Ajman shortens government working hours അജ്മാൻ: വേനൽക്കാലത്ത് സർക്കാർ ജീവനക്കാരുടെ ഔദ്യോഗിക ജോലി സമയം കുറച്ചുകൊണ്ട് അജ്മാൻ ഗവൺമെന്റിന്റെ ഹ്യൂമൻ റിസോഴ്‌സ് ഡിപ്പാർട്ട്‌മെന്റ് ഉത്തരവിറക്കി. ജീവനക്കാരുടെ തൊഴിൽ-ജീവിത സന്തുലിതാവസ്ഥ ഉറപ്പാക്കുന്നതിനും കുടുംബങ്ങളുടെ ക്ഷേമത്തെ പിന്തുണയ്ക്കുന്നതിനുമായി നടപ്പിലാക്കുന്ന ‘സൈഫുനാ മുതവാസിൻ’ എന്ന പദ്ധതിയുടെ ഭാഗമായാണ് ഈ നടപടി. യുഎഇയുടെ ‘കുടുംബ വർഷം’ പ്രഖ്യാപനവുമായി ഒത്തുപോകുന്ന ഈ പദ്ധതി ജൂൺ 29 മുതൽ ഓഗസ്റ്റ് 28 വരെയാണ് നിലവിലുണ്ടാകുക. സർക്കാർ സേവനങ്ങളുടെ കാര്യക്ഷമത ഒട്ടും ചോർന്നുപോകാതെ തന്നെ, ജീവനക്കാർക്ക് കൂടുതൽ സുഖകരവും പിന്തുണ നൽകുന്നതുമായ തൊഴിൽ അന്തരീക്ഷം സൃഷ്ടിക്കുകയാണ് ഇതിലൂടെ ലക്ഷ്യമിടുന്നത്. പുതിയ സർക്കുലർ പ്രകാരം ഔദ്യോഗിക ജോലി സമയം പ്രതിദിനം ഏഴ് മണിക്കൂറായി ചുരുക്കിയിട്ടുണ്ട്. തിങ്കൾ മുതൽ വ്യാഴം വരെ: രാവിലെ 7:30 മുതൽ ഉച്ചയ്ക്ക് 2:30 വരെ. വെള്ളിയാഴ്ചകളിൽ: രാവിലെ 7:30 മുതൽ ഉച്ചയ്ക്ക് 12:00 വരെ. സർക്കുലറിൽ വ്യക്തമാക്കിയിട്ടുള്ള നിശ്ചിത ജോലി സമയം ജീവനക്കാർ പൂർത്തിയാക്കുന്നുണ്ടെന്ന് ഉറപ്പുവരുത്തിക്കൊണ്ട്, അതത് സർക്കാർ സ്ഥാപനങ്ങൾക്ക് ജീവനക്കാർക്കായി ‘ഫ്ലെക്സിബിൾ വർക്കിംഗ്’ രീതികൾ വേണമെങ്കിൽ നടപ്പിലാക്കാവുന്നതാണെന്ന് വകുപ്പ് അറിയിച്ചു.

പോക്കറ്റ് ചോരും! പാസ്‌പോർട്ട് നഷ്ടപ്പെടുകയോ കേടുവരികയോ ചെയ്താൽ പ്രവാസികൾക്ക് എട്ടിന്‍റെ പണി

Passport ദുബായ് / ജിദ്ദ: രാജ്യാന്തര തലത്തിൽ ഇന്ത്യൻ പാസ്‌പോർട്ട് നിരക്കുകൾ കേന്ദ്ര സർക്കാർ കുത്തനെ വർധിപ്പിച്ചു. വിദേശകാര്യ മന്ത്രാലയം ‘പാസ്‌പോർട്ട് (ഭേദഗതി) ചട്ടങ്ങൾ 2026’ വഴി വിജ്ഞാപനം ചെയ്ത പുതുക്കിയ നിരക്കുകൾ ജൂലൈ ഒന്നു മുതൽ പ്രാബല്യത്തിൽ വരും. ഇന്ത്യയിലെ നിരക്കുകൾക്ക് ആനുപാതികമായി ഗൾഫ് രാജ്യങ്ങളിലും വലിയ രീതിയിലുള്ള വർധനവുണ്ടാകും. ഗൾഫ് രാജ്യങ്ങളിലെ ഇന്ത്യൻ എംബസികൾ ഔദ്യോഗിക ഫീസ് ഘടന ഇതുവരെ പ്രഖ്യാപിച്ചിട്ടില്ലെങ്കിലും നിരക്ക് വർധന ലക്ഷക്കണക്കിന് വരുന്ന സാധാരണക്കാരായ പ്രവാസികൾക്ക് വലിയ സാമ്പത്തിക ബാധ്യതയാകും വരുത്തിവെക്കുക. ഇന്ത്യയിൽ സാധാരണ വിഭാഗത്തിൽ 36 പേജുള്ള പാസ്‌പോർട്ടിന്റെ നിരക്ക് 1,500 രൂപയിൽ നിന്ന് 2,500 രൂപയായും തത്കാൽ നിരക്ക് 3,500ൽ നിന്ന് 5,000 രൂപയായും ഉയർത്തി. 60 പേജുള്ള ജംബോ പാസ്‌പോർട്ടിന് സാധാരണ വിഭാഗത്തിൽ 3,500 രൂപയും തത്കാലിന് 6,000 രൂപയുമാണ് പുതിയ നിരക്ക്. പാസ്‌പോർട്ട് നഷ്ടപ്പെടുകയോ കേടുപാടുകൾ സംഭവിക്കുകയോ ചെയ്താൽ ഡ്യൂപ്ലിക്കേറ്റ് എടുക്കുന്നതിനാണ് ഏറ്റവും വലിയ നിരക്ക് വർധനവ് വന്നിരിക്കുന്നത്. 36 പേജിന് സാധാരണ വിഭാഗത്തിൽ 5,000 രൂപയും തത്കാലിൽ 7,500 രൂപയുമാണ് ഇനി നൽകേണ്ടി വരിക. സൗദിയിലെ ഇന്ത്യൻ എംബസിയോ ജിദ്ദ കോൺസുലേറ്റോ ഔദ്യോഗിക റിയാൽ നിരക്കുകൾ ഇതുവരെ പ്രസിദ്ധീകരിച്ചിട്ടില്ലെങ്കിലും വിജ്ഞാപനത്തിന് ശേഷം വരാൻ സാധ്യതയുള്ള ഏകദേശ കണക്കുകൾ ഇങ്ങനെയാണ്: 36 പേജ് സാധാരണ പാസ്‌പോർട്ട്: നിലവിലെ ഫീസ് 277 സൗദി റിയാലിൽ നിന്ന് ഏകദേശം 462 റിയാലായി വർധിക്കും. 36 പേജ് തത്കാൽ പാസ്‌പോർട്ട്: 829 റിയാലിൽ നിന്നും ഏകദേശം 1,106 റിയാലാകും. 60 പേജ് സാധാരണ പാസ്‌പോർട്ട്: 369 റിയാലിൽ നിന്ന് ഏകദേശം 646 റിയാലാകും. പ്രായപൂർത്തിയാകാത്തവർക്കുള്ള സാധാരണ പാസ്‌പോർട്ട്: 185 റിയാലിൽ നിന്ന് ഏകദേശം 323 റിയാലായി ഉയർന്നേക്കും. നഷ്ടപ്പെട്ടതോ കേടുവന്നതോ ആയ പാസ്‌പോർട്ട് (36 പേജ്): 553 റിയാലിൽ നിന്ന് ഏകദേശം 923 റിയാലാകും. പൊലീസ് ക്ലിയറൻസ് സർട്ടിഫിക്കറ്റ് : 93 റിയാലിൽ നിന്ന് ഏകദേശം 138 റിയാലായി ഉയർന്നേക്കും. എട്ടു വയസ്സുവരെയുള്ള കുട്ടികൾക്കും 60 വയസ്സിന് മുകളിലുള്ള മുതിർന്ന പൗരന്മാർക്കും പുതിയ പാസ്‌പോർട്ടിന് അപേക്ഷിക്കുമ്പോൾ 10 ശതമാനം ഇളവ് അനുവദിച്ചിട്ടുണ്ട്. എന്നാൽ പാസ്‌പോർട്ട് പുതുക്കുന്നവർക്ക് ഈ ഇളവ് ബാധകമായിരിക്കില്ല. 35 ലക്ഷത്തിലേറെ ഇന്ത്യൻ പ്രവാസികൾ താമസിക്കുന്ന യുഎഇയിലെ ഇന്ത്യൻ മിഷനുകളും പുതിയ നിരക്കുകൾ ഔദ്യോഗികമായി വരും ദിവസങ്ങളിൽ പ്രഖ്യാപിക്കും. നിലവിൽ യുഎഇയിൽ സാധാരണ പാസ്‌പോർട്ടിന് വെൽഫെയർ ഫണ്ടും സർവീസ് ചാർജും ഉൾപ്പെടെ 302.50 ദിർഹമാണ് അപേക്ഷകർ നൽകുന്നത്.

ഇത്തിഹാദ് റെയിൽ ചരിത്രയാത്രയ്ക്ക് ഒരുങ്ങുന്നു; ആദ്യ പാസഞ്ചർ സീറ്റിലിരിക്കാൻ അർഹനായ വ്യക്തിയെ ജനങ്ങൾക്ക് തെരഞ്ഞെടുക്കാം

Etihad Rail അബുദാബി: ഇത്തിഹാദ് റെയിൽ തങ്ങളുടെ ആദ്യത്തെ യാത്രാ സർവീസിന് തുടക്കം കുറിക്കാൻ ഒരുങ്ങുമ്പോൾ, ഒരു ചരിത്രപരമായ തീരുമാനവുമായി രംഗത്തെത്തിയിരിക്കുകയാണ്. ഫുജൈറയിൽ നിന്ന് അബുദാബിയിലേക്കുള്ള ഈ ഉദ്ഘാടന യാത്രയിലെ ഒന്നാം നമ്പർ കാരിയേജിലെ, ഒന്നാം നമ്പർ സീറ്റിൽ (Seat 1, Carriage 1) ഇരുന്ന് ചരിത്രം കുറിക്കേണ്ടത് ആരാണെന്ന് തീരുമാനിക്കാനുള്ള അവസരം പൊതുജനങ്ങൾക്കാണ് നൽകിയിരിക്കുന്നത്. ‘നമ്മെെയെല്ലാം പ്രതിനിധീകരിക്കുന്ന യാത്രികൻ’ (The Passenger Who Represents Us All) എന്ന പേരിൽ രാജ്യവ്യാപകമായി സംഘടിപ്പിക്കുന്ന ഒരു കാമ്പെയ്‌നിലൂടെയാണ് റെയിൽവേ ഓപ്പറേറ്റർമാർ നാമനിർദ്ദേശങ്ങൾ ക്ഷണിച്ചിരിക്കുന്നത്. കഠിനാധ്വാനം, ഉദാരമനസ്കത, അല്ലെങ്കിൽ നിസ്വാർത്ഥ സേവനം എന്നിവയിലൂടെ സ്വന്തം സമൂഹത്തിൽ അർത്ഥവത്തായ മാറ്റങ്ങൾ വരുത്തിയ വ്യക്തികളെ നാമനിർദ്ദേശം ചെയ്യാൻ യുഎഇയിലുടനീളമുള്ള ജനങ്ങളോട് ഇതിഹാദ് റെയിൽ അഭ്യർത്ഥിച്ചു. തെരഞ്ഞെടുക്കപ്പെടുന്ന ഒരു വ്യക്തിക്ക് ജൂൺ 30-ന് ഫുജൈറയിൽ നിന്ന് അബുദാബിയിലേക്കുള്ള ഇതിഹാദ് റെയിലിന്റെ ആദ്യ യാത്രയിൽ പങ്കെടുക്കാൻ അവസരം ലഭിക്കും. ഈ ദേശീയ നാഴികക്കല്ലിന് സാക്ഷ്യം വഹിക്കുന്ന ആദ്യ യാത്രക്കാരനായി ആ വ്യക്തി മാറും. സാമൂഹിക സേവനം, സന്നദ്ധ പ്രവർത്തനം അല്ലെങ്കിൽ കാരുണ്യപ്രവർത്തികൾ എന്നിവയിലൂടെ ചുറ്റുമുള്ളവരുടെ ജീവിതത്തെ നല്ല രീതിയിൽ സ്വാധീനിച്ച സാധാരണക്കാരായ വ്യക്തികളെ ആദരിക്കുകയാണ് ഈ പദ്ധതിയുടെ ലക്ഷ്യം. ഈ പദ്ധതിയെക്കുറിച്ച് ഇതിഹാദ് റെയിൽ മൊബിലിറ്റിയുടെ കൊമേഴ്സ്യൽ എക്സിക്യൂട്ടീവ് ഡയറക്ടർ അദ്രാ അൽമൻസൂരി പറഞ്ഞത് ഇങ്ങനെയാണ്: “ഇത്തിഹാദ് റെയിലിലേക്ക് യാത്രക്കാരെ ആദ്യമായി സ്വാഗതം ചെയ്യാൻ ഞങ്ങൾ തയ്യാറെടുക്കുമ്പോൾ, ഈ വലിയ ബഹുമതി നമ്മുടെ രാജ്യത്തെ രൂപപ്പെടുത്താൻ സഹായിച്ച മൂല്യങ്ങളെ പ്രതിഫലിപ്പിക്കുന്ന ഒരാൾക്ക് തന്നെ നൽകണമെന്ന് ഞങ്ങൾ ആഗ്രഹിച്ചു.” “സമൂഹങ്ങളെ ശക്തിപ്പെടുത്തുകയും മറ്റുള്ളവരെ പിന്തുണയ്ക്കുകയും യുഎഇയെ ഓരോ ദിവസവും മുന്നോട്ട് നയിക്കാൻ സഹായിക്കുകയും ചെയ്യുന്ന വ്യക്തികൾക്കുള്ള ഒരു ആദരവാണ് ‘നമ്മെെയെല്ലാം പ്രതിനിധീകരിക്കുന്ന യാത്രികൻ’ എന്ന ഈ പരിപാടി.” യുഎഇയിലുടനീളമുള്ള ആർക്കും ഈ പ്രക്രിയയിൽ പങ്കാളികളാകാം. പൊതുജനങ്ങൾക്ക് തങ്ങളുടെ സുഹൃത്ത്, കുടുംബാംഗം, സഹപ്രവർത്തകൻ, അയൽക്കാരൻ അല്ലെങ്കിൽ സമൂഹത്തിലെ മറ്റേതെങ്കിലും വ്യക്തി എന്നിവരെ നാമനിർദ്ദേശം ചെയ്യാം. എന്തുകൊണ്ടാണ് ആ വ്യക്തി ഈ അംഗീകാരത്തിന് അർഹനാകുന്നത് എന്ന കാര്യവും വ്യക്തമാക്കേണ്ടതുണ്ട്. നാമനിർദ്ദേശങ്ങൾ സമർപ്പിക്കേണ്ട അവസാന സമയം ജൂൺ 27 ശനിയാഴ്ച രാവിലെ 10 മണി വരെയാണ്. ലഭിക്കുന്ന അപേക്ഷകൾ ഇതിഹാദ് റെയിൽ പരിശോധിക്കുകയും, തിരഞ്ഞെടുക്കപ്പെടുന്ന വ്യക്തിയുടെ പേര് ഉദ്ഘാടന സർവീസിന് തൊട്ടുമുമ്പ് പ്രഖ്യാപിക്കുകയും ചെയ്യും. പൊതുജനങ്ങൾക്ക് നാമനിർദ്ദേശത്തിനുള്ള അവസരം നൽകുന്നതിലൂടെ, യുഎഇയുടെ ഗതാഗത ചരിത്രത്തിലെ ഏറ്റവും വലിയൊരു നാഴികക്കല്ല് കുറിക്കുന്ന വേളയിൽ സാധാരണക്കാരായ ഹീറോകളിലേക്ക് ശ്രദ്ധ കേന്ദ്രീകരിക്കാനാണ് ഇതിഹാദ് റെയിൽ ശ്രമിക്കുന്നത്. ഇത്തിഹാദ് റെയിലിന്റെ ഈ പാസഞ്ചർ സർവീസ് യുഎഇയിലെ റെയിൽ യാത്രകളുടെ ഒരു പുതിയ യുഗത്തിന് തുടക്കം കുറിക്കുമെന്നാണ് പ്രതീക്ഷിക്കുന്നത്. ഇത് എമിറേറ്റുകൾക്കിടയിൽ അതിവേഗത്തിലും മികച്ച രീതിയിലും യാത്ര ചെയ്യാൻ താമസക്കാർക്കും സന്ദർശകർക്കും ഒരുപോലെ സഹായകരമാകും.

ദുബായ് സമ്മർ സർപ്രൈസ്: ഈ വേനൽക്കാലത്ത് നിങ്ങളെ കാത്തിരിക്കുന്ന 12 പ്രധാന ആകർഷണങ്ങൾ

Dubai Summer Surprises ദുബായ്: 60 ദിവസം നീണ്ടുനിൽക്കുന്ന ഷോപ്പിംഗ്, വിനോദം, ഭക്ഷണവിരുന്ന്, കുടുംബങ്ങൾക്കായുള്ള വിവിധ പരിപാടികൾ എന്നിവയുമായി ദുബായ് സമ്മർ സർപ്രൈസസ് ജൂലൈ 2 മുതൽ ആഗസ്റ്റ് 30 വരെ വീണ്ടുമെത്തുന്നു. ഈ വർഷത്തെ പതിപ്പിൽ അപ്പാർട്ട്മെന്റ് സമ്മാനങ്ങൾ, വൻകിട റീട്ടെയിൽ വിൽപ്പനകൾ, സംഗീത കച്ചേരികൾ, റെസ്റ്റോറന്റ് ഓഫറുകൾ, സ്റ്റേക്കേഷൻ ഓഫറുകൾ എന്നിവ ഉൾപ്പെടുന്നു. ഈ വേനൽക്കാലത്ത് താമസക്കാരെ കാത്തിരിക്കുന്ന 12 പ്രധാന ആകർഷണങ്ങൾ താഴെ പറയുന്നവയാണ്:

1. ദുബായിൽ ഒരു സ്വന്തം വീട് സ്വന്തമാക്കാം
   ആദ്യമായി, പുതിയ ‘വിൻ യുവർ ഹോം ഇൻ ദുബായ്’ കാമ്പെയ്‌നിലൂടെ 50 മില്യൺ ദിർഹത്തിലധികം വിലമതിക്കുന്ന 12 റെസിഡൻഷ്യൽ യൂണിറ്റുകളിൽ ഒന്ന് സ്വന്തമാക്കാൻ ഡിഎസ്എസ് അവസരമൊരുക്കുന്നു. ഒരു ഇന്ത്യൻ സ്വദേശിക്കും ഒരു കസാക്കിസ്ഥാൻ സ്വദേശിക്കും ഇതിനകം തന്നെ സ്റ്റുഡിയോ അപ്പാർട്ട്മെന്റുകൾ ലഭിച്ചുകഴിഞ്ഞു. ബാക്കിയുള്ള വീടുകൾ ഉത്സവകാലത്ത് വിതരണം ചെയ്യും.
2. പുതിയൊരു കാർ വീട്ടിലേക്ക് കൊണ്ടുപോകാം
   ഈ വർഷം കാർ റാഫിളുകൾ വീണ്ടുമെത്തുന്നു, വിവിധ പ്രമോഷനുകളിലൂടെ 35 വാഹനങ്ങളാണ് സമ്മാനമായി നൽകുന്നത്. ഇതിൽ പങ്കെടുക്കുന്ന മാളുകളിൽ നിന്ന് 200 ദിർഹം ചിലവഴിക്കുന്ന ഉപഭോക്താക്കൾക്ക് ‘എക്സീഡ്’ കാറുകൾ നേടാനുള്ള നറുക്കെടുപ്പിൽ പങ്കെടുക്കാം.
3. 3 കിലോഗ്രാം സ്വർണം നേടാം
   സ്വർണ്ണാഭരണങ്ങൾ വാങ്ങുന്നവർക്കും ഭാഗ്യം പരീക്ഷിക്കാം. പങ്കാളിത്തമുള്ള ജ്വല്ലറികളിൽ നിന്ന് 500 ദിർഹം ചിലവഴിക്കുന്നവർക്ക് ‘സിറ്റി ഓഫ് ഗോൾഡ്’ പ്രമോഷനിൽ പങ്കെടുക്കാം, ഇതിലെ വിജയികൾക്ക് 3 കിലോഗ്രാം സ്വർണം പങ്കിട്ടു നൽകും.
4. പണസമ്മാനങ്ങൾ
   ENOC അല്ലെങ്കിൽ Zoom ഔട്ട്‌ലെറ്റുകളിൽ നിന്ന് 50 ദിർഹത്തിന്റെ ‘വിന്നർ പാക്ക്’ വാങ്ങുന്ന ഉപഭോക്താക്കൾക്ക് 500,000 ദിർഹം ക്യാഷ് പ്രൈസും അതോടൊപ്പം ഒരു ‘ഡോങ്‌ഫെങ് 007’ കാറും നേടാനുള്ള അവസരമുണ്ട്.
5. 90% വരെ ഡിസ്കൗണ്ടുകൾ
   ഫാഷൻ, ഇലക്ട്രോണിക്സ്, ബ്യൂട്ടി ഉൽപ്പന്നങ്ങൾ, ഹോം ഫർണിഷിംഗ് എന്നിവയ്ക്ക് ‘ഗ്രേറ്റ് ദുബായ് സമ്മർ സെയിൽ’ സമയത്ത് 90 ശതമാനം വരെ ഡിസ്കൗണ്ടുകളും, അതോടൊപ്പം ഫ്ലാഷ് സെയിലുകളും പ്രത്യേക ഷോപ്പിംഗ് വാരാന്ത്യങ്ങളും പ്രതീക്ഷിക്കാം.
6. സമ്മർ റെസ്റ്റോറന്റ് വീക്ക്
   ഭക്ഷണപ്രിയർക്കായി ജൂലൈ 13 മുതൽ ആഗസ്റ്റ് 2 വരെ നടക്കുന്ന ‘സമ്മർ റെസ്റ്റോറന്റ് വീക്കി’ൽ 60-ലധികം റെസ്റ്റോറന്റുകളിൽ പ്രത്യേകമായി തയ്യാറാക്കിയ മെനുകൾ ആസ്വദിക്കാം.
7. 10 ദിർഹം വിഭവങ്ങൾ
   ആഗസ്റ്റ് മാസത്തിൽ ദുബായിലുടനീളമുള്ള 700-ലധികം റെസ്റ്റോറന്റുകൾ ജനപ്രിയമായ ’10 ദിർഹം ഡിഷ്’ കാമ്പെയ്‌നിൽ പങ്കെടുക്കും. ഇത് കുറഞ്ഞ ചിലവിൽ തിരഞ്ഞെടുത്ത വിഭവങ്ങൾ ആസ്വദിക്കാൻ ഭക്ഷണപ്രേമികൾക്ക് അവസരം നൽകുന്നു.
8. ‘ബീറ്റ് ദി ഹീറ്റ്’ സംഗീത കച്ചേരികൾ
   കെയ്‌റോക്കി, ഡിസ്റ്റിങ്ക്‌ട്, ഇസ്സാം അൽനജ്ജാർ, തലാൽ സാം, സുൽത്താൻ മുർഷെദ്, റഷ റിസ്ക് തുടങ്ങിയ പ്രമുഖ കലാകാരന്മാർ അണിനിരക്കുന്ന ‘ബീറ്റ് ദി ഹീറ്റ്’ കൺസേർട്ട് പരമ്പരയുടെ തിരിച്ചുവരവിനായി സംഗീത ആരാധകർക്ക് കാത്തിരിക്കാം.
9. കുടുംബങ്ങൾക്കായുള്ള ആകർഷണങ്ങൾ
   കുടുംബങ്ങൾക്ക് ‘മൊദേഷ് വേൾഡ്’ സന്ദർശിക്കാം, ബേബി ഷാർക്ക് അനുഭവം ആസ്വദിക്കാം, കൂടാതെ വേനൽക്കാലത്തുടനീളം തത്സമയ ഷോകൾ, കുട്ടികളുടെ വർക്ക്‌ഷോപ്പുകൾ, മറ്റ് ഇൻഡോർ പ്രവർത്തനങ്ങൾ എന്നിവയിൽ പങ്കെടുക്കാനും സാധിക്കും.
10. സ്റ്റേക്കേഷൻ ഓഫറുകൾ
    ഒരു ചെറിയ ഇടവേള ആസൂത്രണം ചെയ്യുന്ന താമസക്കാർക്ക് ലക്ഷ്വറി ഹോട്ടലുകൾ, ഫാമിലി റിസോർട്ടുകൾ, റസിഡന്റ്സ്-എക്സ്ക്ലൂസീവ് ഡീലുകൾ എന്നിവ ഉൾപ്പെടെ ഏകദേശം 200 ഓളം ഹോട്ടൽ-ആകർഷകമായ ഓഫറുകളിൽ നിന്ന് തിരഞ്ഞെടുക്കാം.
11. ബാക്ക്-ടു-സ്കൂൾ ഓഫറുകൾ
    സ്കൂളുകൾ തുറക്കാൻ തയ്യാറെടുക്കുമ്പോൾ, ബാക്ക്-ടു-സ്കൂൾ കാർണിവൽ ഉൾപ്പെടെയുള്ള ഷോപ്പിംഗ് കാമ്പെയ്‌നുകളും പ്രമോഷനുകളും ഫാമിലി ആക്റ്റിവിറ്റികളും ഡിഎസ്എസിന്റെ ഭാഗമായി ഉണ്ടായിരിക്കും.
12. ദുബായിലുടനീളം ഷോപ്പിംഗും വിനോദവും
    പ്രധാന ആകർഷണങ്ങൾക്ക് പുറമെ, തത്സമയ പ്രകടനങ്ങൾ, മാൾ ആക്റ്റിവിറ്റികൾ, പോപ്പ്-അപ്പ് മാർക്കറ്റുകൾ, ഫാഷൻ ഇവന്റുകൾ, കായിക വിനോദങ്ങൾ എന്നിവയും ഡിഎസ്എസ് ദുബായിലുടനീളം എത്തിക്കും. ഇത് താമസക്കാർക്ക് വേനൽക്കാലം ദുബായിൽ തന്നെ ആസ്വദിക്കാൻ നിരവധി കാരണങ്ങൾ നൽകുന്നു.