Kuwait Health Ministry കുവൈത്ത് സിറ്റി: ഹജ്ജ് കർമ്മങ്ങൾ പൂർത്തിയാക്കി കുവൈത്തിലേക്ക് മടങ്ങാനൊരുങ്ങുന്ന തീർഥാടകർ ആരോഗ്യ മുൻകരുതലുകൾ കർശനമായി പാലിക്കണമെന്ന് നിർദ്ദേശിച്ച് കുവൈത്ത് ആരോഗ്യ മന്ത്രാലയം. പകർച്ചവ്യാധികളിൽ നിന്ന് സംരക്ഷണം ഉറപ്പാക്കുക, ഹാജിമാരുടെയും അവരുടെ കുടുംബങ്ങളുടെയും സമൂഹത്തിന്റെയും സുരക്ഷ നിലനിർത്തുക മുതലായ ലക്ഷ്യങ്ങൾ മുൻ നിർത്തിയാണ് കുവൈത്ത് ഇത്തരമൊരു നിർദ്ദേശം പുറപ്പെടുവിച്ചത്.

ഹജ്ജ് യാത്രയ്ക്കു മുമ്പ് സ്വീകരിച്ച വാക്‌സിനുകൾ ആരോഗ്യ സംരക്ഷണത്തിന്റെ പ്രധാന ഘടകങ്ങളിലൊന്നാണെന്ന് മന്ത്രാലയം ചൂണ്ടിക്കാട്ടി. എന്നാൽ , മക്ക വിടുന്നതിന് മുമ്പുള്ള അവസാന രണ്ട് ദിവസത്തിനകം നിർബന്ധമായും മെനിംജൈറ്റിസിനെതിരേയുള്ള പ്രതിരോധ മരുന്ന് സ്വീകരിക്കണമെന്ന് അധികൃതർ വ്യക്തമാക്കി.

ഹജ്ജ് കഴിഞ്ഞ് നാട്ടിലെത്തിയ ശേഷമുള്ള ഘട്ടവും ആരോഗ്യ നിരീക്ഷണത്തിന്റെ പ്രധാന ഭാഗമാണെന്നും മന്ത്രാലയം ഓർമ്മിപ്പിച്ചു. തീർഥാടകർ മടങ്ങിയെത്തിയതിന് ശേഷം 21 ദിവസത്തേക്ക് ആരോഗ്യനില സ്വയം നിരീക്ഷിക്കണമെന്നും അധികൃതർ ആവശ്യപ്പെട്ടു.ഈ കാലയളവിൽ ആവശ്യമായ ആരോഗ്യ നിർദേശങ്ങൾക്കും സഹായങ്ങൾക്കും ബന്ധപ്പെട്ട ആരോഗ്യ വകുപ്പുകളുമായി ബന്ധപ്പെടണം. ശ്വാസകോശ സംബന്ധമായ ലക്ഷണങ്ങൾ അനുഭവപ്പെടുന്നവർ മാസ്‌ക് ധരിക്കണം. ആരോഗ്യ പരിശോധന പൂർത്തിയാകുന്നതുവരെ മറ്റുള്ളവരുമായുള്ള സമ്പർക്കം ഒഴിവാക്കണം. വയോജനങ്ങൾ, ദീർഘകാല രോഗികൾ, പ്രതിരോധശേഷി കുറഞ്ഞവർ എന്നിവരുടെ സുരക്ഷ പ്രത്യേകം ശ്രദ്ധിക്കണം. അവരോടൊപ്പം താമസിക്കുന്നവർ ആവശ്യമായ വാക്‌സിനുകൾ സ്വീകരിച്ചിട്ടുണ്ടെന്ന് ഉറപ്പാക്കണമെന്നും അധികൃതർ കൂട്ടിച്ചേർത്തു.

പനി, അതിയായ ക്ഷീണം, വിശപ്പില്ലായ്മ, തൊണ്ടവേദന, തുടർച്ചയായ തലവേദന, ചുമ, ശ്വാസതടസം, ചർമ്മത്തിൽ പാടുകൾ, വയറുവേദന, വയറിളക്കം, ഛർദി തുടങ്ങിയ ലക്ഷണങ്ങൾ പ്രകടമാകുന്നുവെങ്കിൽ ഉടൻ സമീപത്തെ ആരോഗ്യ കേന്ദ്രത്തിലോ ആശുപത്രിയിലോ ചികിത്സ തേടണമെന്ന് മന്ത്രാലയം നിർദേശിച്ചു. ചികിത്സയ്ക്കായി എത്തുമ്പോൾ യാത്രാ വിവരങ്ങൾ മെഡിക്കൽ സംഘത്തെ അറിയിക്കണമെന്നും ഇത് വഴി പെട്ടെന്ന് തന്നെ രോഗനിർണയം നടത്തുവാനും ആവശ്യമായ നടപടികൾ സ്വീകരിക്കുവാനും സഹായകരമാകുമെന്നും മന്ത്രാലയം വ്യക്തമാക്കി.

Substation Blaze കുവൈത്തിലെ ഇലക്ട്രിക് സബ്‌സ്റ്റേഷനിൽ തീപിടുത്തം

Substation Blaze കുവൈത്ത് സിറ്റി: കുവൈത്തിലെ ഇലക്ട്രിക് സബ്സ്റ്റേഷനിൽ തീപിടുത്തം. ഫഹദ് അൽ-അഹ്‌മദ് പ്രദേശത്തെ ഇലക്ട്രിക്കൽ സബ്‌സ്റ്റേഷനിലാണ് തീപിടുത്തം ഉണ്ടായത്. തീപിടുത്തം നിരവധി വാഹനങ്ങളിലേക്ക് പടർന്നതിനെ തുടർന്ന് സെൻട്രൽ മംഗഫ്, അഹ്‌മദി ഫയർ സ്റ്റേഷനുകളിൽ നിന്നുള്ള അഗ്നി ശമന സേനാംഗങ്ങൾ സംഭവ സ്ഥലത്തെത്തി തീ നിയന്ത്രണ വിധേയമാക്കി.

നീണ്ട നേരത്തെ പരിശ്രമത്തിന് ശേഷമാണ് അധികൃതർ തീ നിയന്ത്രണ വിധേയമാക്കിയത്. അഗ്നി ശമന സേനയുടെ അടിയന്തര ഇടപെടലിലൂടെ തീ കൂടുതൽ സ്ഥലങ്ങളിലേക്ക് വ്യാപിക്കുന്നത് തടയാൻ കഴിഞ്ഞു. സംഭവത്തിൽ ആളപായമൊന്നു സംഭവിക്കുകയോ ആർക്കും പരിക്കേൽക്കുയോ ചെയ്തിട്ടില്ല. തീപിടുത്തത്തിന്റെ കാരണം ഇതുവരെ വ്യക്തമായിട്ടില്ല. ഇതുസംബന്ധിച്ച അന്വേഷണം നടത്തുമെന്ന് അധികൃതർ വ്യക്തമാക്കി.

Father Bigoul കുവൈത്ത് സഹിഷ്ണുതയുടെയും മാനുഷിക മൂല്യങ്ങളുടെയും മാതൃക; ഫാ. ബിഗൗൾ അൻബ ബിഷോയ്

Father Bigoul കുവൈത്ത് സിറ്റി: കുവൈത്ത് സഹിഷ്ണുതയുടെയും മാനുഷിക മൂല്യങ്ങളുടെയും മാതൃകയെന്ന് കുവൈത്തിലെ സെന്റ് മാർക്ക് കോപ്റ്റിക് ഓർത്തഡോക്‌സ് കത്ത്രീഡലിന്റെ മുതിർന്ന പുരോഹിതൻ ഫാ. ബിഗൗൾ അൻബ ബിഷോയ്. ചരിത്രത്തിലുടനീളം കുവൈത്ത് മിതത്വത്തിന്റെയും സഹിഷ്ണുതയുടെയും മാനുഷിക മൂല്യങ്ങളുടെയും മാതൃകയായി നില കൊണ്ടിട്ടുണ്ടെന്ന് അദ്ദേഹം വ്യക്തമാക്കി. കുവൈത്ത് നേതൃത്വത്തിനും ജനങ്ങൾക്കും അദ്ദേഹം ഈദ് ആശംസകൾ നേരുകയും ചെയ്തു.

ബലിപെരുന്നാൾ ത്യാഗത്തിന്റെയും പരോപകാരത്തിന്റെയും ആത്മീയ സന്ദേശം ഉൾക്കൊള്ളുന്നതാണെന്നും അനുരജ്ഞനത്തിനും സമാധാനത്തിനും അത് വഴിയൊരുക്കുന്നുവെന്നും അദ്ദേഹം ചൂണ്ടിക്കാട്ടി. കുവൈത്തിനും മേഖലയ്ക്കും ലോകത്തിനും നന്മയും സമാധാനവും കൊണ്ടുവരട്ടെയെന്ന് അദ്ദേഹം ആശംസിക്കുകയും ചെയ്തു.

Iranian Missile Attack ഇറാന്റെ മിസൈൽ-ഡ്രോൺ ആക്രമണങ്ങൾ; ശക്തമായി അപലപിച്ച് കുവൈത്ത്

Iranian Missile Attack കുവൈത്ത് സിറ്റി: ഇറാന്റെ മിസൈൽ- ഡ്രോൺ ആക്രമണങ്ങളെ ശക്തമായി അപലപിച്ച് കുവൈത്ത്. കുവൈത്തിന് നേരെയുള്ള ഇറാനിയൻ മിസൈൽ, ഡ്രോൺ ആക്രമണങ്ങളെ കുവൈത്ത് വിദേശകാര്യ മന്ത്രാലയം ശക്തമായി അപലപിച്ചു. രാജ്യത്തിന്റെ പരമാധികാരം, സുരക്ഷ, പ്രാദേശിക സമഗ്രത എന്നിവയുടെ നഗ്നമായ ലംഘനവും അപകടകരമാ ആക്രമണവുമാണ് ഇറാന്റെ ഭാഗത്ത് നിന്നും ഉണ്ടാകുന്നതെന്ന് കുവൈത്ത് വിദേശകാര്യ മന്ത്രാലയം വ്യക്തമാക്കി. സാധാരണക്കാർക്കും രാജ്യത്തെ സുപ്രധാന സൗകര്യങ്ങൾക്കും നേരിട്ടുള്ള ഭീഷണിയാണ് ഈ ആക്രമണങ്ങളെന്നും മന്ത്രാലയം ചൂണ്ടിക്കാട്ടി.

പ്രാദേശിക സംഘർഷങ്ങൾ കുറയ്ക്കുന്നതിനും കൂടുതൽ സംഘർഷം തടയുന്നതിനുമായി നിരവധി സഹോദര-സൗഹൃദ രാജ്യങ്ങൾ ശ്രമങ്ങളിൽ ഏർപ്പെട്ടിരിക്കുന്ന സമയത്താണ് ആക്രമണങ്ങൾ നടന്നതെന്ന് മന്ത്രാലയം അറിയിച്ചു. പ്രാദേശിക സുരക്ഷയും സ്ഥിരതയും നിലനിർത്താൻ ലക്ഷ്യമിട്ടുള്ള നയതന്ത്ര സംരംഭങ്ങളെ അത്തരം നടപടികൾ ദുർബലപ്പെടുത്തുമെന്ന് മന്ത്രാലയം വ്യക്തമാക്കി. ആക്രമണങ്ങൾ നിരുപാധികം നിർത്തണമെന്നും, അവയുടെ അനന്തരഫലങ്ങൾക്ക് പൂർണ ഉത്തരവാദിത്തം ഏറ്റെടുക്കണമെന്നും കുവൈത്ത് ഇറാനോട് ആവശ്യപ്പെട്ടു. ആക്രമണങ്ങൾ അന്താരാഷ്ട്ര നിയമം, ഐക്യരാഷ്ട്രസഭയുടെ ചാർട്ടർ, 2026 ലെ സുരക്ഷാ കൗൺസിൽ പ്രമേയം 2817 എന്നിവയുടെ ഗുരുതരമായ ലംഘനമാണെന്നും മന്ത്രാലയം പറഞ്ഞു.

ഏതെങ്കിലും ആക്രമണത്തിൽ നിന്നോ ഭീഷണിയിൽ നിന്നോ തങ്ങളുടെ സുരക്ഷ, പ്രദേശം, സുപ്രധാന അടിസ്ഥാന സൗകര്യങ്ങൾ എന്നിവ സംരക്ഷിക്കുന്നതിന് ആവശ്യമായ എല്ലാ നടപടികളും സ്വീകരിക്കാനുള്ള പൂർണ്ണ അവകാശം കുവൈത്തിനുണ്ടെന്നും മന്ത്രാലയം കൂട്ടിച്ചേർത്തു.

Hormuz Disruption ഹോർമുസ് പ്രതിസന്ധി തുടർന്നാൽ ജെറ്റ് ഇന്ധന വിപണി കൂടുതൽ പ്രതിസന്ധിയിലാകും; മുന്നറിയിപ്പുമായി യൂറോപ്യൻ യൂണിയൻ

Hormuz Disruption ഹോർമുസ് പ്രതിസന്ധി തുടർന്നാൽ ജെറ്റ് ഇന്ധന വിപണി കൂടുതൽ പ്രതിസന്ധിയിലാകുമെന്ന് മുന്നറിയിപ്പ് നൽകി യൂറോപ്യൻ യൂണിയൻ. ഹോർമുസ് കടലിടുക്കിലെ സ്ഥിതി മെച്ചപ്പെട്ടില്ലെങ്കിൽ വരും ആഴ്ച്ചകളിൽ ജെറ്റ് ഇന്ധന വിതരണത്തിൽ കൂടുതൽ സമ്മർദ്ദം നേരിടേണ്ടി വരുമെന്നാണ് യൂറോപ്യൻ യൂണിയൻ നൽകുന്ന മുന്നറിയിപ്പ്.

ലോകത്തിലെ ഏറ്റവും പ്രധാനപ്പെട്ട ഊർജ്ജ ഷിപ്പിംഗ് റൂട്ടുകളിൽ ഒന്നിൽ തുടർച്ചയായ തടസ്സങ്ങളുടെ ആഘാതം വിലയിരുത്തിയ എണ്ണ വാതക ഏകോപന ഗ്രൂപ്പുകളുടെ ഏറ്റവും പുതിയ യോഗങ്ങൾക്ക് ശേഷമാണ് യൂറോപ്യൻ കമ്മീഷന്റെ ഊർജ്ജവകുപ്പ് ഇത് സംബന്ധിച്ച മുന്നറിയിപ്പ് നൽകിയത്. കമ്മീഷൻ പറയുന്നത് അനുസരിച്ച് ഹോർമുസ് കടലിടുക്ക് അടച്ചു പൂട്ടുന്നത് അസംസ്‌കൃത എണ്ണയെയും എല്ലാ പ്രധാനപ്പെട്ട പെട്രോളിയം ഉൽപ്പന്നങ്ങളെയും ബാധിക്കും. എല്ലാ യൂറോപ്യൻ യൂണിയൻ രാജ്യങ്ങളെയും ഈ ചലനാത്മകത ബാധിക്കുമെന്നും എണ്ണ ഏകോപന ഗ്രൂപ്പ് സൂചിപ്പിച്ചു. ഇതുവരെ തന്നെ ഊർജ്ജ വില ഉയർന്നിട്ടുണ്ട്. നീണ്ടുനിൽക്കുന്ന തടസ്സങ്ങൾ വിപണി സാഹചര്യങ്ങളെ കൂടുതൽ ബാധിക്കും എന്നാണ് ഉദ്യോഗസ്ഥർ ചൂണ്ടിക്കാട്ടുന്നത്. വരും ആഴ്ചകളിൽ സ്ഥിതി മെച്ചപ്പെട്ടില്ലെങ്കിൽ പ്രത്യേകിച്ച് ഇന്ധനവിപണികൾ കൂടുതൽ സമ്മർദ്ദത്തിലാകും എന്നാണ് പ്രതീക്ഷിക്കുന്നത്.

Hot Weather കുവൈത്തിൽ ഈ ആഴ്ച്ച അതിശക്തമായ ചൂട്; ചുട്ടുപ്പൊള്ളും

Hot Weather കുവൈത്ത് സിറ്റി: കുവൈത്തിൽ അടുത്ത ദിവസങ്ങളിൽ അതിശക്തമായ ചൂട് അനുഭവപ്പെടുമെന്ന് മുന്നറിയിപ്പ് നൽകി കാലാവസ്ഥാ നിരീക്ഷണ കേന്ദ്രം. കുവൈത്തിൽ ഈ ആഴ്ച്ച മുഴുവനും ചൂടു പൊടിപടലവും നിറഞ്ഞ കാലാവസ്ഥ തുടരുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു. വടക്കുപടിഞ്ഞാറൻ കാറ്റിന്റെ വേഗം ക്രമേണ വർധിക്കുമെന്നും വാരാന്ത്യത്തിൽ പ്രത്യേകിച്ച് തുറസ്സായ പ്രദേശങ്ങളിലും മരുഭൂമി മേഖലകളിലും പൊടിക്കാറ്റ് ഉണ്ടാകാനിടയുണ്ടെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.

വെള്ളിയാഴ്ച താപനില 46 ഡിഗ്രി സെൽഷ്യസിന് മുകളിലെത്താനും ചില ഉൾ, മരുഭൂമി പ്രദേശങ്ങളിൽ 48 ഡിഗ്രി വരെ ഉയരാനുമാണ് സാധ്യത. വെള്ളിയാഴ്ച്ച രാത്രി ചൂടുള്ളതും ഭാഗികമായി മേഘാവൃതവുമായ കാലാവസ്ഥയായിരിക്കും അനുഭവപ്പെടുക. ശനിയാഴ്ച്ചയും രാജ്യത്ത് ചൂട് തുടരും. പടിഞ്ഞാറൻ ദിശയിലുള്ള കാറ്റ് ചില സമയങ്ങളിൽ സജീവമാകാം. പരമാവധി താപനില 39 ഡിഗ്രി സെൽഷ്യസ് മുതൽ 41 ഡിഗ്രി സെൽഷ്യസ് വരെയായിരിക്കും. തുറന്ന പ്രദേശങ്ങളിൽ പൊടിപടലത്തിന് സാധ്യതയുണ്ട്. ശനിയാഴ്ച്ചയ രാത്രിയും ചൂടുള്ള കാലാവസ്ഥയായിരിക്കും.

Express Sale എക്‌സ്പ്രസ് സെയിലുമായി എയർ ഇന്ത്യ എക്‌സ്പ്രസ്; വിമാന യാത്രകളിൽ 50 ശതമാനം വരെ ഡിസ്‌ക്കൗണ്ട്

Express Saleവിമാനയാത്രികർക്ക് ഇതാ ഒരു സന്തോഷവാർത്ത. ആഭ്യന്തര- അന്താരാഷ്ട്ര യാത്രകളിൽ 50 ശതമാനം വരെ ഡിസ്‌ക്കൗണ്ടിൽ 50 ലക്ഷം സീറ്റുകളുമായി എയർ ഇന്ത്യ എക്‌സ്പ്രസ് എക്‌സ്പ്രസ്സ് സെയിൽ ആരംഭിച്ചിരിക്കുകയാണ്. എക്‌സ്പ്രസ് ലൈറ്റ്, എക്‌സ്പ്രസ് വാല്യൂ നിരക്കുകളിലാണ് 50% വരെ ഇളവ് പ്രഖ്യാപിച്ചിരിക്കുന്നത്. ജൂൺ 15 മുതൽ ഒക്ടോബർ 10 വരെയുള്ള യാത്രകൾക്കായി മെയ് 31നകം ബുക്ക് ചെയ്യുന്നവർക്കാണ് ഓഫർ ലഭിക്കുക.

ഓഫർ സമയത്ത് എയർ ഇന്ത്യ എക്‌സ്പ്രസ്സ് വെബ്‌സൈറ്റിലൂടെയും മൊബൈൽ ആപ്പിലൂടെയും ബുക്ക് ചെയ്യുന്ന ടിക്കറ്റുകൾക്ക് കൺവീനിയൻസ് ഫീ ഈടാക്കില്ല. ബിസിനസ് ക്ലാസിന് തത്തുല്യമായ ബിസ് വിഭാഗത്തിൽ ടിക്കറ്റ് എടുക്കുന്ന ടാറ്റ ന്യൂപാ സംഘങ്ങൾക്ക് 20% വരെ ഡിസ്‌കൗണ്ടും എക്‌സ്പ്രസ് എഹെഡ് മുൻഗണന സേവനങ്ങളും ലഭിക്കും. 300 രൂപവരെ അധിക ഡിസ്‌കൗണ്ടും എട്ട് ശതമാനം വരെ ന്യൂ കോയിനുകൾ നേടാനും ഇതിലൂടെ കഴിയും. സീറ്റ്, ഭക്ഷണം, 10 കിലോ അധിക ചെക്ക് ഇൻ ബാഗേജ്, മൂന്ന് കിലോ അധിക ഹാൻഡ് ബാഗേജ് എന്നിവയ്ക്ക് 30% വരെ ഡിസ്‌കൗണ്ട് ലഭിക്കും. വിദ്യാർത്ഥികൾ, മുതിർന്ന പൗരന്മാർ, സായുധ സേനാംഗങ്ങൾ, അവരുടെ ആശ്രിതർ എന്നിവർക്കും എയർ ഇന്ത്യ എക്‌സ്പ്രസ് വെബ്‌സൈറ്റിലൂടെ പ്രത്യേക നിരക്കിൽ വിമാന ടിക്കറ്റ് ബുക്ക് ചെയ്യാം.