Frozen shrimp seized in Kuwait കുവൈത്ത് സിറ്റി: കുവൈത്തിലെ പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷന്റെ ക്യാപിറ്റൽ ഗവർണറേറ്റ് ഇൻസ്പെക്ഷൻ ഡിപ്പാർട്ട്മെന്റിന് കീഴിലുള്ള ‘സീഫ്രണ്ട് ഫുഡ് ഇൻസ്പെക്ഷൻ സെന്റർ’ നടത്തിയ ഫീൽഡ് പരിശോധനയിൽ വൻതോതിൽ ഗുണനിലവാരമില്ലാത്ത ഭക്ഷ്യവസ്തുക്കൾ പിടിച്ചെടുത്തു. ആഭ്യന്തര മന്ത്രാലയം, കുവൈറ്റ് മുൻസിപ്പാലിറ്റി എന്നിവയുടെ സഹകരണത്തോടെയായിരുന്നു ഈ പരിശോധന. എവിടെ നിന്നാണ് കൊണ്ടുവന്നതെന്ന് വ്യക്തമല്ലാത്ത ഏകദേശം 234 കിലോഗ്രാം മരവിപ്പിച്ച കൊഞ്ചാണ് അധികൃതർ പിടിച്ചെടുത്തത്. മരവിപ്പിച്ച ഈ കൊഞ്ച് ഐസ് ഉരുക്കി മാറ്റിയ ശേഷം, പുതിയതാണെന്ന വ്യാജേന പ്രാദേശിക വിപണിയിൽ വീണ്ടും വിൽപ്പന നടത്താൻ തയ്യാറാക്കി വെച്ചിരിക്കുകയായിരുന്നു. ഭക്ഷ്യ സുരക്ഷാ നിയമങ്ങളുടെ ലംഘനം കണ്ടെത്തിയതിനെത്തുടർന്ന് അധികൃതർ അടിയന്തരമായി നിയമനടപടികൾ സ്വീകരിച്ചു. നിയമലംഘന റിപ്പോർട്ടുകൾ തയാറാക്കിയതിനൊപ്പം പിടിച്ചെടുത്ത ചരക്കുകൾ പൂർണ്ണമായും നശിപ്പിച്ചു കളയാനുള്ള ഉത്തരവും അതോറിറ്റി പുറപ്പെടുവിച്ചു. ഉപഭോക്താക്കളുടെ ആരോഗ്യം സംരക്ഷിക്കുന്നതിനും സുരക്ഷിതമല്ലാത്ത ഭക്ഷ്യവസ്തുക്കൾ വിപണിയിൽ വിതരണം ചെയ്യുന്നത് തടയുന്നതിനുമുള്ള നിരന്തര ശ്രമങ്ങളുടെ ഭാഗമായാണ് ഈ നടപടിയെന്ന് പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷൻ വ്യക്തമാക്കി. വരും ദിവസങ്ങളിലും വിവിധ സർക്കാർ വകുപ്പുകളുമായി സഹകരിച്ച് ഇത്തരം പരിശോധനകൾ കർശനമായി തുടരുമെന്നും അധികൃതർ കൂട്ടിച്ചേർത്തു.

ഇരട്ട പൗരത്വം: 30 ലധികം കുവൈത്തി പൗരന്മാരുടെ പൗരത്വം റദ്ദാക്കി

Kuwait dual citizenship violations കുവൈത്ത് സിറ്റി: കുവൈത്തിലെ പൗരത്വ നിയമത്തിലെ ആർട്ടിക്കിൾ 11 അനുസരിച്ച്, ഇരട്ട പൗരത്വമുള്ള 31 വ്യക്തികളുടെ കുവൈത്ത് പൗരത്വം റദ്ദാക്കാൻ നാഷണൽ അഫയേഴ്സ് സുപ്രീം കമ്മിറ്റി തീരുമാനിച്ചു. പൗരത്വ ഫയലുകളും അതുമായി ബന്ധപ്പെട്ട നിയമലംഘനങ്ങളും അവലോകനം ചെയ്യാൻ ചേർന്ന സമിതിയുടെ പ്രത്യേക യോഗത്തിലാണ് ഈ നിർണ്ണായക തീരുമാനമുണ്ടായത്. ഔദ്യോഗികമായ അനുമതിയില്ലാതെ മറ്റ് രാജ്യങ്ങളുടെ പൗരത്വം നേടുകയോ നിലനിർത്തുകയോ ചെയ്യുന്ന പൗരന്മാരുടെ കുവൈത്ത് പൗരത്വം പിൻവലിക്കാൻ ഈ നിയമം വ്യവസ്ഥ ചെയ്യുന്നുണ്ട്. ഈ തീരുമാനം ഔദ്യോഗിക ഗസറ്റിൽ പ്രസിദ്ധീകരിക്കുന്നതിന് മുൻപായി, ബന്ധപ്പെട്ട വ്യക്തികൾക്കെതിരെ ആവശ്യമായ നിയമപരവും ഭരണപരവുമായ തുടർനടപടികൾ സ്വീകരിക്കുന്നതിനായി ഫയലുകൾ കൈമാറും.