Kuwait Condemns Iranian Aggression കുവൈത്ത് സിറ്റി: രാജ്യത്തെ സുപ്രധാന സിവിലിയൻ, സൈനിക കേന്ദ്രങ്ങൾ ലക്ഷ്യമിട്ട് ശത്രു ഡ്രോണുകൾ ആക്രമണം നടത്തിയ സംഭവത്തെ തുടർന്ന് ഇറാന്റെ തുടർച്ചയായ ആക്രമണങ്ങളെ അതിശക്തമായി അപലപിക്കുന്നതായി കുവൈത്ത് പ്രഖ്യാപിച്ചു. വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ, ഈ ആക്രമണങ്ങൾ കുവൈത്തിന്റെ പരമാധികാരത്തിന്റെ നഗ്നമായ ലംഘനവും, രാജ്യത്തിന്റെ സുരക്ഷയ്ക്കും സ്ഥിരതയ്ക്കും നേരിട്ടുള്ള ഭീഷണിയുമാണെന്ന് വ്യക്തമാക്കി. കൂടാതെ, ഇത്തരം നടപടികൾ അന്താരാഷ്ട്ര നിയമങ്ങൾ, ഐക്യരാഷ്ട്രസഭയുടെ ചാർട്ടർ, യുഎൻ സുരക്ഷാ കൗൺസിൽ പ്രമേയം 2817 എന്നിവയുടെ ഗുരുതരമായ ലംഘനമാണെന്നും മന്ത്രാലയം ചൂണ്ടിക്കാട്ടി. ഇത്തരം ആക്രമണങ്ങൾ തുടർന്നുകൊണ്ടിരിക്കുന്നത് മേഖലയിലെ സാഹചര്യം അപകടകരമായി വഷളാക്കുന്നതാണെന്നും, ഒരു തരത്തിലും ന്യായീകരിക്കാനോ അംഗീകരിക്കാനോ കഴിയാത്ത ആസൂത്രിതമായ ശത്രുതാപരമായ സമീപനത്തിന്റെ ഭാഗമാണിതെന്നും പ്രസ്താവനയിൽ ആരോപിച്ചു. രാജ്യത്തിന്റെ പരമാധികാരം സംരക്ഷിക്കുന്നതിനും ദേശീയ സുരക്ഷ ഉറപ്പാക്കുന്നതിനും പൗരന്മാരുടെയും വിദേശ താമസക്കാരുടെയും സുരക്ഷ കാത്തുസൂക്ഷിക്കുന്നതിനുമായി ആവശ്യമായ എല്ലാ നടപടികളും സ്വീകരിക്കാനുള്ള നിയമപരവും സ്വാഭാവികവുമായ അവകാശം കുവൈത്തിനുണ്ടെന്ന് വിദേശകാര്യ മന്ത്രാലയം വീണ്ടും ആവർത്തിച്ചു.