Iran Attack Kuwait കുവൈത്ത് സിറ്റി: രാജ്യത്ത് ഇറാൻ ആക്രമണത്തെത്തുടർന്നുണ്ടായ മിസൈൽ അവശിഷ്ടങ്ങൾ വീണ ഇടങ്ങളിൽ നിന്ന് പൊതുജനങ്ങൾ വിട്ടുനിൽക്കണമെന്ന് കുവൈത്ത് ആഭ്യന്തര മന്ത്രാലയം കർശന നിർദ്ദേശം നൽകി. ആക്രമണങ്ങളിൽ ഇതുവരെ ആരും കൊല്ലപ്പെട്ടിട്ടില്ലെന്നും വ്യാജവാർത്തകൾ പ്രചരിപ്പിക്കുന്നവർക്കെതിരെ കർശന നടപടി സ്വീകരിക്കുമെന്നും മന്ത്രാലയം മുന്നറിയിപ്പ് നൽകി. പ്രതിരോധ നടപടികളുടെ ഭാഗമായി മിസൈലുകൾ തകർക്കുമ്പോഴുണ്ടാകുന്ന അവശിഷ്ടങ്ങൾ വീടുകൾക്കും വാഹനങ്ങൾക്കും മുകളിൽ വീണതായി കഴിഞ്ഞ 24 മണിക്കൂറിനുള്ളിൽ 21 റിപ്പോർട്ടുകളാണ് ലഭിച്ചത്. പരിക്കുകൾ റിപ്പോർട്ട് ചെയ്തിട്ടുണ്ടെങ്കിലും ആർക്കും ജീവഹാനി സംഭവിച്ചിട്ടില്ലെന്ന് മന്ത്രാലയം വ്യക്തമാക്കി. മരണങ്ങൾ നടന്നുവെന്ന തരത്തിൽ സോഷ്യൽ മീഡിയയിൽ പ്രചരിക്കുന്ന വാർത്തകൾ അടിസ്ഥാനരഹിതമാണെന്ന് സുരക്ഷാ വിഭാഗം വക്താവ് ബ്രിഗേഡിയർ ജനറൽ നാസർ ബൂസ്‌ലൈബ് പറഞ്ഞു. ഇത്തരം കിംവദന്തികൾ പ്രചരിപ്പിക്കുന്ന വ്യക്തികളെയും അക്കൗണ്ടുകളെയും തിരിച്ചറിഞ്ഞിട്ടുണ്ടെന്നും അവർക്കെതിരെ നിയമനടപടി സ്വീകരിക്കുമെന്നും അദ്ദേഹം അറിയിച്ചു. ആക്രമണം തുടങ്ങിയത് മുതൽ ഇതുവരെ 699 സ്ഥലങ്ങളിൽ മിസൈൽ അവശിഷ്ടങ്ങൾ വീണതായി റിപ്പോർട്ട് ചെയ്യപ്പെട്ടിട്ടുണ്ട്. കഴിഞ്ഞ ഒരു ദിവസത്തിനുള്ളിൽ മാത്രം 7 തവണ മുന്നറിയിപ്പ് സൈറണുകൾ മുഴങ്ങി. ഇതുവരെ ആകെ 178 തവണയാണ് സൈറണുകൾ പ്രവർത്തിപ്പിച്ചത്. അവശിഷ്ടങ്ങൾ വീണ സ്ഥലങ്ങളിൽ ആളുകൾ തടിച്ചുകൂടുന്നത് രക്ഷാപ്രവർത്തനത്തെ ബാധിക്കുന്നുണ്ട്. അപരിചിതമായ വസ്തുക്കളിൽ തൊടാനോ അവ കൈകാര്യം ചെയ്യാനോ ശ്രമിക്കരുത്. സ്ഫോടകവസ്തു വിഭാഗത്തിന് സുരക്ഷിതമായി ജോലി ചെയ്യാൻ അവസരമൊരുക്കണമെന്ന് അധികൃതർ ആവശ്യപ്പെട്ടു. സ്‌പെഷ്യൽ ഫോഴ്‌സും മറ്റ് സുരക്ഷാ വിഭാഗങ്ങളും ഏകോപിതമായാണ് ഇത്തരം സാഹചര്യങ്ങൾ കൈകാര്യം ചെയ്യുന്നത്. പൊതുജനങ്ങളുടെ ജീവനും സ്വത്തിനും സംരക്ഷണം നൽകാൻ മന്ത്രാലയം സജ്ജമാണെന്നും ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും അധികൃതർ ഓർമ്മിപ്പിച്ചു. രാജ്യത്തിന്റെ സുരക്ഷയെ ബാധിക്കുന്ന തരത്തിലുള്ള തെറ്റായ വിവരങ്ങൾ പ്രചരിപ്പിക്കുന്നത് കുറ്റകരമാണ്.

കുവൈത്തിലെ പുതിയ ജോലി അവസരങ്ങൾക്കായി ഇവിടെ ക്ലിക്ക് ചെയ്യാം

ഇറാൻ ആക്രമണം നടന്ന സ്ഥലം പകർത്തിയവർക്കെതിരെ കർശന നടപടി; കുവൈത്തിൽ സുരക്ഷാ പരിശോധന ശക്തം

Filming Vital Site kuwait കുവൈത്ത് സിറ്റി: രാജ്യത്തെ തന്ത്രപ്രധാനമായ കേന്ദ്രത്തിന്റെ ദൃശ്യങ്ങൾ മൊബൈലിൽ പകർത്തിയ 29 പേരെ കുവൈറ്റ് സുരക്ഷാ ഉദ്യോഗസ്ഥർ പിടികൂടി. കഴിഞ്ഞ ദിവസം ഇറാൻ ആക്രമണത്തിന് ഇരയായ പ്രദേശം ചിത്രീകരിച്ചതിനാണ് 6 സ്വദേശികളും 23 പ്രവാസികളും ഉൾപ്പെടെയുള്ളവർക്കെതിരെ ആഭ്യന്തര മന്ത്രാലയം നിയമനടപടി സ്വീകരിച്ചത്. രാജ്യത്തെ സുരക്ഷാ സാഹചര്യങ്ങൾ കണക്കിലെടുത്ത് അതീവ ജാഗ്രത പുലർത്തുന്ന പ്രദേശങ്ങളിൽ ദൃശ്യങ്ങൾ പകർത്തുന്നത് കർശനമായി നിരോധിച്ചിട്ടുണ്ട്. നിയമലംഘകരെ കൂടുതൽ അന്വേഷണങ്ങൾക്കായി ബന്ധപ്പെട്ട വകുപ്പുകൾക്ക് കൈമാറി. കഴിഞ്ഞ വെള്ളിയാഴ്ച രാജ്യവ്യാപകമായി നടത്തിയ പരിശോധനകളിൽ വൻതോതിലുള്ള നിയമലംഘനങ്ങളാണ് കണ്ടെത്തിയത്: ആകെ 2,327 ഗതാഗത നിയമലംഘനങ്ങൾ റിപ്പോർട്ട് ചെയ്തു. ഇതിൽ ഡ്രൈവിങ്ങിനിടെ മൊബൈൽ ഫോൺ ഉപയോഗിച്ചതിന് 79 പേർക്കും, സീറ്റ് ബെൽറ്റ് ധരിക്കാത്തതിന് 44 പേർക്കും, നിയമവിരുദ്ധമായി ഗ്ലാസുകളിൽ കറുത്ത ഫിലിം ഒട്ടിച്ചതിന് 43 പേർക്കും പിഴ ചുമത്തി. റെസിഡൻസി നിയമങ്ങൾ ലംഘിച്ച് രാജ്യത്ത് കഴിഞ്ഞിരുന്ന 22 പ്രവാസികളെ അറസ്റ്റ് ചെയ്തു. വാറണ്ട് നിലവിലുള്ളവർ, ലൈസൻസില്ലാതെ വാഹനം ഓടിച്ചവർ, ലഹരി ഉപയോഗിച്ച നിലയിൽ കണ്ടെത്തിയവർ എന്നിവരെയും പരിശോധനയ്ക്കിടെ പിടികൂടിയിട്ടുണ്ട്. അടിയന്തര സാഹചര്യങ്ങളിൽ തന്ത്രപ്രധാനമായ ഇടങ്ങളുടെ ചിത്രങ്ങളോ വീഡിയോകളോ പകർത്തുന്നതും സോഷ്യൽ മീഡിയയിൽ പങ്കുവെക്കുന്നതും ഗുരുതരമായ കുറ്റമാണെന്ന് അധികൃതർ വീണ്ടും ഓർമ്മിപ്പിച്ചു. ഔദ്യോഗിക അറിയിപ്പുകൾക്കായി സർക്കാർ ചാനലുകളെ മാത്രം ആശ്രയിക്കണമെന്നും സുരക്ഷാ ഉദ്യോഗസ്ഥർ നിർദ്ദേശിച്ചു.

കുവൈത്തിലെ ഡ്രോൺ ആക്രമണത്തിൽ മരിച്ച തമിഴ്‌നാട് സ്വദേശിയുടെ കുടുംബത്തിന് ആശ്വാസം

Indian Killed in Kuwait കുവൈത്ത് സിറ്റി: പശ്ചിമേഷ്യൻ സംഘർഷത്തിനിടെ കുവൈത്തിൽ കൊല്ലപ്പെട്ട ഇന്ത്യൻ തൊഴിലാളിയുടെ കുടുംബത്തിന് താങ്ങായി പ്രമുഖ ഭക്ഷ്യ ഉൽപ്പന്ന സ്ഥാപനമായ അൽ തിഖ ഫുഡ് ഗ്രൂപ്പ്. ഡ്രോൺ ആക്രമണത്തിൽ മരിച്ച തമിഴ്‌നാട് സ്വദേശി സന്താനശെൽവം കൃഷ്ണന്റെ കുടുംബത്തിന് ഒരു വർഷത്തെ ശമ്പളം നൽകാൻ കമ്പനി തീരുമാനിച്ചു. സാമൂഹികവും മാനുഷികവുമായ പരിഗണന മുൻനിർത്തിയാണ് ഈ തീരുമാനമെന്നും ഇത് നടപ്പിലാക്കുന്നതിന് ആവശ്യമായ എല്ലാ അനുമതികളും ബന്ധപ്പെട്ട അധികാരികളിൽ നിന്ന് നേടിയതായും കമ്പനി അധികൃതർ വ്യക്തമാക്കി. കുവൈത്തിലെ അൽ ഷുഐബ പ്രദേശത്തുള്ള വൈദ്യുതി-ജല ശുദ്ധീകരണ ശാലയ്ക്ക് നേരെ കഴിഞ്ഞ ആഴ്ച നടന്ന ഡ്രോൺ ആക്രമണത്തിലാണ് സന്താനശെൽവം കൊല്ലപ്പെട്ടത്. തമിഴ്‌നാട്ടിലെ രാമനാഥപുരം സ്വദേശിയായ സന്താനശെൽവം (37) പ്ലാന്റിൽ ഇലക്ട്രീഷ്യനായി ജോലി ചെയ്തുവരികയായിരുന്നു. അപ്രതീക്ഷിത വിയോഗത്തിൽ തളർന്നുപോയ കുടുംബത്തിന്റെ സാമ്പത്തിക ഭദ്രത ഉറപ്പാക്കാൻ, അദ്ദേഹം വാങ്ങിയിരുന്ന ശമ്പളം ഒരു വർഷത്തേക്ക് കൂടി നൽകാനാണ് കമ്പനിയുടെ തീരുമാനം. തങ്ങളുടെ ജീവനക്കാരോടുള്ള പ്രതിബദ്ധതയുടെ ഭാഗമായാണ് ഈ സഹായമെന്ന് അൽ തിഖ ഫുഡ് ഗ്രൂപ്പ് അറിയിച്ചു. യുദ്ധസമാനമായ സാഹചര്യത്തിൽ ജോലി ചെയ്യുന്ന മറ്റ് പ്രവാസികൾക്കും ഈ തീരുമാനം വലിയൊരു ആത്മവിശ്വാസം പകരുന്നതാണ്.

കൊല്ലപ്പെട്ട ഇന്ത്യൻ തൊഴിലാളിയുടെ കുടുംബത്തിന് ഒരു വർഷത്തെ ശമ്പളം നൽകും; മാതൃകയായി കുവൈത്തിലെ അൽ തിഖ ഫുഡ് ഗ്രൂപ്പ്

Santhanaselvam Killed in Kuwait കുവൈത്ത് സിറ്റി: പശ്ചിമേഷ്യൻ സംഘർഷത്തിനിടെ കൊല്ലപ്പെട്ട ഇന്ത്യൻ തൊഴിലാളിയുടെ കുടുംബത്തിന് കൈത്താങ്ങുമായി കുവൈറ്റിലെ അൽ തിഖ ഫുഡ് ഗ്രൂപ്പ് കമ്പനി. കുവൈറ്റിലെ വൈദ്യുതി-ജല ശുദ്ധീകരണ പ്ലാന്റിന് നേരെയുണ്ടായ ഇറാൻ ആക്രമണത്തിൽ കൊല്ലപ്പെട്ട ഇലക്ട്രീഷ്യൻ ശാന്തനശെൽവം കൃഷ്ണന്റെ ശമ്പളം ഒരു വർഷത്തേക്ക് കൂടി അദ്ദേഹത്തിന്റെ കുടുംബത്തിന് നൽകുമെന്ന് കമ്പനി അറിയിച്ചു. തങ്ങളുടെ ജീവനക്കാരോടുള്ള സാമൂഹികവും മാനുഷികവുമായ പ്രതിബദ്ധതയുടെ ഭാഗമായാണ് ഈ തീരുമാനമെന്ന് കമ്പനി പ്രസ്താവനയിൽ വ്യക്തമാക്കി. ജോലിസ്ഥലത്തുണ്ടായ അപ്രതീക്ഷിത ആക്രമണത്തിലാണ് കൃഷ്ണന് ജീവൻ നഷ്ടമായത്. കൃഷ്ണൻ മരിച്ചെങ്കിലും അദ്ദേഹത്തിന്റെ കുടുംബത്തിന്റെ സാമ്പത്തിക ഭദ്രത ഉറപ്പാക്കാൻ നിലവിലുണ്ടായിരുന്ന ശമ്പളം ഒരു വർഷം കൂടി ഇന്ത്യയിലുള്ള അദ്ദേഹത്തിന്റെ കുടുംബത്തിന് നൽകാനാണ് കമ്പനിയുടെ തീരുമാനം. ഈ പദ്ധതി നടപ്പിലാക്കുന്നതിനായി ബന്ധപ്പെട്ട സർക്കാർ വകുപ്പുകളിൽ നിന്ന് ആവശ്യമായ എല്ലാ അനുമതികളും കമ്പനി വാങ്ങിക്കഴിഞ്ഞു. അപ്രതീക്ഷിത വിയോഗത്തിൽ തളർന്നുപോയ കുടുംബത്തിന് ഈ തീരുമാനം വലിയൊരു സാമ്പത്തിക ആശ്വാസമാകും. പശ്ചിമേഷ്യയിൽ തുടരുന്ന സംഘർഷത്തിനിടെ കുവൈറ്റിലെ തന്ത്രപ്രധാനമായ വൈദ്യുതി-ജല ശുദ്ധീകരണ പ്ലാന്റിന് നേരെ നടന്ന ഡ്രോൺ/മിസൈൽ ആക്രമണത്തിലാണ് ശാന്തനശെൽവം കൃഷ്ണൻ കൊല്ലപ്പെട്ടത്. നിരവധി പ്രവാസികൾ ജോലി ചെയ്യുന്ന മേഖലകളിൽ സുരക്ഷ ശക്തമാക്കണമെന്ന് ആവശ്യമുയരുന്ന സാഹചര്യത്തിൽ കൂടിയാണ് കമ്പനിയുടെ ഈ കരുതൽ ശ്രദ്ധേയമാകുന്നത്.

കുവൈത്തിൽ 10 ദിനാറിൽ കൂടുതൽ പണമിടപാടുകൾക്ക് വിലക്ക്; ഇവിടങ്ങളില്‍ കാർഡ് പേയ്മെന്റ് നിർബന്ധം

Kuwait Bans Cash Transactions കുവൈത്ത് സിറ്റി: സേവന മേഖലകളിൽ സുതാര്യത ഉറപ്പാക്കുന്നതിനും സാമ്പത്തിക ഇടപാടുകൾ നിരീക്ഷിക്കുന്നതിനുമായി നിർണ്ണായക തീരുമാനവുമായി കുവൈറ്റ് വാണിജ്യ വ്യവസായ മന്ത്രാലയം. 10 കുവൈത്ത് ദിനാറിൽ കൂടുതൽ തുകയുള്ള ഇടപാടുകൾക്ക് പണം നേരിട്ട് നൽകുന്നത് വിലക്കി വാണിജ്യ മന്ത്രി ഒസാമ ബൂദായ് ഉത്തരവിറക്കി. 2026-ലെ 32-ാം നമ്പർ മന്ത്രിതല തീരുമാനപ്രകാരം നിശ്ചിത സേവന മേഖലകളിൽ 10 ദിനാറിന് മുകളിലുള്ള എല്ലാ ഇടപാടുകളും ബാങ്ക് അക്കൗണ്ടുകൾ വഴിയോ അല്ലെങ്കിൽ കുവൈറ്റ് സെൻട്രൽ ബാങ്ക് അംഗീകരിച്ച ഇലക്ട്രോണിക് പേയ്മെന്റ് രീതികൾ (K-Net, Credit Card etc.) വഴിയോ മാത്രമേ നടത്താൻ പാടുള്ളൂ. പുരുഷന്മാരുടെയും സ്ത്രീകളുടെയും കുട്ടികളുടെയും സലൂണുകൾ,
ആരോഗ്യ-കായിക മേഖല: ഹെൽത്ത് ഇൻസ്റ്റിറ്റ്യൂട്ടുകൾ, സ്പോർട്സ് ക്ലബ്ബുകൾ, പെസ്റ്റ് കൺട്രോൾ (കീട നിയന്ത്രണ) സേവനങ്ങൾ, കീടനാശിനികൾ ഇറക്കുമതി ചെയ്യുകയോ സംഭരിക്കുകയോ ചെയ്യുന്ന സ്ഥാപനങ്ങൾ എന്നിവിടങ്ങളാണ് നിയമം ബാധകമായ മേഖലകൾ. പുതിയ നിയമം ലംഘിക്കുന്ന സ്ഥാപനങ്ങൾക്കെതിരെ 1979-ലെ 10-ാം നമ്പർ നിയമപ്രകാരം കർശന നടപടികൾ സ്വീകരിക്കും. നിയമലംഘനം നടത്തുന്ന സ്ഥാപനങ്ങൾ അടച്ചുപൂട്ടുന്നതിനും ഉത്തരവാദികളായവർക്കെതിരെ നിയമനടപടികൾക്കായി അന്വേഷണ ഏജൻസികൾക്ക് കൈമാറുന്നതിനും ഉത്തരവിൽ നിർദ്ദേശമുണ്ട്. ഔദ്യോഗിക ഗസറ്റിൽ പ്രസിദ്ധീകരിക്കുന്നത് മുതൽ ഈ നിയമം പ്രാബല്യത്തിൽ വരും. വിപണിയിൽ ഇത് കൃത്യമായി പാലിക്കപ്പെടുന്നുണ്ടെന്ന് ഉറപ്പാക്കാൻ ബന്ധപ്പെട്ട ഉദ്യോഗസ്ഥർക്ക് മന്ത്രി നിർദ്ദേശം നൽകി. ചെറിയ തുകകൾക്ക് (10 ദിനാറിൽ താഴെ) ഇപ്പോഴും കാഷ് ഉപയോഗിക്കാവുന്നതാണ്.

കുവൈത്തിൽ അവശ്യസാധനങ്ങൾക്ക് സബ്‌സിഡി; ‘ഈ ഉത്പന്നങ്ങള്‍’ക്ക് മുൻഗണന

Kuwait Food Prices Subsidy കുവൈത്ത് സിറ്റി: ആഗോള വിതരണ ശൃംഖലയിലെ തടസ്സങ്ങൾക്കിടയിലും രാജ്യത്ത് ഭക്ഷ്യസുരക്ഷ ഉറപ്പാക്കുന്നതിനും വിലക്കയറ്റം നിയന്ത്രിക്കുന്നതിനുമായി അവശ്യസാധനങ്ങൾക്ക് സബ്‌സിഡി പ്രഖ്യാപിച്ച് കുവൈറ്റ് വാണിജ്യ വ്യവസായ മന്ത്രാലയം. വിപണിയിൽ സാധനങ്ങളുടെ ലഭ്യത തടസ്സമില്ലാതെ ഉറപ്പാക്കുകയാണ് ഇതിലൂടെ ലക്ഷ്യമിടുന്നതെന്ന് മന്ത്രാലയം ആക്ടിംഗ് അണ്ടർസെക്രട്ടറി മർവ അൽ-ജൈദാൻ അറിയിച്ചു. ആഗോള വിപണിയിലെ പ്രതിസന്ധികൾ കാരണം ഇറക്കുമതിക്കാർക്കുണ്ടാകുന്ന അധിക ബാധ്യത കുറയ്ക്കാനും ഉപഭോക്താക്കളെ വിലക്കയറ്റത്തിൽ നിന്ന് സംരക്ഷിക്കാനുമാണ് ഈ തീരുമാനം. നിലവിൽ ജൂൺ 30 വരെയാണ് സബ്‌സിഡി കാലാവധി നിശ്ചയിച്ചിട്ടുള്ളതെങ്കിലും സാഹചര്യം കണക്കിലെടുത്ത് ഇത് നീട്ടാൻ മന്ത്രാലയത്തിന് അധികാരമുണ്ട്. ദീർഘകാലം കേടുകൂടാതെയിരിക്കുന്ന പാൽ, മുട്ട എന്നിവ പ്രാദേശികമായി ഉൽപ്പാദിപ്പിക്കുന്ന കമ്പനികൾക്ക് തീറ്റക്രമീകരണ സഹായ പദ്ധതികൾ വഴി ആനുകൂല്യം ലഭിക്കും. വിപണിയിലെ സാഹചര്യം വിലയിരുത്തി ഇറച്ചി ഉൾപ്പെടെയുള്ള മറ്റ് അവശ്യസാധനങ്ങളെയും സബ്‌സിഡി പട്ടികയിൽ ഉൾപ്പെടുത്താൻ മന്ത്രാലയത്തിന് അധികാരമുണ്ട്. പ്രതിസന്ധി തുടങ്ങിയത് മുതൽ വിപണിയിലെ വിലനിലവാരവും സാധനങ്ങളുടെ ലഭ്യതയും നിരീക്ഷിക്കാൻ പ്രത്യേക ഇൻസ്പെക്ഷൻ ടീമുകളെ നിയോഗിച്ചിട്ടുണ്ട്. സബ്‌സിഡി നിയമങ്ങൾ ലംഘിക്കുന്ന കമ്പനികളിൽ നിന്ന് തുക പൂർണ്ണമായും തിരിച്ചീടാക്കും. കൂടാതെ ഇത്തരം കമ്പനികളെ ഭാവിയിലെ സബ്‌സിഡി പദ്ധതികളിൽ നിന്ന് സ്ഥിരമായി പുറത്താക്കുമെന്നും മർവ അൽ-ജൈദാൻ മുന്നറിയിപ്പ് നൽകി. സ്വകാര്യ മേഖലയെ പിന്തുണയ്ക്കുന്നതോടൊപ്പം ഉപഭോക്താക്കളുടെ താൽപ്പര്യം സംരക്ഷിക്കാനാണ് മന്ത്രാലയം മുൻഗണന നൽകുന്നത്.

‘ഈ സേവനങ്ങൾ’ ഇനി വാട്സാപ്പിലും; പൊതുജനങ്ങൾക്ക് അതിവേഗ പിന്തുണയുമായി കുവൈത്ത്

WhatsApp Service Kuwait കുവൈത്ത് സിറ്റി: പൊതുജനങ്ങൾക്ക് സേവനങ്ങൾ കൂടുതൽ വേഗത്തിലും എളുപ്പത്തിലും ലഭ്യമാക്കുന്നതിനായി വാട്സാപ്പ് ഉൾപ്പെടെയുള്ള ആധുനിക ആശയവിനിമയ സംവിധാനങ്ങൾ ആരംഭിച്ച് പബ്ലിക് അതോറിറ്റി ഫോർ മാൻപവർ. ഡിജിറ്റൽ പ്ലാറ്റ്‌ഫോമുകളിലൂടെയുള്ള ഈ പുതിയ നീക്കം പ്രവാസികൾക്കും തൊഴിലുടമകൾക്കും വലിയ ആശ്വാസമാകും. നിലവിലെ പ്രത്യേക സാഹചര്യത്തിൽ സർക്കാർ സേവനങ്ങൾ തടസ്സമില്ലാതെ ജനങ്ങളിലേക്ക് എത്തിക്കുന്നതിന്റെ ഭാഗമായാണ് അതോറിറ്റി ഈ പരിഷ്കാരം നടപ്പിലാക്കിയത്. ഔദ്യോഗിക വെബ്സൈറ്റിനും മറ്റ് കോൾ സെന്ററുകൾക്കും പുറമെയാണ് ഇപ്പോൾ വാട്സാപ്പ് സേവനവും ലഭ്യമാക്കിയിരിക്കുന്നത്. കസ്റ്റമർ സർവീസ്, റിക്രൂട്ട്‌മെന്റ്, തൊഴിൽ കാര്യങ്ങൾ എന്നിവയുമായി ബന്ധപ്പെട്ട സംശയങ്ങൾക്ക് വാട്സാപ്പിലൂടെ വേഗത്തിൽ മറുപടി ലഭിക്കും. അഹമ്മദി ഗവർണറേറ്റ് ലേബർ ഡിപ്പാർട്ട്‌മെന്റ് ഉൾപ്പെടെയുള്ള വിവിധ ലേബർ ഓഫീസുകളുടെ സേവനങ്ങൾ ഇതിലൂടെ എളുപ്പത്തിൽ പ്രാപ്യമാകും. പ്രവാസികൾക്കും സ്വദേശികൾക്കും തങ്ങളുടെ പരാതികളും അന്വേഷണങ്ങളും ഡിജിറ്റൽ പ്ലാറ്റ്‌ഫോമുകൾ വഴി വീട്ടിലിരുന്ന് തന്നെ സമർപ്പിക്കാൻ സാധിക്കും. സേവനങ്ങളുടെ ഗുണനിലവാരം വർദ്ധിപ്പിക്കുന്നതിനും ഓഫീസുകളിലെ തിരക്ക് കുറയ്ക്കുന്നതിനുമാണ് ഈ മുൻകൈ എടുത്തതെന്ന് പബ്ലിക് അതോറിറ്റി ഫോർ മാൻപവർ പ്രസ്താവനയിൽ വ്യക്തമാക്കി. അതോറിറ്റിയുടെ ഔദ്യോഗിക സോഷ്യൽ മീഡിയ അക്കൗണ്ടുകൾ വഴിയോ വെബ്സൈറ്റ് വഴിയോ ബന്ധപ്പെടേണ്ട വാട്സാപ്പ് നമ്പറുകൾ ലഭ്യമാകുന്നതാണ്.

മിനിസ്ട്രീസ് കോംപ്ലക്സിലെ അറ്റകുറ്റപ്പണികള്‍ യുദ്ധകാലാടിസ്ഥാനത്തിൽ പൂർത്തിയാക്കണം; കുവൈത്ത് ധനമന്ത്രി സന്ദർശനം നടത്തി

Ministries Complex Drone Attack കുവൈത്ത് സിറ്റി: മിനിസ്ട്രീസ് കോംപ്ലക്സ് കെട്ടിടത്തിന് നേരെയുണ്ടായ ഡ്രോൺ ആക്രമണത്തിന് പിന്നാലെ ധനമന്ത്രി യാക്കൂബ് അൽ-രിഫായ് സ്ഥലം സന്ദർശിച്ചു. ശനിയാഴ്ച വൈകുന്നേരമുണ്ടായ ഈ ആക്രമണത്തെ “ഹീനമായ ഇറാനിയൻ അധിനിവേശം” എന്നാണ് മന്ത്രി വിശേഷിപ്പിച്ചത്. ആക്രമണത്തിൽ കെട്ടിടത്തിനുണ്ടായ നാശനഷ്ടങ്ങൾ മന്ത്രി നേരിട്ട് വിലയിരുത്തി. സർക്കാർ ഓഫീസുകളുടെ പ്രവർത്തനം തടസ്സമില്ലാതെ തുടരുന്നതിനായി അറ്റകുറ്റപ്പണികൾ എത്രയും വേഗം പൂർത്തിയാക്കാൻ അദ്ദേഹം ഉദ്യോഗസ്ഥർക്ക് നിർദ്ദേശം നൽകി. കെട്ടിടത്തിന്റെ പുനരുദ്ധാരണ പ്രവർത്തനങ്ങൾ യുദ്ധകാലാടിസ്ഥാനത്തിൽ പൂർത്തിയാക്കി സർക്കാർ സേവനങ്ങൾ ഉടൻ പുനരാരംഭിക്കണമെന്ന് മന്ത്രി ഊന്നിപ്പറഞ്ഞു. ആക്രമണത്തിന് പിന്നാലെ അടിയന്തരമായി ഇടപെട്ട എമർജൻസി ടീമുകളെയും വിവിധ വകുപ്പുകളെയും അദ്ദേഹം അഭിനന്ദിച്ചു. സാഹചര്യം നിയന്ത്രണവിധേയമാക്കാൻ ഏകോപിതമായ നീക്കമാണ് നടന്നതെന്ന് അദ്ദേഹം വ്യക്തമാക്കി. ധനമന്ത്രാലയം അണ്ടർസെക്രട്ടറി അസീൽ അൽ മുനീഫിയും മന്ത്രിയോടൊപ്പം ഉണ്ടായിരുന്നു. ഭരണകൂടത്തിന്റെ പൂർണ്ണ പിന്തുണ ഈ പ്രവർത്തനങ്ങൾക്കുണ്ടാകുമെന്ന് അദ്ദേഹം ഉറപ്പുനൽകി. ആക്രമണത്തെത്തുടർന്നുണ്ടായ നാശനഷ്ടങ്ങൾ അധികൃതർ ഇപ്പോഴും തിട്ടപ്പെടുത്തി വരികയാണ്. സുരക്ഷയ്ക്കായിരിക്കും പ്രഥമ പരിഗണനയെന്നും മന്ത്രാലയങ്ങളിലെ സേവനങ്ങൾ വൈകാതെ തന്നെ സാധാരണ നിലയിലാകുമെന്നും സർക്കാർ അറിയിച്ചു.

ആഗോള സമ്പദ്‌വ്യവസ്ഥയിൽ കനത്ത ആഘാതം; ലോകം സാമ്പത്തിക മാന്ദ്യത്തിലേക്കെന്ന് വിദഗ്ധർ

War fuels rising കുവൈത്ത് സിറ്റി: അമേരിക്കയും ഇറാനും തമ്മിലുള്ള സംഘർഷം അഞ്ചാം വാരത്തിലേക്ക് കടക്കുമ്പോൾ, ലോകം കടുത്ത സാമ്പത്തിക മാന്ദ്യത്തിലേക്ക് നീങ്ങുകയാണെന്ന് കുവൈത്ത് യൂണിവേഴ്സിറ്റിയിലെ ഇക്കണോമിക്സ് പ്രൊഫസർ ഡോ. റിയാദ് അൽ ഫാരസ് മുന്നറിയിപ്പ് നൽകി. കുവൈറ്റ് ടിവിക്ക് നൽകിയ അഭിമുഖത്തിലാണ് അദ്ദേഹം നിലവിലെ ഭൗമരാഷ്ട്രീയ സാഹചര്യം ആഗോള സമ്പദ്‌വ്യവസ്ഥയെ എങ്ങനെ ബാധിക്കുമെന്ന് വിശദീകരിച്ചത്. ഭരണാധികാരികളുടെ പ്രസ്താവനകളും രാഷ്ട്രീയ തീരുമാനങ്ങളും ഊർജ്ജ-ഓഹരി വിപണികളിൽ പെട്ടെന്നുള്ള ആഘാതങ്ങൾ സൃഷ്ടിക്കുന്നുണ്ടെന്ന് അദ്ദേഹം ചൂണ്ടിക്കാട്ടി. ഇതിനെ ഒരു ‘ആഗോള സാമ്പത്തിക ഷോക്ക്’ എന്നാണ് അദ്ദേഹം വിശേഷിപ്പിച്ചത്. സാമ്പത്തിക വളർച്ച മുരടിക്കുകയും അതേസമയം പണപ്പെരുപ്പം ഉയരുകയും ചെയ്യുന്ന ‘സ്റ്റാഗ്ഫ്ലേഷൻ’ എന്ന അവസ്ഥയിലേക്ക് ലോകം നീങ്ങുകയാണ്. ഇത് നിയന്ത്രിക്കാൻ കേന്ദ്ര ബാങ്കുകൾ വലിയ വെല്ലുവിളി നേരിടും. 2026-ൽ ലോകത്തിന്റെ സാമ്പത്തിക വികസന നിരക്ക് പ്രതീക്ഷിച്ചിരുന്ന 4 ശതമാനത്തിൽ നിന്ന് 1.5 ശതമാനത്തിലേക്ക് കൂപ്പുകുത്താൻ സാധ്യതയുണ്ടെന്ന് ഡോ. അൽ ഫാരസ് പറഞ്ഞു. നിലവിലെ പ്രതിസന്ധിയെത്തുടർന്ന് എണ്ണവിലയിൽ 50 മുതൽ 66 ശതമാനം വരെ വർദ്ധനവാണ് രേഖപ്പെടുത്തിയിരിക്കുന്നത്. ഇത് നിത്യോപയോഗ സാധനങ്ങളുടെ വിലക്കയറ്റത്തിന് കാരണമാകും. ലോകത്തിലെ എണ്ണ ശേഖരത്തിന്റെ 50 ശതമാനത്തിലധികവും പ്രകൃതിവാതക ശേഖരത്തിന്റെ 30 ശതമാനവും ഗൾഫ് മേഖലയിലാണെന്ന് ഈ പ്രതിസന്ധി വീണ്ടും തെളിയിച്ചു. ഊർജ്ജ വിതരണത്തിലുണ്ടായ കുറവ് ഏഷ്യൻ വിപണികളെ സാരമായി ബാധിച്ചു. ലോകത്തിന്റെ ഊർജ്ജ സുരക്ഷയിൽ ഗൾഫ് രാജ്യങ്ങൾക്കുള്ള നിർണ്ണായക പങ്ക് ഈ സാഹചര്യം അടിവരയിടുന്നു. സൈനിക നീക്കങ്ങൾക്കപ്പുറം ഇതൊരു ‘ഊർജ്ജ യുദ്ധ’മായി മാറിയിരിക്കുകയാണ്. വിതരണ ശൃംഖലയിലുണ്ടായ തടസ്സങ്ങൾ അന്താരാഷ്ട്ര വിപണികളെ കടുത്ത സമ്മർദ്ദത്തിലാക്കുന്നു. റഷ്യൻ കയറ്റുമതിയിലെ നിയന്ത്രണങ്ങൾ നീക്കുന്നതിനെക്കുറിച്ചോ പിടിച്ചെടുത്ത ഇറാനിയൻ എണ്ണ വിൽക്കുന്നതിനെക്കുറിച്ചോ ഉള്ള പ്രസ്താവനകൾ വിപണിയുടെ അതിരൂക്ഷമായ സെൻസിറ്റിവിറ്റിയെയാണ് കാണിക്കുന്നത്. ഇന്ധനവില വർദ്ധനവ് വരാനിരിക്കുന്ന തിരഞ്ഞെടുപ്പ് ഫലങ്ങളെപ്പോലും സ്വാധീനിച്ചേക്കാമെന്നും അദ്ദേഹം കൂട്ടിച്ചേർത്തു.