Deport From Kuwait കുവൈത്ത് സിറ്റി: കുവൈത്തിൽ വിഷമദ്യം കഴിച്ച് ആശുപത്രിയിൽ ചികിത്സയിൽ കഴിയുന്ന വിദേശികളെ നാടുകടത്തു. കുവൈത്ത് സുരക്ഷാ വിഭാഗമാണ് ഇക്കാര്യം അറിയിച്ചത്. യാത്ര ചെയ്യാനാവും വിധം ആരോഗ്യം വീണ്ടെടുത്തതിനു ശേഷമാകും ഇവരെ രാജ്യത്ത് നിന്നും നാടുകടത്തുക. കരിമ്പട്ടികയിൽപെടുത്തി നാടുകടത്തുന്ന ഇവർക്ക് ഇനി കുവൈത്തിലേക്കു തിരിച്ചുവരാനാകില്ല. അതേസമയം, വിഷമദ്യ ദുരന്തവുമായി ബന്ധപ്പെട്ട കേസിൽ അറസ്റ്റിലായ ഇന്ത്യക്കാരനടക്കം 71 വിദേശികളെ തുടർ നടപടികൾക്കായി പബ്ലിക് പ്രോസിക്യൂഷന് കൈമാറി. 23 വിദേശികളാണ് വിഷമദ്യ ദുരന്തത്തെ തുടർന്ന് മരിച്ചത്. 160 പേരാണ് ആശുപത്രിയിൽ ചികിത്സയിലുള്ളത്. വിഷമദ്യ ദുരന്തത്തിന്റെ പശ്ചാത്തലത്തിൽ രാജ്യവ്യാപകമായി കർശന സുരക്ഷാ റെയ്ഡുകളാണ് അധികൃതർ നടത്തി വരുന്നത്.