Kuwait Weather കുവൈത്ത് സിറ്റി: വരുന്ന വാരാന്ത്യത്തിൽ രാജ്യത്തിന്റെ വിവിധ ഭാഗങ്ങളിൽ മൂടൽമഞ്ഞിനും പകൽ സമയത്ത് ചൂടുള്ള കാലാവസ്ഥയ്ക്കും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. രാത്രികാലങ്ങളിൽ തണുപ്പ് അനുഭവപ്പെടുമെന്നും പ്രവചനമുണ്ട്. ഉപരിതലത്തിലെ ഉയർന്ന മർദ്ദവും ഈർപ്പമുള്ള ഉഷ്ണവായുവും കലർന്ന അന്തരീക്ഷസ്ഥിതിയാണ് രാജ്യത്ത് നിലനിൽക്കുന്നത്. കാറ്റിന്റെ ദിശ മാറിവരാൻ സാധ്യതയുണ്ടെന്നും മിതമായ വേഗതയിലാകും കാറ്റ് വീശുകയെന്നും റിപ്പോർട്ട് വ്യക്തമാക്കുന്നു. വ്യാഴാഴ്ച വൈകുന്നേരത്തോടെ അന്തരീക്ഷം തണുക്കും. ചിലയിടങ്ങളിൽ മൂടൽമഞ്ഞിന് സാധ്യതയുണ്ട്. കുറഞ്ഞ താപനില 12 മുതൽ 14 ഡിഗ്രി സെൽഷ്യസ് വരെയായിരിക്കും. കടൽ ശാന്തമായിരിക്കുമെങ്കിലും 1 മുതൽ 4 അടി വരെ ഉയരത്തിൽ തിരമാലകൾക്ക് സാധ്യതയുണ്ട്. കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയുവാൻ വാട്സ്ആപ്പ് ഗ്രൂപ്പിൽ ഇപ്പോൾ തന്നെ അംഗമാകൂ https://chat.whatsapp.com/LIFfag1qA2X0vkfobY76hr വെള്ളിയാഴ്ച പകൽ സമയത്ത് ചൂട് അനുഭവപ്പെടും (താപനില 25 – 27 ഡിഗ്രി സെൽഷ്യസ്). വൈകുന്നേരത്തോടെ നേരിയ മൂടൽമഞ്ഞ് അനുഭവപ്പെടാൻ സാധ്യതയുള്ളതിനാൽ കാഴ്ചപരിധി കുറഞ്ഞേക്കാം. രാത്രിയിൽ തണുപ്പ് കൂടും. ശനിയാഴ്ച പകൽ സമയത്ത് താപനില 26 മുതൽ 28 ഡിഗ്രി സെൽഷ്യസ് വരെ ഉയരാൻ സാധ്യതയുണ്ട്. വൈകുന്നേരത്തോടെ കുറഞ്ഞ താപനില 14 മുതൽ 16 ഡിഗ്രി സെൽഷ്യസ് വരെയായി കുറയും. കാറ്റിന്റെ വേഗത മണിക്കൂറിൽ 10 മുതൽ 32 കിലോമീറ്റർ വരെയാകാൻ സാധ്യതയുണ്ട്. വാരാന്ത്യത്തിൽ കടലിൽ പോകുന്നവർക്കും വാഹനമോടിക്കുന്നവർക്കും ജാഗ്രതാ നിർദ്ദേശം നൽകിയിട്ടുണ്ട്.
