fish scarcity in kuwait കുവൈത്ത് സിറ്റി പ്രാദേശിക വിപണിയിലെ മത്സ്യലഭ്യതയിൽ 2026-ന്റെ ആദ്യ പാദത്തിൽ വലിയ മാറ്റങ്ങൾ രേഖപ്പെടുത്തിയതായി ഷർഖ് ഫിഷ് മാർക്കറ്റ് സൂപ്പർവൈസർ ഹമൂദ് അൽ ഹംദി അറിയിച്ചു. ഫെബ്രുവരി 28-ന് ആരംഭിച്ച അമേരിക്ക-ഇറാൻ യുദ്ധവും കാലാവസ്ഥാ വ്യതിയാനങ്ങളുമാണ് ഈ പ്രതിസന്ധിക്ക് പ്രധാന കാരണമായതെന്ന് അദ്ദേഹം വ്യക്തമാക്കി. മേഖലയിലെ സൈനിക സംഘർഷത്തെത്തുടർന്ന് ഏർപ്പെടുത്തിയ സുരക്ഷാ മുൻകരുതലുകൾ മത്സ്യബന്ധന മേഖലയെ സാരമായി ബാധിച്ചിട്ടുണ്ട്. സുരക്ഷ കണക്കിലെടുത്ത് ചെറുകിട ബോട്ടുകൾ കടലിൽ ഇറങ്ങുന്നത് അധികൃതർ നിരോധിച്ചതും വലിയ കപ്പലുകൾക്ക് നിയന്ത്രണങ്ങൾ ഏർപ്പെടുത്തിയതും പ്രാദേശിക വിതരണത്തെ ബാധിച്ചു. ആദ്യ മൂന്ന് മാസങ്ങളിൽ (ജനുവരി – മാർച്ച്) ആകെ 1,683,230 ടൺ മത്സ്യമാണ് വിപണിയിലെത്തിയത്. ഇതിൽ 46 ശതമാനവും (532,200 ടൺ) പ്രാദേശിക മത്സ്യങ്ങളാണ്. ആകെ 868,830 ടൺ മത്സ്യമാണ് ഇറക്കുമതി ചെയ്തത്. യുദ്ധത്തിന് മുൻപ് 623,630 ടൺ ഇറക്കുമതി ചെയ്തിരുന്ന സ്ഥാനത്ത്, യുദ്ധം ആരംഭിച്ച ശേഷം ഇത് 246,200 ടണ്ണായി കുറഞ്ഞു. അതായത് ഇറക്കുമതിയിൽ 60.5 ശതമാനത്തിന്റെ കുറവുണ്ടായി. ഫെബ്രുവരി 28-ന് ആരംഭിച്ച സംഘർഷം മൂലം കടലിലെ സുരക്ഷാ ഭീഷണിയും ഗതാഗത തടസ്സങ്ങളും വിതരണത്തെ ബാധിച്ചു. വേനൽക്കാലത്തിന്റെ തുടക്കത്തിൽ ജലത്തിന്റെ താപനില ഉയരുന്നത് മത്സ്യങ്ങളുടെ ലഭ്യത കുറയാൻ കാരണമാകുന്നു. തണുപ്പുകാലം ആരംഭിക്കുന്നതോടെ മാത്രമേ ഇതിൽ മാറ്റമുണ്ടാകൂ എന്ന് ഹമൂദ് അൽ ഹംദി വിശദീകരിച്ചു. സുരക്ഷാ മുൻകരുതലിന്റെ ഭാഗമായി മത്സ്യബന്ധനത്തിന് ഏർപ്പെടുത്തിയ കർശന നിയന്ത്രണങ്ങൾ പ്രാദേശിക വിപണിയിലെ സ്റ്റോക്കിനെ ബാധിച്ചിട്ടുണ്ട്.

കുവൈത്തിലെ പുതിയ ജോലി അവസരങ്ങൾക്കായി ഇവിടെ ക്ലിക്ക് ചെയ്യാം

കുവൈത്തിൽ വ്യാജ വെബ്സൈറ്റ് വഴി ലക്ഷങ്ങളുടെ തട്ടിപ്പ്; പ്രവാസിയ്ക്ക് കടുത്തശിക്ഷ

Fake Website Fraud Kuwait കുവൈത്ത് സിറ്റി: വ്യാജ വെബ്‌സൈറ്റ് നിർമ്മിച്ച് ഈജിപ്ഷ്യൻ വ്യാപാരിയിൽ നിന്ന് 20,000 കുവൈത്ത് ദിനാർ (ഏകദേശം 55 ലക്ഷത്തോളം രൂപ) തട്ടിയെടുത്ത കേസിൽ ഈജിപ്ഷ്യൻ സ്വദേശിക്ക് ഏഴ് വർഷം തടവുശിക്ഷ വിധിച്ച് കുവൈറ്റ് കോടതി. കീഴ്ക്കോടതി വിധി സുപ്രീം കോടതിയായ കോർട്ട് ഓഫ് കസേഷൻ ശരിവെച്ചു. ഉപഭോക്തൃ സംരക്ഷണ ഏജൻസിയുടേതെന്ന വ്യാജേന നിർമ്മിച്ച വെബ്‌സൈറ്റ് വഴിയാണ് പ്രതി തട്ടിപ്പ് നടത്തിയത്. ഔദ്യോഗിക സേവനങ്ങൾ വാഗ്ദാനം ചെയ്ത് വ്യാപാരിയെ വിശ്വസിപ്പിച്ചായിരുന്നു പണം തട്ടിയെടുത്തത്. മറ്റൊരാളുമായി (ഒമാനിൽ സാമ്പത്തിക കുറ്റകൃത്യങ്ങൾക്ക് നിലവിൽ വിചാരണ നേരിടുന്ന ഒന്നാം പ്രതി) ചേർന്ന് ഗൂഢാലോചന നടത്തിയാണ് പ്രതി വ്യാജ വെബ്‌സൈറ്റിലൂടെ ഇരയെ വലയിലാക്കിയത്. തട്ടിയെടുത്ത തുകയിൽ 16,000 ദിനാറിലധികം പ്രതി ക്രിപ്റ്റോകറൻസിയായി മാറ്റി. പണത്തിന്റെ ഉറവിടം മറച്ചുവെക്കാനും അന്വേഷണ ഏജൻസികൾ കണ്ടെത്തുന്നത് തടയാനുമാണ് ഇത്തരത്തിൽ ചെയ്തതെന്ന് അന്വേഷണത്തിൽ വ്യക്തമായി. ഏഴ് വർഷം തടവിന് പുറമെ, തട്ടിയെടുത്ത 20,000 ദിനാർ തിരികെ നൽകാനും തുല്യമായ തുക (20,000 ദിനാർ) പിഴയൊടുക്കാനും കോടതി ഉത്തരവിട്ടു.

വീട്ടില്‍ ആളില്ലാത്ത തക്കംനോക്കി മോഷണം; നഷ്ടപ്പെട്ടത് 18 കോടിയിലധികം മൂല്യമുള്ള സ്വർണാഭരണങ്ങളും വാച്ചുകളും

Bahrain Theft മനാമ: ബഹ്‌റൈനിൽ വീട് കുത്തിത്തുറന്ന് 8 ലക്ഷത്തിലധികം ബഹ്‌റൈനി ദിനാർ (ഏകദേശം 18 കോടിയിലധികം ഇന്ത്യൻ രൂപ) മൂല്യമുള്ള സ്വർണാഭരണങ്ങളും വാച്ചുകളും മറ്റ് വിലപിടിപ്പുള്ള വസ്തുക്കളും മോഷ്ടിച്ച ഏഴംഗ സംഘത്തെ പോലീസ് പിടികൂടി. ക്യാപിറ്റൽ ഗവർണറേറ്റ് പോലീസ് ഡയറക്ടറേറ്റാണ് 18-നും 23-നും ഇടയിൽ പ്രായമുള്ള പ്രതികളെ അറസ്റ്റ് ചെയ്തത്. വീട്ടുകാർ സ്ഥലത്തില്ലാത്ത സമയം നോക്കിയാണ് പ്രതികൾ കവർച്ച നടത്തിയത്. പരാതി ലഭിച്ചതിനെത്തുടർന്ന് ക്യാപിറ്റൽ ഗവർണറേറ്റ് പോലീസ് നടത്തിയ ഊർജിതമായ അന്വേഷണത്തിനൊടുവിലാണ് പ്രതികൾ വലയിലായത്. ശാസ്ത്രീയമായ തെളിവുകളുടെയും അന്വേഷണത്തിന്റെയും അടിസ്ഥാനത്തിലാണ് പ്രതികളെ തിരിച്ചറിഞ്ഞതും പിടികൂടിയതും. മോഷ്ടിച്ച വസ്തുക്കൾ ഇവരുടെ കൈവശം നിന്നും വിവിധ ഒളിത്താവളങ്ങളിൽ നിന്നുമായി പോലീസ് കണ്ടെടുത്തു. അറസ്റ്റിലായവരിൽ ഒരാൾ ഇതിനകം തന്നെ മറ്റൊരു സുരക്ഷാ കേസുമായി ബന്ധപ്പെട്ട് തടങ്കലിലായിരുന്നുവെന്ന് അധികൃതർ വ്യക്തമാക്കി. പ്രതികൾക്കെതിരെയുള്ള എല്ലാ നിയമനടപടികളും പൂർത്തിയാക്കി കേസ് പബ്ലിക് പ്രോസിക്യൂഷന് കൈമാറി.