കുവൈത്ത് സിറ്റി: കുവൈത്തിൽ ശക്തമായ സുരക്ഷാ പരിശോധന. ഗതാഗത സുരക്ഷ ഉറപ്പാക്കുന്നതിനും നിയമ ലംഘകരെ പിടികൂടുന്നതിനും നിയമം കർശനമായി നടപ്പിലാക്കുന്നതിനുമുള്ള തുടർച്ചയായ ശ്രമങ്ങളുടെ ഭാഗമായി ജൂൺ 4 മുതൽ 7 വരെയുള്ള തീയതികളിൽ നടത്തിയ പരിശോധനാ ക്യാമ്പെയ്‌നിൽ 19,788 ട്രാഫിംഗ് നിയമലംഘനങ്ങൾ രേഖപ്പെടുത്തിയതായി ജനറൽ ട്രാഫിക് വകുപ്പ് അറിയിച്ചു.

ഗുരുതരമായ നിയമലംഘനങ്ങൾ നടത്തിയ 23 വ്യക്തികളെ കസ്റ്റഡിയിലെടുത്തു. 76 താമസ നിയമ ലംഘകരും സാധുവായ തിരിച്ചറിയൽ രേഖകൾ ഹാജരാക്കാത്ത 6 പേരും അറസ്റ്റിലായി. 17 വാഹനങ്ങൾ കണ്ടുകെട്ടി. പിടിയിലായതിൽ പ്രായപൂർത്തിയാകാത്ത 13 പേരെ ജുവനൈൽ പ്രോസിക്യൂഷന് കൈമാറി. നിയമ ലംഘകർക്കെതിരെ കർശന നടപടി സ്വീകരിക്കുമെന്നും വരും ദിവസങ്ങളിലും ശക്തമായ പരിശോധന തുടരുമെന്നും അധികൃതർ കൂട്ടിച്ചേർത്തു.

Recruiting Domestic Workers ഗാർഹിക തൊഴിലാളി റിക്രൂട്ട്‌മെന്റിൽ വലിയ മാറ്റങ്ങളുമായി കുവൈത്ത്; 27 രാജ്യങ്ങൾക്ക് വിലക്ക്

കുവൈത്ത് സിറ്റി: കുവൈത്തിൽ ഗാർഹിക തൊഴിലാളി റിക്രൂട്ട്‌മെന്റിൽ വലിയ മാറ്റങ്ങൾ. ഗാർഹിക തൊഴിലാളി റിക്രൂട്ട്മെന്റുമായി ബന്ധപ്പെട്ട് പുതിയ മാനദണ്ഡങ്ങളും നിയന്ത്രണങ്ങളും ഏർപ്പെടുത്തി കുവൈത്ത് ആഭ്യന്തര മന്ത്രാലയം ഉത്തരവിറക്കി. പുതുക്കിയ തൊഴിൽ നടപടിക്രമങ്ങളുടെ ഭാഗമായി അനുമതിയുള്ള രാജ്യങ്ങളുടെ പട്ടിക പുതുക്കുകയും, 27 രാജ്യങ്ങളിൽ നിന്നുള്ള റിക്രൂട്ട്മെന്റുകൾക്ക് പൂർണ്ണമായോ ഭാഗികമായോ നിരോധനം ഏർപ്പെടുത്തുകയും ചെയ്തു.

പുതിയ സർക്കുലർ പ്രകാരം കുവൈത്തിലേക്ക് ഇനി മുതൽ ഇന്ത്യ ഉൾപ്പെടെ 10 രാജ്യങ്ങളിൽ നിന്ന് മാത്രമേ ഗാർഹിക തൊഴിലാളികളെ (സ്ത്രീകളും പുരുഷന്മാരും) റിക്രൂട്ട് ചെയ്യാൻ അനുവാദമുള്ളൂ. അപേക്ഷാ നടപടികൾ വേഗത്തിലാക്കുന്നതിനായി ഗവർണറേറ്റ് തലത്തിലുള്ള സർവീസ് സെന്ററുകൾ വഴി റിക്രൂട്ട്മെന്റ് നടപടികൾ ഏകോപിപ്പിക്കുമെന്നും അധികൃതർ അറിയിച്ചു. ഫിലിപ്പീൻസ്, ശ്രീലങ്ക, എത്യോപ്യ, ദക്ഷിണാഫ്രിക്ക, ബെനിൻ, സെനഗൽ (പുരുഷന്മാർക്ക് മാത്രം) എരിത്രിയ, വിയറ്റ്‌നാം, നേപ്പാൾ എന്നിവയാണ് ഇന്ത്യയ്ക്ക് പുറമേ റിക്രൂട്ട്മെന്റിന് അനുമതിയുള്ള 10 രാജ്യങ്ങൾ.

വിദേശകാര്യ മന്ത്രാലയം, ആരോഗ്യ മന്ത്രാലയം, പബ്ലിക് അതോറിറ്റി ഫോർ മാൻപവർ എന്നിവയുടെ സംയുക്ത വിലയിരുത്തലുകളുടെയും ശുപാർശകളുടെയും അടിസ്ഥാനത്തിലാണ് 27 രാജ്യങ്ങളെ വിലക്കപ്പെട്ട പട്ടികയിൽ ഉൾപ്പെടുത്തിയത്. ചില രാജ്യങ്ങളിൽ നിന്നുള്ള വനിതാ ഗാർഹിക തൊഴിലാളികൾക്ക് മാത്രമാണ് നിയന്ത്രണം. വിലക്ക് നൽകിയിട്ടുള്ള ഏഷ്യൻ രാജ്യങ്ങൾ: ഭൂട്ടാൻ, മഡഗാസ്‌കർ എന്നിവയാണ്. കെനിയ, ഉഗാണ്ട, നൈജീരിയ, ടോഗോ, മലാവി, ചാഡ്, ജിബൂട്ടി, നൈജർ, ഗിനിയ, ഗിനിയ-ബിസാവു, കേപ് വെർദെ, സിയറ ലിയോൺ, ലൈബീരിയ, മാലി, ബുർക്കിന ഫാസോ, ഗാംബിയ, കാമറൂൺ, ഇക്വറ്റോറിയൽ ഗിനിയ, സെൻട്രൽ ആഫ്രിക്കൻ റിപ്പബ്ലിക്, റിപ്പബ്ലിക് ഓഫ് കോംഗോ, ഡെമോക്രാറ്റിക് റിപ്പബ്ലിക് ഓഫ് കോംഗോ, റുവാണ്ട, ബുറുണ്ടി, അംഗോള തുടങ്ങിയവയാണ് വിലക്ക് ഏർപ്പെടുത്തിയിട്ടുള്ള ആഫ്രിക്കൻ രാജ്യങ്ങൾ.

കുവൈത്തിൽ നയതന്ത്ര കാര്യാലയങ്ങൾ (എമ്പസികൾ) ഉള്ളതും ഇല്ലാത്തതുമായ ഭരണപരമായ ഘടകങ്ങൾ ഉൾപ്പെടെ പരിശോധിച്ചാണ് ഈ തരംതിരിവ് നടത്തിയിരിക്കുന്നതെന്ന് അധികൃതർ ചൂണ്ടിക്കാട്ടി. പുതിയ നിർദ്ദേശം രാജ്യത്തെ എല്ലാ റെസിഡൻസി അഫയേഴ്‌സ് ഡിപ്പാർട്ട്മെന്റുകൾക്കും ബന്ധപ്പെട്ട സർവീസ് സെന്ററുകൾക്കും കൈമാറിയിട്ടുണ്ടെന്നും അധികൃതർ കൂട്ടിച്ചേർത്തു.

Kuwait Air Defense കുവൈത്തിന് നേരെ വീണ്ടും ആക്രമണം; ശത്രു വ്യോമലക്ഷ്യങ്ങളെ ശക്തമായി നേരിട്ട് വ്യോമപ്രതിരോധ സംവിധാനം

Kuwait Air Defense കുവൈത്ത് സിറ്റി: കുവൈത്തിന് നേരെ വീണ്ടും വ്യോമാക്രമണം. കുവൈത്തിന്റെ വ്യോമ പ്രതിരോധ സംവിധാനങ്ങൾ നിലവിൽ ശത്രുതാപരമായ വ്യോമ ലക്ഷ്യങ്ങളെ നേരിടുകയാണെന്ന് സൈനിക ജനറൽ സ്റ്റാഫ് ബുധനാഴ്ച വ്യക്തമാക്കി. അംഗീകൃത പ്രവർത്തന നടപടിക്രമങ്ങൾ അനുസരിച്ചാണ് വ്യോമ പ്രതിരോധ യൂണിറ്റുകൾ ലക്ഷ്യങ്ങളെ പ്രതിരോധിക്കുന്നതെന്ന് ജനറൽ സ്റ്റാഫ് പ്രസ്താവനയിൽ അറിയിച്ചു.

സുരക്ഷയും പൊതുജനങ്ങളുടെ ക്ഷേമവും ഉറപ്പാക്കുന്നതിനായി ബന്ധപ്പെട്ട അധികാരികൾ പുറപ്പെടുവിക്കുന്ന നിർദേശങ്ങളും മാർഗനിർദേശങ്ങളും കർശനമായി പാലിക്കണമെന്നും വിവരങ്ങൾ ഔദ്യോഗികവും അംഗീകൃതവുമായ ഉറവിടങ്ങളിൽ നിന്നുമാത്രം സ്വീകരിക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.

ഇലക്ട്രിക്കല്‍ കേബിളുകള്‍ മോഷ്ടിച്ച് വില്‍പ്പന; കുവൈത്തില്‍ പ്രവാസികള്‍ അറസ്റ്റില്‍

Stealing Electrical Cables kuwait കുവൈത്ത് സിറ്റി: രാജ്യത്ത് കുറ്റകൃത്യങ്ങൾ തടയുന്നതിനും പൊതുമുതൽ സംരക്ഷിക്കുന്നതിനുമായി നടത്തുന്ന കർശന പരിശോധനകളുടെ ഭാഗമായി, വൻതോതിൽ ഇലക്ട്രിക്കൽ കേബിളുകൾ മോഷ്ടിച്ച് വിറ്റിരുന്ന അഞ്ചംഗ സംഘത്തെ കുവൈത്ത് ആഭ്യന്തര മന്ത്രാലയം അറസ്റ്റ് ചെയ്തു. ഈജിപ്ത്, ബംഗ്ലാദേശ് സ്വദേശികളാണ് പിടിയിലായതെന്ന് മന്ത്രാലയം അറിയിച്ചു. ജനറൽ ഡിപ്പാർട്ട്‌മെന്റ് ഓഫ് ക്രിമിനൽ ഇൻവെസ്റ്റിഗേഷനിലെ ഉദ്യോഗസ്ഥർ നടത്തിയ കൃത്യമായ നിരീക്ഷണങ്ങൾക്കും അന്വേഷണങ്ങൾക്കുമൊടുവിലാണ് പ്രതികളെ പിടികൂടിയത്. ഇവരിൽ നിന്ന് വിവിധ അളവിലുള്ള ഇലക്ട്രിക്കൽ കേബിളുകൾ, ചെമ്പ് വസ്തുക്കൾ, കമ്പികൾ മുറിക്കാൻ ഉപയോഗിക്കുന്ന ഉപകരണങ്ങൾ എന്നിവ അധികൃതർ പിടിച്ചെടുത്തു. പോലീസ് ചോദ്യം ചെയ്യലിൽ, തങ്ങൾ വിവിധ സ്ഥലങ്ങളിൽ നിന്ന് കേബിളുകൾ മോഷ്ടിച്ചതായും ഇവ വിറ്റ് നിയമവിരുദ്ധമായി പണമുണ്ടാക്കിയതായും പ്രതികൾ സമ്മതിച്ചു. ഇവരെ കൂടുതൽ ചോദ്യം ചെയ്തതിലൂടെയാണ് മോഷ്ടിച്ച സാധനങ്ങൾ സൂക്ഷിക്കാൻ ഉപയോഗിച്ചിരുന്ന വെയർഹൗസ് കണ്ടെത്തിയത്. കുവൈത്ത് പൗരന്റെ ഉടമസ്ഥതയിലുള്ള ഈ വെയർഹൗസ് പ്രതികൾ പ്രതിമാസം 200 കുവൈത്ത് ദിനാറിന് വാടകയ്ക്ക് എടുത്തിരിക്കുകയായിരുന്നു. ഈ വെയർഹൗസ് മുൻസിപ്പാലിറ്റി ചട്ടങ്ങൾ ലംഘിച്ചാണ് പ്രവർത്തിച്ചിരുന്നത്. കൂടാതെ, ജനറൽ ഫയർ ഫോഴ്‌സ് നിർദ്ദേശിച്ചിട്ടുള്ള സുരക്ഷാ മാനദണ്ഡങ്ങളൊന്നും ഇവിടെ പാലിച്ചിരുന്നില്ല. ജനറൽ ഫയർ ഫോഴ്‌സുമായി ഏകോപിപ്പിച്ച് അധികൃതർ ഉടൻ തന്നെ നിയമനടപടികൾ സ്വീകരിക്കുകയും വലിയ സുരക്ഷാ വീഴ്ചകൾ കണ്ടെത്തിയതിനെ തുടർന്ന് ഈ വെയർഹൗസ് പൂട്ടാൻ ഉത്തരവിടുകയും ചെയ്തു.

കുവൈത്തിൽ ഉച്ചസമയത്തെ ജോലി നിരോധനം: കടുത്ത ചൂടിൽ നിന്ന് തൊഴിലാളികൾക്ക് സംരക്ഷണം, നിയമലംഘനങ്ങൾ റിപ്പോർട്ട് ചെയ്യാം…

Midday Outdoor Work Ban Violation kuwait കുവൈത്ത് സിറ്റി: വേനൽക്കാലത്തെ കടുത്ത ചൂടിൽ നിന്നും സൂര്യതാപത്തിൽ നിന്നും തൊഴിലാളികളെ സംരക്ഷിക്കുന്നതിനായി തുറസ്സായ സ്ഥലങ്ങളിൽ ഉച്ചസമയത്ത് ജോലി ചെയ്യുന്നത് നിരോധിച്ചുകൊണ്ടുള്ള ഉത്തരവ് കുവൈത്തിൽ പ്രാബല്യത്തിൽ വന്നു. ഈ നിയമം തൊഴിലുടമകൾ കൃത്യമായി പാലിക്കുന്നുണ്ടോ എന്ന് നിരീക്ഷിക്കാൻ പബ്ലിക് അതോറിറ്റി ഫോർ മാൻപവർ പ്രത്യേക പരിശോധനാ സംഘത്തെ നിയോഗിച്ചു. നിയന്ത്രിത സമയങ്ങളിൽ തൊഴിലാളികളെക്കൊണ്ട് പുറത്ത് ജോലി ചെയ്യിക്കുന്നത് ശ്രദ്ധയിൽപ്പെട്ടാൽ പൊതുജനങ്ങൾക്ക് അത് അധികൃതരെ അറിയിക്കാവുന്നതാണ്. നിയമലംഘനങ്ങൾ റിപ്പോർട്ട് ചെയ്യാനായി പരിശോധനാ സംഘത്തിന്റെ 24936192 എന്ന നമ്പറിൽ ബന്ധപ്പെടണമെന്ന് അതോറിറ്റി അഭ്യർത്ഥിച്ചു. നിയമം ഫലപ്രദമായി നടപ്പാക്കുന്നതിന് പൊതുജനങ്ങളുടെ സഹകരണം അത്യാവശ്യമാണെന്നും അതോറിറ്റി ഊന്നിപ്പറഞ്ഞു. ഉച്ചസമയത്തെ ജോലി നിരോധനം ലംഘിക്കുന്ന തൊഴിലുടമകൾക്കെതിരെ 2010-ലെ ആറാം നമ്പർ നിയമപ്രകാരം കടുത്ത ശിക്ഷാനടപടികൾ സ്വീകരിക്കുമെന്ന് അധികൃതർ ഓർമ്മിപ്പിച്ചു. നിയമലംഘനം നടത്തുന്ന കമ്പനികളുടെയോ തൊഴിലുടമകളുടെയോ ഔദ്യോഗിക ഫയലുകൾ പിഴവുകൾ തിരുത്തുന്നത് വരെ അതോറിറ്റി താൽക്കാലികമായി സസ്‌പെൻഡ് ചെയ്യും. നിയമലംഘനത്തിന്റെ വ്യാപ്തി അനുസരിച്ച് മറ്റ് കടുത്ത നിയമപരവും ഭരണപരവുമായ നടപടികളും നേരിടേണ്ടി വരും. വേനൽക്കാലത്ത് താപനില ഉയർന്നുനിൽക്കുന്ന പീക്ക് സമയങ്ങളിൽ തുറസ്സായ സ്ഥലങ്ങളിൽ ജോലി ചെയ്യുന്നത് തൊഴിലാളികളുടെ ആരോഗ്യത്തിന് ഗുരുതരമായ ഭീഷണിയാണ് ഉയർത്തുന്നത്. ഹീറ്റ് സ്ട്രോക്ക് (സൂര്യതാപം) ഉൾപ്പെടെയുള്ള ആരോഗ്യപരമായ അപകടസാധ്യതകൾ കുറയ്ക്കുന്നതിനുള്ള വിപുലമായ തൊഴിൽ സുരക്ഷാ നടപടികളുടെ ഭാഗമായാണ് ഈ നിയന്ത്രണം ഏർപ്പെടുത്തിയിരിക്കുന്നത്. നിയമം കർശനമായി നടപ്പാക്കുന്നതിലും എല്ലാ തൊഴിലിടങ്ങളിലും തുടർച്ചയായ ഫീൽഡ് പരിശോധനകൾ നടത്തി അനുസരണം ഉറപ്പാക്കുന്നതിലും തങ്ങൾ പ്രതിജ്ഞാബദ്ധരാണെന്ന് പബ്ലിക് അതോറിറ്റി ഫോർ മാൻപവർ വീണ്ടും വ്യക്തമാക്കി.

വിവാഹബ്രോക്കറായി സോഷ്യല്‍മീഡിയയില്‍, തട്ടിപ്പില്‍ കുടുങ്ങി കുവൈത്ത് പൗരന്‍, പ്രവാസികള്‍ പിടിയില്‍

Fake Marriage Brokerage Scheme കുവൈത്ത് സിറ്റി: സോഷ്യൽ മീഡിയ വഴി വ്യാജരൂപം ധരിച്ചും വഞ്ചനയിലൂടെയും പണം തട്ടിയ കേസിൽ രണ്ട് തുർക്കി പൗരന്മാർക്ക് കുവൈത്ത് ക്രിമിനൽ കോടതി അഞ്ച് വർഷം തടവുശിക്ഷ വിധിച്ചു. തടവിന് പുറമെ ഇരുവർക്കും 150 കുവൈത്ത് ദിനാർ വീതം പിഴയും ചുമത്തിയിട്ടുണ്ട്. ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെന്റ് നടത്തിയ കൃത്യമായ അന്വേഷണത്തിനൊടുവിലാണ് പ്രതികൾ കുടുങ്ങിയത്. പ്രതികളിൽ ഒരാൾ സോഷ്യൽ മീഡിയയിൽ ഒരു വിവാഹ ബ്രോക്കർ എന്ന വ്യാജേന അക്കൗണ്ട് ഉണ്ടാക്കിയാണ് തട്ടിപ്പ് നടത്തിയത്. ഒരു യുവതിയുമായി വിവാഹം ശരിയാക്കി നൽകാമെന്ന് വിശ്വസിപ്പിച്ച് ഇയാൾ ഒരു കുവൈത്ത് പൗരനെ കെണിയിൽ വീഴ്ത്തുകയായിരുന്നു. വിശ്വാസ്യത നേടിയെടുക്കാനായി ഇവർ വ്യാജ വിവാഹ കരാറും ബ്രോക്കറേജ് സേവനങ്ങൾ നൽകാൻ അനുമതിയുള്ള വ്യാജ സർട്ടിഫിക്കറ്റും നിർമ്മിച്ചു നൽകി. തുടർന്ന് കബളിപ്പിക്കപ്പെട്ട സ്വദേശിയിൽ നിന്ന് 250 കുവൈത്ത് ദിനാർ തട്ടിയെടുക്കുകയും ചെയ്തു. പണം കൈമാറിയ ശേഷം, യുവതിയെ നേരിട്ട് കാണാനായി നിശ്ചയിച്ചിരുന്ന ഔദ്യോഗിക കൂടിക്കാഴ്ചാ സ്ഥലത്ത് പരാതിക്കാരൻ എത്തിയെങ്കിലും അവിടെ അങ്ങനെയൊരു യുവതി ഉണ്ടായിരുന്നില്ല. വഞ്ചിക്കപ്പെട്ടതായി ബോധ്യപ്പെട്ടതോടെയാണ് ഇയാൾ പോലീസിൽ പരാതി നൽകിയത്. കേസിൽ ഒന്നാം പ്രതിക്ക് തടവുശിക്ഷ നേരിട്ട് ബാധകമാകുമ്പോൾ, രണ്ടാം പ്രതിയുടെ തടവുശിക്ഷ താൽക്കാലികമായി നിർത്തിവെക്കാൻ കോടതി ഉത്തരവിട്ടിട്ടുണ്ട്. 150 കുവൈത്ത് ദിനാർ ജാമ്യതുക കെട്ടിവെക്കണം എന്ന വ്യവസ്ഥയിലാണ് രണ്ടാം പ്രതിയുടെ ശിക്ഷ നടപ്പാക്കുന്നത് കോടതി സസ്പെൻഡ് ചെയ്തത്.

സൈക്കിൾ യാത്രക്കാരന്റെ മരണം: സ്വദേശി പൗരനെ കുറ്റവിമുക്തനാക്കി കുവൈത്ത് കോടതി

Kuwaiti Asian Cyclist death case കുവൈത്ത് സിറ്റി: കുവൈത്തിലെ അബ്ദാലിയിൽ സൈക്കിൾ യാത്രക്കാരനായ ഏഷ്യൻ സ്വദേശി വാഹനാപകടത്തിൽ മരിച്ച കേസിൽ കുറ്റാരോപിതനായ കുവൈത്ത് പൗരനെ മിസ്ഡിമീനർ അപ്പീൽ കോടതി കുറ്റവിമുക്തനാക്കി. പ്രതിഭാഗം അഭിഭാഷകൻ അബ്ദുള്ള സലാമെ കോടതിയിൽ ഹാജരാക്കിയ ശക്തമായ തെളിവുകളുടെ അടിസ്ഥാനത്തിലാണ് കോടതി ഈ നിർണ്ണായക വിധി പ്രസ്താവിച്ചത്. അപകടത്തിൽപ്പെട്ട ഏഷ്യൻ സ്വദേശി സൈക്കിൾ ഓടിക്കുന്നതിനിടയിൽ പാലിക്കേണ്ട യാതൊരുവിധ സുരക്ഷാ മാനദണ്ഡങ്ങളും മുൻകരുതലുകളും സ്വീകരിച്ചിരുന്നില്ലെന്ന് പ്രതിഭാഗം അഭിഭാഷകൻ തെളിവുകൾ സഹിതം സമർപ്പിച്ചു. ഈ അശ്രദ്ധയാണ് അപകടത്തിലേക്ക് നയിച്ച പ്രധാന ഘടകമെന്ന് കോടതി വിലയിരുത്തി. സൈക്കിൾ യാത്രക്കാരന്റെ ഭാഗത്തുനിന്നുണ്ടായ ഈ ഗുരുതരമായ സുരക്ഷാ വീഴ്ച, വാഹനമോടിച്ചിരുന്ന സ്വദേശി പൗരന്റെ മേൽ ചുമത്തപ്പെട്ടിരുന്ന അശ്രദ്ധ എന്ന കുറ്റത്തെ ഇല്ലാതാക്കുന്നതാണെന്ന് കോടതി വ്യക്തമാക്കി. ഇതോടെ ക്രിമിനൽ ബാധ്യതയ്ക്കുള്ള കാരണങ്ങൾ ഇല്ലാതാവുകയും പ്രതിയെ പൂർണ്ണമായി കുറ്റവിമുക്തനാക്കാൻ കോടതി ഉത്തരവിടുകയുമായിരുന്നു.

കുവൈത്തിലെ പ്രധാന റോഡിൽ ഇന്ന് അർധരാത്രി മുതൽ ഭാഗിക ഗതാഗത നിയന്ത്രണം; ബദൽ പാതകൾ ഉപയോഗിക്കാൻ നിർദേശം

Fifth Ring Road Close Kuwait കുവൈത്ത് സിറ്റി: കുവൈത്തിലെ പ്രധാന പാതകളിലൊന്നായ ഫിഫ്ത് റിങ് റോഡിൽ ഇന്ന് അർധരാത്രി മുതൽ ഭാഗിക ഗതാഗത നിയന്ത്രണം ഏർപ്പെടുത്തുന്നതായി ജനറൽ ട്രാഫിക് ഡിപ്പാർട്ട്‌മെന്റുമായി ഏകോപിപ്പിച്ച് പൊതുമരാമത്ത് മന്ത്രാലയം അറിയിച്ചു.ജഹ്‌റയിൽ നിന്നും കിങ് ഫൈസൽ റോഡിൽ നിന്നും സാൽമിയ ഭാഗത്തേക്ക് പോകുന്ന വാഹനങ്ങൾക്കാണ് ഈ നിയന്ത്രണം ബാധകമാകുക. കൃത്യമായി പറഞ്ഞാൽ, അൽ-സാദിഖ് മേഖലയ്ക്ക് എതിർവശത്തുള്ളതും ദമാസ്കസ് സ്ട്രീറ്റിലേക്ക് നയിക്കുന്നതുമായ റോഡിന്റെ ഭാഗമാണ് അടയ്ക്കുക. ഗതാഗത നിയന്ത്രണം തിങ്കളാഴ്ച രാത്രി 12 മണിക്ക് (അർധരാത്രി) ആരംഭിക്കും. ചൊവ്വാഴ്ച രാവിലെ 5:30 മണിയ്ക്ക് (09 ജൂൺ) അവസാനിക്കും. ഗതാഗത തടസ്സം ഒഴിവാക്കാനും സുഗമമായ വാഹനയാത്ര ഉറപ്പാക്കാനും ഈ സമയങ്ങളിൽ ഡ്രൈവർമാർ മറ്റ് ബദൽ പാതകൾ ഉപയോഗിക്കേണ്ടതാണ്. കൂടാതെ, റോഡിലെ സുരക്ഷ മുൻനിർത്തി ട്രാഫിക് നിർദ്ദേശങ്ങളും സൈൻ ബോർഡുകളും കൃത്യമായി പാലിക്കണമെന്നും അധികൃതർ അഭ്യർത്ഥിച്ചു.

കുവൈത്തിൽ ഗാർഹിക തൊഴിലാളി റിക്രൂട്ട്‌മെന്‍റിൽ പുതിയ പരിഷ്‌കാരം; ഇന്ത്യയ്ക്ക് അനുമതി?

Kuwait for Hiring Domestic Workers കുവൈത്ത് സിറ്റി: കുവൈത്തിൽ ഗാർഹിക തൊഴിലാളികളുടെ (ഡൊമസ്റ്റിക് വർക്കേഴ്‌സ്) റിക്രൂട്ട്‌മെന്റ് നിയന്ത്രിക്കുന്നതിനും തൊഴിൽ നടപടിക്രമങ്ങൾ പരിഷ്‌കരിക്കുന്നതിനുമായി ആഭ്യന്തര മന്ത്രാലയം പുതിയ സർക്കുലർ പുറത്തിറക്കി. ഇതനുസരിച്ച് ഗാർഹിക തൊഴിലാളികളെ കൊണ്ടുവരാൻ അനുമതിയുള്ള രാജ്യങ്ങളുടെ പട്ടിക പുതുക്കുകയും, ചില രാജ്യങ്ങളിൽ നിന്നുള്ള റിക്രൂട്ട്‌മെന്റിന് കർശന നിരോധനം ഏർപ്പെടുത്തുകയും ചെയ്തിട്ടുണ്ട്. പുതിയ സർക്കുലർ പ്രകാരം സ്ത്രീകളും പുരുഷന്മാരും ഉൾപ്പെടെയുള്ള ഗാർഹിക തൊഴിലാളികളെ 10 രാജ്യങ്ങളിൽ നിന്ന് റിക്രൂട്ട് ചെയ്യാൻ അനുമതിയുണ്ട്. അപേക്ഷകൾ വേഗത്തിൽ കൈകാര്യം ചെയ്യുന്നതിനായി ഗവർണറേറ്റ് തലത്തിലുള്ള സർവീസ് സെന്ററുകൾ വഴി റിക്രൂട്ട്‌മെന്റ് നടപടികൾ പൂർത്തിയാക്കുമെന്നും അധികൃതർ അറിയിച്ചു. ഇന്ത്യ, ഫിലിപ്പീൻസ്, ശ്രീലങ്ക, എത്യോപ്യ, നേപ്പാൾ, വിയറ്റ്‌നാം, സൗത്ത് ആഫ്രിക്ക, ബെനിൻ, എറിത്രിയ, സെനഗൽ (പുരുഷന്മാർക്ക് മാത്രം) എന്നിവയാണ് അനുമതിയുള്ള 10 രാജ്യങ്ങൾ. പുതിയ പരിഷ്‌കാരത്തിന്റെ ഭാഗമായി 27 രാജ്യങ്ങളിൽ നിന്നുള്ള ഗാർഹിക തൊഴിലാളി റിക്രൂട്ട്‌മെന്റ് പൂർണ്ണമായും നിരോധിച്ചു. വിദേശകാര്യ മന്ത്രാലയം, ആരോഗ്യ മന്ത്രാലയം, പബ്ലിക് അതോറിറ്റി ഫോർ മാൻപവർ എന്നിവയുടെ കൃത്യമായ വിലയിരുത്തലുകളുടെയും ശുപാർശകളുടെയും അടിസ്ഥാനത്തിലാണ് ഈ കടുത്ത തീരുമാനം. ചില രാജ്യങ്ങളുടെ കാര്യത്തിൽ സ്ത്രീ തൊഴിലാളികളെ കൊണ്ടുവരുന്നതിന് മാത്രമാണ് നിരോധനം ഏർപ്പെടുത്തിയിട്ടുള്ളത്. പട്ടികയിലുള്ള ചില രാജ്യങ്ങൾക്ക് കുവൈത്തിൽ ഔദ്യോഗിക നയതന്ത്ര കാര്യാലയങ്ങൾ ഉണ്ടെന്നതും എന്നാൽ ചില രാജ്യങ്ങൾക്ക് ഇതില്ലെന്നതുമായ ഭരണപരവും നയതന്ത്രപരവുമായ ഘടകങ്ങൾ കണക്കിലെടുത്താണ് ഈ പുതിയ നയം രൂപീകരിച്ചിരിക്കുന്നത്. ഈ പുതിയ നിർദ്ദേശം രാജ്യത്തെ റെസിഡൻസി അഫയേഴ്സ് ഡിപ്പാർട്ട്‌മെന്റുകൾക്കും ബന്ധപ്പെട്ട എല്ലാ സർവീസ് സെന്ററുകൾക്കും കൈമാറിയിട്ടുണ്ടെന്നും പുതിയ ഉത്തരവ് ഇതിനകം തന്നെ പ്രാബല്യത്തിൽ വന്നതായും അധികൃതർ വ്യക്തമാക്കി.

കുവൈത്തിൽ വീണ്ടും പൗരത്വം റദ്ദാക്കൽ; 25 ലധികം പേരുടെ പൗരത്വം കൂടി റദ്ദാക്കി

Kuwait Citizenship Lost കുവൈത്ത് സിറ്റി: കുവൈത്തിൽ വ്യവസ്ഥകൾ ലംഘിച്ച് പൗരത്വം നേടിയവർക്കെതിരെയുള്ള കർശന നടപടികളുടെ ഭാഗമായി 28 വ്യക്തികളുടെ കുവൈത്ത് പൗരത്വം കൂടി റദ്ദാക്കിയതായി അധികൃതർ അറിയിച്ചു. കുവൈത്ത് പൗരത്വ അന്വേഷണത്തിനായുള്ള സുപ്രീം കമ്മിറ്റിയാണ് ഇതുസംബന്ധിച്ച നിർണായക തീരുമാനം കൈക്കൊണ്ടതെന്ന് ‘അൽ-സിയാസ’ ദിനപത്രം റിപ്പോർട്ട് ചെയ്തു. ഇതുമായി ബന്ധപ്പെട്ട ഔദ്യോഗിക ഉത്തരവ് (Decision No. 53/9/2026) തിങ്കളാഴ്ച ഗവൺമെന്റിന്റെ ഔദ്യോഗിക ഗസറ്റായ “കുവൈത്ത് അൽ-യൗം” (Kuwait Al-Youm) പ്രത്യേക സപ്ലിമെന്റായി പ്രസിദ്ധീകരിച്ചു. കുവൈത്ത് പൗരത്വ നിയമത്തിലെ (Nationality Law No. 15/1959) ആർട്ടിക്കിൾ 11-ൽ വ്യക്തമാക്കുന്ന വ്യവസ്ഥകൾക്ക് അനുസൃതമായാണ് ഈ 28 പേരുടെയും പൗരത്വം റദ്ദാക്കാൻ സുപ്രീം കമ്മിറ്റി തീരുമാനിച്ചത്. വ്യാജരേഖകൾ ചമച്ചും, യഥാർത്ഥ വിവരങ്ങൾ മറച്ചുവെച്ചും, മറ്റ് രാജ്യങ്ങളിലെ പൗരത്വം നിലനിർത്തിക്കൊണ്ടും നിയമവിരുദ്ധമായി കുവൈത്ത് പൗരത്വം നേടിയവരെ കണ്ടെത്താൻ രാജ്യത്ത് വലിയ രീതിയിലുള്ള പരിശോധനകളാണ് നടന്നു വരുന്നത്. ഇതിന്റെ തുടർച്ചയായാണ് പുതിയ നടപടിയും ഉണ്ടായിരിക്കുന്നത്.