UAE India flights അബുദാബി: ഈ മാസം യുഎഇയിൽ നിന്നും ഇന്ത്യയിലേക്ക് യാത്ര പ്ലാൻ ചെയ്യുന്ന പ്രവാസികൾക്ക് വിമാന ടിക്കറ്റ് ഇനത്തിൽ നൂറുകണക്കിന് ദിർഹം ലാഭിക്കാം. മുൻ ആഴ്ചകളെ അപേക്ഷിച്ച് വിവിധ റൂട്ടുകളിലെ ഇരുവശത്തേക്കുമുള്ള വിമാനക്കട്ടണത്തിൽ 20 മുതൽ 30 ശതമാനം വരെ കുറവുണ്ടായതായി ട്രാവൽ ഏജന്റുമാരും ഖലീജ് ടൈംസ് നടത്തിയ നിരക്ക് വിശകലനവും വ്യക്തമാക്കുന്നു. ഉത്തര-പശ്ചിമ ഇന്ത്യയിലെ പല നഗരങ്ങളിലേക്കുമുള്ള റിട്ടേൺ ടിക്കറ്റ് നിരക്കുകൾ 1,000 ദിർഹത്തിന് മുകളിലേക്ക് താഴ്ന്നപ്പോൾ, ദക്ഷിണേന്ത്യൻ നഗരങ്ങളിലേക്കുള്ള നിരക്കുകൾ ഇപ്പോഴും ഉയർന്ന നിലയിലാണ് തുടരുന്നത്. ജൂലൈ മാസത്തിലെ ചില ദിവസങ്ങളിൽ മാത്രമേ ഈ കുറഞ്ഞ നിരക്കുകൾ ലഭ്യമാകൂ എന്നും ആഗസ്റ്റിലെ യാത്രകൾക്ക് നിരക്ക് വീണ്ടും ഉയരുമെന്നും ട്രാവൽ ഏജന്റുമാർ വ്യക്തമാക്കുന്നു. ജൂലൈ 21 നും ജൂലൈ 31 നും ഇടയിലുള്ള യാത്രയ്ക്കായി ബുക്കിംഗ് വെബ്‌സൈറ്റുകളിൽ നടത്തിയ പരിശോധനയിൽ കണ്ടെത്തിയ ഏറ്റവും കുറഞ്ഞ നിരക്കുകൾ താഴെ നൽകുന്നു: അഹമ്മദാബാദ്: Dh 1,029 മുതൽ, ന്യൂഡൽഹി: Dh 1,041 മുതൽ, മുംബൈ: Dh 1,074 മുതൽ, പൂനെ: Dh 1,114 മുതൽ, ബെംഗളൂരു: Dh 1,389 മുതൽ, കോഴിക്കോട്: Dh 1,578 മുതൽ, മംഗളൂരു: Dh 1,928 മുതൽ. വിശകലനങ്ങൾ പ്രകാരം ഉത്തരേന്ത്യ, പശ്ചിമേന്ത്യൻ നഗരങ്ങളിലേക്ക് പോകുന്നവർക്കാണ് ഇപ്പോൾ മികച്ച ഓഫറുകൾ ലഭിക്കുന്നത്. എന്നാൽ കേരളം, തീരദേശ കർണാടക തുടങ്ങിയ ജനപ്രിയ റൂട്ടുകളിലേക്ക് നേരിയ നിരക്ക് കുറവുണ്ടായിട്ടുണ്ടെങ്കിലും മറ്റുള്ളവയെ അപേക്ഷിച്ച് ഇപ്പോഴും നൂറുകണക്കിന് ദിർഹം കൂടുതലാണ്. മംഗളൂരുവിലെ സിദ്ദീഖ് ട്രാവൽസ് ഉടമ താഹ സിദ്ദീഖ് വ്യക്തമാക്കുന്നത് അനുസരിച്ച്, തീരദേശ കർണാടക നഗരങ്ങളിലേക്കുള്ള നിരക്കിൽ സമീപകാലത്തായി 20 ശതമാനത്തോളം കുറവുണ്ടായിട്ടുണ്ട്. എന്നാൽ പുറപ്പെടുന്ന എയർപോർട്ടിനെ ആശ്രയിച്ചായിരിക്കും നിരക്കുകൾ മാറുക. ദുബായിയെ അപേക്ഷിച്ച് നിലവിൽ അബുദാബിയിൽ നിന്നുള്ള വിമാനങ്ങൾക്ക് നിരക്ക് കുറവാണ്. ഹൈദരാബാദ്, ചെന്നൈ തുടങ്ങിയ നഗരങ്ങളിലേക്കും ഈ മാസം കുറഞ്ഞ നിരക്കുകൾ ലഭ്യമാണ്.

ഓഫിസിൽ ജോലി ചെയ്യുന്നതിനിടെ ഹൃദയാഘാതം; യുഎഇയില്‍ മലയാളി യുവാവ് മരിച്ചു

Malayali Man Dies in UAE ദുബായ്: മലയാളി യുവാവ് ഓഫിസിൽ ജോലി ചെയ്തുകൊണ്ടിരിക്കെ ഹൃദയാഘാതം മൂലം മരിച്ചു. കോട്ടയം എരുമേലി പാമ്പവല്ലി, ചാലക്കുഴിയിൽ രഞ്ജിൻ സി. ജോൺസൺ (41) ആണ് മരിച്ചത്. കഴിഞ്ഞ 10 വർഷമായി യുഎഇയിൽ പ്രവാസിയായിരുന്ന രഞ്ജിൻ ദുബായിലെ ഷിപ്പിങ് കമ്പനിയിലാണ് ജോലി ചെയ്തിരുന്നത്. പതിവുപോലെ ഓഫിസിൽ ജോലിയിൽ ഏർപ്പെട്ടിരിക്കെയായിരുന്നു അപ്രതീക്ഷിതമായി ഹൃദയാഘാതം സംഭവിച്ചത്. രഞ്ജിൻ സി.പി. ജോൺസൺ-ഏലിയാമ്മ ജോൺസൺ ദമ്പതികളുടെ മകനാണ്. റിയ എലിസബത്ത് ആണ് ഭാര്യ. ഇവലിന മറിയം രഞ്ജിൻ ഏക മകളാണ്. ആവശ്യമായ നിയമനടപടികൾ പൂർത്തിയാക്കിയ ശേഷം മൃതദേഹം നാട്ടിലേയ്ക്ക് കൊണ്ടുപോകുമെന്ന് ബന്ധുക്കൾ അറിയിച്ചു. ദുബായ് സെന്റ് തോമസ് ഓർത്തഡോക്സ് കത്തീഡ്രൽ ഇടവക അംഗവും സജീവ പ്രവർത്തകനുമായിരുന്ന രഞ്ജിൻ മികച്ചൊരു ഗായകൻ കൂടിയായിരുന്നു. എരുമേലി കനകപ്പാലം സെന്റ് ജോർജ് ഓർത്തഡോക്സ്‌ പള്ളിയാണ് അദ്ദേഹത്തിന്റെ മാതൃഇടവക. ദുബായ് കത്തീഡ്രൽ യുവജനപ്രസ്ഥാനത്തിന്റെ മുൻ ട്രഷററായും കമ്മിറ്റി അംഗമായും ദീർഘകാലം പ്രവർത്തിച്ചിട്ടുണ്ട്. പ്രവാസലോകത്തെ ആത്മീയ-സാമൂഹിക-കലാ വേദികളിലെല്ലാം സജീവ സാന്നിധ്യമായിരുന്നു. തന്റെ സംഗീതത്തിലൂടെയും ലാളിത്യം നിറഞ്ഞ പെരുമാറ്റത്തിലൂടെയും ചുരുങ്ങിയ കാലം കൊണ്ട് ഏവരുടെയും പ്രിയങ്കരനായി മാറാൻ രഞ്ജിന് സാധിച്ചിരുന്നു. രഞ്ജിന്റെ അപ്രതീക്ഷിത വേർപാടിൽ ഇന്ത്യൻ ഓർത്തഡോക്സ്‌ സഭ മീഡിയ വിങ് ആഴമായ ആദരാഞ്ജലികൾ അർപ്പിച്ചു.