Petrol Pump അബുദാബി: പെട്രോൾ പമ്പ് ജീവനക്കാരനെ അക്രമിച്ച കേസിലെ പ്രതികൾക്ക് മാതൃകാപരമായ ശിക്ഷ വിധിച്ച് യുഎഇ കോടതി. അക്രമത്തിന് ഇരയായ ജീവനക്കാരൻ ജോലി ചെയ്യുന്ന അതേ പെട്രോൾ പമ്പിൽ രണ്ടുമാസത്തെ നിർബന്ധിത സാമൂഹിക സേവനം അനുഷ്ഠിക്കണമെന്നാണ് കോടതി ഉത്തരവ്. അൽ ഐൻ കോടതിയാണ് പ്രതികൾക്ക് ശിക്ഷ വിധിച്ചത്.

പൊതുസേവന ജീവനക്കാരനെ ആക്രമിച്ചതിനും പൊതുജനസമാധാനം തകർത്തതിനും പ്രതികൾ രണ്ടുപേരും 50,000 ദിർഹം വീതം പിഴയടക്കണമെന്നും കോടതി വിധിച്ചു. വാഹനത്തിന്റെ മുൻഭാഗത്തെ ചില്ല് വൃത്തിയാക്കുന്നതുമായി ബന്ധപ്പെട്ടുണ്ടായ തർക്കമാണ് ആക്രമണത്തിന് കാരണം. ഔദ്യോഗിക കൃത്യനിർവഹണത്തിലേർപ്പെട്ടിരുന്ന ജീവനക്കാരനെ പ്രതികൾ കയ്യേറ്റം നടത്തുകയായിരുന്നു.

യുഎഇയിൽ പൊതുസേവന മേഖലയിൽ ജോലി ചെയ്യുന്ന ജീവനക്കാരെ ആക്രമിക്കുന്നതും അവരുടെ ജോലി തടസ്സപ്പെടുത്തുന്നതും ഗുരുതരമായ കുറ്റകൃത്യമായാണ് കണക്കാക്കുന്നത്.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

ഈ ദിനങ്ങള്‍ പ്രധാനം; യുഎഇ പ്രവാസികൾക്ക് അടുത്ത വർഷത്തെ അവധികൾ മുൻകൂട്ടി ആസൂത്രണം ചെയ്യാം

UAE expats 2027 holidays അബുദാബി: അടുത്ത ഹിജ്റ വർഷമായ 1448ലെ റമസാൻ, ഈദുൽ ഫിത്ർ, ഈദുൽ അദ്ഹ തുടങ്ങിയ പ്രധാന ഇസ്‌ലാമിക വിശേഷദിവസങ്ങളുടെ സാധ്യതയുള്ള തീയതികൾ യുഎഇ ജ്യോതിശാസ്ത്ര കേന്ദ്രം പുറത്തുവിട്ടു. ഔദ്യോഗികമായി ചന്ദ്രദർശനം സ്ഥിരീകരിക്കുന്നതിന് മുമ്പ് യാത്രകളും മറ്റ് പരിപാടികളും ആസൂത്രണം ചെയ്യാൻ ഈ കണക്കുകൂട്ടലുകൾ സഹായിക്കും.

റമസാൻ 2027

2027 ഫെബ്രുവരി 8 തിങ്കളാഴ്ച യുഎഇയിൽ റമസാൻ വ്രതാരംഭമാകാനാണ് കൂടുതൽ സാധ്യത. ഷഅ്ബാൻ മാസപ്പിറവി ഫെബ്രുവരി 6 ശനിയാഴ്ചയോ 7 ഞായറാഴ്ചയോ ദൃശ്യമാകേണ്ടതുണ്ട്. എന്നാൽ ഫെബ്രുവരി 6ന് യുഎഇ ഉൾപ്പെടെയുള്ള ലോകത്തിന്റെ ഭൂരിഭാഗം പ്രദേശങ്ങളിലും ചന്ദ്രൻ അസ്തമിച്ചതിന് ശേഷമായിരിക്കും സൂര്യാസ്തമയം. അതിനാൽ അന്ന് മാസപ്പിറവി ദൃശ്യമാകാൻ സാധ്യതയില്ല. തുടർന്ന് ഷഅ്ബാൻ 30 ദിവസം പൂർത്തിയാക്കി ഫെബ്രുവരി 8ന് റമസാൻ ഒന്ന് ആരംഭിക്കാനാണ് സാധ്യത.

ഈദുൽ ഫിത്ർ

റമസാൻ 29-ാം ദിവസം മാർച്ച് 8 തിങ്കളാഴ്ചയായിരിക്കും. അന്ന് ശവ്വാൽ മാസപ്പിറവി ദൃശ്യമാകുകയാണെങ്കിൽ മാർച്ച് 9 ചൊവ്വാഴ്ച ഈദുൽ ഫിത്ർ ആഘോഷിക്കാം. മാർച്ച് 8ന് മാസപ്പിറവി കാണാൻ സാധിക്കാത്ത പക്ഷം റമസാൻ 30 ദിവസം പൂർത്തിയാക്കി മാർച്ച് 10 ബുധനാഴ്ച പെരുന്നാൾ ആഘോഷിക്കാനാണ് സാധ്യത.

ഈദുൽ അദ്ഹ

ദുൽഹജ് മാസപ്പിറവി 2027 മേയ് 6 വ്യാഴാഴ്ചയോ മേയ് 7 വെള്ളിയാഴ്ചയോ ദൃശ്യമാകാനാണ് സാധ്യത. ഇതനുസരിച്ച് ദുൽഹജ് ഒന്ന് മേയ് 7നോ 8നോ ആയിരിക്കും. അതിനനുസരിച്ച് അറഫാ ദിനം മേയ് 15 ശനിയാഴ്ചയോ 16 ഞായറാഴ്ചയോ വരാൻ സാധ്യതയുണ്ട്. തുടർന്ന് ഈദുൽ അദ്ഹ മേയ് 16 ഞായറാഴ്ചയോ 17 തിങ്കളാഴ്ചയോ ആഘോഷിക്കാനാണ് കണക്കുകൂട്ടൽ.

ഹിജ്റ പുതുവത്സരം 1449

ദുൽഹജ് മാസപ്പിറവിയുടെ അടിസ്ഥാനത്തിൽ ഹിജ്റ വർഷം 1449ന്റെ തുടക്കമായ മുഹറം ഒന്ന് 2027 ജൂൺ 5 ശനിയാഴ്ച, 6 ഞായറാഴ്ച, 7 തിങ്കളാഴ്ച എന്നിവയിൽ ഏതെങ്കിലും ദിവസമായിരിക്കാം. ശാസ്ത്രീയ കണക്കുകൂട്ടലുകളുടെ അടിസ്ഥാനത്തിലുള്ള സാധ്യതാ തീയതികളാണ് ഇവയെന്നും കൃത്യമായ തീയതികൾ യുഎഇ ചന്ദ്രദർശന സമിതിയുടെ ഔദ്യോഗിക പ്രഖ്യാപനത്തിന് ശേഷമേ സ്ഥിരീകരിക്കുകയുള്ളൂവെന്നും ജ്യോതിശാസ്ത്ര കേന്ദ്രം വ്യക്തമാക്കി.