cooperative societies workers kuwait കുവൈത്ത് സിറ്റി: 70 വയസിന് മുകളിലുള്ള ജീവനക്കാരുടെ സേവനം അവസാനിപ്പിക്കുന്നതിനായി ആവശ്യമായ നടപടികൾ സ്വീകരിക്കാൻ സാമൂഹികകാര്യ മന്ത്രാലയം രാജ്യത്തെ എല്ലാ സഹകരണ സംഘങ്ങൾക്കും യൂണിയനുകൾക്കും സർക്കുലർ പുറത്തിറക്കി. 70 വയസിന് മുകളിലുള്ള ജീവനക്കാരുടെ പട്ടിക അടിയന്തരമായി തയ്യാറാക്കി, നിലവിലുള്ള നിയമങ്ങളും ചട്ടങ്ങളും അനുസരിച്ച് അവരുടെ സേവനം അവസാനിപ്പിക്കണമെന്നും, സർവീസ് ആനുകൂല്യങ്ങളും നഷ്ടപരിഹാരവും (ഇൻഡെംനിറ്റി) ഉൾപ്പെടെയുള്ള എല്ലാ സാമ്പത്തിക ബാധ്യതകളും പൂർണമായി നൽകണമെന്നും സർക്കുലറിൽ നിർദേശിച്ചിട്ടുണ്ട്. സർക്കുലർ പുറത്തിറക്കിയ തീയതി മുതൽ 30 ദിവസത്തിനകം സേവനം അവസാനിപ്പിക്കുന്ന ജീവനക്കാരുടെ പേരുവിവരങ്ങൾ ഉൾപ്പെടുത്തിയ റിപ്പോർട്ട് മന്ത്രാലയത്തിന് സമർപ്പിക്കണമെന്നും സഹകരണ സംഘങ്ങൾക്ക് നിർദേശം നൽകിയിട്ടുണ്ട്. തൊഴിൽ മേഖലയിൽ സ്വദേശിവൽക്കരണം ശക്തിപ്പെടുത്തുക, ദേശീയ പ്രതിഭകൾക്ക് കൂടുതൽ അവസരങ്ങൾ ഒരുക്കുക, സഹകരണ സംഘങ്ങളിലെ പ്രവർത്തനക്ഷമതയും ദീർഘകാല സുസ്ഥിരതയും വർധിപ്പിക്കുക എന്നീ ലക്ഷ്യങ്ങളുടെ ഭാഗമായാണ് ഈ നടപടി സ്വീകരിച്ചതെന്ന് മന്ത്രാലയ വൃത്തങ്ങൾ അറിയിച്ചു.