Jazeera Airways കുവൈത്ത് സിറ്റി: വ്യോമപാത തുറന്നതിന് പിന്നാലെ വിമാന സർവ്വീസുകൾ പുന:രാരംഭിച്ച് ജസീറ എയർവേയ്സ്. സുരക്ഷാ മുൻകരുതലിന്റെ ഭാഗമായി വ്യാഴാഴ്ച്ച പുലർച്ചെ 4.50 മുതൽ താത്ക്കാലികമായി നിർത്തിവെച്ചിരുന്ന സർവ്വീസുകളാണ് ജസീറ എയർവേയ്സ് പുന:സ്ഥാപിച്ചത്. സർവീസ് തടസ്സപ്പെട്ട സമയത്ത് റദ്ദാക്കിയതോ വൈകിയതോ ആയ വിമാനങ്ങൾ പുനഃക്രമീകരിക്കുന്നതിനുള്ള നടപടികൾ എയർലൈൻ അധികൃതർ സ്വീകരിക്കുന്നുണ്ട്. തടസ്സങ്ങൾ നേരിട്ട യാത്രക്കാരെ എയർലൈൻ അധികൃതർ നേരിട്ട് ബന്ധപ്പെട്ട് പുതിയ യാത്രാ വിവരങ്ങൾ അറിയിക്കുമെന്ന് കമ്പനി അറിയിച്ചു.
യാത്രക്കാർ വിമാനത്താവളത്തിലേക്ക് തിരിക്കുന്നതിന് മുൻപ് തങ്ങളുടെ വിമാനങ്ങളുടെ നിലവിലെ സ്റ്റാറ്റസ് പരിശോധിക്കേണ്ടതാണ്. ഔദ്യോഗിക വെബ്സൈറ്റ്, മൊബൈൽ ആപ്ലിക്കേഷൻ, കസ്റ്റമർ സർവീസ് ഇമെയിൽ എന്നിവ വഴിയോ അല്ലെങ്കിൽ 177 എന്ന ഹോട്ട്ലൈൻ നമ്പറിൽ ബന്ധപ്പെട്ടോ യാത്രക്കാർക്ക് വിവരങ്ങൾ അറിയാം.
Kuwait Airways യാത്രക്കാർക്ക് ആശ്വാസ വാർത്ത; വിമാന സർവ്വീസുകൾ പുന:രാരംഭിച്ച് കുവൈത്ത് എയർവേയ്സ്
Kuwait Airways കുവൈത്ത് സിറ്റി: കുവൈത്ത് വ്യോമപാത തുറന്നതോടെ വിമാന സർവ്വീസുകൾ പുന:രാരംഭിച്ച് കുവൈത്ത് എയർവേയ്സ്. താൽക്കാലിക മുൻകരുതൽ നടപടികളുടെ ഭാഗമായി സർവീസുകൾ നിർത്തിവെച്ചിരുന്നെങ്കിലും, ഇപ്പോൾ വിമാന ഗതാഗതം സാധാരണ നിലയിലായതായി കുവൈത്ത് എയർവേയ്സ് വ്യക്തമാക്കി.
യാത്രാ തടസ്സം നേരിട്ട യാത്രക്കാരെ ഉൾക്കൊള്ളുന്നതിനുള്ള നടപടികൾ പുരോഗമിക്കുകയാണെന്നും, ബാധിക്കപ്പെട്ട യാത്രക്കാർക്ക് പുതുക്കിയ യാത്രാ വിവരങ്ങൾ നേരിട്ട് അറിയിക്കുമെന്നും കമ്പനി ചൂണ്ടിക്കാട്ടി. ജൂൺ 11-ന് യാത്ര നിശ്ചയിച്ചിരുന്ന യാത്രക്കാർക്ക് ടിക്കറ്റ് റദ്ദാക്കാനോ തീയതി മാറ്റാനോ അധിക ഫീസ് ഈടാക്കില്ലെന്നും കമ്പനി വ്യക്തമാക്കി. ഉപഭോക്താക്കളുടെ സഹകരണത്തിന് കുവൈത്ത് എയർലൈൻസ് നന്ദി അറിയിക്കുകയും ചെയ്തു. യാത്രക്കാരുടെ സുരക്ഷയ്ക്കും സേവന നിലവാരത്തിനുമുള്ള പ്രതിബദ്ധതയും കുവൈത്ത് എയർലൈൻസ് ഉയർത്തിക്കാട്ടി.
കൂടുതൽ വിവരങ്ങൾക്ക് കുവൈത്തിലുള്ളവർ 171 എന്ന ഹോട്ട്ലൈൻ വഴിയോ വിദേശത്ത് നിന്ന് +965 2434 5555 എന്ന നമ്പർ വഴിയോ ബന്ധപ്പെടണം.
Hijri New Year ഹിജ്റ പുതുവർഷം; അവധി തീയതികൾ പ്രഖ്യാപിച്ച് കുവൈത്ത് സിവിൽ സർവ്വീസ് കമ്മീഷൻ
Hijri New Year കുവൈത്ത് സിറ്റി: ഇസ്ലാമിക പുതുവത്സരമായ 1448 ഹിജ്റ വർഷാഘോഷത്തോടനുബന്ധിച്ചുള്ള ഔദ്യോഗിക അവധി ക്രമീകരണങ്ങൾ പ്രഖ്യാപിച്ച് കുവൈത്ത് സിവിൽ സർവീസ് കമ്മീഷൻ. ജൂൺ 10-ന് മന്ത്രിസഭ പുറപ്പെടുവിച്ച തീരുമാനത്തിന്റെ അടിസ്ഥാനത്തിൽ, എല്ലാ മന്ത്രാലയങ്ങൾക്കും സർക്കാർ ഏജൻസികൾക്കും പൊതു സ്ഥാപനങ്ങൾക്കും അവധി ബാധകമായിരിക്കും. എന്നാൽ ദുൽഹിജ്ജ മാസത്തിന്റെ ദൈർഘ്യത്തെ ആശ്രയിച്ചായിരിക്കും അവധി ദിനം നിശ്ചയിക്കുക.
ദുൽഹിജ്ജ 29 ദിവസമാണെങ്കിൽ, 2026 ജൂൺ 16 ചൊവ്വാഴ്ച ഹിജ്റ പുതുവത്സര അവധിയായിരിക്കും. ജീവനക്കാർ ജൂൺ 17 ബുധനാഴ്ച ജോലിയിൽ പ്രവേശിക്കും. ദുൽഹിജ്ജ 30 ദിവസമാണെങ്കിൽ, ജൂൺ 17 ബുധനാഴ്ച ഔദ്യോഗിക അവധിയായിരിക്കും. തുടർന്ന് രണ്ട് അവധി ദിവസങ്ങൾക്കിടയിൽ വരുന്ന ജൂൺ 18 വ്യാഴാഴ്ചയും അവധിയായി പ്രഖ്യാപിക്കും. ഈ സാഹചര്യത്തിൽ സർക്കാർ ഓഫീസുകൾ ജൂൺ 21 ഞായറാഴ്ച മുതൽ പ്രവർത്തനം പുനരാരംഭിക്കും. അത്യാവശ്യ സേവനങ്ങൾ നൽകുന്ന പ്രത്യേക സ്വഭാവമുള്ള സ്ഥാപനങ്ങൾ പൊതുതാൽപര്യവും സേവനങ്ങളുടെ തുടർച്ചയും പരിഗണിച്ച് തങ്ങളുടെ അവധി ക്രമീകരണങ്ങൾ ബന്ധപ്പെട്ട അധികാരികൾ മുഖേന തീരുമാനിക്കുമെന്ന് സിവിൽ സർവീസ് കമ്മീഷൻ കൂട്ടിച്ചേർത്തു.
Patient’s Photo രോഗിയുടെ ചിത്രം സമ്മതമില്ലാതെ പോസ്റ്റ് ചെയ്തു; കുവൈത്തിൽ ഡോക്ടർക്ക് പിഴ
Patient’s Photo കുവൈത്ത് സിറ്റി: കുവൈത്തിൽ രോഗിയുടെ സമ്മതമില്ലാതെ മുഖചിത്രവും ചികിത്സാ വിവരങ്ങളും സാമൂഹ്യ മാധ്യമങ്ങളിലും പരസ്യ പ്ലാറ്റ്ഫോമുകളിലും പങ്കുവെച്ച ഡോക്ടർക്ക് പിഴ. വിദേശി കോസ്മെറ്റിക് സർജനാണ് കുവൈത്ത് അപ്പീൽ കോടതി പിഴ ചുമത്തിയത്. ആറായിരം കുവൈത്തി ദിനാനാണ് പിഴ. മുഖം മറയ്ക്കുന്ന പർദ്ദ ധരിക്കുന്ന സ്ത്രീയുടെ ശസ്ത്രക്രിയയ്ക്ക് മുൻപും പിൻപുമുള്ള ചിത്രങ്ങളാണ് ഡോക്ടർ പരസ്യ ആവശ്യങ്ങൾക്കായി ദുരുപയോഗം ചെയ്തത്.
നിയമപ്രകാരം സംരക്ഷിക്കപ്പെട്ടിട്ടുള്ള രോഗിയുടെ വ്യക്തിവിവരങ്ങളും ചികിത്സാ രഹസ്യങ്ങളും പരസ്യമാക്കിയതിലൂടെ ഡോക്ടർ ഗുരുതരമായ നിയമലംഘനമാണ് നടത്തിയതെന്ന് കോടതി ചൂണ്ടിക്കാട്ടി. ചികിത്സയുമായി ബന്ധപ്പെട്ട ചിത്രങ്ങൾ അനുമതിയില്ലാതെ പ്രചരിപ്പിച്ചതിലൂടെ രോഗിയുടെ സ്വകാര്യതയും വ്യക്തിത്വവുമാണ് ഡോക്ടർ പൊതുസമൂഹത്തിന് മുന്നിൽ തുറന്നുകാട്ടിയതെന്ന് കോടതി പറഞ്ഞു. നിയമപരമായ രേഖാമൂലമുള്ള അനുമതിയില്ലാതെ വാണിജ്യപരമായോ മറ്റ് ഏതെങ്കിലും ആവശ്യങ്ങൾക്കോ രോഗികളുടെ ചിത്രങ്ങളോ മെഡിക്കൽ വിവരങ്ങളോ ചൂഷണം ചെയ്യുന്നത് കർശനമായി നിരോധിച്ചിട്ടുണ്ടെന്നും കോടതി കൂട്ടിച്ചേർത്തു.
Kuwait Air Traffic യാത്രക്കാർക്ക് ആശ്വാസ വാർത്ത; കുവൈത്ത് വ്യോമപരിധി വീണ്ടും തുറന്നു, സർവ്വീസുകൾ പുന:രാരംഭിച്ചു
Kuwait Air Traffic കുവൈത്ത് സിറ്റി: കുവൈത്തിലെ വിമാന യാത്രക്കാർക്ക് ആശ്വാസ വാർത്ത. കുവൈത്ത് വ്യോമപാത വീണ്ടും തുറന്നു. കുവൈത്തിന് നേരെയുണ്ടായ വ്യോമാക്രമണത്തെ തുടർന്ന് ഇന്ന് പുലർച്ചെ 4.50 മുതൽ വ്യോമപാത താത്ക്കാലികമായി അടച്ചിരുന്നു. വ്യോമപാത വീണ്ടും തുറന്നതോടെ കുവൈത്ത് എയർവേയ്സും ജസീറ എയർവേയ്സും വിമാന സർവ്വീസുകൾ പുന:രാരംഭിച്ചു.
താത്ക്കാലിക മുൻകരുതൽ നടപടികളുടെ ഭാഗമായി സർവീസുകൾ നിർത്തിവെച്ചിരുന്നെങ്കിലും നിലവിൽ വിമാന ഗതാഗതം സാധാരണ നിലയിലായതായി കമ്പനികൾ വ്യക്തമാക്കി. ജൂൺ 11-ന് യാത്ര നിശ്ചയിച്ചിരുന്ന യാത്രക്കാർക്ക് ടിക്കറ്റ് റദ്ദാക്കാനോ തീയതി മാറ്റാനോ അധിക ഫീസ് ഈടാക്കില്ലെന്ന് കുവൈത്ത് എയർവേയ്സ് അറിയിച്ചു. അതേസമയം, തടസ്സപ്പെട്ട വിമാന സർവീസുകൾ പുനഃക്രമീകരിച്ചുവരികയാണെന്നും യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുമ്പ് വിമാന സ്റ്റാറ്റസ് പരിശോധിക്കണമെന്നും ജസീറ എയർവേയ്സ് നിർദ്ദേശം നൽകി.
Mobile Phone സ്ക്രീൻ ടൈം കുറയ്ക്കൽ; അടുത്ത അധ്യയന വർഷം മുതൽ സ്കൂളുകളിൽ മൊബൈൽ ഫോൺ നിരോധിക്കാൻ ഈ രാജ്യം…..
Mobile Phone കുട്ടികളിലെ സ്ക്രീൻ ടൈം കുറയ്ക്കാൻ നടപടികളുമായി സ്വീഡൻ. അടുത്ത അധ്യയന വർഷം മുതൽ സ്കൂളുകളിൽ മൊബൈൽ ഫോണുകൾ നിരോധിക്കാനുള്ള നടപടികളാണ് സ്വീഡൻ നടത്തുന്നത്. ക്ലാസ്റൂം സാങ്കേതികവിദ്യയോടുള്ള രാജ്യത്തിന്റെ സമീപനത്തിൽ തന്നെ ഇത് നിർണായക കാൽവയ്പ്പാകുമെന്നാണ് കണക്കാക്കപ്പെടുന്നത്. വിദ്യാർഥികൾക്കിടയിൽ, പ്രത്യേകിച്ച് ചെറിയ കുട്ടികളിൽ, വായനാ സമയം വർധിപ്പിക്കുന്നതിനും സ്ക്രീൻ ഉപയോഗം കുറയ്ക്കുന്നതിനുമുള്ള സ്വീഡിഷ് സർക്കാരിന്റെ ശ്രമത്തിന്റെ ഭാഗമായാണ് നടപടി.
കോവിഡിന് ശേഷം 2023 മുതൽ, മധ്യ-വലതു സഖ്യ സർക്കാർ സ്കൂളുകളിൽ പുസ്തകങ്ങളുടെ ഉപയോഗവും പരമ്പരാഗത പഠനരീതികളുമാണ് പ്രോത്സാഹിപ്പിച്ചത്. മൊബൈൽ സ്ക്രീൻ ഉപയോഗം കൊണ്ട് വിദ്യാർഥികളിൽ വായനയും എഴുത്തും കുറയുന്നതിനെക്കുറിച്ചുള്ള ആശങ്കകളാണ് ഈ തീരുമാനം എടുക്കാൻ കാരണമെന്ന് ഉദ്യോഗസ്ഥർ ചൂണ്ടിക്കാട്ടി. സാക്ഷരതാ നിലവാരത്തിലും കുറവുണ്ടായതായി അധികൃതർ കണ്ടെത്തി. പ്രത്യേകിച്ച് ചെറിയ കുട്ടികളിൽ ഇത് പ്രകടമാണെന്നും സ്വീഡിഷ് പാർലമെന്റ് എഡ്യുക്കേഷൻ കമ്മിറ്റി ചെയർപേഴ്സൺ ജോർ ഫോർസെൽ വ്യക്തമാക്കി.
കുട്ടികൾക്ക് പുസ്തകങ്ങളും പരമ്പരാഗത പഠനരീതികളുമാണ് നല്ലതെന്ന് തങ്ങൾ വിശ്വസിക്കുന്നതിനാലാണ് സ്ക്രീൻ ഉപയോഗം നിയന്ത്രിക്കുന്നതെന്ന് ഫോർസെൽ പറഞ്ഞതായി വാർത്താ ഏജൻസിയായ അസോസിയേറ്റഡ് പ്രസ്സ് റിപ്പോർട്ട് ചെയ്യുന്നു. സ്മാർട്ട്ഫോണുകളും മറ്റ് ഡിജിറ്റൽ ഉപകരണങ്ങളും കുട്ടികളിൽ ശ്രദ്ധ വ്യതിചലിപ്പിക്കുന്നതിനെക്കുറിച്ച് അധ്യാപകരും രക്ഷിതാക്കളും ആശങ്കകൾ ഉന്നയിക്കുന്നതിനാൽ, ഒട്ടേറെ രാജ്യങ്ങൾ ഇതിനോടകം തന്നെ സ്കൂളുകളിൽ മൊബൈൽ ഫോൺ ഉപയോഗത്തിന് നിയന്ത്രണങ്ങൾ ഏർപ്പെടുത്തിയിട്ടുണ്ട്. ഇതിന്റെ ചുവടുപിടിച്ചാണ് പരമ്പരാഗത പഠനത്തെ പ്രോത്സാഹിപ്പിക്കുന്നതിനുള്ള നടപടികൾ സ്വീഡൻ ഇതിനകം സ്വീകരിച്ചിട്ടുള്ളത്.
Unpaid Pay ശമ്പളം നൽകിയില്ല; സ്പോൺസറുടെ വീട്ടിലെ സാധനങ്ങൾ തല്ലിതകർത്ത് വീട്ടുജോലിക്കാരി
Unpaid Pay കുവൈത്ത് സിറ്റി: ശമ്പളം നൽകിയില്ലെന്ന പേരിൽ സ്പോൺസറുടെ വീട്ടിലെ സാധനങ്ങൾ തല്ലിതകർത്ത് വീട്ടുജോലിക്കാരി. കുവൈത്തിലാണ് സംഭവം. ശമ്പളം ലഭിക്കാത്തതിനെച്ചൊല്ലിയുള്ള തർക്കത്തെ തുടർന്നാണ് വീട്ടുജോലിക്കാരി സ്പോൺസറുടെ വീട്ടിനുള്ളിൽ നാശനഷ്ടങ്ങൾ വരുത്തിയത്. സംഭവത്തിന് പിന്നാലെ സ്പോൺസർ പരാതി നൽകിയിട്ടുണ്ട്. പരാതിയുടെ അടിസ്ഥാനത്തിൽ നിയമ നടപടികൾ ആരംഭിച്ചതായി അധികൃതർ അറിയിച്ചു.
Airspace Closed കുവൈത്ത് വ്യോമപാത താത്ക്കാലികമായി അടച്ചു; വിമാന സർവ്വീസുകൾ വഴി തിരിച്ചുവിട്ടു
Airspace Closed കുവൈത്ത് സിറ്റി: കുവൈത്ത് വ്യോമപാത താത്ക്കാലികമായി അടച്ചു. വ്യാഴാഴ്ച പുലർച്ചെ 4:50 മുതൽ കുവൈത്ത് വ്യോമപാത താത്ക്കാലികമായി അടച്ചതായി കുവൈത്ത് ജനറൽ അതോറിറ്റി ഓഫ് സിവിൽ ഏവിയേഷൻ അറിയിച്ചു. രാജ്യത്തിന്റെ വ്യോമപാത സുരക്ഷാ മുൻകരുതലിന്റെ ഭാഗമായി വിമാനങ്ങൾ അംഗീകൃത നടപടിക്രമങ്ങൾ അനുസരിച്ച് മറ്റ് വിമാനത്താവളങ്ങളിലേക്ക് തിരിച്ചുവിട്ടതായും അധികൃതർ വ്യക്തമാക്കി.
പ്രദേശത്തെ സിവിൽ വ്യോമഗതാഗതത്തിന് ഭീഷണിയാകാവുന്ന സാഹചര്യങ്ങൾ നിലനിൽക്കുന്നതിനാലും, കുവൈത്തിനെതിരെ നടന്നതായി അധികൃതർ വിശേഷിപ്പിച്ച ഇറാനിയൻ ആക്രമണങ്ങളുടെ പശ്ചാത്തലത്തിലുമാണ് ഈ നടപടി സ്വീകരിച്ചതെന്ന് അതോറിറ്റി അറിയിച്ചു. ബന്ധപ്പെട്ട സർക്കാർ ഏജൻസികളുമായും സുരക്ഷാ വകുപ്പുകളുമായും ചേർന്ന് സാഹചര്യം നിരന്തരം വിലയിരുത്തുകയാണെന്നും അപകടസാധ്യത പൂർണമായും അവസാനിച്ചതായി സ്ഥിരീകരിക്കുന്നതോടെ വ്യോമപാത വീണ്ടും തുറന്ന് വിമാന സർവീസുകൾ സാധാരണ നിലയിലാക്കുമെന്നും ഡിജിസിഎ വ്യക്തമാക്കി. യാത്രക്കാരും വിമാനക്കമ്പനികളും ഔദ്യോഗിക അറിയിപ്പുകൾ മാത്രം പിന്തുടരുകയും ബന്ധപ്പെട്ട നിർദേശങ്ങളും സുരക്ഷാ മാർഗനിർദേശങ്ങളും കർശനമായി പാലിക്കണമെന്നും അധികൃതർ കൂട്ടിച്ചേർത്തു.
Accident in Kuwait കുവൈത്തിൽ വാഹനാപകടം; ഒരാൾ മരിച്ചു
Accident in Kuwait കുവൈത്ത് സിറ്റി: കുവൈത്തിൽ വാഹനാപകടം. ഫഹാഹിൽ എക്സ്പ്രസ് ഹൈവേയിൽ രണ്ട് വാഹനങ്ങൾ കൂട്ടിയിടിച്ച്, ഒരു വാഹനം മറിഞ്ഞതിനെ തുടർന്ന് ഇന്ധന ടാങ്കർ തീപിടിച്ചുണ്ടായ അപകടത്തിൽ ഒരാൾ മരിച്ചു.
മംഗഫ് അഗ്നിശമന കേന്ദ്രത്തിലെ സംഘം സംഭവ സ്ഥലത്തെത്തി രക്ഷാപ്രവർത്തനം നടത്തുകയും തീ നിയന്ത്രണവിധേയമാക്കുകയും ചെയ്തു. തുടർന്ന് സംഭവസ്ഥലം ബന്ധപ്പെട്ട അധികാരികൾക്ക് കൈമാറി.
അപകടത്തിന്റെ കാരണം സംബന്ധിച്ച അന്വേഷണം പുരോഗമിക്കുകയാണെന്ന് അധികൃതർ വ്യക്തമാക്കി.
