സുരക്ഷാ ഉദ്യോഗസ്ഥരെയും പൊതുജനങ്ങളെയും ഒരുപോലെ അമ്പരപ്പിച്ചിരിക്കുകയാണ്. പ്രതിക്കായി തെരച്ചിൽ ഊർജ്ജിതമാക്കിയിട്ടുണ്ട്.

കുവൈത്തിൽ ഒരാഴ്ചയ്ക്കിടെ 27,000ത്തിലധികം ഗതാഗത നിയമലംഘനങ്ങൾ; പിടിയിലായത്…

Traffic Violations Kuwait കുവൈത്ത് സിറ്റി: രാജ്യത്തെ സുരക്ഷയും ഗതാഗത ക്രമീകരണങ്ങളും കർശനമാക്കുന്നതിന്റെ ഭാഗമായി ജനറൽ ട്രാഫിക് ഡിപ്പാർട്ട്‌മെന്റും എമർജൻസി പോലീസും നടത്തിയ തീവ്രമായ ഫീൽഡ് കാമ്പെയ്‌നുകളിൽ എട്ടു ദിവസത്തിനുള്ളിൽ 27,969 ഗതാഗത നിയമലംഘനങ്ങൾ പിടികൂടി. ജനുവരി 11 മുതൽ 17 വരെയുള്ള കാലയളവിലാണ് പരിശോധന നടന്നത്. ട്രാഫിക് വിഭാഗം മാത്രം 25,653 കേസുകൾ രജിസ്റ്റർ ചെയ്തു. ഇതിൽ 45 പേരെ തടങ്കലിലാക്കുകയും 25 പ്രായപൂർത്തിയാകാത്തവരെ പബ്ലിക് പ്രോസിക്യൂഷന് കൈമാറുകയും ചെയ്തു. മയക്കുമരുന്ന് കേസുകളിൽ ഉൾപ്പെട്ടവർ, കോടതി തിരയുന്ന പ്രതികൾ, താമസമരേഖ ഇല്ലാത്തവർ എന്നിവരടക്കം നിരവധി പേർ പിടിയിലായി. 58 പേർ താമസ നിയമം ലംഘിച്ചതിനും 32 പേർ രേഖകളില്ലാതെ യാത്ര ചെയ്തതിനും അറസ്റ്റിലായി. നിയമലംഘനം നടത്തിയ 333 കാറുകളും 25 മോട്ടോർ സൈക്കിളുകളും അധികൃതർ കസ്റ്റഡിയിലെടുത്തു. കൂടാതെ കോടതി ഉത്തരവ് നിലവിലുള്ള നിരവധി വാഹനങ്ങളും പിടിച്ചെടുത്തു. ഇതേ കാലയളവിൽ 178 ഗുരുതരമായ അപകടങ്ങളും 1,200 ചെറിയ കൂട്ടിയിടികളും ഉൾപ്പെടെയുള്ള ഗതാഗത റിപ്പോർട്ടുകളിൽ പോലീസ് നടപടിയെടുത്തു. മയക്കുമരുന്ന് കടത്ത്, പൊതുസ്ഥലത്തെ അടിപിടി, ഹിറ്റ് ആൻഡ് റൺ കേസുകൾ തുടങ്ങിയവയിലും പോലീസ് ശക്തമായ ഇടപെടലുകൾ നടത്തി. രാജ്യത്തെ നിയമവാഴ്ച ഉറപ്പാക്കാൻ വരും ദിവസങ്ങളിലും പരിശോധനകൾ തുടരുമെന്ന് ആഭ്യന്തര മന്ത്രാലയം അറിയിച്ചു.

കുവൈത്തിൽ യുവതിയെ കൊലപ്പെടുത്തി സ്യൂട്ട്കേസിലാക്കിയ കേസ്; പ്രതിയുടെ വധശിക്ഷ അപ്പീൽ കോടതി ശരിവെച്ചു

Suitcase Murder Kuwait കുവൈത്ത് സിറ്റി: റുമൈത്തിയയിൽ യുവതിയെ ശ്വാസം മുട്ടിച്ചു കൊലപ്പെടുത്തിയ ശേഷം മൃതദേഹം സ്യൂട്ട്കേസിലാക്കി രാജ്യം കടത്താൻ ശ്രമിച്ച പ്രതിക്ക് വിചാരണ കോടതി വിധിച്ച വധശിക്ഷ അപ്പീൽ കോടതി ശരിവെച്ചു. ജഡ്ജി അബ്ദുള്ള അൽ-ഒത്മാന്റെ നേതൃത്വത്തിലുള്ള ബെഞ്ചാണ് വധശിക്ഷ ശരിവെച്ചുകൊണ്ട് വിധി പുറപ്പെടുവിച്ചത്. പ്രോസിക്യൂഷൻ വാദമനുസരിച്ച്, പ്രതി ഇരയെ തടഞ്ഞുവെക്കുകയും ക്രൂരമായി കൊലപ്പെടുത്തുകയും ചെയ്തു. കൊലപാതകത്തിന് ശേഷം മൃതദേഹം ഒരു സ്യൂട്ട്കേസിനുള്ളിൽ ഒളിപ്പിച്ച് രാജ്യം വിടാനായിരുന്നു പ്രതിയുടെ ശ്രമം. പ്രതിക്ക് മാനസികരോഗങ്ങൾ ഒന്നുമില്ലെന്ന് മാനസികരോഗ വിദഗ്ധരുടെ മെഡിക്കൽ കമ്മിറ്റി റിപ്പോർട്ട് നൽകിയിരുന്നു. ഇത് പ്രതിഭാഗത്തിന്റെ വാദങ്ങളെ ദുർബലപ്പെടുത്തി. പ്രതിയെ “ഇരയുടെ നിഷ്കളങ്കതയെ നഖങ്ങൾ കൊണ്ട് മാന്തികീറിയ ചെന്നായ” എന്നാണ് പ്രോസിക്യൂട്ടർ ഫാരിസ് അൽ-ദബ്ബൂസ് കോടതിയിൽ വിശേഷിപ്പിച്ചത്. മനുഷ്യജീവന്റെ അവകാശത്തെ ഹനിച്ച പ്രതിക്ക് പരമാവധി ശിക്ഷ നൽകണമെന്ന് അദ്ദേഹം ആവശ്യപ്പെട്ടു. വിചാരണ കോടതി നേരത്തെ വധശിക്ഷയ്‌ക്കൊപ്പം മൃതദേഹത്തോടുള്ള അനാദരവ്, ലഹരിമരുന്ന് ഉപയോഗം, ഫോൺ ദുരുപയോഗം തുടങ്ങിയ കുറ്റങ്ങൾക്ക് എട്ട് വർഷം തടവും വിധിച്ചിരുന്നു. എന്നാൽ അപ്പീൽ കോടതി ഇത് ആസൂത്രിത കൊലപാതകമായി സ്ഥിരീകരിക്കുകയും വധശിക്ഷ നിലനിർത്തിക്കൊണ്ട് മറ്റു കുറ്റങ്ങൾക്കുള്ള തടവ് ആറ് വർഷമായി പരിഷ്കരിക്കുകയും ചെയ്തു. ഇരയുടെ കുടുംബത്തിന് വേണ്ടി ഹാജരായ അഭിഭാഷകൻ യൂസഫ് അൽ-അത്താർ, വധശിക്ഷ അന്തിമമായി നടപ്പിലാക്കുന്നത് വരെ നിയമപോരാട്ടം തുടരുമെന്ന് വ്യക്തമാക്കി.

കുവൈത്തിൽ നാല് സ്വകാര്യ ഫാർമസികളുടെ ലൈസൻസ് റദ്ദാക്കി; നിയമലംഘകർക്കെതിരെ കർശന നടപടി

kuwait Cancels Licenses Pharmacies കുവൈത്ത് സിറ്റി: ഫാർമസി തൊഴിൽ ചട്ടങ്ങളും മരുന്നുകൾ കൈകാര്യം ചെയ്യുന്നതിലെ നിബന്ധനകളും ലംഘിച്ച നാല് സ്വകാര്യ ഫാർമസികളുടെ ലൈസൻസ് ആരോഗ്യ മന്ത്രി ഡോ. അഹമ്മദ് അൽ-അവാദി റദ്ദാക്കി. പൊതുജനാരോഗ്യം സംരക്ഷിക്കുന്നതിനും ആരോഗ്യമേഖലയിലെ അച്ചടക്കം ഉറപ്പാക്കുന്നതിനുമുള്ള മന്ത്രാലയത്തിന്റെ കർശന നീക്കത്തിന്റെ ഭാഗമാണിത്. ഫാർമസികൾക്ക് ലൈസൻസ് നൽകുന്നതും മരുന്ന് വിതരണം നിയന്ത്രിക്കുന്നതും സംബന്ധിച്ച 2025-ലെ 237-ാം നമ്പർ മന്ത്രിതല തീരുമാനത്തിന്റെ അടിസ്ഥാനത്തിലാണ് ഈ നടപടി. സ്വകാര്യ ഫാർമസികളുടെ പ്രവർത്തനം നിരീക്ഷിക്കുന്നത് ഒരു തുടർച്ചയായ പ്രക്രിയയാണെന്നും എല്ലാ നിയമങ്ങളും പാലിച്ച് മാത്രമേ ഇവ പ്രവർത്തിക്കാവൂ എന്നും മന്ത്രാലയം വ്യക്തമാക്കി.  മരുന്നുകളുടെ ഗുണനിലവാരം ഉറപ്പാക്കുക, അവ സുരക്ഷിതമായി കൈകാര്യം ചെയ്യുന്നുണ്ടെന്ന് ഉറപ്പുവരുത്തുക, ആരോഗ്യ സംവിധാനത്തിലുള്ള പൊതുജനവിശ്വാസം വർദ്ധിപ്പിക്കുക എന്നിവയാണ് ഇത്തരം നടപടികളിലൂടെ ലക്ഷ്യമിടുന്നത്. രാജ്യത്തെ എല്ലാ മേഖലകളിലും ഫാർമസികളിൽ പരിശോധനകൾ തുടരുമെന്നും നിയമലംഘനങ്ങൾ കണ്ടെത്തിയാൽ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്നും ആരോഗ്യ മന്ത്രാലയം അറിയിച്ചു.