Dubai Emirates Road crash ദുബായ്: എമിറേറ്റ്സ് റോഡിലുണ്ടായ ദാരുണമായ വാഹനാപകടത്തിൽ മരിച്ചവരുടെ മൃതദേഹങ്ങൾ വിവിധ രാജ്യങ്ങളുടെ സഹകരണത്തോടെയുള്ള ഔദ്യോഗിക നടപടികൾ പൂർത്തിയാക്കി ജന്മനാടുകളിലേക്ക് എത്തിക്കാൻ തുടങ്ങി. ഞായറാഴ്ച (ജൂൺ 14) നാല് മൃതദേഹങ്ങൾ വിമാനമാർഗ്ഗം നാട്ടിലെത്തിച്ചതായി അധികൃതർ സ്ഥിരീകരിച്ചു. ഇതിൽ രണ്ട് മൃതദേഹങ്ങൾ തെലങ്കാനയിലേക്കും, ഒരെണ്ണം വീതം ന്യൂഡൽഹിയിലേക്കും ശ്രീലങ്കയിലേക്കുമാണ് കൊണ്ടുപോയത്. ശനിയാഴ്ച വാരണാസിയിലേക്ക് കൊണ്ടുപോയ മറ്റ് രണ്ട് മൃതദേഹങ്ങളുടെ അന്ത്യകർമ്മങ്ങൾ ഇതിനകം അവിടെ പൂർത്തിയായിട്ടുണ്ട്. മറ്റൊരു മൃതദേഹം ഇന്ന് രാത്രി വൈകി തെലങ്കാനയിലേക്ക് അയക്കുമെന്നാണ് പ്രതീക്ഷിക്കുന്നത്. ജൂൺ 8-നാണ് എമിറേറ്റ്സ് റോഡിൽ വെച്ച് 16 യാത്രക്കാരുമായി പോയ തൊഴിലാളികളുടെ മിനിബസ്, സാങ്കേതിക തകരാർ കാരണം റോഡരികിൽ നിർത്തിയിട്ടിരുന്ന ട്രക്കിലിടിച്ച് വൻ അപകടമുണ്ടായത്. ദുബായ് പോലീസിന്റെ കണക്കനുസരിച്ച് അപകടത്തിൽ 7 പേർ മരിക്കുകയും 9 പേർക്ക് പരിക്കേൽക്കുകയും ചെയ്തിരുന്നു. അപകടത്തിൽപ്പെട്ടവരുടെ കുടുംബങ്ങളെ പിന്തുണയ്ക്കുന്നതിനും ഔദ്യോഗിക നടപടികൾ വേഗത്തിലാക്കുന്നതിനുമായി തെലങ്കാനയിൽ നിന്നുള്ള നിയമസഭാ സാമാജികൻ (എം.എൽ.എ) മേഡിപ്പള്ളി സത്യം (കരീംനഗർ ജില്ലയിലെ ചോപ്പദണ്ഡി മണ്ഡലം) ദുബായിൽ എത്തിയിട്ടുണ്ട്. ഇന്ത്യൻ കോൺസുലേറ്റുമായി സഹകരിച്ചാണ് ഇദ്ദേഹം ആവശ്യമായ നടപടികൾ പൂർത്തിയാക്കുന്നത്. മരിച്ചവർ തെലങ്കാന, ഇന്ത്യയിലെ മറ്റ് സംസ്ഥാനങ്ങൾ, ശ്രീലങ്ക എന്നിങ്ങനെ വിവിധ പ്രദേശങ്ങളിൽ നിന്നുള്ളവരായതിനാൽ, പ്രാദേശിക അധികാരികളും ഇന്ത്യൻ നയതന്ത്ര കാര്യാലയങ്ങളും തമ്മിലുള്ള ശക്തമായ ഏകോപനമാണ് മൃതദേഹങ്ങൾ വേഗത്തിൽ നാട്ടിലെത്തിക്കാൻ സഹായിച്ചതെന്ന് അദ്ദേഹം വ്യക്തമാക്കി.

ഫിഫ ലോകകപ്പ്: യുഎഇയിലും ഗൾഫ് മേഖലയിലും ജീവനക്കാർക്ക് ‘ഹൈബ്രിഡ്’, റിമോട്ട് വർക്ക് സൗകര്യങ്ങൾ

UAE firms remote and hybrid work അബുദാബി: അമേരിക്ക, മെക്സിക്കോ, കാനഡ എന്നീ രാജ്യങ്ങളിലായി നടക്കുന്ന ഫിഫ ലോകകപ്പ് ഫുട്ബോൾ മത്സരങ്ങൾ കാരണം ജൂൺ, ജൂലൈ മാസങ്ങളിൽ ജീവനക്കാരുടെ ഉൽപ്പാദനക്ഷമതയിൽ (productivity) കുറവുണ്ടാകാൻ സാധ്യതയുള്ളതിനാൽ യുഎഇയിലെയും ഗൾഫ് മേഖലയിലെയും ചില കമ്പനികൾ ജീവനക്കാർക്ക് ‘ഹൈബ്രിഡ്’ ജോലി രീതികളും ജോലി സമയത്തിൽ മാറ്റങ്ങളും റിമോട്ട് വർക്ക് (വീട്ടിലിരുന്ന് ജോലി ചെയ്യാനുള്ള) സൗകര്യങ്ങളും അനുവദിക്കുന്നു. റിക്രൂട്ട്‌മെന്റ്, എച്ച്ആർ കൺസൾട്ടന്റുമാർ പറയുന്നതനുസരിച്ച്, യുഎഇയിലെയും ഗൾഫ് രാജ്യങ്ങളിലെയും ഫുട്ബോൾ ആരാധകർ തങ്ങളുടെ പ്രിയപ്പെട്ട ടീമുകളെ പിന്തുണയ്ക്കുന്നതിനായി വാർഷിക അവധി (annual leave) എടുക്കുന്നത് പതിവാണ്. ജൂൺ 11 മുതൽ ജൂലൈ 19 വരെ നടക്കുന്ന മത്സരങ്ങൾ, കളി നടക്കുന്ന സ്ഥലത്തെ ആശ്രയിച്ച് യുഎഇ സമയം രാത്രി 8:00 മണി മുതൽ രാവിലെ 8:00 മണി വരെയാണ് സംപ്രേഷണം ചെയ്യുന്നത്. ഗൾഫ് മേഖലയിലെ ജനങ്ങൾക്ക് ഫുട്ബോളിനോടുള്ള കടുത്ത ആവേശവും വിവിധ രാജ്യങ്ങളിൽ നിന്നുള്ള ജീവനക്കാരുടെ സാന്നിധ്യവും കാരണം ഫിഫ ലോകകപ്പ് പോലുള്ള വലിയ കായിക മാമാങ്കങ്ങൾ ഓഫീസുകളിലെ ജീവനക്കാരുടെ പെരുമാറ്റത്തിലും ഹാജരിലും പ്രകടമായ സ്വാധീനം ചെലുത്താറുണ്ട്. ഈ വർഷത്തെ ലോകകപ്പിൽ സൗദി അറേബ്യ, ഖത്തർ, ഈജിപ്ത്, ജോർദാൻ, മൊറോക്കോ, ടുണീഷ്യ, അൾജീരിയ, ഇറാഖ് എന്നീ 8 അറബ് രാജ്യങ്ങൾ പങ്കെടുക്കുന്നുണ്ട്. മിഡിൽ ഈസ്റ്റിലുടനീളമുള്ള കമ്പനികളിൽ ഈ ജൂൺ, ജൂലൈ മാസങ്ങളിൽ ജീവനക്കാരുടെ ഉൽപ്പാദനക്ഷമതയിൽ വലിയ കുറവുണ്ടാകുമെന്ന് പ്രമുഖ തൊഴിൽ പോർട്ടലായ ഗൾഫ് ടാലന്റ് നടത്തിയ സർവേ വ്യക്തമാക്കുന്നു. മേഖലയിലെ 84 ശതമാനം പ്രൊഫഷണലുകളും ഏതെങ്കിലും തരത്തിൽ മത്സരങ്ങൾ കാണാൻ പദ്ധതിയിടുന്നു. പുരുഷന്മാരിൽ 87 ശതമാനവും സ്ത്രീകളിൽ 74 ശതമാനവും മത്സരങ്ങൾ കാണാൻ താൽപ്പര്യപ്പെടുന്നു. കളി കാണാൻ ആഗ്രഹിക്കുന്നവരിൽ പകുതിയോളം പേർ രാത്രി മുഴുവൻ ഉണർന്നിരുന്ന് തത്സമയം മത്സരങ്ങൾ കാണുമെന്ന് വ്യക്തമാക്കിയപ്പോൾ, ബാക്കിയുള്ളവർ അർദ്ധരാത്രിക്ക് മുൻപുള്ള മത്സരങ്ങൾ മാത്രമോ അല്ലെങ്കിൽ അടുത്ത ദിവസം അതിന്റെ റീപ്ലേകളോ കാണാനാണ് താൽപ്പര്യപ്പെടുന്നത്.

യുദ്ധം തുടങ്ങി 100 ദിവസങ്ങൾക്കുള്ളിൽ അമേരിക്കയും ഇറാനും സമാധാന കരാറിലെത്തി; യുദ്ധത്തിന് വിരാമം?

US Iran peace deal അബുദാബി: ഫെബ്രുവരി 28-ന് ആരംഭിച്ച്, ഏപ്രിൽ 8-ന് താത്കാലിക വെടിനിർത്തൽ പ്രഖ്യാപിച്ച യുഎസ്-ഇറാൻ യുദ്ധത്തിന് ഒടുവിൽ വിരാമം. യുദ്ധം തുടങ്ങി 100-ലധികം ദിവസങ്ങൾക്ക് ശേഷം യുഎസും ഇറാനും തമ്മിൽ ചരിത്രപരമായ സമാധാനക്കരാറിൽ എത്തിയതായി തിങ്കളാഴ്ച പുലർച്ചെ പാകിസ്ഥാൻ പ്രധാനമന്ത്രി ഷെഹബാസ് ഷെരീഫ് അറിയിച്ചു. വരാനിരിക്കുന്ന ജൂൺ 19-ന് സ്വിറ്റ്സർലൻഡിൽ വെച്ച് കരാർ ഔദ്യോഗികമായി ഒപ്പുവെക്കുമെന്ന് ഷെരീഫ് വ്യക്തമാക്കി. “ലബനൻ ഉൾപ്പെടെ എല്ലാ മുന്നണികളിലെയും സൈനിക നടപടികൾ അടിയന്തിരമായും സ്ഥിരമായും അവസാനിപ്പിക്കാൻ ഇരുപക്ഷവും സമ്മതിച്ചിട്ടുണ്ട്,” ഷെഹബാസ് ഷെരീഫ് എക്‌സിൽ കുറിച്ചു. പിന്നാലെ, ഇറാനുമായുള്ള കരാർ പൂർത്തിയായതായി യുഎസ് പ്രസിഡന്റ് ഡൊണാൾഡ് ട്രംപും സ്ഥിരീകരിച്ചു. ഇറാനെതിരെയുള്ള യുഎസ് നാവിക ഉപരോധം പിൻവലിക്കുന്നതായും ഹോർമുസ് കടലിടുക്ക് ടോൾ രഹിതമായി തുറന്നു കൊടുക്കാൻ താൻ അനുമതി നൽകിയതായും ട്രംപ് പ്രഖ്യാപിച്ചു. ഈ മേഖലയിലാകെ “സമാധാനവും സുരക്ഷയും” കൊണ്ടുവരാൻ ഈ കരാറിന് സാധിക്കുമെന്ന് ട്രംപ് കൂട്ടിച്ചേർത്തു. ഇറാൻ ഡെപ്യൂട്ടി വിദേശകാര്യ മന്ത്രിയും നാഷണൽ സെക്യൂരിറ്റി കൗൺസിലും ഈ ധാരണാപത്രത്തിന് അംഗീകാരം നൽകിയതായി സ്ഥിരീകരിച്ചിട്ടുണ്ട്. ഇറാന്റെ അന്തിമ ആവശ്യങ്ങൾ കൂടി ഉൾപ്പെടുത്തിയതിന് ശേഷമാണ് തങ്ങൾ ധാരണാപത്രത്തിന് സമ്മതം മൂകിയതെന്ന് ഇറാന്റെ ഡെപ്യൂട്ടി വിദേശകാര്യ മന്ത്രി കാസിം ഗരീബാബാദി വ്യക്തമാക്കി. ആണവ പ്രശ്നങ്ങൾ, ഉപരോധങ്ങൾ പൂർണ്ണമായി അവസാനിപ്പിക്കൽ, ഇറാന്റെ പുനർനിർമ്മാണത്തിനുള്ള സംവിധാനങ്ങൾ രൂപീകരിക്കൽ, ഇരുവിഭാഗവും കരാർ വ്യവസ്ഥകൾ പാലിക്കുന്നുണ്ടോ എന്ന് നിരീക്ഷിക്കാനുള്ള സംവിധാനം ഏർപ്പെടുത്തൽ എന്നിവയാണ് അടുത്ത 60 ദിവസങ്ങളിലെ ചർച്ചകളിൽ ഉൾപ്പെടുന്ന പ്രധാന വിഷയങ്ങൾ. ഇന്നത്തെ രാത്രി മുതൽ ലബനൻ ഉൾപ്പെടെ എല്ലാ മേഖലകളിലും യുദ്ധത്തിന് “സ്ഥിരമായ അന്ത്യം” കുറിക്കുമെന്നും ഇറാൻ ഉടൻ തന്നെ ചർച്ചകളിലേക്ക് കടക്കുമെന്നും കാസിം പറഞ്ഞു. ആസ്തികൾ മരവിപ്പിച്ചത് പിൻവലിക്കുക, ഉപരോധം അവസാനിപ്പിക്കുക, യുദ്ധം നിർത്തുക എന്നീ വ്യവസ്ഥകളുടെ അടിസ്ഥാനത്തിലായിരിക്കും മധ്യസ്ഥരുടെ സാന്നിധ്യത്തിലുള്ള ഈ ചർച്ചകൾ നടക്കുക. ഇറാന്റെ ഭാഗത്തുനിന്നുള്ള പ്രതിബദ്ധതകൾ വെള്ളിയാഴ്ച മുതൽ പ്രാബല്യത്തിൽ വരും.

വ്യാജ വെബ്‌സൈറ്റുകളും കെണി ആപ്പുകളും; യുഎഇയില്‍ നിങ്ങളുടെ ബാങ്ക് വിവരങ്ങൾ ചോർത്തുന്ന പുതിയ തട്ടിപ്പ് രീതികൾ

Online Scams Abu Dhabi അബുദാബി: ഉപഭോക്തൃ സംരക്ഷണ സേവനങ്ങൾ എന്ന വ്യാജേന പ്രവർത്തിക്കുന്ന വെബ്സൈറ്റുകൾക്കും ഓൺലൈൻ പ്ലാറ്റ്‌ഫോമുകൾക്കുമെതിരെ അബുദാബി പോലീസ് പൊതുജനങ്ങൾക്ക് ജാഗ്രതാ നിർദേശം നൽകി. സെർച്ച് എൻജിനുകൾ വഴി ആളുകളെ കബളിപ്പിച്ച് വ്യക്തിഗത വിവരങ്ങളും ബാങ്ക് അക്കൗണ്ട് വിവരങ്ങളും തട്ടിയെടുക്കാനാണ് തട്ടിപ്പുകാർ ഇത്തരം വ്യാജ വെബ്സൈറ്റുകൾ ഉപയോഗിക്കുന്നത്. ഔദ്യോഗിക ഉപഭോക്തൃ സംരക്ഷണ സ്ഥാപനങ്ങളുടേതിന് സമാനമായ പേര്, ലോഗോ, ബ്രാൻഡിങ് എന്നിവ ഉപയോഗിച്ചാണ് തട്ടിപ്പുകാർ ഈ വ്യാജ വെബ്സൈറ്റുകൾ രൂപകൽപ്പന ചെയ്യുന്നത്. ഉൽപന്നങ്ങളെക്കുറിച്ചോ മറ്റ് സേവനങ്ങളെക്കുറിച്ചോ പരാതി നൽകാൻ ഉപഭോക്താക്കൾ ഓൺലൈനിൽ തിരയുമ്പോൾ, ഇവർ സ്പോൺസേർഡ് ലിങ്കുകളിലൂടെയോ പരസ്യങ്ങളിലൂടെയോ ഉപഭോക്താക്കളെ ഈ വ്യാജ വെബ്സൈറ്റുകളിലേക്ക് വഴിതിരിച്ചുവിടുന്നു. പരാതികൾ വേഗത്തിൽ പരിഹരിക്കാമെന്ന് വാഗ്ദാനം നൽകി ഉപഭോക്താക്കളിൽനിന്ന് പേര്, ഐഡി കാർഡ് വിവരങ്ങൾ, ബാങ്ക് അക്കൗണ്ട് നമ്പറുകൾ എന്നിവ ശേഖരിക്കുന്നു. ചില സന്ദർഭങ്ങളിൽ ഫോണുകളിലും കംപ്യൂട്ടറുകളിലും വിദൂര നിയന്ത്രണം ലഭിക്കുന്ന ആപ്ലിക്കേഷനുകൾ ഡൗൺലോഡ് ചെയ്യാൻ ഉപഭോക്താക്കളോട് ആവശ്യപ്പെടുന്നു. ഇതിലൂടെ ഉപകരണങ്ങളിലുള്ള രഹസ്യ വിവരങ്ങളും ബാങ്കിംഗ് പാസ്‌വേഡുകളും ഇവർ മോഷ്ടിക്കുന്നു. ഔദ്യോഗിക വെബ്‌സൈറ്റുകളുടെ ലിങ്കുകൾ കൃത്യമായി പരിശോധിച്ച് മാത്രം സേവനങ്ങൾ ഉപയോഗിക്കണമെന്നും, അപരിചിതമായ ലിങ്കുകളിൽ ക്ലിക്ക് ചെയ്യുകയോ ബാങ്ക് വിവരങ്ങൾ കൈമാറുകയോ ചെയ്യരുതെന്നും പോലീസ് ഓർമ്മിപ്പിച്ചു.