Malayali Youth Umm Al Quwain Accident അജ്മാൻ: ഉമ്മുൽ ഖുവൈനിലുണ്ടായ വാഹനാപകടത്തിൽ തിരുവനന്തപുരം അടിമലത്തുറ സ്വദേശി മലയാളി യുവാവ് മരിച്ചു. പത്രോസിന്റെ മകൻ ജൈസൺ (35) ആണ് മരിച്ചത്. ഗുരുതരമായി പരുക്കേറ്റ ജൈസണെ ഉമ്മുൽ ഖുവൈൻ ശൈഖ് ഖലീഫ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തൊഴിലാളികളുമായി സഞ്ചരിച്ചിരുന്ന കമ്പനിയുടെ പാസഞ്ചർ വാഹനമാണ് അപകടത്തിൽപ്പെട്ടത്. അജ്മാനിലെ കമ്പനിയിൽ നിന്ന് ഉമ്മുൽ ഖുവൈനിലെ സൈറ്റിലേക്ക് തൊഴിലാളികളുമായി പോകുന്നതിനിടെ രാവിലെ ഏഴുമണിയോടെയായിരുന്നു അപകടം. അപകടത്തിൽ നിരവധി പേർക്ക് പരുക്കേറ്റു. ഇതിൽ നാലുപേർ നിസാര പരുക്കുകളോടെ ആശുപത്രിയിൽ ചികിത്സയിലാണ്. കമ്പനിയിലെ സൂപ്പർവൈസറായിരുന്ന ജൈസൺ അപകടസമയത്ത് വാഹനത്തിന്റെ മുൻസീറ്റിലായിരുന്നു. ഡ്രൈവിങിനിടെ ഡ്രൈവർക്ക് ദേഹാസ്വാസ്ഥ്യം അനുഭവപ്പെട്ടതാണ് അപകടത്തിന് കാരണമെന്നാണ് പ്രാഥമിക വിവരം. നിയന്ത്രണം നഷ്ടപ്പെട്ട വാൻ റോഡരികിലെ ഡിവൈഡറിൽ ഇടിക്കുകയായിരുന്നു. 14 പേരാണ് വാഹനത്തിലുണ്ടായിരുന്നത്. ജൈസൺ അടുത്തിടെയാണ് ഭാര്യ ലില്ലിയെ അജ്മാനിലേക്ക് കൊണ്ടുവന്നത്. അജ്മാനിലെ സ്വകാര്യ ക്ലിനിക്കിൽ നഴ്‌സായി ജോലി ലഭിച്ചതിനെ തുടർന്ന് ലില്ലിയുടെ വിസ നടപടികൾ പുരോഗമിച്ചുവരികയായിരുന്നു. മൂന്നരയും ആറും വയസ്സുള്ള രണ്ട് മക്കളുണ്ട്. മറിയദാസിയാണ് മാതാവ്. ജോൺസൺ, സിസ്റ്റർ മറിയം എന്നിവരാണ് സഹോദരങ്ങൾ. സലാം പാപ്പിനിശ്ശേരി ഉൾപ്പെടെയുള്ളവരുടെ ഇടപെടലിനെ തുടർന്ന് മൃതദേഹം നാട്ടിലെത്തിക്കുന്നതിനുള്ള നടപടികൾ വേഗത്തിൽ പൂർത്തിയാക്കി. മൃതദേഹം കഴിഞ്ഞ ദിവസം നാട്ടിലേക്ക് അയച്ചു. അപകടത്തിൽ പരുക്കേറ്റ് ആശുപത്രിയിൽ പ്രവേശിപ്പിച്ച മറ്റുള്ളവർ സുഖം പ്രാപിച്ചുവരുന്നതായാണ് വിവരം.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

ഈ ദിനങ്ങള്‍ പ്രധാനം; യുഎഇ പ്രവാസികൾക്ക് അടുത്ത വർഷത്തെ അവധികൾ മുൻകൂട്ടി ആസൂത്രണം ചെയ്യാം

UAE expats 2027 holidays അബുദാബി: അടുത്ത ഹിജ്റ വർഷമായ 1448ലെ റമസാൻ, ഈദുൽ ഫിത്ർ, ഈദുൽ അദ്ഹ തുടങ്ങിയ പ്രധാന ഇസ്‌ലാമിക വിശേഷദിവസങ്ങളുടെ സാധ്യതയുള്ള തീയതികൾ യുഎഇ ജ്യോതിശാസ്ത്ര കേന്ദ്രം പുറത്തുവിട്ടു. ഔദ്യോഗികമായി ചന്ദ്രദർശനം സ്ഥിരീകരിക്കുന്നതിന് മുമ്പ് യാത്രകളും മറ്റ് പരിപാടികളും ആസൂത്രണം ചെയ്യാൻ ഈ കണക്കുകൂട്ടലുകൾ സഹായിക്കും.

റമസാൻ 2027

2027 ഫെബ്രുവരി 8 തിങ്കളാഴ്ച യുഎഇയിൽ റമസാൻ വ്രതാരംഭമാകാനാണ് കൂടുതൽ സാധ്യത. ഷഅ്ബാൻ മാസപ്പിറവി ഫെബ്രുവരി 6 ശനിയാഴ്ചയോ 7 ഞായറാഴ്ചയോ ദൃശ്യമാകേണ്ടതുണ്ട്. എന്നാൽ ഫെബ്രുവരി 6ന് യുഎഇ ഉൾപ്പെടെയുള്ള ലോകത്തിന്റെ ഭൂരിഭാഗം പ്രദേശങ്ങളിലും ചന്ദ്രൻ അസ്തമിച്ചതിന് ശേഷമായിരിക്കും സൂര്യാസ്തമയം. അതിനാൽ അന്ന് മാസപ്പിറവി ദൃശ്യമാകാൻ സാധ്യതയില്ല. തുടർന്ന് ഷഅ്ബാൻ 30 ദിവസം പൂർത്തിയാക്കി ഫെബ്രുവരി 8ന് റമസാൻ ഒന്ന് ആരംഭിക്കാനാണ് സാധ്യത.

ഈദുൽ ഫിത്ർ

റമസാൻ 29-ാം ദിവസം മാർച്ച് 8 തിങ്കളാഴ്ചയായിരിക്കും. അന്ന് ശവ്വാൽ മാസപ്പിറവി ദൃശ്യമാകുകയാണെങ്കിൽ മാർച്ച് 9 ചൊവ്വാഴ്ച ഈദുൽ ഫിത്ർ ആഘോഷിക്കാം. മാർച്ച് 8ന് മാസപ്പിറവി കാണാൻ സാധിക്കാത്ത പക്ഷം റമസാൻ 30 ദിവസം പൂർത്തിയാക്കി മാർച്ച് 10 ബുധനാഴ്ച പെരുന്നാൾ ആഘോഷിക്കാനാണ് സാധ്യത.

ഈദുൽ അദ്ഹ

ദുൽഹജ് മാസപ്പിറവി 2027 മേയ് 6 വ്യാഴാഴ്ചയോ മേയ് 7 വെള്ളിയാഴ്ചയോ ദൃശ്യമാകാനാണ് സാധ്യത. ഇതനുസരിച്ച് ദുൽഹജ് ഒന്ന് മേയ് 7നോ 8നോ ആയിരിക്കും. അതിനനുസരിച്ച് അറഫാ ദിനം മേയ് 15 ശനിയാഴ്ചയോ 16 ഞായറാഴ്ചയോ വരാൻ സാധ്യതയുണ്ട്. തുടർന്ന് ഈദുൽ അദ്ഹ മേയ് 16 ഞായറാഴ്ചയോ 17 തിങ്കളാഴ്ചയോ ആഘോഷിക്കാനാണ് കണക്കുകൂട്ടൽ.

ഹിജ്റ പുതുവത്സരം 1449

ദുൽഹജ് മാസപ്പിറവിയുടെ അടിസ്ഥാനത്തിൽ ഹിജ്റ വർഷം 1449ന്റെ തുടക്കമായ മുഹറം ഒന്ന് 2027 ജൂൺ 5 ശനിയാഴ്ച, 6 ഞായറാഴ്ച, 7 തിങ്കളാഴ്ച എന്നിവയിൽ ഏതെങ്കിലും ദിവസമായിരിക്കാം. ശാസ്ത്രീയ കണക്കുകൂട്ടലുകളുടെ അടിസ്ഥാനത്തിലുള്ള സാധ്യതാ തീയതികളാണ് ഇവയെന്നും കൃത്യമായ തീയതികൾ യുഎഇ ചന്ദ്രദർശന സമിതിയുടെ ഔദ്യോഗിക പ്രഖ്യാപനത്തിന് ശേഷമേ സ്ഥിരീകരിക്കുകയുള്ളൂവെന്നും ജ്യോതിശാസ്ത്ര കേന്ദ്രം വ്യക്തമാക്കി.