Kuwait Warehouse Raid കുവൈത്ത് സിറ്റി: ക്യാപിറ്റൽ ഗവർണറേറ്റിൽ അനധികൃതമായി പ്രവർത്തിച്ചിരുന്ന ഗോഡൗണിൽ നിന്ന് നൂറുകണക്കിന് ലൈസൻസില്ലാത്ത സൗന്ദര്യവർധക ഉൽപന്നങ്ങളും മെഡിക്കൽ ക്രീമുകളും അധികൃതർ പിടിച്ചെടുത്തു. ഉൽപന്നങ്ങളുടെ ലേബലുകളും കാലാവധി വിവരങ്ങളും മാറ്റി ഉപഭോക്താക്കളെ തെറ്റിദ്ധരിപ്പിക്കാൻ ശ്രമിച്ചതായും അന്വേഷണത്തിൽ കണ്ടെത്തി. പരിശോധനാ സംഘത്തിന്റെ നിരീക്ഷണത്തെയും രഹസ്യ വിവരശേഖരണത്തെയും തുടർന്നാണ് ഗോഡൗൺ കണ്ടെത്തിയത്. ഇവിടെ നിന്ന് 411 ലൈസൻസില്ലാത്ത സൗന്ദര്യവർധക ഉൽപന്നങ്ങളും മെഡിക്കൽ ക്രീമുകളും, കൂടാതെ 3,500 ലേബലുകളും പിടിച്ചെടുത്തു. ഉൽപന്നങ്ങളുടെ തരം, കാലാവധി തുടങ്ങിയ വിവരങ്ങളുള്ള ലേബലുകൾ തൊഴിലാളികൾ മാറ്റി പതിപ്പിച്ചിരുന്നതായാണ് അധികൃതരുടെ കണ്ടെത്തൽ. ഉപഭോക്താക്കളെ തെറ്റിദ്ധരിപ്പിച്ച് ഉൽപന്നങ്ങൾ വിപണിയിലെത്തിക്കാനായിരുന്നു ഈ നീക്കമെന്നാണ് സംശയം. ഈ പ്രവൃത്തി 2019-ലെ നിയമം നമ്പർ 20 പ്രകാരമുള്ള ജിസിസി ഏകീകൃത വാണിജ്യ തട്ടിപ്പ് വിരുദ്ധ നിയമത്തിന്റെ ആർട്ടിക്കിൾ 2 (ഖണ്ഡിക 2) ലംഘിക്കുന്നതാണെന്ന് അധികൃതർ വ്യക്തമാക്കി. ഗോഡൗണിനെതിരെ നിയമലംഘന റിപ്പോർട്ട് രജിസ്റ്റർ ചെയ്തതായും

കുവൈത്തിൽ വ്യാപക പരിശോധന; പരസ്യ-ലൈസൻസ് ചട്ടലംഘനത്തിന് 30 ലധികം സ്ഥാപനങ്ങൾക്കെതിരെ നടപടി

Kuwait Violations in Advertising കുവൈത്ത് സിറ്റി: ഹവല്ലി ഗവർണറേറ്റിലെ കടകളിലും വാണിജ്യ സ്ഥാപനങ്ങളിലുമായി നടത്തിയ വ്യാപക പരിശോധനയിൽ പരസ്യ, വിലനിർണയ ചട്ടങ്ങൾ ലംഘിച്ചതിന് 37 നിയമലംഘനങ്ങൾ രേഖപ്പെടുത്തി. കുവൈത്ത് മുനിസിപ്പാലിറ്റിയുടെ പരിശോധനാ നടപടികളുടെ ഭാഗമായാണ് ഈ നടപടി. മുനിസിപ്പാലിറ്റിയുടെ പബ്ലിക് റിലേഷൻസ് വകുപ്പ് അറിയിച്ചു പ്രകാരം, ഹവല്ലി മുനിസിപ്പാലിറ്റി ശാഖയിലെ മുനിസിപ്പൽ സർവീസ് ഓഡിറ്റ് ആൻഡ് ഫോളോ-അപ്പ് വിഭാഗമാണ് വിപണികളിലും വ്യാപാര സ്ഥാപനങ്ങളിലും ഫീൽഡ് പരിശോധന നടത്തിയത്. മുനിസിപ്പൽ ചട്ടങ്ങളും ലൈസൻസ് നിബന്ധനകളും സ്ഥാപനങ്ങൾ പാലിക്കുന്നുണ്ടോ എന്നതാണ് പരിശോധനയുടെ പ്രധാന ലക്ഷ്യം. വകുപ്പ് ഡയറക്ടർ മുഹമ്മദ് അൽ സുബൈ പറഞ്ഞു, പരിശോധനാ സംഘം 60 വാണിജ്യ സ്ഥാപനങ്ങൾ സന്ദർശിച്ചപ്പോൾ 37 നിയമലംഘനങ്ങൾ കണ്ടെത്തി. ലൈസൻസ് പുതുക്കാതിരിക്കുക, പരസ്യ ബോർഡുകൾ ശരിയായ രീതിയിൽ പരിപാലിക്കാതിരിക്കുക, ലൈസൻസില്ലാതെ പ്രചാരണ പരസ്യങ്ങൾ പ്രദർശിപ്പിക്കുക, മുനിസിപ്പാലിറ്റിയുടെ അനുമതിയില്ലാതെ അധിക പരസ്യ ബോർഡുകൾ സ്ഥാപിക്കുക എന്നിവയാണ് കണ്ടെത്തിയ പ്രധാന ലംഘനങ്ങൾ. വ്യാപാര സ്ഥാപനങ്ങളുടെ ഉടമകളും നടത്തിപ്പുകാരും എല്ലാ വാണിജ്യ-പരസ്യ ലൈസൻസുകളും സാധുവാണെന്ന് ഉറപ്പാക്കണമെന്ന് മുഹമ്മദ് അൽ സുബൈ അഭ്യർഥിച്ചു. പരസ്യങ്ങളുമായി ബന്ധപ്പെട്ട പുതിയ നിയമപ്രകാരം ചട്ടലംഘനങ്ങൾക്ക് കൂടുതൽ കർശനമായ നടപടികളും ഉയർന്ന പിഴയും ഏർപ്പെടുത്തിയിട്ടുണ്ടെന്നും, നിയമലംഘനങ്ങൾ കുറയ്ക്കുകയും പൊതുതാൽപര്യം സംരക്ഷിക്കുകയും ചെയ്യുക എന്നതാണ് ഇതിന്റെ ലക്ഷ്യമെന്നും അദ്ദേഹം കൂട്ടിച്ചേർത്തു.

കുവൈത്ത്: പോലീസ് ചമഞ്ഞ് പ്രവാസികളെ കൊള്ളയടിച്ചു, തെളിഞ്ഞത് 10 കവർച്ചാ കേസുകള്‍

Posing as Police Theft Kuwait കുവൈത്ത് സിറ്റി: ജലീബ് അൽ ഷുയൂഖ് ഉൾപ്പെടെയുള്ള പ്രദേശങ്ങളിൽ പോലീസ് ഉദ്യോഗസ്ഥനാണെന്ന് നടിച്ച് പ്രവാസികളെ പരിശോധനയ്ക്ക് വിധേയരാക്കി പണവും വിലപിടിപ്പുള്ള സാധനങ്ങളും തട്ടിയെടുത്ത ബിദൂനി യുവാവിനെ കുവൈത്ത് കുറ്റാന്വേഷണ വിഭാഗം അറസ്റ്റ് ചെയ്തു. അൽ റായ് മേഖലയിലെ ഒരു പ്രമുഖ ഷോപ്പിംഗ് മാളിൽ നടത്തിയ പ്രത്യേക നീക്കത്തിലാണ് പ്രതിയെ പിടികൂടിയത്. അറസ്റ്റിനെ തുടർന്ന് ഫർവാനിയ ഗവർണറേറ്റിലെ വിവിധ പ്രദേശങ്ങളിൽ ഇയാൾ നടത്തിയതായി സംശയിച്ചിരുന്ന പത്തോളം കവർച്ചക്കേസുകൾ തെളിഞ്ഞതായി അധികൃതർ അറിയിച്ചു. പ്രതിയുടെ കൈവശം കണ്ടെത്തിയ വാഹനം പോലും ഇതേ രീതിയിൽ കവർന്നെടുത്തതാണെന്നും അന്വേഷണത്തിൽ വ്യക്തമായി. മയക്കുമരുന്ന് വാങ്ങാൻ പണം കണ്ടെത്തുന്നതിനായാണ് ഏഷ്യൻ പ്രവാസികളെ ലക്ഷ്യമിട്ട് ഇയാൾ തുടർച്ചയായി കവർച്ച നടത്തിയിരുന്നതെന്ന് ചോദ്യംചെയ്യലിൽ സമ്മതിച്ചതായും സുരക്ഷാ വൃത്തങ്ങൾ അറിയിച്ചു. ഫർവാനിയ ഗവർണറേറ്റിൽ ലഭിച്ച നിരവധി പരാതികളുടെ അടിസ്ഥാനത്തിലായിരുന്നു അന്വേഷണം. ഇതിൽ മൂന്ന് പരാതികൾ ജലീബ് അൽ ഷുയൂഖ് പൊലീസ് സ്റ്റേഷനിൽ രജിസ്റ്റർ ചെയ്തവയായിരുന്നു. കുവൈത്തി വേഷം ധരിച്ച് ഇരകളെ സമീപിച്ച പ്രതി, താൻ ക്രിമിനൽ ഇൻവെസ്റ്റിഗേഷൻ വിഭാഗത്തിലെ ഉദ്യോഗസ്ഥനാണെന്ന് പരിചയപ്പെടുത്തി രേഖകളും പേഴ്സും പരിശോധനയ്ക്കെന്ന പേരിൽ കൈപ്പറ്റുകയായിരുന്നു. തുടർന്ന് പണവും മറ്റ് വിലപിടിപ്പുള്ള സാധനങ്ങളും കൈക്കലാക്കിയ ശേഷം, അവ തിരികെ ലഭിക്കാൻ പൊലീസ് സ്റ്റേഷനിൽ എത്തണമെന്ന് പറഞ്ഞ് സ്ഥലത്ത് നിന്ന് മുങ്ങുന്നതായിരുന്നു ഇയാളുടെ രീതി. പരാതികൾ വിശദമായി പരിശോധിച്ച അന്വേഷണ സംഘം ഖൈത്താൻ, ഫർവാനിയ മേഖലകളിൽ സമാനമായ ഏഴ് കേസുകൾ കൂടി കണ്ടെത്തി. തുടർന്ന് പ്രത്യേക അന്വേഷണസംഘം രൂപീകരിച്ച് പ്രതി ഉപയോഗിച്ചിരുന്ന വാഹനം കണ്ടെത്തുകയും അൽ റായ് പ്രദേശത്തെ ഷോപ്പിംഗ് കോംപ്ലക്സിൽ എത്തിയ വിവരം ലഭിച്ചതിനെ തുടർന്ന് കെണിയൊരുക്കി പ്രതിയെ പിടികൂടുകയുമായിരുന്നു. ചോദ്യംചെയ്യലിൽ പ്രതി കുറ്റം സമ്മതിച്ചു. തുടർന്ന് പരാതിക്കാരുടെ സാന്നിധ്യത്തിൽ നടത്തിയ തിരിച്ചറിയൽ പരേഡിലും ഇയാളെ വ്യക്തമായി തിരിച്ചറിഞ്ഞു. പ്രതിയെ തുടർ നിയമനടപടികൾക്കായി പബ്ലിക് പ്രോസിക്യൂഷന് കൈമാറിയതായി അധികൃതർ അറിയിച്ചു.

അനധികൃത തെരുവ് വ്യാപാരത്തിനെതിരെ കർശന നടപടി; മൊബൈൽ കാർട്ടുകൾ നീക്കം ചെയ്ത് കുവൈത്ത് മുനിസിപ്പാലിറ്റി

kuwait campaign unlicensed street vendors കുവൈത്ത് സിറ്റി: അനധികൃത തെരുവ് വ്യാപാരം നിയന്ത്രിക്കുന്നതിനുള്ള നടപടികളുടെ ഭാഗമായി ജഹ്‌റ ഗവർണറേറ്റിലെ പൊതുശുചിത്വ-റോഡ് അധിനിവേശ വിഭാഗം വ്യാപക പരിശോധന നടത്തി. പരിശോധനയിൽ ഏഴ് അനധികൃത മൊബൈൽ കാർട്ടുകൾ നീക്കം ചെയ്യുകയും രണ്ട് തെരുവ് കച്ചവടക്കാർക്കെതിരെ നിയമലംഘന റിപ്പോർട്ടുകൾ രജിസ്റ്റർ ചെയ്യുകയും ചെയ്തു. അൽ ജഹ്‌റയിലെ വിവിധ പ്രദേശങ്ങളിൽ അനുമതിയില്ലാതെ തെരുവ് കച്ചവടം നടക്കുന്നതായി കണ്ടെത്തിയതിനെ തുടർന്നാണ് മുനിസിപ്പൽ സംഘങ്ങൾ പരിശോധന നടത്തിയത്. പൊതുസ്ഥലങ്ങളുടെ ശുചിത്വം സംരക്ഷിക്കുക, റോഡുകളിലെ ക്രമസമാധാനം ഉറപ്പാക്കുക, മുനിസിപ്പൽ ചട്ടങ്ങൾ കർശനമായി നടപ്പാക്കുക എന്നിവയാണ് പരിശോധനാ നടപടികളുടെ പ്രധാന ലക്ഷ്യമെന്ന് അധികൃതർ അറിയിച്ചു. ജഹ്‌റ പൊതുശുചിത്വ-റോഡ് അധിനിവേശ വിഭാഗം ഡയറക്ടർ നവാഫ് അൽ മുതൈരി പറഞ്ഞു, അനധികൃത തെരുവ് വ്യാപാരത്തിനെതിരെ തുടരുന്ന കർശന നടപടികളുടെ ഭാഗമായാണ് പുതിയ പരിശോധന നടത്തിയതെന്ന്. പൊതുസ്ഥലങ്ങളും റോഡുകളും കൈയേറുന്നതും നിയമവിരുദ്ധ വ്യാപാര പ്രവർത്തനങ്ങളും അനുവദിക്കില്ലെന്നും, ചട്ടലംഘനങ്ങൾ കണ്ടെത്താൻ സ്ഥിരമായ പരിശോധനകൾ തുടരുമെന്നും മുനിസിപ്പാലിറ്റി മുന്നറിയിപ്പ് നൽകി.

ഈ തസ്തികകളില്‍ ഇനി പ്രവാസികളില്ല, 100% കുവൈത്തിവത്കരണം പൂര്‍ത്തിയായി

Expert Department Kuwaitisation കുവൈത്ത് സിറ്റി: കുവൈത്ത് നീതിന്യായ മന്ത്രാലയത്തിന് കീഴിലുള്ള ജനറൽ ഡിപ്പാർട്ട്മെന്റ് ഓഫ് എക്‌സ്‌പേർട്‌സിൽ സമ്പൂർണ കുവൈത്തിവൽക്കരണം പൂർത്തിയായി. തിങ്കളാഴ്ച മുതൽ വകുപ്പിലെ വിദഗ്ധ തസ്തികകളിൽ 100 ശതമാനവും കുവൈത്ത് പൗരന്മാർ നിയമിതരായതായി അധികൃതർ അറിയിച്ചു. ജനറൽ ഡിപ്പാർട്ട്മെന്റ് ഓഫ് എക്‌സ്‌പേർട്‌സിന്റെ ആക്ടിങ് മേധാവി ഡോ. ഫവാസ് ബൗദി കുവൈത്ത് ന്യൂസ് ഏജൻസിയോട് പറഞ്ഞു, എൻജിനീയറിങ് വിദഗ്ധർ, അക്കൗണ്ടന്റുമാർ, നിയമ ഗവേഷകർ തുടങ്ങി എല്ലാ വിദഗ്ധ തസ്തികകളും കുവൈത്ത് പൗരന്മാർക്കായി മാറ്റിയതായാണ്. ദേശീയ പ്രതിഭകളെ കൂടുതൽ ആശ്രയിച്ചുകൊണ്ട് വകുപ്പിന്റെ പ്രവർത്തനങ്ങൾ ശക്തിപ്പെടുത്തുകയാണ് ഈ നടപടിയുടെ ലക്ഷ്യമെന്ന് അദ്ദേഹം വ്യക്തമാക്കി. നീതിന്യായ മന്ത്രി കൗൺസിലർ നാസർ അൽ സുമൈത്ത് മേയ് മാസത്തിൽ പ്രഖ്യാപിച്ച സമഗ്ര വികസന പദ്ധതിയുടെ ആദ്യഘട്ടമാണ് സമ്പൂർണ കുവൈത്തിവൽക്കരണമെന്നും അദ്ദേഹം കൂട്ടിച്ചേർത്തു. പദ്ധതിയുടെ അടുത്ത ഘട്ടത്തിൽ വിദഗ്ധർക്കിടയിൽ ജോലിഭാരം കൂടുതൽ സന്തുലിതമായി വിഭജിക്കുക, നിശ്ചിത ഇടവേളകളിൽ ചുമതലമാറ്റം നടപ്പാക്കുക, പ്രവർത്തനക്ഷമതയും സാങ്കേതിക റിപ്പോർട്ടുകളുടെ നിലവാരവും ഉയർത്തുക, റിപ്പോർട്ടുകൾ വേഗത്തിൽ പൂർത്തിയാക്കുക തുടങ്ങിയ കാര്യങ്ങൾക്കാണ് മുൻഗണന നൽകുക. വകുപ്പിന്റെ സേവനങ്ങൾ പൂർണമായും ഡിജിറ്റൽ സംവിധാനത്തിലേക്ക് മാറ്റുന്നതിനുള്ള നടപടികളും അടുത്ത ഘട്ടത്തിൽ പൂർത്തിയാക്കുമെന്ന് അധികൃതർ അറിയിച്ചു. ജനറൽ ഡിപ്പാർട്ട്മെന്റ് ഓഫ് എക്‌സ്‌പേർട്‌സിനെ ആധുനികവൽക്കരിക്കുന്നതിനുള്ള സമഗ്ര പദ്ധതി മേയ് 9-ന് മന്ത്രി നാസർ അൽ സുമൈത്ത് പ്രഖ്യാപിച്ചിരുന്നു. ഇതിന്റെ ഭാഗമായി എൻജിനീയറിങ് വിദഗ്ധർ, അക്കൗണ്ടന്റുമാർ, നിയമ ഗവേഷകർ എന്നീ തസ്തികകളിൽ ജോലി ചെയ്തിരുന്ന വിദേശ ജീവനക്കാരുടെ സേവനം അവസാനിപ്പിച്ച് ഓഗസ്റ്റ് ആദ്യം മുതൽ സമ്പൂർണ കുവൈത്തിവൽക്കരണം നടപ്പാക്കാനായിരുന്നു തീരുമാനം.

അമേരിക്ക–കുവൈത്ത് പ്രതിരോധ സഹകരണം ശക്തമാക്കാൻ ഉന്നതതല ചർച്ച

US Kuwait Military Discussion കുവൈത്ത് സിറ്റി: അമേരിക്കൻ ലെഫ്റ്റനന്റ് ജനറൽ ലീഹി കുവൈത്ത് സായുധസേനയുടെ ചീഫ് ഓഫ് ദ ജനറൽ സ്റ്റാഫ് ലെഫ്റ്റനന്റ് ജനറൽ ഖാലിദ് അൽ-ഷരിയാനുമായി കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള പ്രതിരോധ സഹകരണം കൂടുതൽ ശക്തിപ്പെടുത്തുന്നതിനും കുവൈത്തിനുള്ള അമേരിക്കയുടെ പ്രതിബദ്ധത ആവർത്തിച്ച് ഉറപ്പിക്കുന്നതിനുമായിരുന്നു കൂടിക്കാഴ്ച. അമേരിക്കയും കുവൈത്തും തമ്മിലുള്ള ദീർഘകാല പ്രതിരോധ പങ്കാളിത്തം യോഗത്തിൽ വിലയിരുത്തി. മേഖലയിലെ സുരക്ഷയും സ്ഥിരതയും ഉറപ്പാക്കാനുള്ള ഇരുരാജ്യങ്ങളുടെയും സംയുക്ത പ്രതിബദ്ധതയും നേതാക്കൾ വീണ്ടും ഊന്നിപ്പറഞ്ഞു. പ്രാദേശിക സുരക്ഷാ വെല്ലുവിളികൾ നേരിടുന്നതിൽ ഇരുസേനകളും തമ്മിലുള്ള തുടർച്ചയായ ഏകോപനത്തിന്റെ പ്രാധാന്യവും സൈനിക സഹകരണത്തിന്റെ വിവിധ മേഖലകളും ചർച്ചയായി. പതിറ്റാണ്ടുകളായി തുടരുന്ന പ്രതിരോധ സഹകരണത്തിന്റെയും സംയുക്ത സുരക്ഷാ ശ്രമങ്ങളുടെയും അടിസ്ഥാനത്തിൽ കുവൈത്തും അമേരിക്കയും തമ്മിലുള്ള ശക്തമായ തന്ത്രപ്രധാന ബന്ധം കൂടുതൽ ദൃഢമാണെന്ന് കൂടിക്കാഴ്ചയിൽ ഇരുപക്ഷവും ആവർത്തിച്ചു.

ഭക്ഷ്യസുരക്ഷ ശക്തിപ്പെടുത്താൻ കുവൈത്തിന്‍റെ വൻ പദ്ധതി; ശുദ്ധീകരിച്ച ജലം കാർഷിക ആവശ്യങ്ങൾക്ക്

Kuwait’s food security agricultural future കുവൈത്ത് സിറ്റി: കാർഷിക ആവശ്യങ്ങൾക്കായി ശുദ്ധീകരിച്ച മലിനജലത്തിന്റെ ഉപയോഗം വിപുലീകരിച്ച് രാജ്യത്തിന്റെ ഭക്ഷ്യസുരക്ഷ ശക്തിപ്പെടുത്തുന്നതിനുള്ള രണ്ട് പ്രധാന അടിസ്ഥാനസൗകര്യ പദ്ധതികൾക്കായി 13 കമ്പനികൾ മത്സരരംഗത്ത്. തെക്കൻ, വടക്കൻ മേഖലകളിൽ ശുദ്ധീകരിച്ച ജല വിതരണ ശൃംഖല വികസിപ്പിക്കൽ, നിർമാണം, പ്രവർത്തനം, പരിപാലനം എന്നിവ ഉൾപ്പെടുന്ന രണ്ട് ടെൻഡറുകളുടെ സാമ്പത്തിക ബിഡുകൾ സെൻട്രൽ ഏജൻസി ഫോർ പബ്ലിക് ടെൻഡേഴ്‌സ് തുറന്നു. കുവൈത്ത് അൽ യൗം ഔദ്യോഗിക ഗസറ്റിൽ പ്രസിദ്ധീകരിച്ച വിവരമനുസരിച്ച്, തെക്കൻ മേഖലാ പദ്ധതിക്കായി ആറു കമ്പനികളും വടക്കൻ മേഖലാ പദ്ധതിക്കായി ഏഴ് കമ്പനികളുമാണ് ടെൻഡർ സമർപ്പിച്ചത്. ക്വാട്ടേണറി തലത്തിൽ ശുദ്ധീകരിച്ച മലിനജലം ജലസേചനത്തിനും കാർഷിക ആവശ്യങ്ങൾക്കും പരമാവധി പ്രയോജനപ്പെടുത്തുകയെന്ന സർക്കാർ തന്ത്രത്തിന്റെ ഭാഗമായാണ് പൊതുമരാമത്ത് മന്ത്രാലയം ഈ പദ്ധതികൾ നടപ്പാക്കുന്നത്. ശുദ്ധജല സ്രോതസ്സുകളെ ആശ്രയിക്കുന്നത് കുറയ്ക്കുക, ജലവിഭവങ്ങളുടെ സുസ്ഥിര ഉപയോഗം ഉറപ്പാക്കുക, ആഭ്യന്തര കാർഷിക ഉൽപ്പാദനം വർധിപ്പിക്കുക, രാജ്യത്തിന്റെ ഭക്ഷ്യസുരക്ഷ ശക്തിപ്പെടുത്തുക എന്നിവയാണ് പദ്ധതികളുടെ പ്രധാന ലക്ഷ്യങ്ങൾ. സുസ്ഥിര ജലവിഭവ വികസനത്തിനും ദീർഘകാല കാർഷിക പ്രതിരോധശേഷി വർധിപ്പിക്കുന്നതിനുമുള്ള രാജ്യത്തെ പ്രധാന അടിസ്ഥാനസൗകര്യ നിക്ഷേപങ്ങളിലൊന്നായാണ് ഈ പദ്ധതികളെ പൊതുമരാമത്ത് മന്ത്രാലയം വിലയിരുത്തുന്നത്. സാമ്പത്തിക ബിഡുകൾ തുറന്നതിന് പിന്നാലെ സമർപ്പിച്ച എല്ലാ രേഖകളും സാങ്കേതിക പരിശോധനയ്ക്കായി CAPT പൊതുമരാമത്ത് മന്ത്രാലയത്തിന് കൈമാറി. ഔദ്യോഗിക ഗസറ്റിൽ പ്രസിദ്ധീകരിച്ച തീയതി മുതൽ 30 ദിവസത്തിനകം ടെൻഡറുകൾ വിലയിരുത്തി ശുപാർശകൾ സമർപ്പിക്കാനാണ് മന്ത്രാലയത്തിന് സമയം അനുവദിച്ചിരിക്കുന്നത്. തുടർന്ന് കരാർ നൽകുന്നതിനുള്ള നടപടികൾ പൂർത്തിയാക്കും. സുസ്ഥിര അടിസ്ഥാനസൗകര്യ വികസനം, ജലവിഭവ മാനേജ്മെന്റ് മെച്ചപ്പെടുത്തൽ, ശുദ്ധീകരിച്ച ജലത്തിന്റെ കാര്യക്ഷമമായ ഉപയോഗത്തിലൂടെ ദേശീയ ഭക്ഷ്യസുരക്ഷ ഉറപ്പാക്കൽ എന്നീ കുവൈത്തിന്റെ ദീർഘകാല വികസന തന്ത്രത്തിന്റെ ഭാഗമായാണ് ഈ പദ്ധതികൾ നടപ്പാക്കുന്നത്.

കുവൈത്തിൽ നഴ്‌സുമാർക്കും മിഡ്‌വൈഫുകൾക്കും വമ്പൻ ആനുകൂല്യങ്ങൾ; പുതിയ ശമ്പള – അലവൻസ് സംവിധാനം പ്രഖ്യാപിച്ചു

Kuwait allowances nursing staff കുവൈത്ത് സിറ്റി: നഴ്‌സുമാരുടെയും മിഡ്‌വൈഫുകളുടെയും സേവനത്തെ കൂടുതൽ ആകർഷകമാക്കുന്നതിനും പരിചയസമ്പത്തിനും വിദ്യാഭ്യാസ യോഗ്യതയ്ക്കും കൂടുതൽ അംഗീകാരം നൽകുന്നതിനുമായി കുവൈത്ത് ആരോഗ്യ മന്ത്രി ഡോ. അഹമ്മദ് അൽ അവാദി പുതിയ ആനുകൂല്യ-കരിയർ സംവിധാനം പ്രഖ്യാപിച്ചു. 2026-ലെ മന്ത്രാലയ ഉത്തരവ് നമ്പർ 206 പ്രകാരമാണ് അലവൻസുകൾ, പ്രോത്സാഹനങ്ങൾ, കരിയർ ഗ്രേഡുകൾ എന്നിവ പുനഃക്രമീകരിക്കുകയും മിഡ്‌വൈഫ് മേഖലയ്ക്കായി പുതിയ സാങ്കേതിക തസ്തികകൾ സൃഷ്ടിക്കുകയും ചെയ്തത്. പുതിയ ഉത്തരവ് പ്രകാരം, കുവൈത്തി നഴ്‌സുമാർക്കും മിഡ്‌വൈഫുകൾക്കും അടിസ്ഥാന പ്രൊഫഷണൽ ഗ്രേഡിൽ പ്രതിമാസം 1,110 കുവൈത്തി ദിനാർ വരെ വിവിധ അലവൻസുകൾ ലഭിക്കും. സ്ഥാനക്കയറ്റം, പ്രവൃത്തി പരിചയം, ഉയർന്ന പ്രൊഫഷണൽ ഗ്രേഡുകൾ എന്നിവ അനുസരിച്ച് ഈ ആനുകൂല്യങ്ങൾ വർധിക്കും. ഹെഡ് നഴ്‌സിങ് സ്പെഷ്യലിസ്റ്റ്, ഹെഡ് മിഡ്‌വൈഫറി സ്പെഷ്യലിസ്റ്റ് എന്നീ തസ്തികകളിലുള്ളവർക്ക് പ്രതിമാസം 1,510 ദിനാർ വരെ അലവൻസുകൾ ലഭിക്കും. ജോലി സ്വഭാവ അലവൻസ്, ജോലിനിലവാര ബോണസ്, പ്രോത്സാഹന അലവൻസ്, ജീവിതച്ചെലവ് സഹായം, ഷിഫ്റ്റ് അലവൻസ്, മേൽനോട്ട അലവൻസ്, പരിശീലന പ്രോത്സാഹനം എന്നിവ ഇതിൽ ഉൾപ്പെടും. സീനിയർ നഴ്‌സിങ് സ്പെഷ്യലിസ്റ്റ്, സീനിയർ മിഡ്‌വൈഫറി സ്പെഷ്യലിസ്റ്റ് എന്നിവർക്ക് 1,430 ദിനാർ, സാധാരണ സീനിയർ നഴ്‌സുമാർക്കും സീനിയർ മിഡ്‌വൈഫുകൾക്കും 1,170 ദിനാർ, അടിസ്ഥാന ഗ്രേഡിലുള്ള നഴ്‌സുമാർക്കും മിഡ്‌വൈഫുകൾക്കും 1,110 ദിനാർ എന്നിങ്ങനെയാണ് അലവൻസ് നിശ്ചയിച്ചിരിക്കുന്നത്. അസിസ്റ്റന്റ് നഴ്‌സുമാർക്കും അസിസ്റ്റന്റ് മിഡ്‌വൈഫുകൾക്കും ജോലി സ്വഭാവം, പ്രോത്സാഹന ബോണസ്, ജീവിതച്ചെലവ് സഹായം, ഓൺ-കോൾ അലവൻസ് എന്നിവ ഉൾപ്പെടെ പ്രതിമാസം 1,040 ദിനാർ ലഭിക്കും. പുതിയ ഉത്തരവിൽ വിദേശ നഴ്‌സുമാർക്കും മിഡ്‌വൈഫുകൾക്കും പുതുക്കിയ അലവൻസ് സംവിധാനവും ഉൾപ്പെടുത്തിയിട്ടുണ്ട്. കുവൈത്തി ജീവനക്കാരെ അപേക്ഷിച്ച് ആനുകൂല്യങ്ങൾ കുറവായിരിക്കുമെങ്കിലും ജോലി സ്വഭാവ അലവൻസ്, ജോലിനിലവാര ബോണസ്, ജീവിതച്ചെലവ് സഹായം, ഷിഫ്റ്റ്/ഓൺ-കോൾ അലവൻസ്, മേൽനോട്ടവും പരിശീലനവുമായി ബന്ധപ്പെട്ട ആനുകൂല്യങ്ങളും തുടരും. നഴ്‌സിങ് സർവീസ് ടെക്നീഷ്യൻമാർക്കായി കുവൈത്തിക്കാർക്കും വിദേശികൾക്കും പ്രത്യേക ശമ്പള-അലവൻസ് സ്കെയിലും മന്ത്രാലയം പ്രഖ്യാപിച്ചിട്ടുണ്ട്. കുവൈത്തി നഴ്‌സിങ് അല്ലെങ്കിൽ മിഡ്‌വൈഫറി ബിരുദധാരികൾക്കായി പ്രത്യേക പ്രൊഫഷണൽ ബോണസും ഏർപ്പെടുത്തി. ഇതനുസരിച്ച് ഹെഡ് സ്പെഷ്യലിസ്റ്റുകൾക്ക് 500 ദിനാർ, സീനിയർ സ്പെഷ്യലിസ്റ്റുകൾക്ക് 400 ദിനാർ, സ്പെഷ്യലിസ്റ്റുകൾക്ക് 300 ദിനാർ, സീനിയർ നഴ്‌സുമാർക്കും സീനിയർ മിഡ്‌വൈഫുകൾക്കും 200 ദിനാർ, നഴ്‌സുമാർക്കും മിഡ്‌വൈഫുകൾക്കും 100 ദിനാർ വീതം അധികമായി ലഭിക്കും. ഉയർന്ന വിദ്യാഭ്യാസ യോഗ്യതകൾക്കും പ്രത്യേക പ്രോത്സാഹനമുണ്ട്. നഴ്‌സിങ്ങിൽ ഡോക്ടറേറ്റ് നേടിയ കുവൈത്തി നഴ്‌സുമാർക്ക് പ്രതിമാസം 150 ദിനാറും, മാസ്റ്റർസ് ബിരുദമുള്ളവർക്ക് 75 ദിനാറും അധികമായി ലഭിക്കും. യോഗ്യത ഔദ്യോഗികമായി അംഗീകരിക്കപ്പെട്ടതും നഴ്‌സിങ് മേഖലയുമായി നേരിട്ട് ബന്ധപ്പെട്ടതുമായിരിക്കണമെന്ന വ്യവസ്ഥയുണ്ട്. വിദേശ നഴ്‌സിങ് പ്രൊഫഷണലുകളിൽ ഡോക്ടറേറ്റ് നേടിയവർക്ക് 50 ദിനാറും, മാസ്റ്റർസ് ബിരുദധാരികൾക്ക് 25 ദിനാറും അധികമായി അനുവദിക്കും. നഴ്‌സിങ്, മിഡ്‌വൈഫറി മേഖലകളിലെ പ്രൊഫഷണൽ വൈദഗ്ധ്യത്തെ അംഗീകരിക്കാനും സ്പെഷ്യലൈസേഷൻ പ്രോത്സാഹിപ്പിക്കാനും ജീവനക്കാരെ ദീർഘകാലം നിലനിർത്താനും രാജ്യത്തെ ആരോഗ്യ സേവനങ്ങളുടെ നിലവാരം ഉയർത്താനുമാണ് പുതിയ ശമ്പള-അലവൻസ് സംവിധാനമെന്ന് ആരോഗ്യ മന്ത്രാലയം വ്യക്തമാക്കി. അതോടൊപ്പം, മിഡ്‌വൈഫ് മേഖലയ്ക്കായി സാങ്കേതിക ഗ്രേഡുകളോടുകൂടിയ പുതിയ സംയുക്ത തസ്തികകളും ഔദ്യോഗികമായി നിലവിൽ വരും. നഴ്‌സിങ്, മിഡ്‌വൈഫറി ജീവനക്കാർക്ക് കൂടുതൽ വ്യക്തമായ കരിയർ പുരോഗതിയും സാമ്പത്തിക സുരക്ഷയും തുടർപഠനത്തിനും പ്രൊഫഷണൽ വളർച്ചയ്ക്കുമുള്ള കൂടുതൽ അവസരങ്ങളും പുതിയ സംവിധാനം ഉറപ്പാക്കുമെന്നാണ് മന്ത്രാലയത്തിന്റെ വിലയിരുത്തൽ.