Iran Gulf Attack കുവൈത്ത് സിറ്റി: തൊഴിലിടങ്ങളിൽ തൊഴിലാളികളുടെ ജീവനും സ്വത്തിനും സംരക്ഷണം ഉറപ്പാക്കുന്നതിനായി തൊഴിൽ സുരക്ഷാ മാനദണ്ഡങ്ങൾ കർശനമായി പാലിക്കണമെന്ന് പബ്ലിക് അതോറിറ്റി ഫോർ മാൻപവർ (PAM) നിർദ്ദേശിച്ചു. അടിയന്തര സാഹചര്യങ്ങളിൽ ദ്രുതഗതിയിലുള്ള പ്രതികരണം ഉറപ്പാക്കാനും അപകടസാധ്യതകൾ കുറയ്ക്കാനും ലക്ഷ്യമിട്ടാണ് അതോറിറ്റി പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചത്. തൊഴിലാളികളുടെ ആരോഗ്യവും സുരക്ഷയും ഉറപ്പാക്കുന്നത് അതോറിറ്റിയുടെ മുഖ്യ ഉത്തരവാദിത്തമാണെന്ന് വ്യക്തമാക്കിയ PAM, ഉടമകളും ജീവനക്കാരും താഴെ പറയുന്ന നിർദ്ദേശങ്ങൾ പാലിക്കണമെന്ന് അഭ്യർത്ഥിച്ചു. അപായ സൂചന നൽകുന്ന സൈറണുകളോ ഔദ്യോഗിക മുന്നറിയിപ്പുകളോ ലഭിച്ചാലുടൻ ജോലി നിർത്തിവെക്കണം. ഊർജ്ജ-എണ്ണ മേഖലകളിലെ അതീവ സുരക്ഷാ കേന്ദ്രങ്ങൾ സിവിൽ ഡിഫൻസുമായി ഏകോപിപ്പിച്ച് നിർദ്ദേശങ്ങൾ പാലിക്കണം. കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയുവാൻ വാട്സ്ആപ്പ് ഗ്രൂപ്പിൽ ഇപ്പോൾ തന്നെ അംഗമാകൂ https://chat.whatsapp.com/LIFfag1qA2X0vkfobY76hr സ്ഥാപനങ്ങളിൽ മുൻകൂട്ടി നിശ്ചയിച്ചിട്ടുള്ള ‘ഇവാക്യുവേഷൻ പ്ലാൻ’ കൃത്യമായും ചിട്ടയായും നടപ്പിലാക്കണം. സുരക്ഷിത സ്ഥാനങ്ങളിലേക്ക് മാറുന്നതിന് മുൻപ് സിവിൽ ഡിഫൻസിന്റെ നിർദ്ദേശങ്ങൾ തേടേണ്ടതാണ്. അടിയന്തര സാഹചര്യങ്ങളിൽ ലിഫ്റ്റുകൾ ഉപയോഗിക്കരുത്. എമർജൻസി എക്സിറ്റുകൾ വഴി മാത്രം പുറത്തുകടക്കുക. അടിയന്തര സേവന വിഭാഗങ്ങളെയും ബന്ധപ്പെട്ട ഔദ്യോഗിക സ്ഥാപനങ്ങളെയും വിവരമറിയിക്കുകയും അവരുടെ നിർദ്ദേശങ്ങൾ പിന്തുടരുകയും വേണം. പരിഭ്രാന്തി ഒഴിവാക്കാനും എല്ലാവരുടെയും സുരക്ഷ ഉറപ്പാക്കാനും സുരക്ഷാ ഉദ്യോഗസ്ഥരുമായി പൂർണ്ണമായും സഹകരിക്കുക. സ്ഥാപനങ്ങളിലെ അടിയന്തര പ്ലാനുകൾ കൃത്യമായ ഇടവേളകളിൽ പുനഃപരിശോധിക്കണമെന്ന് അതോറിറ്റി അറിയിച്ചു. അലാറം സംവിധാനങ്ങൾ പ്രവർത്തനക്ഷമമാണെന്ന് ഉറപ്പുവരുത്തുകയും തൊഴിലാളികൾക്ക് കൃത്യമായ ഇടവേളകളിൽ മോക് ഡ്രില്ലുകൾ നൽകി ബോധവൽക്കരിക്കുകയും വേണം.

കുവൈത്തിലെ പുതിയ ജോലി അവസരങ്ങൾക്കായി ഇവിടെ ക്ലിക്ക് ചെയ്യാം

കുവൈത്തിലെ റിഫൈനറിയിൽ വിമാനാവശിഷ്ടങ്ങൾ വീണു: തൊഴിലാളികൾക്ക് പരിക്ക്

KNPC Refinery കുവൈത്ത് സിറ്റി: മിന അൽ അഹമ്മദി റിഫൈനറിയിൽ വിമാനാവശിഷ്ടങ്ങൾ വീണുണ്ടായ അപകടത്തിൽ രണ്ട് തൊഴിലാളികൾക്ക് നിസാര പരിക്കേറ്റതായി കുവൈത്ത് നാഷണൽ പെട്രോളിയം കമ്പനി (KNPC), കുവൈത്ത് ഇന്റഗ്രേറ്റഡ് പെട്രോളിയം ഇൻഡസ്ട്രീസ് കമ്പനി (KIPIC) എന്നിവയുടെ ഔദ്യോഗിക വക്താവ് ഘാനിം അൽ ഒതൈബി സ്ഥിരീകരിച്ചു. തിങ്കളാഴ്ച പുലർച്ചെയായിരുന്നു സംഭവം. സുരക്ഷാ പ്രോട്ടോക്കോളുകൾ അനുസരിച്ച് സംഭവസ്ഥലത്ത് അടിയന്തര നടപടികൾ സ്വീകരിച്ചതായും പരിക്കേറ്റവരെ ഉടൻ തന്നെ അദാൻ ആശുപത്രിയിൽ പ്രവേശിപ്പിച്ചതായും അദ്ദേഹം അറിയിച്ചു. പരിക്കേറ്റ തൊഴിലാളികൾ നിലവിൽ ആശുപത്രിയിൽ നിരീക്ഷണത്തിലാണ്. ഇവരുടെ ആരോഗ്യനില തൃപ്തികരമാണെന്ന് അധികൃതർ വ്യക്തമാക്കി. അപകടം റിഫൈനറിയുടെ ഉൽപാദനത്തെയോ ദൈനംദിന പ്രവർത്തനങ്ങളെയോ ബാധിച്ചിട്ടില്ല. മിന അൽ അഹമ്മദി റിഫൈനറി പൂർണ്ണ ശേഷിയിൽ തന്നെ പ്രവർത്തനം തുടരുകയാണ്. അടിയന്തര പ്രതികരണ സേന ഉടൻ തന്നെ രംഗത്തെത്തുകയും ആവശ്യമായ എല്ലാ മുൻകരുതലുകളും സ്വീകരിക്കുകയും ചെയ്തു. പ്ലാന്റിന് മറ്റ് ഭൗതിക നാശനഷ്ടങ്ങൾ ഒന്നും സംഭവിച്ചിട്ടില്ല. തൊഴിലാളികളുടെ സുരക്ഷയ്ക്കാണ് പ്രഥമ പരിഗണനയെന്നും വിമാനാവശിഷ്ടങ്ങൾ വീണ സാഹചര്യം വിശദമായി പരിശോധിച്ചു വരികയാണെന്നും ഘാനിം അൽ ഒതൈബി കൂട്ടിച്ചേർത്തു.

അരാംകോ ലക്ഷ്യം വച്ച് ഇറാൻ; യുദ്ധം പുതിയ തലത്തിലേക്ക്

Iran targets Aramco refinery റിയാദ്: പശ്ചിമേഷ്യൻ സംഘർഷം പുതിയ തലങ്ങളിലേക്ക് കടക്കുന്നു. സൗദി അറേബ്യയിലെ പ്രമുഖ എണ്ണക്കമ്പനിയായ അരാംകോയുടെ റാസ് ടാനുറ റിഫൈനറിക്ക് നേരെ ഇറാന്റെ ഡ്രോൺ ആക്രമണം ഉണ്ടായി. യുദ്ധം മുറുകുന്നതിനിടെ ഗൾഫ് മേഖലയിലെ തന്ത്രപ്രധാന കേന്ദ്രങ്ങൾ ലക്ഷ്യമിട്ടുള്ള ആക്രമണങ്ങൾ വർധിക്കുന്നത് ആഗോളതലത്തിൽ വലിയ ആശങ്കയുണ്ടാക്കുന്നു. ഇറാൻ നിർമ്മിത ഷഹീദ്-136 ഡ്രോണുകൾ ഉപയോഗിച്ചാണ് ആക്രമണം നടത്തിയതെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. ആക്രമണത്തിന് പിന്നാലെ റിഫൈനറിയിൽ തീപിടിത്തമുണ്ടായെങ്കിലും സ്ഥിതിഗതികൾ നിയന്ത്രണവിധേയമാണെന്ന് സൗദി അധികൃതർ അറിയിച്ചു. റാസ് ടാനുറയിൽ ഡ്രോൺ പതിച്ചതിനെത്തുടർന്ന് പുക ഉയരുന്ന ദൃശ്യങ്ങൾ പുറത്തുവന്നു. എന്നാൽ വലിയ തോതിലുള്ള നാശനഷ്ടങ്ങളോ ആളപായമോ റിപ്പോർട്ട് ചെയ്തിട്ടില്ല. ആക്രമണം നടത്തിയത് ഹൂതികളാണെന്നും സൂചനയുണ്ട്. കുവൈത്തിലെ യുഎസ് എംബസി, ദുബായ്, അബുദാബി, ദോഹ, ബഹ്‌റൈൻ എന്നിവിടങ്ങളിൽ ഇറാൻ കടുത്ത ആക്രമണം അഴിച്ചുവിട്ടു. അമേരിക്കയുടെ എഫ്-15 ഈഗിൾ യുദ്ധവിമാനം വെടിവെച്ച് വീഴ്ത്തിയതായി ഇറാൻ അവകാശപ്പെടുകയും ഇതിന്റെ ദൃശ്യങ്ങൾ പുറത്തുവിടുകയും ചെയ്തു. ഇറാന്റെ നീക്കങ്ങൾക്കെതിരെ അമേരിക്കയ്ക്കൊപ്പം അണിചേരുമെന്ന് ഫ്രാൻസും ജർമ്മനിയും വ്യക്തമാക്കിയിട്ടുണ്ട്. ഇറാന്റെ ആക്രമണങ്ങളെ അപലപിച്ച് സൗദി അറേബ്യ, യുഎഇ, ഖത്തർ, ബഹ്‌റൈൻ, ജോർദാൻ എന്നീ രാജ്യങ്ങൾ സംയുക്ത പ്രസ്താവനയിറക്കി. ജിസിസി വിദേശകാര്യമന്ത്രിമാർ അടിയന്തര യോഗം ചേർന്ന് ഇറാന് ശക്തമായ തിരിച്ചടി നൽകുമെന്ന സൂചന നൽകി. മേഖലയിലെ സമാധാനം വീണ്ടെടുക്കുന്നതിനായി ഒമാന്റെ നേതൃത്വത്തിൽ വീണ്ടും മധ്യസ്ഥ ചർച്ചകൾക്ക് നീക്കം തുടങ്ങിയിട്ടുണ്ട്.

അമേരിക്കയുമായി ചർച്ചയ്ക്കില്ലെന്ന് ഇറാൻ; 500 ലധികം യുഎസ് സൈനികരെ വധിച്ചെന്ന് അവകാശവാദം

Iran US ടെഹ്‌റാൻ/വാഷിംഗ്ടൺ: പശ്ചിമേഷ്യൻ യുദ്ധം കൊടുമ്പിരിക്കൊള്ളുന്നതിനിടെ അമേരിക്കയുമായുള്ള ചർച്ചാ വാർത്തകൾ തള്ളി ഇറാൻ. ചർച്ചയ്ക്ക് തയ്യാറാണെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ അവകാശവാദത്തെ ഇറാന്റെ സുരക്ഷാ മേധാവി അലി ലറിജാനി പൂർണ്ണമായും നിരസിച്ചു. ഇരുപക്ഷവും അവകാശപ്പെടുന്ന മരണസംഖ്യയിലെ വൈരുദ്ധ്യവും ആശുപത്രികൾക്ക് നേരെയുള്ള ആക്രമണവും സാഹചര്യം കൂടുതൽ വഷളാക്കുന്നു. ട്രംപിന്റെ സമാധാന ചർച്ചാ വാഗ്ദാനങ്ങൾ വെറും പ്രചാരണം മാത്രമാണെന്നും അമേരിക്കയുമായി ഒരു തരത്തിലുള്ള ഒത്തുതീർപ്പിനുമില്ലെന്നുമാണ് ഇറാന്റെ നിലപാട്. ഖമനയിയുടെ കൊലപാതകത്തിന് പ്രതികാരം ചെയ്യുമെന്ന ഉറച്ച തീരുമാനത്തിലാണ് രാജ്യം. യുദ്ധക്കളത്തിലെ നാശനഷ്ടങ്ങളെക്കുറിച്ച് ഇരുരാജ്യങ്ങളും പുറത്തുവിടുന്ന വിവരങ്ങളിൽ വലിയ അന്തരമുണ്ട്. ഇറാന്റെ സൈനിക ആസ്ഥാനവും ഏഴ് നാവിക കപ്പലുകളും തകർത്തു. ഇറാൻ നടത്തിയ തിരിച്ചടിയിൽ 3 അമേരിക്കൻ സൈനികർ കൊല്ലപ്പെട്ടു. ചർച്ചയ്ക്കായി ഇറാൻ തന്നെ സമീപിച്ചെങ്കിലും സമയം വൈകിപ്പോയെന്നും ട്രംപ് അവകാശപ്പെട്ടു. കുവൈത്തിലെ അമേരിക്കൻ സൈനികത്താവളം പൂർണ്ണമായും നശിപ്പിച്ചു. 560 അമേരിക്കൻ സൈനികരെ വധിച്ചതായും ബഹ്‌റൈനിലെ യുഎസ് താവളത്തിൽ കനത്ത നാശനഷ്ടങ്ങൾ വരുത്തിയതായും ഇറാൻ കമാൻഡർ അവകാശപ്പെട്ടു. ദുബായ് വിമാനത്താവളം, ബുർജ് ഖലീഫ, ഖത്തറിലെയും കുവൈത്തിലെയും അമേരിക്കൻ സൈനിക താവളങ്ങൾ എന്നിവിടങ്ങളിലേക്ക് ഇറാൻ ആക്രമണം വ്യാപിപ്പിച്ചു. ലെബനനിൽ ഹിസ്ബുല്ലയെ ഉപയോഗിച്ചും ഇറാൻ പ്രതിരോധം തുടരുന്നു. ടെഹ്‌റാനിലെ ഒരു ആശുപത്രിക്ക് നേരെ ഇസ്രയേൽ നടത്തിയ ആക്രമണം ആഗോളതലത്തിൽ പ്രതിഷേധത്തിന് കാരണമായിട്ടുണ്ട്. ആക്രമണത്തിൽ കനത്ത നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. ആശുപത്രികൾക്ക് നേരെ നടത്തുന്ന ആക്രമണങ്ങൾ അങ്ങേയറ്റം അപലപനീയമാണെന്ന് ലോകാരോഗ്യ സംഘടന (WHO) പ്രതികരിച്ചു. യുദ്ധസാഹചര്യത്തിലും ആരോഗ്യ കേന്ദ്രങ്ങളെയും സിവിലിയന്മാരെയും ആക്രമണങ്ങളിൽ നിന്ന് ഒഴിവാക്കണമെന്ന് സംഘടന അഭ്യർത്ഥിച്ചു.

കുവൈത്തിൽ യുദ്ധവിമാനം തകർന്നുവീണു; ലെബനനിൽ ഇസ്രയേൽ ആക്രമണം കടുപ്പിക്കുന്നു

Warplane crashes Kuwait കുവൈത്ത് സിറ്റി/ബെയ്റൂട്ട്: പശ്ചിമേഷ്യൻ യുദ്ധം കൂടുതൽ സങ്കീർണ്ണമാകുന്നു. കുവൈത്ത് വ്യോമാതിർത്തിയിൽ അമേരിക്കൻ യുദ്ധവിമാനം തകർന്നുവീണതും ലെബനനിൽ ഇസ്രയേൽ നടത്തിയ രൂക്ഷമായ വ്യോമാക്രമണവുമാണ് മേഖലയെ വീണ്ടും മുനയിൽ നിർത്തുന്നത്. സ്വന്തം പ്രതിരോധ സംവിധാനത്തിൽ നിന്നുള്ള മിസൈൽ ഏറ്റാണ് അമേരിക്കൻ വിമാനം തകർന്നതെന്ന സൂചനകൾ പുറത്തുവരുന്നത് സൈനിക വൃത്തങ്ങളിൽ വലിയ ചർച്ചയായിട്ടുണ്ട്. കുവൈത്ത് വ്യോമാതിർത്തിയിൽ അമേരിക്കൻ എഫ്-15 (F-15) യുദ്ധവിമാനമാണ് തകർന്നത്. പാട്രിയറ്റ് എയർ ഡിഫൻസ് സിസ്റ്റത്തിൽ നിന്നുള്ള മിസൈൽ അബദ്ധത്തിൽ വിമാനത്തിൽ പതിച്ചതായാണ് പ്രാഥമിക നിഗമനം. വിമാനത്തിന്റെ അവശിഷ്ടങ്ങൾ മിന അൽ അഹമ്മദി റിഫൈനറിക്ക് ഉള്ളിലാണ് വീണത്. അപകടത്തിൽ രണ്ട് തൊഴിലാളികൾക്ക് പരിക്കേറ്റു. വിമാനം തകരുന്നതിന് തൊട്ടുമുൻപ് പൈലറ്റ് പാരച്യൂട്ട് വഴി പുറത്തുകടന്നതായി റിപ്പോർട്ടുകളുണ്ടെങ്കിലും ഔദ്യോഗിക സ്ഥിരീകരണം വരാനിരിക്കുന്നതേയുള്ളൂ. ഹിസ്ബുല്ലയുടെ റോക്കറ്റ് ആക്രമണത്തിന് പിന്നാലെ ബെയ്റൂട്ടിന്റെ തെക്കൻ പ്രാന്തപ്രദേശങ്ങളിലും തെക്കൻ ലെബനനിലും ഇസ്രയേൽ രൂക്ഷമായ വ്യോമാക്രമണം നടത്തി. ആക്രമണങ്ങളിൽ ഇതുവരെ 31 പേർ കൊല്ലപ്പെടുകയും 149 പേർക്ക് പരിക്കേൽക്കുകയും ചെയ്തതായി ലെബനൻ ആരോഗ്യ മന്ത്രാലയം സ്ഥിരീകരിച്ചു. ഇസ്രയേലിന്റെ മുന്നറിയിപ്പിനെത്തുടർന്ന് തെക്കൻ ലെബനനിൽ നിന്ന് ലക്ഷക്കണക്കിന് ആളുകളാണ് സുരക്ഷിത സ്ഥാനങ്ങളിലേക്ക് മാറുന്നത്. ഇറാനെതിരായ സൈനിക നടപടി നാലാഴ്ചയോളം നീണ്ടുനിന്നേക്കാമെന്ന് യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കി. “ഇതൊരു വലിയ രാജ്യമാണ്, നടപടികൾ പൂർത്തിയാക്കാൻ നാലാഴ്ചയോ അതിൽ കുറവോ സമയം വേണ്ടിവരും,” ട്രംപ് ഡെയ്‌ലി മെയിലിനോട് പറഞ്ഞു. ചർച്ചകൾക്ക് ഇറാൻ താല്പര്യം പ്രകടിപ്പിച്ചെങ്കിലും സമയം അതിക്രമിച്ചു പോയെന്ന നിലപാടിലാണ് ട്രംപ്.

യുഎസിന് സൈനിക താവളങ്ങൾ തുറന്നുനൽകി ബ്രിട്ടൻ; പശ്ചിമേഷ്യൻ സംഘർഷത്തിൽ നിർണ്ണായക നീക്കം

britain gives up military bases ലണ്ടൻ: പശ്ചിമേഷ്യയിലെ സംഘർഷം രൂക്ഷമാകുന്നതിനിടെ, ഇറാന്റെ മിസൈൽ ആക്രമണങ്ങളെ പ്രതിരോധിക്കാൻ അമേരിക്കയ്ക്ക് തങ്ങളുടെ സൈനിക താവളങ്ങൾ വിട്ടുനൽകുമെന്ന് ബ്രിട്ടൻ പ്രഖ്യാപിച്ചു. സഖ്യകക്ഷികളുടെ കൂട്ടായ സുരക്ഷയും അന്താരാഷ്ട്ര നിയമങ്ങളും മുൻനിർത്തിയാണ് ഈ തീരുമാനമെന്ന് ബ്രിട്ടീഷ് പ്രധാനമന്ത്രി കിയർ സ്റ്റാമർ വ്യക്തമാക്കി. മിസൈലുകളെ അവയുടെ ഉറവിടത്തിൽ തന്നെ തടയുക എന്ന പരിമിതമായ പ്രതിരോധ ലക്ഷ്യത്തോടെയാണ് ഈ അനുമതിയെന്നും, ഇറാനെതിരായ നേരിട്ടുള്ള ആക്രമണങ്ങളിൽ യുകെ പങ്കാളിയല്ലെന്നും അദ്ദേഹം കൂട്ടിച്ചേർത്തു. മേഖലയിലുടനീളം ഇറാൻ തൊടുത്തുവിടുന്ന മിസൈലുകൾ സാധാരണക്കാരുടെ ജീവന് ഭീഷണിയാണെന്നും, ലോഞ്ചറുകൾ നശിപ്പിക്കുന്നത് വഴി ഈ ഭീഷണി ഇല്ലാതാക്കാനാണ് താവളങ്ങൾ ഉപയോഗിക്കാൻ യുഎസിനെ അനുവദിച്ചതെന്നും സ്റ്റാമർ പറഞ്ഞു. സഖ്യകക്ഷികളെയും പൗരന്മാരെയും സംരക്ഷിക്കാൻ ബ്രിട്ടീഷ് വിമാനങ്ങൾ ആകാശത്തുണ്ടെന്നും ഇറാന്റെ ചില ആക്രമണങ്ങളെ വിജയകരമായി തടഞ്ഞതായും അദ്ദേഹം അവകാശപ്പെട്ടു. നിലവിൽ പശ്ചിമേഷ്യയിലുള്ള ഏകദേശം രണ്ട് ലക്ഷത്തോളം ബ്രിട്ടീഷ് പൗരന്മാരുടെ സുരക്ഷ ഉറപ്പാക്കുക എന്നത് സർക്കാരിന്റെ കടമയാണെന്ന് പ്രധാനമന്ത്രി ഓർമ്മിപ്പിച്ചു. വിമാനത്താവളങ്ങളെയും ഹോട്ടലുകളെയും ലക്ഷ്യം വെച്ചുള്ള ഇറാന്റെ നീക്കങ്ങൾ അശ്രദ്ധമാണെന്നും അദ്ദേഹം കുറ്റപ്പെടുത്തി. ഇറാൻ വിവേചനരഹിതമായ രീതിയിലാണ് ആക്രമണം നടത്തുന്നതെന്ന് യുകെ, ഫ്രാൻസ്, ജർമ്മനി എന്നീ രാജ്യങ്ങൾ സംയുക്ത പ്രസ്താവനയിൽ ആരോപിച്ചു. ഇറാനെതിരായ യുഎസ്-ഇസ്രയേൽ ആക്രമണങ്ങളുടെ നിയമസാധുതയെക്കുറിച്ചുള്ള ചോദ്യങ്ങളിൽ നിന്ന് ബ്രിട്ടീഷ് സർക്കാർ ഒഴിഞ്ഞുമാറി. എന്നിരുന്നാലും, പ്രതിരോധ കാര്യങ്ങളിൽ സഖ്യകക്ഷികൾക്കൊപ്പം ഉറച്ചുനിൽക്കുമെന്നാണ് ലണ്ടന്റെ നിലപാട്.

കുവൈത്തിൽ ഭക്ഷ്യവസ്തുക്കൾക്ക് വിലനിയന്ത്രണം; വില പരമാവധി പരിധിയായി നിശ്ചയിച്ചു

Kuwait Maximum Prices Food കുവൈത്ത് സിറ്റി: വിപണി നിയന്ത്രിക്കുന്നതിനും ഉപഭോക്താക്കളുടെ താൽപ്പര്യം സംരക്ഷിക്കുന്നതിനുമായി എല്ലാത്തരം ഭക്ഷ്യവസ്തുക്കൾക്കും പരമാവധി വില നിശ്ചയിച്ചുകൊണ്ട് വാണിജ്യ വ്യവസായ മന്ത്രി ഒസാമ ബൂദായ് ഉത്തരവിറക്കി. അന്യായമായ വിലക്കയറ്റം തടയുന്നതിനും വിപണിയിൽ സ്ഥിരത ഉറപ്പാക്കുന്നതിനുമുള്ള മന്ത്രാലയത്തിന്റെ ശ്രമങ്ങളുടെ ഭാഗമായാണ് ഈ നടപടി. പൊതുജനങ്ങൾക്ക് വിൽക്കുന്ന എല്ലാ ഭക്ഷ്യവസ്തുക്കളുടെയും ഫെബ്രുവരി 28-ന് മുൻപുള്ള വിലയായിരിക്കും ഇനി മുതൽ അനുവദനീയമായ പരമാവധി വിലയെന്ന് ഉത്തരവിൽ വ്യക്തമാക്കുന്നു. ഫെബ്രുവരി 28-ന് മുൻപ് നിലനിന്നിരുന്ന വിലയേക്കാൾ കൂടുതൽ ഈടാക്കാൻ പാടില്ല. ഈ പരിധിയിൽ കൂടുതൽ വില വർദ്ധിപ്പിക്കണമെങ്കിൽ വാണിജ്യ മന്ത്രിയുടെ പ്രത്യേക അനുമതി ആവശ്യമാണ്. ഈ ഉത്തരവ് ലംഘിക്കുന്നവർക്കെതിരെ 1979-ലെ പത്താം നമ്പർ നിയമപ്രകാരം കർശനമായ പിഴയും നിയമനടപടികളും സ്വീകരിക്കും. വിപണി നിരീക്ഷണം ശക്തമാക്കുന്നതിന്റെ ഭാഗമായാണ് ഈ നടപടി. ഉത്തരവ് പുറപ്പെടുവിച്ച് ഒരു മാസത്തിന് ശേഷം ഇത് പ്രാബല്യത്തിൽ വരും. ഔദ്യോഗിക ഗസറ്റിൽ പ്രസിദ്ധീകരിക്കുന്നതോടെ ബന്ധപ്പെട്ട അധികൃതർ നിയമം നടപ്പിലാക്കുന്നതിനുള്ള നടപടികൾ തുടങ്ങും. വിപണിയിലെ വിലനിലവാരം സർക്കാർ സൂക്ഷ്മമായി നിരീക്ഷിച്ചുവരികയാണെന്നും ഉപഭോക്താക്കളുടെ ക്രയശേഷി സംരക്ഷിക്കുമെന്നും മന്ത്രി അറിയിച്ചു. 

അനധികൃതമദ്യം പ്ലാസ്റ്റിക് കുപ്പികളിലാക്കി വില്‍പ്പന, പ്രവാസിയെ കൈയോടെ പിടികൂടി കുവൈത്ത് പോലീസ്

Selling Liquor Arrest കുവൈത്തിലെ ഹവല്ലിയിൽ അനധികൃത മദ്യവില്പനയ്‌ക്കെതിരെ പോലീസ് നടത്തിയ നീക്കത്തിൽ ഒരു ഏഷ്യൻ സ്വദേശി പിടിയിലായി. രഹസ്യവിവരത്തിന്റെ അടിസ്ഥാനത്തിൽ ഹവല്ലി പട്രോളിംഗ് സംഘം നടത്തിയ മിന്നൽ പരിശോധനയിലാണ് ഇയാൾ വലയിലായത്. പ്രതി മദ്യം വിതരണം ചെയ്യുന്നതിനിടെയാണ് സുരക്ഷാ സേന പിടികൂടിയത്. ഇയാളിൽ നിന്ന് പ്രാദേശികമായി നിർമ്മിച്ച മദ്യം അടങ്ങിയ 35 പ്ലാസ്റ്റിക് കുപ്പികൾ പിടിച്ചെടുത്തു. പ്രതിയുടെ അനധികൃത മദ്യവ്യാപാരത്തെക്കുറിച്ച് പോലീസിന് നേരത്തെ വിവരം ലഭിച്ചിരുന്നു. തുടർന്ന് ഒരു രഹസ്യ ഏജന്റ് ഇയാളെ നിരീക്ഷിച്ചു വരികയായിരുന്നു. ഹവല്ലിയിലെ ഒരു വിതരണ കേന്ദ്രത്തിൽ വെച്ച് മദ്യം കൈമാറുന്നതിനിടെയാണ് പോലീസ് സംഘം ഇയാളെ വളഞ്ഞത്. യാതൊരു പ്രതിരോധത്തിനും മുതിരാതെ പ്രതി കീഴടങ്ങിയതായി അധികൃതർ അറിയിച്ചു. തുടർനടപടികൾ: മദ്യം നിർമ്മിക്കുന്ന പ്രധാന കേന്ദ്രത്തെക്കുറിച്ചുള്ള വിവരങ്ങൾ ഇയാളിൽ നിന്ന് ലഭിക്കുമെന്നാണ് പോലീസ് കരുതുന്നത്. ഇത്തരത്തിലുള്ള അനധികൃത നിർമ്മാണ കേന്ദ്രങ്ങൾ കണ്ടെത്താനായി വരും ദിവസങ്ങളിൽ റെയ്ഡുകൾ തുടരുമെന്ന് അധികൃതർ വ്യക്തമാക്കി.

കുവൈത്തിൽ ഗതാഗതനിയമം ലംഘിച്ച് അശ്രദ്ധമായ ഡ്രൈവിങ്; പ്രതി കൊടുംക്രിമിനൽ

Traffic Violation Arrest Kuwait കുവൈത്ത് സിറ്റി: കുവൈത്തിലെ ഹവല്ലി സെക്യൂരിറ്റി ഡയറക്ടറേറ്റിൽ നിന്നുള്ള പോലീസ് ഉദ്യോഗസ്ഥർ, ക്രിമിനൽ പശ്ചാത്തലമുള്ള നാൽപ്പതുകാരനായ സ്വദേശി പൗരനെ അറസ്റ്റ് ചെയ്തു. ഇയാൾക്ക് കോടതി നേരത്തെ തടവുശിക്ഷ വിധിച്ചിരുന്നതായും പോലീസ് കണ്ടെത്തി. സൽമിയ മേഖലയിൽ അശ്രദ്ധമായ രീതിയിൽ വാഹനമോടിക്കുന്നത് ശ്രദ്ധയിൽപ്പെട്ട പട്രോളിംഗ് സംഘം വാഹനം തടയുകയായിരുന്നു. തുടർന്നുള്ള പരിശോധനയിലാണ് പിടിക്കപ്പെട്ടയാൾ കുപ്രസിദ്ധ കുറ്റവാളിയാണെന്ന് വ്യക്തമായത്. സൽമിയയിൽ ഗതാഗത നിയമങ്ങൾ ലംഘിച്ച് വാഹനം ഓടിച്ചതിനാണ് ഇയാളെ പോലീസ് തടഞ്ഞത്. ഡ്രൈവർക്കെതിരെ മുൻപ് നടന്ന ഒരു ക്രിമിനൽ കേസിൽ കോടതി തടവുശിക്ഷ വിധിച്ചിരുന്നു. എന്നാൽ ശിക്ഷ അനുഭവിക്കാതെ ഒളിവിൽ കഴിയുകയായിരുന്നു ഇയാൾ. അറസ്റ്റ് ചെയ്ത പ്രതിയെ തടവുശിക്ഷ നടപ്പിലാക്കുന്നതിനായി ‘ജനറൽ ഡിപ്പാർട്ട്‌മെന്റ് ഫോർ ദി എക്സിക്യൂഷൻ ഓഫ് ജഡ്ജ്‌മെന്റ്‌സിന്’ കൈമാറിയതായി അധികൃതർ സ്ഥിരീകരിച്ചു. 

ഇറാനെ ആക്രമിക്കാൻ സൗദി ട്രംപിനെ പ്രേരിപ്പിച്ചോ? വാഷിങ്ടൺ പോസ്റ്റ് റിപ്പോർട്ട് പുറത്ത്

Saudi Trump to attack Iran ഇറാൻ പരമോന്നത നേതാവ് ആയത്തുല്ല അലി ഖമനയി കൊല്ലപ്പെട്ടതിനും അതിനെത്തുടർന്നുണ്ടായ പ്രത്യാക്രമണങ്ങൾക്കും പിന്നാലെ മേഖലയിലെ രാഷ്ട്രീയ നീക്കങ്ങൾ സങ്കീർണ്ണമാകുന്നു. ഇറാനെ ആക്രമിക്കാൻ സൗദി അറേബ്യ അമേരിക്കയെ പ്രേരിപ്പിച്ചെന്ന വാഷിങ്ടൺ പോസ്റ്റ് റിപ്പോർട്ട് പശ്ചിമേഷ്യയിൽ പുതിയ ചർച്ചകൾക്ക് വഴിതുറന്നു. ഇറാനെതിരായ നീക്കത്തിൽ സൗദിയുടെ പങ്ക് സംബന്ധിച്ച ആരോപണങ്ങൾ പുറത്തുവരുമ്പോഴും, തങ്ങളുടെ വ്യോമാതിർത്തി ആക്രമണത്തിനായി വിട്ടുനൽകില്ലെന്ന മുൻനിലപാടിൽ ഉറച്ചുനിൽക്കുകയാണെന്ന് സൗദി വ്യക്തമാക്കുന്നു. സൗദി കിരീടാവകാശി മുഹമ്മദ് ബിൻ സൽമാനും യുഎസ് പ്രസിഡന്റ് ഡൊണാൾഡ് ട്രംപും തമ്മിൽ കഴിഞ്ഞ മാസം പലതവണ സ്വകാര്യ ഫോൺ കോളുകൾ വഴി ഇറാൻ വിഷയത്തിൽ ചർച്ച നടത്തിയെന്നാണ് റിപ്പോർട്ട്. എന്നാൽ ഇതിന് ഔദ്യോഗിക സ്ഥിരീകരണമില്ല. ജനുവരിയിൽ സൗദി രാജകുമാരൻ സ്വീകരിച്ച നിലപാടിന് വിരുദ്ധമാണ് ഈ റിപ്പോർട്ട്. ഇറാന്റെ പരമാധികാരത്തെ ബഹുമാനിക്കുന്നുവെന്നും ചർച്ചയിലൂടെ പ്രശ്നപരിഹാരം വേണമെന്നുമാണ് അദ്ദേഹം അന്ന് ആവശ്യപ്പെട്ടിരുന്നത്.  ശനിയാഴ്ച അമേരിക്കയും ഇസ്രയേലും ചേർന്ന് നടത്തിയ ആക്രമണത്തിന് പിന്നാലെ റിയാദ്, ദുബായ്, അബുദാബി, ദോഹ തുടങ്ങിയ ഗൾഫ് നഗരങ്ങളിൽ ഇറാൻ തിരിച്ചടിച്ചു. ഇറാന്റെ ആക്രമണം ‘ഭീരുത്വം നിറഞ്ഞതാണ്’ എന്ന് സൗദി വിദേശകാര്യ മന്ത്രാലയം പ്രതികരിച്ചു. സൗദി വ്യോമാതിർത്തി ആക്രമണത്തിനായി വിട്ടുനൽകില്ലെന്ന് അറിവുണ്ടായിട്ടും റിയാദിനെ ലക്ഷ്യം വെച്ചതിനെ ന്യായീകരിക്കാനാവില്ലെന്ന് ആഭ്യന്തര മന്ത്രാലയം വ്യക്തമാക്കി. മേഖലയുടെ സുരക്ഷ നിലനിർത്താൻ യുഎഇ, ഖത്തർ, കുവൈത്ത്, ബഹ്‌റൈൻ, ജോർദാൻ ഭരണാധികാരികളുമായി മുഹമ്മദ് ബിൻ സൽമാൻ ചർച്ച നടത്തി. ഞായറാഴ്ച പുലർച്ചെയാണ് ഖമനയി കൊല്ലപ്പെട്ട വിവരം ഇറാൻ ഔദ്യോഗികമായി സ്ഥിരീകരിച്ചത്. ഇതോടെ പശ്ചിമേഷ്യയിൽ അസ്ഥിരത വർധിക്കുമെന്ന ആശങ്ക ശക്തമായി. ഇറാൻ ജനതയ്ക്ക് അവരുടെ രാജ്യം തിരിച്ചുപിടിക്കാനുള്ള അവസരമാണ് ഇതിലൂടെ ലഭിച്ചതെന്ന് ഡൊണാൾഡ് ട്രംപ് പ്രതികരിച്ചു. എട്ട് മാസത്തിനിടെ രണ്ടാം തവണയാണ് ട്രംപ് ഭരണകൂടം ഇറാനെതിരെ സൈനിക നീക്കം നടത്തുന്നത്.