residence permits ദുബായ്: യുഎഇ റസിഡൻസി പെർമിറ്റുള്ള പ്രവാസികളാണോ നിങ്ങൾ. എന്നാൽ, ഇതാണ് നിങ്ങൾക്ക് മോണ്ടിനെഗ്രോ സന്ദർശിക്കാനുള്ള സുവർണാവസരം. യുഎഇയിൽ കുറഞ്ഞത് തുടർച്ചയായി മൂന്ന് വർഷമെങ്കിലും കാലാവധിയുള്ള റസിഡൻഷ്യൽ പെർമിറ്റുള്ള പ്രവാസികൾക്ക് ഇനി വിസയില്ലാതെ മോണ്ടിനെഗ്രോ സന്ദർശിക്കാം. മോണ്ടിനെഗ്രോ സർക്കാർ പ്രഖ്യാപിച്ച താൽക്കാലിക ഇളവിന്റെ ഭാഗമായാണ് ഈ അവസരം. 2026 ഒക്ടോബർ 1 വരെ ഈ ഇളവ് ലഭ്യമാകും.

യോഗ്യരായ യുഎഇ പ്രവാസികൾക്ക് വിസയില്ലാതെ മോണ്ടിനെഗ്രോയിൽ എത്തി 10 ദിവസം വരെ തങ്ങാൻ അനുവാദമുണ്ട്. വിദേശികൾക്കായുള്ള നിയമത്തിലെ നിർദേശങ്ങൾ അനുസരിച്ചാണ് മോണ്ടിനെഗ്രോ സർക്കാർ ഈ തീരുമാനമെടുത്തത്. ടൂറിസം രംഗം മെച്ചപ്പെടുത്തുന്നതിനും യുഎഇയും മോണ്ടിനെഗ്രോയും തമ്മിലുള്ള യാത്രാസൗകര്യങ്ങൾ സുഗമമാക്കുന്നതിനുമാണ് നടപടി. എന്നാൽ, ഇമിഗ്രേഷൻ നിയമങ്ങളിൽ മാറ്റങ്ങൾ വരാൻ സാധ്യതയുള്ളതിനാൽ യാത്ര തിരിക്കുന്നതിന് മുൻപ് ഔദ്യോഗിക വിവരങ്ങൾ പരിശോധിക്കണമെന്ന നിർദ്ദേശവും അധികൃതർ നൽകുന്നുണ്ട്.

ആനുകൂല്യം ലഭിക്കുന്നതിനുള്ള നിബന്ധനകൾ എന്തൊക്കെയാണെന്ന് നോക്കാം:

• റസിഡൻസ് പെർമിറ്റ്

മോണ്ടിനെഗ്രോയിൽ എത്തുന്നതിന് മുൻപ് കുറഞ്ഞത് തുടർച്ചയായി മൂന്ന് വർഷത്തെ കാലാവധിയുള്ള യുഎഇ റസിഡൻസ് പെർമിറ്റ് ഉണ്ടായിരിക്കണം.

• നേരിട്ടുള്ള വിമാനയാത്ര

യുഎഇയിൽ നിന്നുള്ള നേരിട്ടുള്ള വിമാനത്തിൽ മാത്രമേ മോണ്ടിനെഗ്രോയിലേക്ക് യാത്ര ചെയ്യാവൂ. മറ്റ് രാജ്യങ്ങൾ വഴി കണക്ടിങ് വിമാനങ്ങളിൽ വരുന്നവർക്ക് ഈ ആനുകൂല്യം ലഭിക്കില്ല.

• രേഖകൾ

കാലാവധിയുള്ള പാസ്പോർട്ടും ടൂറിസ്റ്റ് ബുക്കിങ് അല്ലെങ്കിൽ യാത്രാ വിവരങ്ങൾ കാണിക്കുന്ന രേഖകളും കൈവശം കരുതണം.

ദുബായിൽ നിന്ന് നേരിട്ടുള്ള വിമാനങ്ങൾ

ദുബായിൽ നിന്ന് മോണ്ടിനെഗ്രോയിലെ തിവാറ്റിലേക്ക് ഫ്‌ലൈദുബായ് നേരിട്ട് വിമാന സർവീസ് നടത്തുന്നുണ്ട്. ആഴ്ചയിൽ 4 വിമാനങ്ങളാണ് ഈ റൂട്ടിലുള്ളത്. ഏകദേശം 5 മണിക്കൂർ 55 മിനിറ്റാണ് യാത്രാസമയം.

യുഎഇയിലെ കൂടുതൽ തൊഴിൽ വാർത്തകൾക്കായി ഈ ലിങ്ക് ക്ലിക്ക് ചെയ്യൂ

കാരുണ്യസ്പർശം; തവണ വ്യവസ്ഥയിൽ വാങ്ങിയ കാറിന്റെ കുടിശികയിൽ തകർന്ന പ്രവാസിയ്ക്ക് കൈത്താങ്ങായി എം എ യൂസഫലി

MA Yusaff Ali ജിദ്ദ: തവണ വ്യവസ്ഥയിൽ വാങ്ങിയ കാറിന്റെ കുടിശികയിൽ തകർന്ന പ്രവാസിയ്ക്ക് കൈത്താങ്ങായി ലുലു ഗ്രൂപ്പ് ചെയർമാൻ എം എ യൂസഫലി. ഹൈദരാബാദ് സ്വദേശി മുഹമ്മദ് അബ്ദുൽ അലീമാണ് യൂസഫലിയുടെ സഹായഹസ്തത്തെ തുടർന്ന് നാട്ടിലേക്ക് മടങ്ങുന്നത്. മരണത്തിനും ജീവിതത്തിനുമിടയിലെ ഇരുട്ടറയിൽ നിന്നും അലീമിന് കൈത്താങ്ങായത് എം എ യൂസഫലിയുടെ ഇടപെടലാണ്. 15 വർഷത്തോളമായി സൗദിയിൽ സെയിൽസ്മാനായിരുന്നു അലീം. ഈ ജോലി ചെയ്യുന്നതിനിടെ അദ്ദേഹം തവണ വ്യവസ്ഥയിൽ ഒരു വാഹനം വാങ്ങിയിരുന്നു. എന്നാൽ, പിന്നീട് ഭാര്യയുടെ ഗുരുതരാവസ്ഥയറിഞ്ഞ് അലീം അടിയന്തരമായി നാട്ടിലേക്ക് മടങ്ങി. ഭാര്യയുടെ വേർപാടിലുണ്ടായ മാനസികാഘാതം മൂലം കൃത്യസമയത്ത് സൗദിയിലേക്ക് തിരിച്ചെത്താൻ അദ്ദേഹത്തിനായില്ല.

വർഷങ്ങൾക്ക് ശേഷം പുതിയ വിസയിൽ ഹൗസ് ഡ്രൈവറായി അദ്ദേഹം സൗദിയിലേക്ക് തിരിച്ചെത്തി. എന്നാൽ, പഴയ കാറിന്റെ കുടിശ്ശികയെ തുടർന്ന് കോടതി അദ്ദേഹത്തിന് യാത്രാവിലക്ക് ഏർപ്പെടുത്തി. ഇതിനിടെ പക്ഷാഘാതം വന്ന് അലീമിന്റെ ശരീരത്തിന്റെ ഒരുവശം തളരുകയും ചെയ്തു. കിങ് അബ്ദുൽ അസീസ് ആശുപത്രിയിലെ ചികിത്സയ്ക്ക് ശേഷം, പരിചരിക്കാൻ ആളില്ലാത്തതിനെ തുടർന്ന് ഇദ്ദേഹത്തെ ‘വഖഫ് ദാറകും’ എന്ന അഭയകേന്ദ്രത്തിലേക്ക് മാറ്റി.

അലീമിന്റെ ദയനീയാവസ്ഥയറിഞ്ഞ എം.എ. യൂസഫലി വാഹന കമ്പനിക്കുള്ള മുഴുവൻ കുടിശ്ശിക തുകയും അടച്ചുതീർത്തു. തുടർന്ന് യാത്രാവിലക്ക് നീക്കുന്നതിനായുള്ള ഔദ്യോഗിക നടപടികൾ ലുലു പ്രതിനിധികൾ വേഗത്തിലാക്കി. യൂസഫലിയുടെ നിർദേശപ്രകാരം ലുലു സൗദി ഡയറക്ടർ മുഹമ്മദ് ഹാരിസ് അഭയകേന്ദ്രത്തിലെത്തി അലീമിനെയും സഹായിയെയും സന്ദർശിക്കുകയും ഇരുവർക്കുമുള്ള വിമാന ടിക്കറ്റുകൾ കൈമാറുകയും ചെയ്യുകയായിരുന്നു.

ഇന്ത്യൻ സഞ്ചാരികൾക്ക് സർപ്രൈസ്; ബുർജ് ഖലീഫയുടെ അറ്റ് ദി ടോപ് സന്ദർശിക്കാൻ യുപിഐ വഴി ടിക്കറ്റ് ബുക്ക് ചെയ്യാം

UPI ദുബായ്: ഇന്ത്യൻ സഞ്ചാരികൾക്ക് ഇതാ ഒരു സന്തോഷ വാർത്ത. ഇനി മുതൽ ഇന്ത്യയിൽ നിന്നുള്ള വിനോദസഞ്ചാരികൾക്ക് ദുബായിലെ ലോകപ്രശസ്തമായ ബുർജ് ഖലീഫയുടെ ‘അറ്റ് ദ് ടോപ്’ സന്ദർശിക്കാനുള്ള ടിക്കറ്റുകൾ യുപിഐ (യുണിഫൈഡ് പേയ്‌മെന്റ്‌സ് ഇന്റർഫേസ്) വഴി ഓൺലൈനായി ബുക്ക് ചെയ്യാം. ഈ സൗകര്യം ലഭ്യമാക്കിയിരിക്കുന്നത് എൻപിസിഐ ഇന്റർനാഷനൽ പേയ്‌മെന്റ്‌സ് ലിമിറ്റഡ് (എൻഐപിഎൽ), നിയോപേ, ഇമാർ എന്റർടൈൻമെന്റ് എന്നിവർ തമ്മിലുള്ള സഹകരണത്തിലൂടെയാണ്.

ഓൺലൈൻ ടിക്കറ്റ് ബുക്കിങ്ങിനായി യുപിഐ സൗകര്യം ഉറപ്പാക്കുന്ന യുഎഇയിലെ ആദ്യ വിനോദസഞ്ചാര കേന്ദ്രമാണ് ബുർജ് ഖലീഫ. യാത്രയ്ക്ക് മുൻപുതന്നെ ഇന്ത്യയിലുള്ള സഞ്ചാരികൾക്ക് ബുർജ് ഖലീഫയുടെ വെബ്സൈറ്റ് വഴി സ്വന്തം യുപിഐ ആപ്പുകൾ ഉപയോഗിച്ച് എളുപ്പത്തിൽ ടിക്കറ്റുകൾ മുൻകൂട്ടി ബുക്ക് ചെയ്യാൻ കഴിയുന്നതാണ്. വിദേശയാത്രകളിൽ ലളിതവും സുരക്ഷിതവുമായ പണമിടപാടുകൾ ആഗ്രഹിക്കുന്ന ദശലക്ഷക്കണക്കിന് ഇന്ത്യൻ സഞ്ചാരികൾക്ക് പുതിയ തീരുമാനം വലിയ ആശ്വാസമാകുമെന്ന് എൻപിസിഐ രാജ്യാന്തര വിഭാഗം സിഇഒ റിതേഷ് ശുക്ല വ്യക്തമാക്കി.

ബുർജ് ഖലീഫയിൽ ഈ സൗകര്യം ലഭിക്കുന്നത് ആഗോളതലത്തിൽ തന്നെ പുതിയൊരു മാറ്റത്തിന്റെ തുടക്കമാണെന്ന് നിയോപേ സിഇഒ വിഭോർ മുൻധാധ അറിയിച്ചു.

ദുബായ്–അൽ ഐൻ റോഡിൽ അപകടം; പിന്നാലെ ഗതാഗതക്കുരുക്ക്, മുന്നറിയിപ്പുമായി ദുബായ് പോലീസ്

Accident in Al Ain Street ദുബായ്–അൽ ഐൻ റോഡിൽ അൽ ഐൻ ഭാഗത്തേക്കുള്ള പാതയിൽ ഉണ്ടായ വാഹനാപകടത്തെ തുടർന്ന് ഗതാഗത തടസ്സമുണ്ടായതായി ദുബായ് പൊലീസ് അറിയിച്ചു. എമിറേറ്റ്സ് സ്ട്രീറ്റിലേക്കുള്ള എക്സിറ്റിന് സമീപമാണ് അപകടം നടന്നത്. എക്‌സിൽ (മുൻ ട്വിറ്റർ) പങ്കുവെച്ച അറിയിപ്പിൽ #RoadStatus, #Accident ഹാഷ്‌ടാഗുകളോടെയാണ് ദുബായ് പൊലീസ് മുന്നറിയിപ്പ് നൽകിയത്. അപകടസ്ഥലത്ത് അടിയന്തരസേവന സംഘങ്ങളും ട്രാഫിക് അധികൃതരും സ്ഥിതിഗതികൾ നിയന്ത്രിച്ചുവരുന്നതിനാൽ, ഈ ഭാഗത്തുകൂടി കടന്നുപോകുന്ന വാഹനമോടിക്കുന്നവർ അതീവ ജാഗ്രത പാലിക്കണമെന്ന് പൊലീസ് അഭ്യർഥിച്ചു. ദുബായെയും അൽ ഐനെയും ബന്ധിപ്പിക്കുന്ന പ്രധാന റോഡുകളിലൊന്നായതിനാൽ, ഇവിടെ ഉണ്ടാകുന്ന ഏത് തടസ്സവും ഗതാഗതക്കുരുക്കിനും യാത്രാ വൈകല്യങ്ങൾക്കും കാരണമാകാൻ സാധ്യതയുണ്ട്. തിരക്കേറിയ സമയങ്ങളിൽ ഇതിന്റെ ആഘാതം കൂടുതൽ അനുഭവപ്പെടുമെന്നും അധികൃതർ അറിയിച്ചു. അൽ ഐൻ ഭാഗത്തേക്ക് യാത്ര ചെയ്യുന്നവരും എമിറേറ്റ്സ് സ്ട്രീറ്റ് എക്സിറ്റ് ഉപയോഗിക്കാൻ പദ്ധതിയിടുന്നവരും വേഗത നിയന്ത്രിച്ച് വാഹനമോടിക്കണമെന്നും, ട്രാഫിക് പൊലീസിന്റെയും റോഡിലെ മുന്നറിയിപ്പ് ബോർഡുകളുടെയും നിർദേശങ്ങൾ കർശനമായി പാലിക്കണമെന്നും ദുബായ് പൊലീസ് നിർദേശിച്ചു.

യുഎഇയുടെ വിവിധ ഭാഗങ്ങളിൽ മഴ; പൊടിക്കാറ്റിനും ശക്തമായ കാറ്റിനും മുന്നറിയിപ്പ്

Rain hits parts UAE അബുദാബി: യുഎഇയുടെ വിവിധ ഭാഗങ്ങളിൽ ഞായറാഴ്ച വൈകുന്നേരം മഴ ലഭിച്ചു. രാജ്യത്ത് സംവഹന മേഘങ്ങളുടെ രൂപീകരണം തുടരുകയാണെന്ന് നാഷണൽ സെന്റർ ഓഫ് മെറ്റീരിയോളജി അറിയിച്ചു. കഴിഞ്ഞ ദിവസവും രാജ്യത്തിന്റെ ചില ഭാഗങ്ങളിൽ മഴയ്ക്കൊപ്പം പൊടിക്കാറ്റും കാഴ്ചപരിധി കുറയുന്ന സാഹചര്യവും അനുഭവപ്പെട്ടിരുന്നു. ഉച്ചയ്ക്ക് 1 മണി മുതൽ രാത്രി 8 മണി വരെ പ്രാബല്യത്തിലുള്ള കാലാവസ്ഥാ മുന്നറിയിപ്പിൽ, പുതിയതും ശക്തവുമായ കാറ്റ് വീശാൻ സാധ്യതയുണ്ടെന്നും, ഇതോടെ പ്രത്യേകിച്ച് ദുബായ്, അബുദാബി, ഷാർജ എന്നിവിടങ്ങളിൽ മഴയ്‌ക്കൊപ്പം പൊടിക്കാറ്റും അനുഭവപ്പെടാമെന്നും എൻസിഎം മുന്നറിയിപ്പ് നൽകി. രാജ്യത്തിന്റെ കിഴക്കൻ, പടിഞ്ഞാറൻ മേഖലകളിലും ഉൾപ്രദേശങ്ങളിലുമായി സംവഹന മേഘങ്ങളുടെ സ്വാധീനം ഉണ്ടാകുമെന്നാണ് കാലാവസ്ഥാ കേന്ദ്രത്തിന്റെ പ്രവചനം. പൊടിക്കാറ്റും കാഴ്ചപരിധി കുറയാനുള്ള സാധ്യതയും ഉള്ളതിനാൽ ഈ മേഖലകളിലൂടെ സഞ്ചരിക്കുന്ന വാഹനയാത്രക്കാർ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു. അതേസമയം, പ്രാദേശിക കാലാവസ്ഥാ നിരീക്ഷണ പ്ലാറ്റ്‌ഫോമായ @storm_aeയുടെ റിപ്പോർട്ട് പ്രകാരം, അൽ ഐനിന് വടക്കുള്ള അൽ ഷുവൈബ് റോഡിൽ ഇതിനകം മഴ ലഭിച്ചിട്ടുണ്ട്. പ്രദേശത്ത് മഴമേഘങ്ങൾ ശക്തിപ്പെടുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. കഴിഞ്ഞ ദിവസത്തെ സമാന കാലാവസ്ഥ തുടരുന്നതിനാൽ, കിഴക്കൻ, പടിഞ്ഞാറൻ മേഖലകളിലെ താമസക്കാർ എൻസിഎമ്മിന്റെ ഔദ്യോഗിക അറിയിപ്പുകൾ പിന്തുടരുകയും, മഴയും പൊടിക്കാറ്റും കാരണം കാഴ്ചപരിധി കുറയാൻ സാധ്യതയുള്ളതിനാൽ വാഹനമോടിക്കുമ്പോൾ കൂടുതൽ ജാഗ്രത പാലിക്കുകയും വേണമെന്ന് അധികൃതർ അഭ്യർഥിച്ചു.

യുഎഇയിലേക്ക് യാത്രയാണോ? ബാഗേജിൽ ഈ സാധനങ്ങളുണ്ടെങ്കിൽ വിമാനത്താവളത്തിൽ കുടുങ്ങാം

UAE Baggage Rules ദുബായ്: വിമാനയാത്രയ്ക്കായി ബാഗേജ് പായ്ക്ക് ചെയ്യുമ്പോൾ നിസ്സാരമെന്ന് കരുതുന്ന ചില വസ്തുക്കൾ പോലും യുഎഇയിലെ വിമാനത്താവളങ്ങളിൽ സുരക്ഷാ പരിശോധനയിലും കസ്റ്റംസിലും വലിയ പ്രശ്നങ്ങൾക്ക് കാരണമായേക്കാം. യാത്രക്കാരുടെയും രാജ്യത്തിന്റെയും സുരക്ഷ ഉറപ്പാക്കാൻ രാജ്യാന്തര വ്യോമയാന ചട്ടങ്ങൾക്കൊപ്പം യുഎഇയിൽ പ്രത്യേക നിയന്ത്രണങ്ങളും നിലവിലുണ്ട്. അതിനാൽ യാത്രയ്ക്ക് മുമ്പ് ബാഗേജിലെ സാധനങ്ങൾ പരിശോധിക്കുന്നത് അനാവശ്യ ബുദ്ധിമുട്ടുകൾ ഒഴിവാക്കാൻ സഹായിക്കും.

ഹാൻഡ് ബാഗേജിൽ അനുവദിക്കാത്തവ

സാധാരണ ഉപയോഗിക്കുന്ന മെഷറിങ് ടേപ്പ് പോലും ആയുധമായി ഉപയോഗിക്കാനുള്ള സാധ്യത കണക്കിലെടുത്ത് ദുബായ് വിമാനത്താവളത്തിൽ ഹാൻഡ് ബാഗേജിൽ അനുവദിക്കില്ല. അതുപോലെ ക്രിക്കറ്റ് ബാറ്റ്, സ്കേറ്റ്ബോർഡ്, മീൻപിടിത്ത ചൂണ്ട തുടങ്ങിയ കായിക ഉപകരണങ്ങളും കാബിൻ ബാഗേജിൽ കൊണ്ടുപോകാൻ പാടില്ല. കളിത്തോക്കുകൾ, വില്ലും അമ്പും, ഡാർട്ടുകൾ എന്നിവയും സുരക്ഷാ പരിശോധനയിൽ പിടിച്ചെടുക്കപ്പെടാം.

കസ്കസിന് കർശന വിലക്ക്

ഇന്ത്യൻ വിഭവങ്ങളിൽ വ്യാപകമായി ഉപയോഗിക്കുന്ന കസ്കസ് (പോപ്പി സീഡ്സ്) യുഎഇയിലേക്ക് കൊണ്ടുവരുന്നത് പൂർണമായും നിരോധിച്ചിരിക്കുന്നു. ലഹരിമരുന്നായ ഒപിയം ലഭിക്കുന്ന പോപ്പി സസ്യത്തിന്റെ ഉപോൽപ്പന്നമായതിനാലാണ് ഈ വിലക്ക്. ചെറിയ അളവിൽ കണ്ടെത്തിയാലും നിയമനടപടികൾ നേരിടേണ്ടി വരാം.

മരുന്നുകളും ഭക്ഷ്യവസ്തുക്കളും

മറ്റ് രാജ്യങ്ങളിൽ സാധാരണ ലഭിക്കുന്ന ചില മരുന്നുകൾ യുഎഇയിൽ കർശന നിയന്ത്രണത്തിലാണ്. ലഹരിയോ മാനസികാവസ്ഥയെ ബാധിക്കുന്ന ഘടകങ്ങളോ അടങ്ങിയ മരുന്നുകൾ കൊണ്ടുവരാൻ ആരോഗ്യ മന്ത്രാലയത്തിന്റെ മുൻകൂർ അനുമതിയും ഡോക്ടറുടെ കുറിപ്പടിയും ആവശ്യമായേക്കും.

കഞ്ചാവ്, CBD ഓയിൽ ഉൾപ്പെടെയുള്ള ഉൽപ്പന്നങ്ങൾ യുഎഇയിൽ പൂർണമായും നിരോധിച്ചിരിക്കുന്നു. കൂടാതെ പന്നിയിറച്ചി, ബേക്കൺ, ഹാം, പോർക്ക് ജെലാറ്റിൻ തുടങ്ങിയ ഉൽപ്പന്നങ്ങൾ രാജ്യത്തേക്ക് കൊണ്ടുവരുന്നതിനും കർശന നിയന്ത്രണങ്ങളുണ്ട്.

ഈ പഴങ്ങളും വിമാനത്തിൽ വിലക്കുള്ളത്

മറ്റ് യാത്രക്കാർക്ക് അസൗകര്യമുണ്ടാകാതിരിക്കാൻ ഇത്തിഹാദ് എയർവേയ്സ് ദുർഗന്ധമുള്ള ചില പഴങ്ങൾ വിമാനത്തിനുള്ളിൽ കൊണ്ടുപോകുന്നത് വിലക്കിയിട്ടുണ്ട്. ഡ്യൂറിയൻ, ചക്ക, പെഡലൈ, മറാങ് തുടങ്ങിയ പഴങ്ങളാണ് ഈ പട്ടികയിലുള്ളത്.

മറ്റ് നിരോധിത വസ്തുക്കൾ

ഷാർജ, അബുദാബി വിമാനത്താവളങ്ങളിൽ ആറ് സെന്റിമീറ്ററിലധികം നീളമുള്ള കത്തികൾ, വാളുകൾ, ബോക്സ് കട്ടറുകൾ, റേസറുകൾ എന്നിവ ഹാൻഡ് ബാഗേജിലും ചെക്ക്ഡ് ബാഗേജിലും അനുവദിക്കില്ല. സ്ഫോടക വസ്തുക്കൾ, ഫയർ എക്സ്റ്റിങ്ഗിഷറുകൾ, അമോണിയ ലായനികൾ എന്നിവയും നിരോധിത പട്ടികയിൽ ഉൾപ്പെടുന്നു.

ഇതുകൂടാതെ ലഹരിമരുന്നുകൾ, ചൂതാട്ട ഉപകരണങ്ങൾ, ആനക്കൊമ്പ്, റേഡിയോ ആക്ടീവ് വസ്തുക്കൾ, വ്യാജ കറൻസി, പൊതുമര്യാദയ്ക്കും യുഎഇ നിയമങ്ങൾക്കും വിരുദ്ധമായ പ്രസിദ്ധീകരണങ്ങൾ എന്നിവ രാജ്യത്തേക്ക് കൊണ്ടുവരുന്നതും കുറ്റകരമാണ്.

യാത്രയ്ക്കു മുമ്പ് വിമാനക്കമ്പനിയുടെയും ബന്ധപ്പെട്ട വിമാനത്താവളത്തിന്റെയും ബാഗേജ്, കസ്റ്റംസ് മാർഗനിർദേശങ്ങൾ പരിശോധിക്കുന്നത് സുരക്ഷിതവും തടസ്സരഹിതവുമായ യാത്രയ്ക്ക് സഹായകരമാകും.

മഴയില്ലാതെ തന്നെ യുഎഇയിൽ എന്തുകൊണ്ട് ഇത്രയധികം ഈർപ്പം അനുഭവപ്പെടുന്നു? കാരണം ഇതാണ്

UAE humid without rain അബുദാബി: വേനൽക്കാലത്ത് യുഎഇയിൽ പല ദിവസങ്ങളിലും ഈർപ്പത്തിന്റെ തോത് 90 ശതമാനത്തിലധികമാകാറുണ്ട്. എന്നിട്ടും ആകാശം തെളിഞ്ഞതായിരിക്കും; ഒരു തുള്ളി മഴ പോലും പെയ്യില്ല. ഇത് പലരെയും ആശയക്കുഴപ്പത്തിലാക്കുന്ന ഒരു കാലാവസ്ഥാ പ്രതിഭാസമാണ്.എമിറേറ്റ്സ് ആസ്ട്രോണമിക്കൽ സൊസൈറ്റി ചെയർമാനും അറബ് യൂണിയൻ ഫോർ ആസ്ട്രോണമി ആൻഡ് സ്പേസ് സയൻസസിലെ അംഗവുമായ ഇബ്രാഹിം അൽ ജർവാൻ പറയുന്നതനുസരിച്ച്, ഈർപ്പം മാത്രം ഉണ്ടായാൽ മഴ പെയ്യില്ല. അന്തരീക്ഷത്തിൽ ജലാംശം എങ്ങനെ സഞ്ചരിക്കുന്നു, മേഘങ്ങൾ രൂപപ്പെടാൻ ആവശ്യമായ മറ്റ് കാലാവസ്ഥാ സാഹചര്യങ്ങൾ ഉണ്ടോ എന്നതാണ് മഴയെ നിർണയിക്കുന്നത്. ഇതേ കാലാവസ്ഥാ സാഹചര്യമാണ് ഹജർ പർവതനിരകളിൽ ഉയരമുള്ള ക്യൂമുലോണിംബസ് മേഘങ്ങൾ രൂപപ്പെടാൻ കാരണമാകുന്നത്. ചിലപ്പോൾ ഇത് പർവതപ്രദേശങ്ങളിലും അൽ ഐൻ മുതൽ അൽ ധൈദ് വരെയുള്ള ചരൽ സമതലങ്ങളിലും ശക്തമായ ഇടിമിന്നലോടുകൂടിയ മഴയ്ക്ക് വഴിവയ്ക്കും. കിഴക്കൻ തീരപ്രദേശങ്ങളിൽ താഴ്ന്ന മേഘങ്ങളും നേരിയ ചാറ്റൽമഴയും ഇതേ സാഹചര്യത്തിൽ അനുഭവപ്പെടാറുണ്ട്. അതേസമയം, അറേബ്യൻ ഗൾഫ് യുഎഇയുടെ തീരപ്രദേശങ്ങളിലെ ഈർപ്പം വർധിപ്പിക്കുന്നതിൽ പ്രധാന പങ്ക് വഹിക്കുന്നു. കടലിലെ ഉയർന്ന താപനില കാരണം വലിയ തോതിൽ വെള്ളം ബാഷ്പീകരിക്കപ്പെടുകയും, അതുവഴി ദുബായ്, അബുദാബി, ഷാർജ, അജ്‌മാൻ തുടങ്ങിയ നഗരങ്ങളിലെ വായുവിൽ ജലാംശം വർധിക്കുകയും ചെയ്യുന്നു. മഴയ്ക്ക് ശേഷവും ഭൂമിയിലെ വെള്ളം വീണ്ടും ബാഷ്പീകരിക്കുന്നതിനാൽ ഈർപ്പനില ഉയരാം. ദുബായിലെയും അബുദാബിയിലെയും വേനൽക്കാല കാലാവസ്ഥ അൽ ഐനിലെയും റുബ് അൽ ഖാലി മരുഭൂമിയിലെയും കാലാവസ്ഥയിൽ നിന്ന് വ്യത്യസ്തമായി അനുഭവപ്പെടുന്നതിന്റെ പ്രധാന കാരണം കടലിനോടുള്ള സമീപ്യതയാണ്. തീരദേശ നഗരങ്ങൾ ചൂടുള്ള കടലിനോട് ചേർന്നുകിടക്കുന്നതിനാൽ ബാഷ്പീകരണത്തിലൂടെ അന്തരീക്ഷത്തിലേക്ക് തുടർച്ചയായി ജലാംശം എത്തിക്കപ്പെടുന്നു. അറേബ്യൻ കടലിൽ നിന്നും ഒമാൻ ഉൾക്കടലിൽ നിന്നും എത്തുന്ന ഈർപ്പമുള്ള വായുവാണ് യുഎഇയിലെ പൊതുവായ ഈർപ്പാവസ്ഥയെ സ്വാധീനിക്കുന്നതെങ്കിലും, തീരപ്രദേശങ്ങളിലെ ഉയർന്ന ഈർപ്പത്തിന് അറേബ്യൻ ഗൾഫ് ഇപ്പോഴും പ്രധാന പ്രാദേശിക സ്രോതസായി തുടരുകയാണെന്ന് കാലാവസ്ഥാ വിദഗ്ധർ വ്യക്തമാക്കുന്നു.

അറിയാതെ പണം ചോരുന്നുണ്ടോ? യുഎഇയിൽ താമസിക്കുന്നവർ ശ്രദ്ധിക്കേണ്ട 10 ചെലവുകൾ

spending leaks UAE residents ഒരു ബ്ലോഗിലേക്കോ ആപ്പിലേക്കോ സ്ട്രീമിംഗ് പ്ലാറ്റ്‌ഫോമിലേക്കോ ഒന്നും ആലോചിക്കാതെ സബ്സ്ക്രൈബ് ചെയ്യുന്നത് പലർക്കും പതിവാണ്. എന്നാൽ പിന്നീട് ആ ചെറിയ തുകകളെല്ലാം നിങ്ങളുടെ ക്രെഡിറ്റ് കാർഡ് കൃത്യമായി ഈടാക്കിക്കൊണ്ടിരിക്കും. Dh35 പോലുള്ള ചെറിയ സബ്സ്ക്രിപ്ഷനുകൾ പോലും മാസങ്ങൾ കഴിയുമ്പോൾ വലിയ ചെലവായി മാറും. ഇനി ഉപയോഗിക്കാത്ത സേവനങ്ങളാണെങ്കിലും, അവ സ്വയം പണം ഈടാക്കുന്നത് നിർത്തുമെന്ന പ്രതീക്ഷയിൽ പലരും സബ്സ്ക്രിപ്ഷൻ റദ്ദാക്കാറില്ല. എന്നാൽ ഓരോ മാസവും ക്രെഡിറ്റ് കാർഡ് സ്റ്റേറ്റ്മെന്റിൽ ആ തുകകൾ വീണ്ടും പ്രത്യക്ഷപ്പെടും. ഇത്തരം കണ്ണിൽപ്പെടാത്ത ചെലവുകൾ പലപ്പോഴും ബാങ്ക് അക്കൗണ്ടിൽ നിന്ന് നൂറുകണക്കിന്, ചിലപ്പോൾ ആയിരക്കണക്കിന് ദിർഹം വരെ ചോർത്തിക്കൊണ്ടിരിക്കും. സാമ്പത്തിക വിദഗ്ധരുടെ അഭിപ്രായത്തിൽ, യുഎഇയിലെ പല താമസക്കാരുടെയും വലിയ സാമ്പത്തിക നഷ്ടങ്ങൾക്ക് കാരണം ആഡംബര വാങ്ങലുകളോ വലിയ നിക്ഷേപങ്ങളോ അല്ല. പകരം, ദൈനംദിന ജീവിതത്തിന്റെ ഭാഗമായി മാറിയ ചെറിയ ചെലവുകളാണ് കൂടുതൽ പണം നഷ്ടപ്പെടുത്തുന്നത്. ഉപയോഗിക്കാത്ത ആപ്പ് സബ്സ്ക്രിപ്ഷനുകൾ, ഭക്ഷണ ഡെലിവറി ഫീസുകൾ, ആലോചിക്കാതെയുള്ള ഓൺലൈൻ ഷോപ്പിംഗ്, ആവശ്യകത അവസാനിച്ചിട്ടും തുടരുന്ന ഓട്ടോമാറ്റിക് പേയ്‌മെന്റുകൾ എന്നിവയാണ് പ്രധാനപ്പെട്ട ഉദാഹരണങ്ങൾ. എല്ലാ ഇഷ്ടങ്ങളും ഉപേക്ഷിക്കുകയാണ് പരിഹാരമെന്ന് സാമ്പത്തിക വിദഗ്ധർ പറയുന്നില്ല. പകരം, നിങ്ങളുടെ പണം എവിടേക്കാണ് പോകുന്നത്, എന്തിനാണ് ചെലവാകുന്നത് എന്നത് ആദ്യം മനസ്സിലാക്കുകയാണ് സാമ്പത്തിക നിയന്ത്രണത്തിലേക്കുള്ള ആദ്യ ചുവടെന്ന് അവർ ചൂണ്ടിക്കാട്ടുന്നു. യുഎഇയിൽ താമസിക്കുന്നവർ നിർബന്ധമായും പരിശോധിക്കേണ്ട പണം ചോർത്തുന്ന 10 പ്രധാന ചെലവുകൾ ഏതൊക്കെയാണെന്ന് നോക്കാം.

1. ഫുഡ് ഡെലിവറി: പ്രതിമാസം Dh1,000 കടക്കും

ജോലി കഴിഞ്ഞ് വീട്ടിലെത്തി ഭക്ഷണം ഓർഡർ ചെയ്യുന്നത് ഇടയ്ക്കൊക്കെ ചെയ്യുന്ന ഒരു ചെറിയ ആഡംബരമായി തോന്നാം. എന്നാൽ ഇത് പതിവായാൽ, അറിയാതെ തന്നെ പ്രതിമാസ ബജറ്റിൽ നിന്ന് വലിയൊരു തുക ചെലവാകാൻ ഇടയാകും.

2. ദിവസേനയുള്ള കാപ്പിയും കഫേ ചെലവുകളും

രാവിലെ ഒരു കാപ്പിയോടെ ദിവസം തുടങ്ങുന്നത് പലരുടെയും ശീലമാണ്. എന്നാൽ ദിവസേനയുള്ള ഈ ചെറിയ ചെലവുകൾ തുടർച്ചയായി ആവർത്തിക്കുമ്പോൾ മാസാവസാനത്തിൽ വലിയ തുകയായി മാറുമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.

3. മറന്നുപോയ സബ്സ്ക്രിപ്ഷനുകൾ

സ്ട്രീമിംഗ് പ്ലാറ്റ്‌ഫോമുകൾ, ഫിറ്റ്നസ് ആപ്പുകൾ, ക്ലൗഡ് സ്റ്റോറേജ് തുടങ്ങിയ ഡിജിറ്റൽ സേവനങ്ങൾ ഉപയോഗം നിർത്തിയ ശേഷവും പലപ്പോഴും പ്രതിമാസ ഫീസ് ഈടാക്കിക്കൊണ്ടിരിക്കും. ഇവ റദ്ദാക്കാൻ മറക്കുന്നത് അനാവശ്യ ചെലവിന് കാരണമാകും.

4. ഗ്രോസറി ഡെലിവറി ആപ്പുകള്‍

ഓൺലൈനായി പലചരക്ക് സാധനങ്ങൾ വാങ്ങുന്നത് സമയം ലാഭിക്കുമെങ്കിലും, ആവശ്യമില്ലാത്ത സാധനങ്ങൾ കൂടി വാങ്ങാൻ ഇത് പലരെയും പ്രേരിപ്പിക്കുമെന്ന് വിദഗ്ധർ മുന്നറിയിപ്പ് നൽകുന്നു.

5. ഓൺലൈൻ ഇംപൾസ് ഷോപ്പിംഗും ഓഫർ കെണികളും

‘ഫ്ലാഷ് സെയിൽ’, ‘പരിമിത സമയ ഓഫർ’, എളുപ്പത്തിലുള്ള പേയ്‌മെന്റ് സൗകര്യങ്ങൾ എന്നിവ പലരെയും ആസൂത്രണം ചെയ്യാത്ത വാങ്ങലുകളിലേക്ക് നയിക്കുന്നു.

6. മറന്നുപോയ ‘Buy Now, Pay Later’ തിരിച്ചടവുകൾ

തവണകളായി പണം അടയ്ക്കുന്ന പദ്ധതികൾ വാങ്ങൽ എളുപ്പമാക്കുമെങ്കിലും, നിരവധി ചെറിയ തിരിച്ചടവുകൾ ഒന്നിച്ചാകുമ്പോൾ വലിയ സാമ്പത്തിക ബാധ്യതയായി മാറും. ഇത് ചെലവുകളെ കുറിച്ച് തെറ്റായ സുരക്ഷാബോധവും സൃഷ്ടിക്കും.

7. ക്രെഡിറ്റ് കാർഡ് ഫീസുകളും ഉപയോഗിക്കാത്ത ആനുകൂല്യങ്ങളും

നിരവധി പേർ വാർഷിക ക്രെഡിറ്റ് കാർഡ് ഫീസ് അടയ്ക്കുന്നുണ്ടെങ്കിലും, അതിന് ലഭിക്കുന്ന ആനുകൂല്യങ്ങൾ യഥാർത്ഥത്തിൽ പ്രയോജനപ്പെടുന്നുണ്ടോയെന്ന് പരിശോധിക്കാറില്ല. ഇത് പലരും ശ്രദ്ധിക്കാതെ പോകുന്ന ഒരു അനാവശ്യ ചെലവാണ്.

8. ഒരിക്കലും പുതുക്കി വിലപേശാത്ത സേവനങ്ങൾക്ക് അധികം പണം നൽകുന്നത്

മൊബൈൽ ഫോൺ പ്ലാനുകൾ, ഇന്റർനെറ്റ് പാക്കേജുകൾ, ഇൻഷുറൻസ്, ബാങ്കിങ് സേവനങ്ങൾ എന്നിവ പഴയ നിരക്കിൽ തന്നെ തുടർന്നുപോകാറുണ്ട്. കരാറുകൾ ഇടയ്ക്കിടെ പരിശോധിച്ച് മികച്ച ഓഫറുകളിലേക്ക് മാറാത്തതിനാൽ പലർക്കും അനാവശ്യമായി കൂടുതൽ പണം ചെലവാകുന്നു.

9. Dh50-ൽ താഴെയുള്ള ചെറിയ ഇടപാടുകൾ

വലിയ ചെലവുകൾ പലരും കൃത്യമായി രേഖപ്പെടുത്തുമെങ്കിലും, Dh50-ൽ താഴെയുള്ള ചെറിയ വാങ്ങലുകൾ പലപ്പോഴും അവഗണിക്കപ്പെടുന്നു. എന്നാൽ ഇത്തരം ചെറിയ ചെലവുകൾ ആവർത്തിക്കുമ്പോൾ മാസാവസാനത്തിൽ വലിയ തുകയായി മാറും.

10. ചെലവാക്കാനുള്ള യഥാർത്ഥ കാരണം മനസ്സിലാക്കാതിരിക്കുക

സാമ്പത്തിക വിദഗ്ധരുടെ അഭിപ്രായത്തിൽ, ചെലവ് കുറയ്ക്കാൻ ശ്രമിക്കുന്നതിലുപരി എന്തുകൊണ്ടാണ് പണം ചെലവാക്കുന്നത് എന്നത് മനസ്സിലാക്കുന്നതാണ് ഏറ്റവും വലിയ സാമ്പത്തിക മാറ്റത്തിന് വഴിയൊരുക്കുന്നത്. ഓരോ വാങ്ങലിനെയും കുറ്റപ്പെടുത്തുന്നതിനുപകരം സ്വന്തം ചെലവുശീലങ്ങൾ വിലയിരുത്തുകയാണ് കൂടുതൽ ഫലപ്രദമെന്നും അവർ പറയുന്നു.