air india express restores flight കൊച്ചി: കോഴിക്കോട് നിന്ന് ഒമാനിലെ സലാല, കുവൈത്ത് എന്നിവിടങ്ങളിലേക്കുള്ള വിമാന സർവീസുകൾക്ക് വീണ്ടും തുടക്കമിട്ടതോടെ പശ്ചിമേഷ്യയിലേക്കുള്ള മുഴുവൻ വിമാന സർവീസുകളും എയർ ഇന്ത്യ എക്സ്പ്രസ് പുനരാരംഭിച്ചു. സലാലയിലേക്കുള്ള സർവീസുകൾ ജൂലൈ രണ്ടിന് തന്നെ പുനരാരംഭിച്ചിരുന്നു. കോഴിക്കോട് – കുവൈത്ത് സർവീസുകൾ ജൂലൈ മൂന്നിനും ബെംഗളൂരുവിൽ നിന്നും കുവൈത്തിലേക്കുള്ള സർവീസ് ജൂലൈ നാലിനുമാണ് പുനരാരംഭിക്കുന്നത്.

പുതിയ സമയക്രമം ഇങ്ങനെ:
കോഴിക്കോട് – സലാല: ചൊവ്വ, വ്യാഴം ദിവസങ്ങളിൽ രാവിലെ 11 മണിക്ക് കോഴിക്കോട് നിന്നും പുറപ്പെടും. ഉച്ചകഴിഞ്ഞ് 2:15-ന് സലാലയിൽ നിന്ന് തിരികെ കോഴിക്കോട്ടേക്ക് തിരിക്കും.

കോഴിക്കോട് – കുവൈത്ത് (വെള്ളിയാഴ്ചകളിൽ): രാവിലെ 7:30ന് കോഴിക്കോട് നിന്നും പുറപ്പെട്ട്, 11:05ന് കുവൈത്തിൽ നിന്നും തിരികെ തിരിച്ച് വൈകിട്ട് 6:50ന് കോഴിക്കോട് എത്തിച്ചേരും.

ബെംഗളൂരു – കുവൈത്ത് (വെള്ളിയാഴ്ചകളിൽ): പുലർച്ചെ 2:25ന് പുറപ്പെട്ട് രാവിലെ 4:50ന് കുവൈത്തിൽ ലാൻഡ് ചെയ്യും. അതേ ദിവസം രാവിലെ 5:50ന് കുവൈത്തിൽ നിന്ന് തിരികെ പുറപ്പെടുന്ന വിമാനം ഉച്ചയ്ക്ക് 1:25ന് ബെംഗളൂരുവിൽ എത്തും.

യാത്രക്കാരുടെ തിരക്ക് പരിഗണിച്ച് ജൂലൈ അഞ്ച് മുതൽ കോഴിക്കോട് – കുവൈത്ത് സെക്ടറിലെ വിമാന സർവീസ് ആഴ്ചയിൽ മൂന്നായി ഉയർത്തും. ഇതോടെ ബുധൻ, വെള്ളി, ഞായർ ദിവസങ്ങളിൽ പുലർച്ചെ 2:15ന് കോഴിക്കോട് നിന്നും കുവൈത്തിലേക്കും രാവിലെ 5:50ന് തിരികെ കുവൈത്തിൽ നിന്നും കോഴിക്കോട്ടേക്കും സർവീസുകൾ ഉണ്ടായിരിക്കും. ജൂലൈ ഏഴ് മുതൽ ബെംഗളൂരു – കുവൈത്ത് സെക്ടറിലും ആഴ്ചയിൽ മൂന്ന് ദിവസമായി സർവീസുകൾ വർദ്ധിപ്പിക്കും. തിങ്കൾ, ചൊവ്വ, ശനി ദിവസങ്ങളിൽ പുലർച്ചെ 2:25ന് ബംഗളൂരിൽ നിന്നും രാവിലെ 5:50ന് കുവൈത്തിൽ നിന്നുമായിരിക്കും ഈ സർവീസുകൾ. എയർ ഇന്ത്യ എക്സ്പ്രസിന്റെ കുവൈത്തിലേക്കുള്ള മുഴുവൻ വിമാനങ്ങളും കുവൈത്ത് രാജ്യാന്തര വിമാനത്താവളത്തിലെ ടെർമിനൽ നാലിൽ നിന്നായിരിക്കും സർവീസ് നടത്തുകയെന്ന് അധികൃതർ വ്യക്തമാക്കി. സലാല കൂടാതെ ഒമാനിലെ മസ്കത്തിലേക്കും എയർ ഇന്ത്യ എക്സ്പ്രസ് സർവീസുകൾ പുനരാരംഭിച്ചിട്ടുണ്ട്. ജൂലൈ 3 മുതൽ ബെംഗളൂരുവിൽ നിന്നാണ് ഈ സർവീസുകൾ. നിലവിൽ മസ്കത്തിൽ നിന്നും ഇന്ത്യയിലെ ഏഴ് വിമാനത്താവളങ്ങളിലേക്ക് ആഴ്ചതോറും 40 വിമാന സർവീസുകൾ എയർ ഇന്ത്യ എക്സ്പ്രസ് നടത്തുന്നുണ്ട്. ബഹ്റൈൻ, കുവൈത്ത്, ഒമാൻ, ഖത്തർ, സൗദി അറേബ്യ, യുഎഇ തുടങ്ങി പശ്ചിമേഷ്യയിലെ 13 സ്ഥലങ്ങളിലേക്ക് ഇന്ത്യയിലെ 18 വിമാനത്താവളങ്ങളിൽ നിന്നായി ആഴ്ചതോറും 780 വിമാന സർവീസുകളാണ് എയർ ഇന്ത്യ എക്സ്പ്രസിനുള്ളത്. അടുത്തിടെ നവിമുംബൈ – അബുദാബി, ഗുവാഹത്തി – അബുദാബി, ഗുവാഹത്തി – ദുബായ്, ബെംഗളൂരു – ഫുക്കറ്റ്, പൂനെ, അമൃത്സർ എന്നിവിടങ്ങളിലേക്കും പുതിയ സർവീസുകൾ ആരംഭിച്ചിരുന്നു. നിലവിൽ മലബാറിലെ പ്രവാസികൾക്ക് ഏറെ പ്രയോജനപ്പെടുന്ന രീതിയിൽ കോഴിക്കോട് നിന്നും ബെംഗളൂരു, ഗൾഫ് മേഖലകളിലെ 13 നഗരങ്ങളിലേക്ക് ആഴ്ചതോറും 85 സർവീസുകൾ എയർ ഇന്ത്യ എക്സ്പ്രസ് നടത്തുന്നുണ്ട്. യാത്രക്കാർക്ക് എയർ ഇന്ത്യ എക്സ്പ്രസ് വെബ്സൈറ്റ്, മൊബൈൽ ആപ്പ്, മറ്റ് പ്രമുഖ ബുക്കിങ് ചാനലുകൾ എന്നിവ വഴി ടിക്കറ്റുകൾ ബുക്ക് ചെയ്യാവുന്നതാണ്.