Illegal Fishing Kuwait കുവൈത്ത് സിറ്റി: കുവൈത്തിന്റെ സമുദ്രാതിർത്തി ലംഘിക്കുന്നവർക്കെതിരെ വിട്ടുവീഴ്ചയില്ലാത്ത നടപടിയുമായി ആഭ്യന്തര മന്ത്രാലയം. ഞായറാഴ്ച (ഫെബ്രുവരി 8, 2026) പുലർച്ചെ നടത്തിയ നാടകീയമായ നീക്കത്തിനൊടുവിൽ നിയമവിരുദ്ധമായി മീൻപിടിത്തം നടത്തിയ മൂന്ന് പ്രതികളെ കോസ്റ്റ് ഗാർഡ് അറസ്റ്റ് ചെയ്തു. കുവൈത്ത് സമുദ്രാതിർത്തിയിൽ നിയമവിരുദ്ധമായി മീൻപിടിത്തം നടത്തുന്നത് ശ്രദ്ധയിൽപ്പെട്ട കോസ്റ്റ് ഗാർഡ് ബോട്ട് നിർത്താൻ ആവശ്യപ്പെട്ടു. എന്നാൽ ഉത്തരവ് അവഗണിച്ച് അതിവേഗത്തിൽ ഓടിച്ചുപോയ ബോട്ടിനെ സുരക്ഷാ ഉദ്യോഗസ്ഥർ പിന്തുടർന്നു. തീരത്തിനടുത്തെത്തിയ പ്രതികൾ രക്ഷപ്പെടാനുള്ള ശ്രമത്തിനിടെ സുരക്ഷാ ഉദ്യോഗസ്ഥനെ വാഹനം കയറ്റി വധിക്കാൻ ശ്രമിച്ചു. എന്നാൽ സാഹസികമായി ഉദ്യോഗസ്ഥർ പ്രതികളെ കീഴ്പ്പെടുത്തുകയായിരുന്നു. ആക്രമണത്തിൽ ഉദ്യോഗസ്ഥർക്ക് പരിക്കുകളില്ല. കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയുവാൻ വാട്സ്ആപ്പ് ഗ്രൂപ്പിൽ ഇപ്പോൾ തന്നെ അംഗമാകൂ https://chat.whatsapp.com/LIFfag1qA2X0vkfobY76hr പിടിയിലായവരിൽ ഒരു കുവൈത്ത് പൗരനും രണ്ട് ബിദൂനികളുമാണ് ഉള്ളത്. ഇവർക്കെതിരെ നേരത്തെയും ക്രിമിനൽ കേസുകൾ ഉള്ളതായി അന്വേഷണത്തിൽ വ്യക്തമായി. മീൻപിടിത്ത ബോട്ട് ആയിട്ടല്ല ഈ കപ്പൽ രജിസ്റ്റർ ചെയ്തിരുന്നത്. അനുമതിയില്ലാതെ മീൻപിടിത്തം നടത്തിയതിലൂടെ വലിയ നിയമലംഘനമാണ് നടന്നതെന്ന് അധികൃതർ സ്ഥിരീകരിച്ചു. പിടിച്ചെടുത്ത ബോട്ട് നിയമപ്രകാരം നശിപ്പിക്കുകയും പ്രതികളെ തുടർനടപടികൾക്കായി ബന്ധപ്പെട്ട അധികാരികൾക്ക് കൈമാറുകയും ചെയ്തു. രാജ്യത്തെ നിയമങ്ങൾ ലംഘിക്കുന്നവർക്കും സുരക്ഷാ ഉദ്യോഗസ്ഥരുടെ ജീവൻ അപകടത്തിലാക്കുന്നവർക്കും എതിരെ കർശന നടപടി സ്വീകരിക്കുമെന്ന് ആഭ്യന്തര മന്ത്രാലയം ആവർത്തിച്ചു.

കുവൈത്തിലെ പുതിയ ജോലി അവസരങ്ങൾ ഇതാ

കുവൈത്തിൽ വിവിധയിടങ്ങളില്‍ ഗതാഗത നിയന്ത്രണം; വാഹനമോടിക്കുന്നവർ ശ്രദ്ധിക്കുക

kuwait traffic regulations കുവൈത്ത് സിറ്റി: കുവൈത്തിലെ പ്രധാന പാതകളായ കിംഗ് അബ്ദുൽ അസീസ് ബിൻ അബ്ദുൽ റഹ്മാൻ അൽ സൗദ് റോഡിലും (ഫഹാഹീൽ എക്സ്പ്രസ് വേ) റായ് മേഖലയിലെ മർസൂഖ് റാഷിദ് അൽ-റഷ്ദാൻ റോഡിലും അറ്റകുറ്റപ്പണികൾക്കായി ഗതാഗത നിയന്ത്രണം ഏർപ്പെടുത്തിയതായി ജനറൽ ട്രാഫിക് ഡിപ്പാർട്ട്‌മെന്റ് അറിയിച്ചു. 1. ഫഹാഹീൽ എക്സ്പ്രസ് വേ (മംഗഫ് – സബാഹിയ മേഖല)- മംഗഫ്, സബാഹിയ ഏരിയകളിലെ അറ്റകുറ്റപ്പണികളുടെ ഭാഗമായാണ് ഇവിടെ നിയന്ത്രണം ഏർപ്പെടുത്തിയിരിക്കുന്നത്. ഫെബ്രുവരി 9 തിങ്കളാഴ്ച അർദ്ധരാത്രി 12 മണിക്ക് ആരംഭിച്ച നിയന്ത്രണം 20 ദിവസത്തേക്ക് തുടരും.  മംഗഫ് – സബാഹിയ റൗണ്ട് എബൗട്ട് ടണൽ പ്രവേശനം മുതൽ ഫഹാഹീൽ ഭാഗത്തേക്കുള്ള എക്സിറ്റ് വരെയുള്ള റോഡ് ഷോൾഡർ, ഇടത് വശത്തെ ഫാസ്റ്റ് ലെയ്ൻ, മിഡിൽ ലെയ്നിന്റെ പകുതി ഭാഗം എന്നിവിടങ്ങളിൽ ഗതാഗതം ഭാഗികമായി തടസ്സപ്പെടും. 2. മർസൂഖ് റാഷിദ് അൽ-റഷ്ദാൻ റോഡ് (റായ്)- ഫോർത്ത് റിംഗ് റോഡിൽ നിന്ന് ഫ്രൈഡേ മാർക്കറ്റ് റൗണ്ട് എബൗട്ടിലേക്ക് വരുന്ന വാഹനങ്ങൾക്കാണ് ഇവിടെ നിയന്ത്രണം. ഫെബ്രുവരി 9 തിങ്കളാഴ്ച വൈകുന്നേരം 3:00 മുതൽ ഫെബ്രുവരി 10 ചൊവ്വാഴ്ച പുലർച്ചെ 5:00 വരെ റോഡ് താൽക്കാലികമായി അടച്ചിടും. വാഹനമോടിക്കുന്നവർ പകരമുള്ള ബദൽ പാതകൾ ഉപയോഗിക്കണമെന്ന് അധികൃതർ നിർദ്ദേശിച്ചു. റോഡുകളിലെ സുരക്ഷ വർദ്ധിപ്പിക്കുന്നതിനും അറ്റകുറ്റപ്പണികൾ വേഗത്തിൽ പൂർത്തിയാക്കുന്നതിനുമാണ് ഈ നിയന്ത്രണങ്ങൾ. ഈ മേഖലകളിലൂടെ യാത്ര ചെയ്യുന്നവർ ട്രാഫിക് സൈനുകൾ ശ്രദ്ധിക്കണമെന്നും ഉദ്യോഗസ്ഥരുടെ നിർദ്ദേശങ്ങൾ പാലിക്കണമെന്നും ട്രാഫിക് ഡിപ്പാർട്ട്‌മെന്റ് അഭ്യർത്ഥിച്ചു.

കുവൈത്തിൽ വൻ സിഗരറ്റ് വേട്ട; കള്ളക്കടത്ത് ശ്രമങ്ങൾ പരാജയപ്പെടുത്തി

Kuwait Smuggling കുവൈത്ത് സിറ്റി: നുവൈസീബ് അതിർത്തി കടന്ന് രാജ്യത്തേക്ക് നിയമവിരുദ്ധമായി സിഗരറ്റ് കടത്താനുള്ള അഞ്ച് വ്യത്യസ്ത ശ്രമങ്ങൾ കുവൈത്ത് കസ്റ്റംസ് അധികൃതർ പരാജയപ്പെടുത്തി. കഴിഞ്ഞ കുറച്ച് ദിവസങ്ങളായി നടന്ന പരിശോധനയിൽ ആകെ 1,639 പാക്കറ്റ് സിഗരറ്റുകളാണ് പിടിച്ചെടുത്തത്. അതിർത്തിയിലെത്തിയ ഒരു സ്വകാര്യ വാഹനത്തിൽ നിന്ന് ഒളിപ്പിച്ച നിലയിൽ 389 പാക്കറ്റ് വിവിധ ഇനം സിഗരറ്റുകൾ കണ്ടെടുത്തു. മറ്റൊരു വാഹനത്തിൽ പ്രൊഫഷണൽ രീതിയിൽ ഒളിപ്പിച്ച 77 പാക്കറ്റ് സിഗരറ്റുകളും ലൈസൻസില്ലാത്ത അഞ്ച് ഇലക്ട്രോണിക് സിഗരറ്റ് പാക്കറ്റുകളും പിടികൂടി. പരിശോധന വെട്ടിക്കാനായി വാഹനത്തിനുള്ളിലെ രഹസ്യ അറകളിൽ ഒളിപ്പിച്ച നിലയിൽ 429 പാക്കറ്റ് സിഗരറ്റുകളാണ് കണ്ടെത്തിയത്. സംശയാസ്പദമായ രീതിയിലെത്തിയ വാഹനത്തിൽ നടത്തിയ വിശദമായ പരിശോധനയിൽ വാഹനത്തിന്റെ ഭാഗങ്ങൾക്കിടയിൽ ഒളിപ്പിച്ച 330 കാർട്ടൺ ഇലക്ട്രോണിക് സിഗരറ്റുകളും 20 കാർട്ടൺ സാധാരണ സിഗരറ്റുകളും പിടിച്ചെടുത്തു. വാഹനത്തിനുള്ളിൽ പ്രത്യേകമായി സജ്ജീകരിച്ച രഹസ്യ കേന്ദ്രങ്ങളിൽ നിന്ന് 389 കാർട്ടൺ സിഗരറ്റുകൾ കൂടി കണ്ടെടുത്തു. നിയമലംഘകർക്കെതിരെ കർശനമായ നിയമനടപടികൾ സ്വീകരിച്ചതായി കസ്റ്റംസ് അതോറിറ്റി അറിയിച്ചു. യൂണിഫൈഡ് കസ്റ്റംസ് നിയമപ്രകാരം പിടിച്ചെടുത്ത സാധനങ്ങൾ കണ്ടുകെട്ടുകയും കേസുകൾ ബന്ധപ്പെട്ട വകുപ്പുകൾക്ക് കൈമാറുകയും ചെയ്തു. രാജ്യത്തിന്റെ സുരക്ഷയും സമ്പദ്‌വ്യവസ്ഥയും സംരക്ഷിക്കുന്നതിനായി അതിർത്തികളിൽ പരിശോധന കർശനമായി തുടരുമെന്നും കള്ളക്കടത്തുകാരോട് വിട്ടുവീഴ്ചയില്ലാത്ത സമീപനമായിരിക്കും സ്വീകരിക്കുകയെന്നും ജനറൽ അഡ്മിനിസ്‌ട്രേഷൻ ഓഫ് കസ്റ്റംസ് വ്യക്തമാക്കി.

കുവൈത്തിൽ നിയമലംഘകർക്കെതിരെ കർശന നടപടി; പ്രവാസികൾ അറസ്റ്റിൽ

Kuwait law violation കുവൈത്ത് സിറ്റി: കുവൈത്തിൽ താമസ-തൊഴിൽ നിയമങ്ങൾ ലംഘിച്ചതിന് കഴിഞ്ഞ 24 മണിക്കൂറിനുള്ളിൽ വിവിധ ഗവർണറേറ്റുകളിൽ നിന്നായി 18 അറബ്, ഏഷ്യൻ വംശജരെ ട്രാഫിക് പോലീസ് അറസ്റ്റ് ചെയ്തു. രാജ്യത്തെ സുരക്ഷാ നടപടികൾ ശക്തമാക്കുന്നതിന്റെ ഭാഗമായി നടത്തിയ പരിശോധനയിലാണ് ഇവർ പിടിയിലായത്. ട്രാഫിക് പട്രോളിംഗിനിടെ പിടിയിലായ 18 പേരെയും മേൽനടപടികൾക്കായി ബന്ധപ്പെട്ട അധികാരികൾക്ക് കൈമാറി. രാജ്യത്തെ നിയമവാഴ്ച ഉറപ്പാക്കുന്നതിനും പിടികിട്ടാപ്പുള്ളികളെ കണ്ടെത്തുന്നതിനുമുള്ള തീവ്രശ്രമത്തിന്റെ ഭാഗമാണ് ഈ കാമ്പയിൻ എന്ന് സുരക്ഷാ വൃത്തങ്ങൾ അറിയിച്ചു.  മുബാറക് അൽ-കബീറിൽ അശ്രദ്ധമായും അപകടകരമായും വാഹനമോടിച്ച സ്വദേശി പൗരനെ പോലീസ് അറസ്റ്റ് ചെയ്തു. ഇയാളുടെ വാഹനം കസ്റ്റഡിയിലെടുത്തിട്ടുണ്ട്. റോഡുകളിൽ പട്രോളിംഗ് നടത്തുകയായിരുന്ന ഉദ്യോഗസ്ഥർ ഇയാൾ അമിതവേഗതയിലും അശ്രദ്ധമായും വാഹനമോടിക്കുന്നത് ശ്രദ്ധയിൽപ്പെട്ടതിനെ തുടർന്ന് തടഞ്ഞുനിർത്തുകയും നിയമനടപടികൾ സ്വീകരിക്കുകയുമായിരുന്നു. ദേശീയ സുരക്ഷ നിലനിർത്തുന്നതിനും ഗതാഗത-താമസ നിയമങ്ങൾ ലംഘിക്കുന്നവരെ കണ്ടെത്തുന്നതിനുമായി വരും ദിവസങ്ങളിലും പരിശോധനകൾ തുടരുമെന്ന് അധികൃതർ വ്യക്തമാക്കി.

കുവൈത്തിൽ ഫുഡ് ഡെലിവറി ആപ്പുകൾക്ക് പുതിയ നിയന്ത്രണം; സർവീസ് ചാർജുകൾക്ക് പരിധി നിശ്ചയിച്ചു

New Regulations Restaurant kuwait കുവൈത്ത് സിറ്റി: കുവൈത്തിൽ ഓൺലൈൻ പ്ലാറ്റ്‌ഫോമുകൾ വഴിയുള്ള റെസ്റ്റോറന്റ്, റെഡിമെയ്ഡ് ഭക്ഷണ വിതരണം ക്രമീകരിക്കുന്നതിനായി വാണിജ്യ വ്യവസായ മന്ത്രി ഖലീഫ അൽ-അജിൽ പുതിയ ഉത്തരവ് പുറപ്പെടുവിച്ചു. ഡെലിവറി സേവനങ്ങൾ കൂടുതൽ സുതാര്യമാക്കുന്നതിനും ഉപഭോക്താക്കളെ സംരക്ഷിക്കുന്നതിനുമാണ് ഈ നീക്കം. ഫുഡ് ഡെലിവറി പ്ലാറ്റ്‌ഫോമുകൾ നടത്തുന്ന എല്ലാ കമ്പനികളും പുതിയ ചട്ടങ്ങൾക്കനുസൃതമായി തങ്ങളുടെ നിയമപരമായ പദവി മാറ്റേണ്ടതുണ്ട്. അന്താരാഷ്ട്ര വർഗ്ഗീകരണം അനുസരിച്ച്, ലൈസൻസ് ചെയ്ത പ്രവർത്തനം “ഇലക്ട്രോണിക് പ്ലാറ്റ്‌ഫോമുകൾ വഴിയുള്ള ഡെലിവറി സേവനങ്ങളുടെ മാനേജ്‌മെന്റ്” എന്നാക്കി മാറ്റണം. ഈ മാറ്റങ്ങൾ പൂർത്തിയാക്കാൻ കമ്പനികൾക്ക് രണ്ട് മാസത്തെ സമയം അനുവദിച്ചിട്ടുണ്ട്. നിലവിൽ സർവീസ് പ്രൊവൈഡർമാരും ഉപഭോക്താക്കളും (റെസ്റ്റോറന്റുകൾ) തമ്മിലുള്ള കരാറുകളിലെ ഫീസുകൾ, കമ്മീഷനുകൾ, മറ്റ് തുകകൾ എന്നിവ 2026 അവസാനിക്കുന്നത് വരെ പരമാവധി പരിധിയായി നിശ്ചയിച്ചു. ഈ തുകയിൽ കൂടുതൽ ഈടാക്കാൻ കമ്പനികൾക്ക് അനുവാദമുണ്ടായിരിക്കില്ല. നിലവിലുള്ള കരാറുകൾ അവയുടെ കാലാവധി തീരുന്നത് വരെ നിയമപരമായി നിലനിൽക്കും. എന്നാൽ, പുതിയ നിയമങ്ങൾക്ക് വിധേയമായി സേവന നിരക്കുകൾ കുറയ്ക്കാൻ ആഗ്രഹിക്കുന്ന പക്ഷം ഇരുപാർട്ടികൾക്കും അതിന് തടസ്സമുണ്ടാകില്ല. ഓൺലൈൻ ഭക്ഷണ വിതരണ രംഗത്തെ അമിത ചാർജുകൾ നിയന്ത്രിക്കാനും വിപണിയിൽ കൂടുതൽ വ്യക്തത കൊണ്ടുവരാനും ഈ പരിഷ്കാരം സഹായിക്കുമെന്ന് മന്ത്രാലയം വിലയിരുത്തുന്നു.