Jazeel Killed in UAE ദുബായ്: താമസസ്ഥലത്തുണ്ടായ തർക്കം പരിഹരിക്കുന്നതിനിടെ കുത്തേറ്റ് മരിച്ച കോഴിക്കോട് സ്വദേശി ജസീലിന്റെ (32) മൃതദേഹം ഇന്ന് (വ്യാഴം) നാട്ടിലേക്ക് കൊണ്ടുപോകും. നിയമപരമായ എല്ലാ നടപടികളും പൂർത്തിയാക്കി വൈകിട്ടോടെ ഷാർജ രാജ്യാന്തര വിമാനത്താവളം വഴി മൃതദേഹം നാട്ടിലെത്തിക്കുമെന്ന് പ്രവാസി ഇന്ത്യ ഭാരവാഹികൾ അറിയിച്ചു. ഫോറൻസിക് വിഭാഗത്തിൽ നിന്നുള്ള ഓട്ടോപ്സി റിപ്പോർട്ട് ലഭിക്കാൻ വൈകിയതാണ് മൃതദേഹം നാട്ടിലേക്ക് അയക്കുന്നത് നീണ്ടുപോകാൻ കാരണമായത്. ഈ റിപ്പോർട്ട് ഇന്നലെയാണ് അധികൃതർക്ക് ലഭ്യമായത്. ദുബായ് പോലീസിന്റെ അന്വേഷണത്തിനും പോസ്റ്റ്‌മോർട്ടം നടപടികൾക്കും ശേഷം ഇന്നലെ ഉച്ചയോടെയാണ് മരണ സർട്ടിഫിക്കറ്റ് തയ്യാറായത്. കോഴിക്കോട് ചെറുവണ്ണൂർ മധുരബസാർ സ്വദേശിയായ ജസീൽ ദുബായ് അൽഖൂസിലെ താമസസ്ഥലത്തുണ്ടായ സംഘർഷത്തിനിടെയാണ് കൊല്ലപ്പെട്ടത്. ഒരു സംഘം യുവാക്കൾ തമ്മിലുള്ള തർക്കം പരിഹരിക്കാൻ ശ്രമിക്കുന്നതിനിടെ ജസീലിന് കുത്തേൽക്കുകയായിരുന്നു. കഴിഞ്ഞ 15 ദിവസമായി മൃതദേഹം ദുബായ് പോലീസ് മോർച്ചറിയിൽ സൂക്ഷിച്ചിരിക്കുകയായിരുന്നു. മൃതദേഹം നാട്ടിലെത്തിക്കാനുള്ള ശ്രമങ്ങൾക്ക് പ്രവാസി ഇന്ത്യ പ്രവർത്തകൻ ലബീബ് കുന്നക്കാവ് ഉൾപ്പെടെയുള്ളവർ നേതൃത്വം നൽകി. മനോരമ ഓൺലൈൻ ഈ വിഷയം റിപ്പോർട്ട് ചെയ്തതിന് പിന്നാലെ നടപടികൾ വേഗത്തിലാകുകയായിരുന്നു. നടപടികൾ പൂർത്തിയായതോടെ പ്രിയപ്പെട്ടവനെ അവസാനമായി ഒരുനോക്ക് കാണാനുള്ള കാത്തിരിപ്പിലാണ് ബന്ധുക്കളും നാട്ടുകാരും.

ഇന്ത്യ-ഗൾഫ് വിമാന സർവീസുകൾ പുനരാരംഭിക്കുന്നു; കൂടുതൽ സർവീസുകളുമായി എയർ ഇന്ത്യ എക്സ്പ്രസ്

Air India Express restores routes ദുബായ്: പശ്ചിമേഷ്യൻ സംഘർഷങ്ങളെത്തുടർന്ന് ആഗോള വ്യോമയാന മേഖലയിലുണ്ടായ തടസ്സങ്ങൾക്ക് പരിഹാരമാകുന്നു. ഇന്ത്യക്കും യുഎഇ ഉൾപ്പെടെയുള്ള ഗൾഫ് രാജ്യങ്ങൾക്കുമിടയിലുള്ള വിമാന സർവീസുകൾ പഴയപടി പുനഃസ്ഥാപിച്ചു തുടങ്ങി. എയർ ഇന്ത്യ എക്സ്പ്രസ് തങ്ങളുടെ പുതുക്കിയ സമയക്രമം 2026 ഏപ്രിൽ 30 മുതൽ പ്രാബല്യത്തിൽ കൊണ്ടുവന്നു. യുഎഇയിലെ വിവിധ വിമാനത്താവളങ്ങളെ ബന്ധിപ്പിച്ചുകൊണ്ട് ഇന്ത്യയിലെ പ്രമുഖ നഗരങ്ങളിൽ നിന്ന് സർവീസുകൾ ആരംഭിച്ചിട്ടുണ്ട്. ദുബായ്: കണ്ണൂർ, ലഖ്‌നൗ, മംഗളൂരു, തിരുച്ചിറപ്പള്ളി എന്നിവിടങ്ങളിൽ നിന്ന് സർവീസുകൾ ഉണ്ടാകും. അബുദാബി: ഡൽഹി, കൊച്ചി, കോഴിക്കോട്, മംഗളൂരു, മുംബൈ എന്നിവിടങ്ങളിൽ നിന്ന് വിമാനങ്ങൾ എത്തും. ഷാർജ: അമൃത്സർ, ജയ്പൂർ, കണ്ണൂർ, കോഴിക്കോട്, വാരണാസി നഗരങ്ങളുമായി ബന്ധിപ്പിക്കും. മറ്റ് എമിറേറ്റുകൾ: റാസൽഖൈമയിലേക്ക് കൊച്ചി, കോഴിക്കോട് എന്നിവിടങ്ങളിൽ നിന്നും അൽ ഐനിലേക്ക് കോഴിക്കോട് നിന്നും സർവീസുകൾ തുടരും. യുഎഇക്ക് പുറമെ ഖത്തർ, ബഹ്‌റൈൻ, ഒമാൻ, സൗദി അറേബ്യ എന്നിവിടങ്ങളിലേക്കും സർവീസുകൾ പുനഃസ്ഥാപിച്ചു. സൗദി അറേബ്യ: ജിദ്ദ (ബെംഗളൂരു, ഹൈദരാബാദ്, കോഴിക്കോട്, മംഗളൂരു), റിയാദ് (കണ്ണൂർ, കൊച്ചി), ദമ്മാം (കൊച്ചി, കോഴിക്കോട്, മംഗളൂരു). ഒമാൻ: മസ്‌കത്തിലേക്ക് ഡൽഹി, കണ്ണൂർ, മുംബൈ, തിരുവനന്തപുരം എന്നിവിടങ്ങളിൽ നിന്ന് വിമാനങ്ങൾ പുറപ്പെടും. ഖത്തർ & ബഹ്‌റൈൻ: കണ്ണൂർ, കോഴിക്കോട് എന്നിവിടങ്ങളിൽ നിന്ന് സർവീസുകൾ പുനരാരംഭിച്ചു. അമൃത്സർ, ബെംഗളൂരു, ഡൽഹി, ഹൈദരാബാദ്, ജയ്പൂർ, കൊച്ചി, കോഴിക്കോട്, കണ്ണൂർ, ലഖ്‌നൗ, മംഗളൂരു, മുംബൈ, തിരുച്ചിറപ്പള്ളി, തിരുവനന്തപുരം, വാരണാസി എന്നീ നഗരങ്ങളിൽ നിന്ന് സർവീസുകൾ സജീവമാകുന്നതോടെ പ്രവാസികൾക്കും വിനോദസഞ്ചാരികൾക്കും യാത്ര കൂടുതൽ സുഗമമാകും. യുദ്ധസാഹചര്യങ്ങളെത്തുടർന്ന് മുടങ്ങിയ ഗൾഫ് ശൃംഖല പൂർണ്ണതോതിൽ പ്രവർത്തനസജ്ജമായത് യാത്രക്കാർക്ക് വലിയ ആശ്വാസമാണ് നൽകുന്നത്.