kuwait digital vaccination reminder കുവൈത്ത് സിറ്റി: ആരോഗ്യ മന്ത്രാലയം “Sahl”, “Salem” ആപ്ലിക്കേഷനുകൾ വഴി ഉപയോക്താക്കൾക്ക് വരാനിരിക്കുന്ന വാക്സിനേഷൻ അപ്പോയിന്റ്മെന്റുകൾ ഓർമ്മിപ്പിക്കുന്ന പുതിയ ഡിജിറ്റൽ സേവനം ആരംഭിച്ചു. നിശ്ചയിച്ചിരിക്കുന്ന വാക്സിനേഷൻ സമയത്തിന് 48 മണിക്കൂർ മുമ്പ് ഉപയോക്താക്കൾക്ക് അറിയിപ്പ് ലഭിക്കുന്ന രീതിയിലാണ് സേവനം ഒരുക്കിയിരിക്കുന്നത്. അപ്പോയിന്റ്മെന്റ് സമയത്തിൽ എന്തെങ്കിലും മാറ്റമുണ്ടായാൽ അതുസംബന്ധിച്ച മുന്നറിയിപ്പുകളും ലഭിക്കും. കുട്ടികൾക്കും മുതിർന്നവർക്കും വാക്സിൻ ഡോസുകൾ കൃത്യസമയത്ത് സ്വീകരിക്കുന്നുവെന്ന് ഉറപ്പാക്കാനും, രോഗപ്രതിരോധ പ്രവർത്തനങ്ങൾ ശക്തിപ്പെടുത്താനും, പൊതുജനാരോഗ്യം സംരക്ഷിക്കാനുമാണ് ഈ പദ്ധതി ലക്ഷ്യമിടുന്നതെന്ന് മന്ത്രാലയം അറിയിച്ചു. പുതിയ സേവനം സൗകര്യപ്രദവും സുരക്ഷിതവും സമയലാഭം നൽകുന്നതുമായ ഡിജിറ്റൽ സംവിധാനത്തിലൂടെ ആരോഗ്യ സേവന അനുഭവം മെച്ചപ്പെടുത്തുമെന്നും മന്ത്രാലയം വ്യക്തമാക്കി. ഇലക്ട്രോണിക് ആരോഗ്യ സേവനങ്ങൾ വിപുലീകരിക്കുന്ന കുവൈത്തിന്റെ ശ്രമങ്ങളുടെ ഭാഗമായാണ് ഈ പുതിയ സംവിധാനം നടപ്പാക്കുന്നത്.

ആക്രമണത്തെ തുടർന്ന് അടച്ച അബ്ദാലി അതിർത്തി വീണ്ടും തുറന്ന് കുവൈത്ത്; ഇറാഖിലേക്കുള്ള യാത്രയും ചരക്ക് ഗതാഗതവും പുനരാരംഭിച്ചു

Kuwait reopens Abdali border കുവൈത്ത് സിറ്റി: സമീപകാല ആക്രമണത്തെ തുടർന്ന് താൽക്കാലികമായി അടച്ചിരുന്ന കുവൈത്ത്–ഇറാഖ് അബ്ദാലി അതിർത്തി ചെക്ക്പോസ്റ്റ് വീണ്ടും തുറന്നു. ഇതോടെ യാത്രക്കാരുടെയും വാണിജ്യ ചരക്കുകളുടെയും ട്രക്ക് ഗതാഗതത്തിന്റെയും നീക്കം സാധാരണ നിലയിലേക്ക് തിരിച്ചെത്തി. പ്രഥമ ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ-യൂസഫിന്റെ നിർദേശപ്രകാരമാണ് അതിർത്തി വീണ്ടും തുറന്നതെന്ന് സുരക്ഷാ വൃത്തങ്ങൾ അറിയിച്ചു. അതിർത്തിയിലെ പ്രവർത്തനങ്ങൾ പുനരാരംഭിക്കുന്നതിനായി ആഭ്യന്തര മന്ത്രാലയം ബന്ധപ്പെട്ട വകുപ്പുകളുമായി അടുത്ത് സഹകരിച്ചാണ് നടപടികൾ സ്വീകരിച്ചത്. രണ്ടു ദിവസം മുമ്പ് മുതൽ അതിർത്തിയിൽ സാധാരണ പ്രവർത്തനങ്ങൾ ക്രമേണ പുനഃസ്ഥാപിക്കപ്പെട്ടതായി അധികൃതർ അറിയിച്ചു. നിരവധി ചരക്ക് ട്രക്കുകൾ ഇറാഖിലേക്ക് കടന്നുപോകുകയും യാത്രക്കാർ വീണ്ടും അതിർത്തി ചെക്ക്പോസ്റ്റ് ഉപയോഗിക്കാൻ ആരംഭിക്കുകയും ചെയ്തിട്ടുണ്ട്. ആക്രമണത്തിൽ ഉണ്ടായ നാശനഷ്ടങ്ങൾ പരിഹരിക്കുന്നതിനുള്ള പ്രവർത്തനങ്ങൾ ബന്ധപ്പെട്ട ഏജൻസികളുമായി ചേർന്ന് ആഭ്യന്തര മന്ത്രാലയം തുടരുകയാണ്. അതോടൊപ്പം, യാത്രക്കാരുടെ സുരക്ഷിത യാത്രയും ചരക്കുകളുടെ തടസ്സമില്ലാത്ത ഗതാഗതവും ഉറപ്പാക്കുന്നതിനുള്ള നടപടികളും ശക്തമാക്കിയിട്ടുണ്ട്. അതിർത്തി വീണ്ടും തുറന്നതോടെ, ആക്രമണത്തെ തുടർന്ന് നിർത്തിവെച്ചിരുന്ന കുവൈത്തും ഇറാഖും തമ്മിലുള്ള പ്രധാന കരവ്യാപാര-യാത്രാ പാത വീണ്ടും സജീവമായി.

ഡോക്ടർമാരുടെ രാജി നടപടികൾക്ക് പുതിയ ചട്ടങ്ങൾ; നിയമപരിശോധന നിർബന്ധമാക്കി ആരോഗ്യ മന്ത്രാലയം

kuwait new rules medical staff കുവൈത്ത് സിറ്റി: ഡോക്ടർമാർ, ദന്തഡോക്ടർമാർ ഉൾപ്പെടെയുള്ള മെഡിക്കൽ പ്രൊഫഷണലുകളുടെ രാജിയും സേവനാവസാന നടപടികളും സംബന്ധിച്ച പുതുക്കിയ മാർഗനിർദേശങ്ങൾ ആരോഗ്യ മന്ത്രാലയം നടപ്പാക്കി. ഭരണനടപടികൾ കൂടുതൽ കാര്യക്ഷമമാക്കുന്നതിനും എല്ലാ നിയമ-ചട്ട വ്യവസ്ഥകളും കൃത്യമായി പാലിക്കുന്നുവെന്ന് ഉറപ്പാക്കുന്നതിനുമാണ് പുതിയ നടപടി. ആരോഗ്യ മന്ത്രാലയ അണ്ടർസെക്രട്ടറി ഷെയ്ഖ് ഡോ. സൽമാൻ അൽ-സബാഹ് മെഡിക്കൽ ജീവനക്കാർ രാജി സമർപ്പിക്കുമ്പോൾ അവരുടെ പേരിൽ ഭരണപരമോ സാങ്കേതികമോ ആയ അന്വേഷണം നിലവിലുണ്ടോയെന്ന് പരിശോധിക്കുന്നതിന് ഏകീകൃത ഫോം അംഗീകരിച്ചുകൊണ്ട് ഭരണ ഉത്തരവ് പുറത്തിറക്കി. രാജി അപേക്ഷ അംഗീകരിക്കുന്നതിന് മുമ്പ് ആവശ്യമായ എല്ലാ നിയമപരവും ചട്ടപരവുമായ നടപടിക്രമങ്ങൾ പൂർത്തിയാക്കിയെന്ന് ഉറപ്പാക്കുകയും ആരോഗ്യപ്രവർത്തകരുടെയും മന്ത്രാലയത്തിന്റെയും അവകാശങ്ങൾ സംരക്ഷിക്കുകയും ചെയ്യുകയാണ് പുതിയ സംവിധാനത്തിന്റെ ലക്ഷ്യം. പുതിയ ഫോമിൽ മെഡിക്കൽ ജീവനക്കാരന്റെ സർവീസ് വിവരങ്ങൾ ഉൾപ്പെടുത്തും. തുടർന്ന് ബന്ധപ്പെട്ട ആശുപത്രിയോ വകുപ്പോ, മെഡിക്കൽ ലൈബിലിറ്റി അതോറിറ്റി, ലീഗൽ അഫയേഴ്‌സ് ആൻഡ് ഇൻവെസ്റ്റിഗേഷൻസ് വകുപ്പ് എന്നിവ ചേർന്ന് ഫോം പരിശോധിക്കും. രാജി നടപടികൾ പൂർത്തിയാക്കുന്നതിന് മുമ്പ് ജീവനക്കാരനെതിരെ തീർപ്പാകാത്ത ഭരണപരമോ സാങ്കേതികമോ ആയ അന്വേഷണങ്ങൾ ഇല്ലെന്ന് ഉറപ്പാക്കുന്നതിനാണ് ഈ പരിശോധനാ സംവിധാനം. പുതിയ ഉത്തരവ് ഉടൻ പ്രാബല്യത്തിൽ വന്നതായും, ഇതിന് വിരുദ്ധമായ മുൻ നിർദേശങ്ങൾ എല്ലാം റദ്ദാക്കിയതായും മന്ത്രാലയം അറിയിച്ചു. ബന്ധപ്പെട്ട എല്ലാ വകുപ്പുകൾക്കും പുതിയ നടപടിക്രമങ്ങൾ അതത് മേഖലകളിൽ നടപ്പാക്കാൻ നിർദേശം നൽകിയിട്ടുണ്ട്. സിവിൽ സർവീസ് നിയമവും ചട്ടങ്ങളും, കൂടാതെ 2020-ലെ നിയമം നമ്പർ 70 (വൈദ്യവൃത്തിയും അനുബന്ധ ആരോഗ്യ മേഖലകളും, രോഗികളുടെ അവകാശങ്ങളും ആരോഗ്യ സ്ഥാപനങ്ങളും സംബന്ധിച്ച നിയമം) എന്നിവയുടെ അടിസ്ഥാനത്തിലാണ് പുതിയ തീരുമാനം. ഭരണ കാര്യക്ഷമത വർധിപ്പിക്കാനും, കൂടുതൽ സുതാര്യത ഉറപ്പാക്കാനും, മെഡിക്കൽ ജീവനക്കാരുടെ സേവനാവസാന നടപടികൾ അംഗീകൃത നിയമപരമായ ചട്ടക്കൂടിനുള്ളിൽ നടപ്പാക്കാനുമാണ് പുതുക്കിയ നടപടിക്രമങ്ങൾ ലക്ഷ്യമിടുന്നതെന്ന് ആരോഗ്യ മന്ത്രാലയം വ്യക്തമാക്കി.

കുവൈത്തിലെ ഫർവാനിയ ആശുപത്രിയിൽ തീപിടിത്തമില്ല; പ്രചരിക്കുന്ന വാർത്തകൾ നിഷേധിച്ച് ആരോഗ്യമന്ത്രാലയം

fire Farwaniya Hospital കുവൈത്ത് സിറ്റി: ഫർവാനിയ ആശുപത്രിയിൽ തീപിടിത്തമുണ്ടായെന്ന തരത്തിൽ പ്രചരിക്കുന്ന വാർത്തകൾ ആരോഗ്യമന്ത്രാലയം നിഷേധിച്ചു. ആശുപത്രിയിൽ എയർ കണ്ടീഷനിംഗ് ഡക്ടുകൾ വൃത്തിയാക്കുന്നതിനിടെ ഉയർന്ന പൊടിപടലമാണ് ഒരു സന്ദർശകൻ പുകയെന്ന് തെറ്റിദ്ധരിച്ചത്. തുടർന്ന് അദ്ദേഹം അടിയന്തര സേവന ഹോട്ട്‌ലൈനിൽ വിവരം അറിയിക്കുകയായിരുന്നുവെന്ന് മന്ത്രാലയം പ്രസ്താവനയിൽ വ്യക്തമാക്കി. ഔദ്യോഗിക സ്രോതസുകളിൽ നിന്ന് വിവരങ്ങൾ സ്ഥിരീകരിച്ച ശേഷമേ വാർത്തകൾ പങ്കുവയ്ക്കുകയോ പ്രചരിപ്പിക്കുകയോ ചെയ്യാവൂ എന്ന് ആരോഗ്യമന്ത്രാലയം പൊതുജനങ്ങളോട് അഭ്യർഥിച്ചു. തെറ്റായ വിവരങ്ങൾ പ്രചരിക്കുന്നത് ഒഴിവാക്കാൻ കൃത്യവും വിശ്വസനീയവുമായ ഔദ്യോഗിക വിവരങ്ങളെയാണ് ആശ്രയിക്കേണ്ടത് എന്നും മന്ത്രാലയം ഓർമ്മിപ്പിച്ചു.

കുവൈത്തിൽ കാലാവസ്ഥാ വ്യതിയാനത്തിൽ മാറ്റമെന്ന് പ്രവചനം

Kuwait Weather Dust കുവൈത്ത് സിറ്റി: വടക്കുപടിഞ്ഞാറൻ കാറ്റിന്റെ വേഗത കുറയുന്നതിനാലും കാഴ്ചപരിധി മെച്ചപ്പെടുന്നതിനാലും തിങ്കളാഴ്ച രാത്രിയോടെ കുവൈത്തിലെ പൊടിപടലങ്ങളുടെ അന്തരീക്ഷം ഘട്ടംഘട്ടമായി മെച്ചപ്പെടുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. അതീവ ചൂടുള്ള വായുപ്രവാഹത്തോടൊപ്പം ഭൂതല ന്യൂനമർദ്ദത്തിന്റെ സ്വാധീനം തിങ്കളാഴ്ച രാജ്യത്ത് അനുഭവപ്പെട്ടതായി കാലാവസ്ഥാ വകുപ്പ് ആക്ടിംഗ് ഡയറക്ടർ ദറാർ അൽ-അലി കുവൈറ്റ് ന്യൂസ് ഏജൻസിയോട് പറഞ്ഞു. ഇത് മണിക്കൂറിൽ 15 മുതൽ 55 കിലോമീറ്റർ വരെ വേഗതയിൽ വീശിയടിച്ച വടക്കുപടിഞ്ഞാറൻ കാറ്റിന് കാരണമായി. ശക്തമായ കാറ്റ് മണലും പൊടിയും ഉയർന്നുവരാൻ ഇടയാക്കി, പ്രത്യേകിച്ച് തുറസ്സായ സ്ഥലങ്ങളിൽ കാഴ്ചപരിധി 1,000 മീറ്ററിൽ താഴെയായി കുറഞ്ഞു. രാത്രിയോടെ കാറ്റിന്റെ വേഗത കുറയുമെന്നും പൊടിപടലങ്ങൾ അടങ്ങുമെന്നും അൽ-അലി പറഞ്ഞു. തീരദേശ മേഖലകളിൽ കാറ്റ് ഇടയ്ക്കിടെ ശക്തമാകാനും ഉയർന്ന തിരമാലകൾക്ക് കാരണമാകാനും സാധ്യതയുണ്ടെങ്കിലും, മിതമായ വടക്കുപടിഞ്ഞാറൻ കാറ്റ് തുടരും. തിങ്കളാഴ്ച രേഖപ്പെടുത്തിയ ഉയർന്ന താപനില 46 ഡിഗ്രി സെൽഷ്യസാണ്.
ചൊവ്വാഴ്ചത്തെ കാലാവസ്ഥയെക്കുറിച്ച് സംസാരിച്ച അൽ-അലി, പകൽ സമയത്ത് കടുത്ത ചൂടും രാത്രിയിൽ മിതമായ ചൂടും അനുഭവപ്പെടുമെന്ന് വ്യക്തമാക്കി. മണിക്കൂറിൽ 15 മുതൽ 45 കിലോമീറ്റർ വരെ വേഗതയിൽ വടക്കുപടിഞ്ഞാറൻ ദിശയിൽ നിന്ന് കാറ്റ് വീശാൻ സാധ്യതയുണ്ട്. തുറസ്സായ സ്ഥലങ്ങളിൽ പൊടിപടലങ്ങൾ ഉയരാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു. പുലർച്ചെയോടെ താപനില 34 നും 36 ഡിഗ്രി സെൽഷ്യസിനും ഇടയിലായിരിക്കുമെന്നും, പകൽ സമയത്തെ ഉയർന്ന താപനില 47 മുതൽ 49 ഡിഗ്രി സെൽഷ്യസ് വരെ ഉയർന്നേക്കാമെന്നും പ്രതീക്ഷിക്കുന്നു.

ദേശീയ മനുഷ്യാവകാശ നിയമങ്ങളിൽ ഭേദഗതി വരുത്തി കുവൈത്ത്; അറിയേണ്ടതെല്ലാം

Kuwait Human Rights Protections കുവൈത്ത് സിറ്റി: ദേശീയ മനുഷ്യാവകാശ സംവിധാനങ്ങളെ ശക്തിപ്പെടുത്തുന്നതിനും ദേശീയ മനുഷ്യാവകാശ സ്ഥാപനങ്ങൾക്കായുള്ള പാരിസ് തത്വങ്ങൾ ഉൾപ്പെടെയുള്ള അന്താരാഷ്ട്ര മാനദണ്ഡങ്ങൾക്ക് അനുസൃതമായി മാറ്റുന്നതിനുമായി കുവൈത്ത് പുതിയ നിയമനിർമ്മാണ ഭേദഗതികൾ പുറപ്പെടുവിച്ചു. നാഷണൽ ഹ്യൂമൻ റൈറ്റ്സ് ബ്യൂറോ നിയമത്തിലെ ചില വ്യവസ്ഥകളിലെ മാറ്റങ്ങളും, മനുഷ്യാവകാശ സംരക്ഷണത്തിനും പ്രോത്സാഹനത്തിനുമായി പ്രവർത്തിക്കുന്ന സ്ഥാപനത്തിന്റെ പുനഃസംഘടിപ്പിച്ച നിയമനിർമ്മാണ ചട്ടക്കൂട് വ്യക്തമാക്കുന്ന ‘നാഷണൽ ഹ്യൂമൻ റൈറ്റ്സ് ഇൻസ്റ്റിറ്റ്യൂഷൻ’ നിയമം പുറപ്പെടുവിച്ചതും ഈ ഭേദഗതികളിൽ ഉൾപ്പെടുന്നു. പുതിയ നിയമപ്രകാരം, ‘നാഷണൽ ഹ്യൂമൻ റൈറ്റ്സ് ബ്യൂറോ’ ഇനിമുതൽ ‘നാഷണൽ ഹ്യൂമൻ റൈറ്റ്സ് ഇൻസ്റ്റിറ്റ്യൂഷൻ’ (ദേശീയ മനുഷ്യാവകാശ സ്ഥാപനം) എന്ന് പുനർനാമകരണം ചെയ്യും. സ്ഥാപനത്തിന്റെ സ്വയംഭരണാധികാരം വർദ്ധിപ്പിക്കുന്നതിനും പ്രവർത്തനങ്ങളുടെ കാര്യക്ഷമത മെച്ചപ്പെടുത്തുന്നതിനുമുള്ള നടപടികളും ഇതിൽ ഉൾപ്പെടുത്തിയിട്ടുണ്ട്. സ്ഥാപനത്തിന്റെ ഡയറക്ടർ ബോർഡ് പുനഃസംഘടിപ്പിക്കുന്നതും, അതിന്റെ ചുമതലകളും ഉത്തരവാദിത്തങ്ങളും നിയന്ത്രിക്കുന്ന ചട്ടങ്ങൾ പരിഷ്കരിക്കുന്നതും ഈ ഭേദഗതികളിൽ ഉൾപ്പെടുന്നു. ദേശീയ മനുഷ്യാവകാശ സംവിധാനം വികസിപ്പിക്കുന്നതിനും, വ്യക്തിസ്വാതന്ത്ര്യവും അവകാശങ്ങളും കൂടുതൽ ശക്തമായി സംരക്ഷിക്കുന്നതിനും, അന്താരാഷ്ട്ര മനുഷ്യാവകാശ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനുമുള്ള കുവൈറ്റിന്റെ ശ്രമങ്ങളെയാണ് ഈ നടപടി പ്രതിഫലിപ്പിക്കുന്നത്.

രണ്ട് ദിനാര്‍ നൽകാൻ വിസമ്മതിച്ചു; കടജീവനക്കാരനെ വാഹനം തട്ടി കൊലപ്പെടുത്തിയ കേസിൽ കുവൈത്തി പൗരന് കടുത്ത ശിക്ഷ

Kuwaiti Dragging Grocer to Death കുവൈത്ത് സിറ്റി: രണ്ട് ദിനാർ മാത്രം വിലയുള്ള സാധനങ്ങൾ വാങ്ങിയ ശേഷം പണം നൽകാതെ രക്ഷപ്പെടാൻ ശ്രമിക്കുന്നതിനിടെ ഗ്രോസറി ജീവനക്കാരൻ കൊല്ലപ്പെട്ട കേസിൽ കുവൈത്തി പൗരന് വിധിച്ച 15 വർഷത്തെ തടവുശിക്ഷ കുവൈത്തിലെ രണ്ടാമത് അപ്പീൽ കോടതി ശരിവെച്ചു. കോടതി നടപടികൾ അനുസരിച്ച്, അൽ-മുത്ല പ്രദേശത്തെ ഒരു ഗ്രോസറിയിലാണ് സംഭവം നടന്നത്. രേഖപ്പെടുത്തിയ രണ്ട് ദീനാർ വിലയുള്ള സാധനങ്ങൾ വാങ്ങിയ ശേഷം പ്രതി പണം നൽകാതെ പോകാൻ ശ്രമിച്ചു. ജീവനക്കാരൻ തടയാൻ ശ്രമിച്ചപ്പോൾ പ്രതി വാഹനം വേഗത്തിൽ മുന്നോട്ട് എടുക്കുകയും, തുടർന്ന് ജീവനക്കാരൻ ഏകദേശം 30 മീറ്ററോളം വണ്ടിക്കടിയിൽപ്പെട്ട് വലിച്ചിഴയ്ക്കപ്പെടുകയും ചെയ്തു. ഇതിനെ തുടർന്നുണ്ടായ ഗുരുതരമായ പരിക്കുകളാണ് ജീവനക്കാരന്റെ മരണത്തിന് കാരണമായത്. സംഭവത്തെ തുടർന്ന് നടത്തിയ അന്വേഷണത്തിൽ അറസ്റ്റിലായ പ്രതിക്ക് മുൻപും മയക്കുമരുന്ന്, മോഷണ കേസുകളിൽ ശിക്ഷ ലഭിച്ചിട്ടുണ്ടെന്ന് വ്യക്തമായി. കൊലപാതക കുറ്റത്തിന് മുൻപ് വിധിച്ച 15 വർഷത്തെ തടവുശിക്ഷ ശരിവെച്ചുകൊണ്ട് അപ്പീൽ കോടതി ഉത്തരവിറക്കുകയായിരുന്നു.

കുവൈത്ത്: പൗരത്വം റദ്ദാക്കപ്പെട്ടവർക്കായി സെൻട്രൽ ഏജൻസി ഇലക്ട്രോണിക് പ്ലാറ്റ്‌ഫോം ആരംഭിച്ചു

Kuwait Digital Platform Nationality Cases കുവൈത്ത് സിറ്റി: കുവൈത്ത് പൗരത്വം റദ്ദാക്കപ്പെടുകയും മുൻപ് ആർട്ടിക്കിൾ 5 വിഭാഗത്തിൽ (വിശിഷ്ട സേവനം അനുഷ്ഠിച്ചവർ, കുവൈത്തി വനിതകളുടെ മക്കൾ, 1965-ലെ സെൻസസിൽ രജിസ്റ്റർ ചെയ്തവർ എന്നിവരുൾപ്പെടെ) ഉൾപ്പെടുകയും ചെയ്ത വ്യക്തികൾക്കായി ‘സെൻട്രൽ ഏജൻസി ഫോർ അഡ്രസ്സിംഗ് ദി സ്റ്റാറ്റസ് ഓഫ് ബിദൂൺസ്’ പുതിയ ഇലക്ട്രോണിക് പ്ലാറ്റ്‌ഫോം ആരംഭിച്ചതായി പ്രഖ്യാപിച്ചു. ഇതുവരെ അപേക്ഷ സമർപ്പിക്കാത്ത യോഗ്യരായ വ്യക്തികൾക്ക് ആവശ്യമായ “ടു ഹൂം ഇറ്റ് മേ കൺസേൺ” (ബന്ധപ്പെട്ട അധികാരികളുടെ ശ്രദ്ധയ്ക്ക്) ഔദ്യോഗിക സർട്ടിഫിക്കറ്റുകൾ നൽകുന്നതിനുള്ള നടപടിക്രമങ്ങൾ എളുപ്പമാക്കുകയാണ് ഈ പുതിയ പ്ലാറ്റ്‌ഫോമിലൂടെ ഏജൻസി ലക്ഷ്യമിടുന്നത്. അപേക്ഷകർ തങ്ങളുടെ സിവിൽ ഐഡി കാർഡിന്റെ പകർപ്പ് സമർപ്പിക്കേണ്ടതുണ്ട്. അപേക്ഷിക്കേണ്ട വ്യക്തി മരണപ്പെട്ടിട്ടുണ്ടെങ്കിൽ, മരണ സർട്ടിഫിക്കറ്റിന്റെ പകർപ്പും നൽകേണ്ടതുണ്ടെന്ന് ഏജൻസി അറിയിച്ചു. പൗരത്വം റദ്ദാക്കിക്കൊണ്ടുള്ള ഉത്തരവിൽ പേരുള്ള വ്യക്തിയുടെ പേരിൽ മാത്രമേ അപേക്ഷകൾ സമർപ്പിക്കാവൂ എന്ന് ഏജൻസി വ്യക്തമാക്കി. ആശ്രിതർ വേറെ അപേക്ഷകൾ സമർപ്പിക്കേണ്ടതില്ല. ഉത്തരവിൽ പേരുള്ള വ്യക്തി മരണപ്പെട്ടിട്ടുണ്ടെങ്കിൽ, ബന്ധുക്കൾ ഇലക്ട്രോണിക് പ്ലാറ്റ്‌ഫോം വഴി ആ വ്യക്തിയുടെ പേരും വിവരങ്ങളും ഉപയോഗിച്ച് വേണം അപേക്ഷ സമർപ്പിക്കാൻ. ഏജൻസിയുടെ വെബ്‌സൈറ്റ് നിലവിൽ ‘സഹേൽ’ (Sahel) ആപ്പുമായി ഘടിപ്പിച്ചിട്ടില്ലെന്നുംഏജൻസി വ്യക്തമാക്കി. അതിനാൽ, അപേക്ഷകർ ഏജൻസിയുടെ വെബ്‌സൈറ്റിൽ നിന്ന് ഇഷ്യൂ ചെയ്ത സർട്ടിഫിക്കറ്റ് ഡൗൺലോഡ് ചെയ്യുകയും, ബാക്കി നടപടിക്രമങ്ങൾ പൂർത്തിയാക്കുന്നതിനായി അത് സഹേൽ ആപ്പിലേക്ക് മാന്വലായി അപ്‌ലോഡ് ചെയ്യുകയും വേണം. അപേക്ഷാ വേളയിൽ സാങ്കേതിക തടസ്സങ്ങളോ സിസ്റ്റം പ്രശ്നങ്ങളോ നേരിടുന്നവർക്ക് ഈസ്റ്റ് അൽ-സവാബറിലുള്ള സെൻട്രൽ ഏജൻസിയുടെ ആസ്ഥാനത്തെ ‘സ്റ്റാറ്റസ് അഡ്ജസ്റ്റ്മെന്റ് ഡിപ്പാർട്ട്മെന്റുമായി’ ബന്ധപ്പെടാവുന്നതാണെന്നും ഏജൻസി കൂട്ടിച്ചേർത്തു.