Al Thuraya UAE അബുദാബി: യുഎഇയിൽ കടുത്ത വേനൽച്ചൂടിന്റെ ഔദ്യോഗിക തുടക്കം കുറിച്ചുകൊണ്ട് ജൂൺ ഏഴിന് പുലർച്ചെ കിഴക്കൻ ചക്രവാളത്തിൽ ‘അൽ തുറയ്യ’ നക്ഷത്രസമൂഹം ദൃശ്യമാകുമെന്ന് എമിറേറ്റ്സ് അസ്ട്രോണമിക്കൽ സൊസൈറ്റി ഡയറക്ടർ ബോർഡ് ചെയർമാൻ ഇബ്രാഹിം അൽ ജർവാൻ അറിയിച്ചു. പരമ്പരാഗത അറബിക് നാവിഗേഷൻ കോമ്പസ് പ്രകാരം കൃത്യമായ കിഴക്ക് ദിശയിൽ നിന്ന് 25 ഡിഗ്രി വടക്ക് മാറിയാണ് ഈ നക്ഷത്രസമൂഹം ഉദിച്ചുയരുക. അറബികളുടെ പരമ്പരാഗത വിശ്വാസപ്രകാരം അൽ തുറയ്യ നക്ഷത്രത്തിന്റെ ഉദയം കടുത്ത വേനൽക്കാലത്തിന്റെ വരവിനെയാണ് സൂചിപ്പിക്കുന്നത്. ജൂൺ 7 മുതൽ 19 വരെയുള്ള 13 ദിവസങ്ങളാണ് ഈ നക്ഷത്രോദയത്തിന്റെ പ്രധാന കാലയളവ്. ജൂലൈ രണ്ട് വരെ നീളുന്ന ഈ നക്ഷത്ര സീസണിന് ശേഷമാകും ‘അൽ മർസം’, ‘അൽ കുലൈബിയീൻ’ എന്നീ ഘട്ടങ്ങളിലേക്ക് കാലാവസ്ഥ മാറുക. ഈ കാലയളവിൽ ചൂടും വരൾച്ചയും അന്തരീക്ഷത്തിലെ ഈർപ്പവും ക്രമാതീതമായി വർധിക്കും. തുടർന്ന് ആഗസ്റ്റ് അവസാനത്തോടെ ‘സുഹൈൽ’ നക്ഷത്രം ഉദിക്കുന്നതോടെ മാത്രമേ ചൂടിന് നേരിയ ശമനമുണ്ടാകൂ. വേനൽക്കാലത്തിന്റെ തുടക്കത്തിൽ പകൽസമയത്തെ ശരാശരി താപനില 40°C മുതൽ 43°C വരെ ഉയർന്നേക്കും. രാത്രികളിൽ താപനില 28°C മുതൽ 31°C വരെയായിരിക്കും. ഈ സീസണിൽ സാധാരണ താപനിലയേക്കാൾ 4 ഡിഗ്രിയിലധികം ചൂട് തുടർച്ചയായ ദിവസങ്ങളിൽ വർധിക്കുന്ന ശക്തമായ ഉഷ്ണതരംഗങ്ങൾക്ക് സാധ്യതയുണ്ട്. പൊടിയും മണലും നിറഞ്ഞ ശക്തമായ വടക്കുപടിഞ്ഞാറൻ കാറ്റും മണൽക്കാറ്റും ഇതോടൊപ്പം വീശിയടിച്ചേക്കാം. ജ്യോതിശാസ്ത്രപരമായി ജൂൺ 21-നാണ് ഈ വർഷത്തെ ഉത്തരായനാന്തം (Summer Solstice) സംഭവിക്കുന്നത്. വർഷത്തിലെ ഏറ്റവും നീളമേറിയ പകലും ഏറ്റവും ചെറിയ രാത്രിയും അനുഭവപ്പെടുന്ന ദിവസമാണിത്. ഈ ദിവസം യുഎഇയുടെ തെക്കൻ പ്രദേശങ്ങളിലൂടെ കടന്നുപോകുന്ന ഉത്തരായന രേഖയ്ക്ക് മുകളിൽ സൂര്യൻ നേരിട്ടെത്തുന്നതിനാൽ, ഉച്ചസമയത്ത് നിഴലുകളുടെ നീളം ഏറ്റവും കുറയുകയോ പൂർണമായി ഇല്ലാതാവുകയോ ചെയ്യും. കാർഷിക മേഖലയെ സംബന്ധിച്ചിടത്തോളം ഈ വേനൽക്കാല സീസൺ ഏറെ പ്രധാനപ്പെട്ടതാണ്. ഇത് ഈന്തപ്പഴ വിളവെടുപ്പിന്റെ (നഗൽ സീസൺ) തുടക്കത്തെയാണ് സൂചിപ്പിക്കുന്നത്.