koothattukulam accident കൂത്താട്ടുകുളം (എറണാകുളം): ഗൾഫിൽ നിന്ന് വിവാഹത്തിനായി നാട്ടിലെത്തുന്ന മകളെ വിമാനത്താവളത്തിൽ നിന്ന് സ്വീകരിക്കാൻ പോകുന്നതിനിടെ പിതാവ് വാഹനാപകടത്തിൽ മരിച്ചു. കുര്യനാട് മുളയോലിക്കൽ സണ്ണി ജോൺ (64) ആണ് മരിച്ചത്. ഞായറാഴ്ച ഉച്ചയോടെ സണ്ണിയും ഭാര്യയും മകനും ചേർന്ന് കൂത്താട്ടുകുളം ദേവമാതാ ആശുപത്രിയിൽ ചികിത്സയിൽ കഴിയുന്ന ബന്ധുവിനെ സന്ദർശിക്കാൻ എത്തിയിരുന്നു. തുടർന്ന് വിമാനത്താവളത്തിലേക്ക് പോകാനായിരുന്നു ഇവരുടെ പദ്ധതി. വാഹനം പാർക്ക് ചെയ്ത ശേഷം ആശുപത്രിയിലേക്ക് നടന്ന് പോകുന്നതിനിടെ ഇറക്കത്തിലൂടെ നിയന്ത്രണം വിട്ടെത്തിയ കാർ സണ്ണിയെ ഇടിച്ചുതെറിപ്പിക്കുകയായിരുന്നു. ഇടിയുടെ ആഘാതത്തിൽ മതിൽ മറികടന്ന് ആശുപത്രി കോംപൗണ്ടിലേക്ക് വീണ സണ്ണിയെ ഉടൻ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. സണ്ണി ജോൺ കോൺഗ്രസ് മരങ്ങാട്ടുപിള്ളി മണ്ഡലം വൈസ് പ്രസിഡന്റായിരുന്നു. ഭാര്യ: വിൽസി. മക്കൾ: ആൻഡിയ (സൗദി), അൽജോ, അനീറ്റ. സംസ്കാരം പിന്നീട് നടക്കും.

LATEST JOB IN UAE-DAILY UPDATING…	APPLY NOW
HOSPITAL JOBS IN UAE-DAILY UPDATING…	APPLY NOW
AIRPORT AND AIRLINE JOB IN UAE -DAILY UPDATING…	APPLY NOW
TEACHING JOB IN UAE -DAILY UPDATING…	APPLY NOW
LOGISTICS JOB IN UAE-DAILY UPDATING…	APPLY NOW
ACCOUNTING JOB IN UAE-DAILY UPDATING…	APPLY NOW

ദിർഹത്തിന് കരുത്തേറി; നാട്ടിലേക്ക് പണം അയക്കുന്ന പ്രവാസികൾക്ക് ഇരട്ട നേട്ടം

Dirham strengthens ദുബായ്: ഏഷ്യൻ രാജ്യങ്ങളിലെ കറൻസികളുടെ മൂല്യം ഇടിയുന്നത് യുഎഇയിലെ പ്രവാസികൾക്ക് വലിയ സാമ്പത്തിക നേട്ടമായി മാറുന്നു. ഇന്ത്യൻ രൂപ, ഫിലിപ്പീൻ പെസോ, പാകിസ്ഥാൻ രൂപ എന്നിവ ദിർഹത്തിനെതിരെ ദുർബലമായതോടെ നാട്ടിലേക്ക് പണമയയ്ക്കുന്നവർക്ക് കൂടുതൽ തുക ലഭിക്കുന്ന സാഹചര്യമാണുള്ളത്. ഇന്ത്യൻ രൂപയുടെ മൂല്യം ഒരു യുഎഇ ദിർഹത്തിന് 26.08 രൂപ എന്ന നിലയിലേക്ക് താഴ്ന്നതോടെ റമിറ്റൻസ് അയയ്ക്കാൻ അനുകൂല സമയമാണെന്നാണ് പലരും വിലയിരുത്തുന്നത്. നിലവിലെ ഉയർന്ന വിനിമയ നിരക്ക് പ്രയോജനപ്പെടുത്താൻ പല പ്രവാസികളും തുക ഘട്ടംഘട്ടമായി അയക്കുന്ന രീതിയാണ് സ്വീകരിക്കുന്നത്. ഒരു ഭാഗം ഇപ്പോൾ അയച്ച്, നിരക്ക് കൂടുതൽ അനുകൂലമായാൽ ശേഷിക്കുന്ന തുക പിന്നീട് കൈമാറാനാണ് പലരുടെയും തീരുമാനം. ഫിലിപ്പീൻ പെസോയും ദിർഹത്തിനെതിരെ 16 മുതൽ 16.48 വരെയുള്ള നിരക്കിലാണ് വ്യാപാരം നടക്കുന്നത്. ആഗോള സാമ്പത്തിക അനിശ്ചിതത്വവും രാഷ്ട്രീയ ഘടകങ്ങളും പെസോയുടെ മൂല്യത്തകർച്ചയ്ക്ക് കാരണമായെന്നാണ് വിലയിരുത്തൽ. യുഎസ് ഡോളറുമായി ബന്ധിപ്പിച്ചിരിക്കുന്ന യുഎഇ ദിർഹത്തിന്റെ ചലനങ്ങളും പെസോയുടെ വിനിമയ നിരക്കിനെ സ്വാധീനിക്കുന്നുണ്ട്. നിലവിലെ അനുകൂല സാഹചര്യം പരമാവധി പ്രയോജനപ്പെടുത്താനാണ് പ്രവാസി കുടുംബങ്ങളുടെ ശ്രമം. അതേസമയം, ഇപ്പോഴുള്ള നിരക്കിൽ തന്നെ മുഴുവൻ തുകയും അയക്കണമോ, അതോ വിപണിയിലെ തുടർചലനങ്ങൾ നിരീക്ഷിച്ച് പിന്നീട് കൈമാറണമോയെന്ന ആശയക്കുഴപ്പവും പലർക്കുമുണ്ട്.

ഇത്തിഹാദ് റെയിൽ യാത്രക്കാർക്കായി പുതിയ ‘റെയിൽ ടു റോഡ്’ സേവനം

New Rail to Road car rental service അബുദാബി: യുഎഇയിൽ യാത്ര കൂടുതൽ സുഗമമാക്കാൻ ഇതിഹാദ് റെയിലും ത്രിഫ്റ്റി കാർ റെന്റൽ യുഎഇയും ചേർന്ന് രാജ്യത്ത് ആദ്യമായി ‘റെയിൽ ടു റോഡ്’ സേവനം അവതരിപ്പിക്കുന്നു. ട്രെയിനിൽ യാത്ര ചെയ്യുന്നവർക്ക് സ്റ്റേഷനിൽ നിന്ന് നേരിട്ട് വാടകയ്ക്ക് വാഹനം എടുത്ത് ലക്ഷ്യസ്ഥാനത്തേക്ക് യാത്ര തുടരാൻ ഈ സേവനം സഹായിക്കും. ദേശീയ പാസഞ്ചർ റെയിൽ ശൃംഖലയിലുടനീളം കാർ വാടക സേവനം നൽകുന്നതിനായി എതിഹാദ് റെയിലുമായി അഞ്ച് വർഷത്തെ പ്രത്യേക കരാറിൽ എത്തിയതായി ത്രിഫ്റ്റി കാർ റെന്റൽ യുഎഇ അറിയിച്ചു. എതിഹാദ് റെയിലിന്റെ മൊബൈൽ ആപ്പ്, വെബ്സൈറ്റ്, ത്രിഫ്റ്റിയുടെ ഡിജിറ്റൽ പ്ലാറ്റ്ഫോം എന്നിവ വഴി യാത്രക്കാർക്ക് വാഹനങ്ങൾ മുൻകൂട്ടി ബുക്ക് ചെയ്യാം. പാസഞ്ചർ ശൃംഖലയിലെ 11 റെയിൽവേ സ്റ്റേഷനുകളിലും ഡിജിറ്റൽ ബുക്കിങ് കിയോസ്കുകളും സഹായ ഡെസ്കുകളും ഒരുക്കും. ട്രെയിൻ ടിക്കറ്റും കാർ ബുക്കിങ്ങും ഒരേ ഡിജിറ്റൽ സംവിധാനത്തിലൂടെ പൂർത്തിയാക്കാൻ കഴിയുന്ന സംവിധാനം ഒരുക്കാനുള്ള പ്രവർത്തനങ്ങളും പുരോഗമിക്കുകയാണ്. റെയിൽവേ സ്റ്റേഷനുമായി നേരിട്ട് ബന്ധമില്ലാത്ത സ്ഥലങ്ങളിലേക്ക് പോകുന്ന യാത്രക്കാർക്ക് അവസാനഘട്ട യാത്ര എളുപ്പമാക്കുകയാണ് പദ്ധതിയുടെ പ്രധാന ലക്ഷ്യം. ഈ പദ്ധതിക്കായി അടുത്ത അഞ്ച് വർഷത്തിനുള്ളിൽ 1 കോടി ദിർഹത്തിലധികം നിക്ഷേപിക്കുമെന്ന് ത്രിഫ്റ്റി യുഎഇ അറിയിച്ചു. തുടക്കത്തിൽ ഏകദേശം 500 വാഹനങ്ങൾ സേവനത്തിനായി വിന്യസിക്കും. യാത്രക്കാരുടെ എണ്ണം വർധിക്കുന്നതിനും റെയിൽ ശൃംഖല വികസിക്കുന്നതിനും അനുസരിച്ച് വാഹനങ്ങളുടെ എണ്ണവും കൂട്ടും. ലോകമെമ്പാടുമുള്ള ട്രെയിൻ യാത്രക്കാരിൽ 50 ശതമാനത്തിലധികം പേരും അവസാനഘട്ട യാത്രയ്ക്കായി കാർ വാടകയോ മറ്റ് പങ്കിടൽ ഗതാഗത സംവിധാനങ്ങളോ ഉപയോഗിക്കുന്നുണ്ടെന്ന് കമ്പനി ചൂണ്ടിക്കാട്ടി. പുതിയ സേവനത്തിലൂടെ യാത്രക്കാർക്ക് എത്തിച്ചേരുന്ന റെയിൽവേ സ്റ്റേഷനിൽ നിന്ന് വാഹനം ഏറ്റുവാങ്ങി നേരിട്ട് ലക്ഷ്യസ്ഥാനത്തേക്ക് പോകാനാകും. ബുക്കിങ് സംവിധാനത്തിലും ഉപഭോക്തൃ സേവനങ്ങളിലും ആർട്ടിഫിഷ്യൽ ഇന്റലിജൻസ് അടിസ്ഥാനമാക്കിയുള്ള പുതിയ സവിശേഷതകളും ഉൾപ്പെടുത്തുമെന്ന് കമ്പനി അറിയിച്ചു. എ.എ. അൽ മൂസ എന്റർപ്രൈസസിന്റെ സ്ഥാപകൻ അബ്ദുല്ല അഹമ്മദ് അൽ മൂസ പറഞ്ഞു: “യഥാർഥ കണക്റ്റിവിറ്റി എന്നത് യാത്രയുടെ ഓരോ ഘട്ടവും തടസ്സമില്ലാതെ ബന്ധിപ്പിക്കുന്നതാണ്. എതിഹാദ് റെയിൽ ശൃംഖലയിൽ ത്രിഫ്റ്റിയെ ഉൾപ്പെടുത്തുന്നതിലൂടെ യുഎഇയിൽ കൂടുതൽ സ്മാർട്ടും സമഗ്രവും സുസ്ഥിരവുമായ യാത്രാ സംവിധാനമാണ് ലക്ഷ്യമിടുന്നത്.” എതിഹാദ് റെയിൽ പാസഞ്ചർ സർവീസിന്റെ ആദ്യഘട്ടം ജൂൺ 30-ന് അബുദാബിയെയും ഫുജൈറയെയും ബന്ധിപ്പിച്ച് ആരംഭിച്ചിരുന്നു. സെപ്റ്റംബർ 30, 2026-ന് ജുമൈറ ഗോൾഫ് എസ്റ്റേറ്റ്സിന് സമീപമുള്ള ദുബായ് സ്റ്റേഷനും ഷാർജയിലെ അൽ ധൈദ് സ്റ്റേഷനും പ്രവർത്തനം ആരംഭിക്കുന്നതോടെ ശൃംഖല കൂടുതൽ വികസിക്കും. തുടർന്ന് 2026 അവസാനത്തോടെയും 2027 ആദ്യ മാസങ്ങളിലുമായി കൂടുതൽ സ്റ്റേഷനുകൾ ഘട്ടംഘട്ടമായി തുറക്കും. അബുദാബിയിലെ അൽ ദഫ്ര മേഖലയിലെ മദീനത്ത് സായിദ്, ലിവ, അൽ സില, അൽ ധന്ന, അൽ മിർഫ സ്റ്റേഷനുകളും 2027 മാർച്ച് 30-ന് ഷാർജ യൂണിവേഴ്സിറ്റി സിറ്റി സ്റ്റേഷനും പ്രവർത്തനം ആരംഭിക്കുന്നതോടെ ആദ്യഘട്ട പാസഞ്ചർ റെയിൽ ശൃംഖല പൂർണമാകും. പൂർണമായും പ്രവർത്തനക്ഷമമാകുമ്പോൾ എതിഹാദ് റെയിൽ പ്രതിവർഷം ഏകദേശം ഒരു കോടി യാത്രക്കാരെ വഹിക്കുമെന്നാണ് പ്രതീക്ഷ.

സൗദിയിലും ഒമാനിലും അസ്ഥിരമായ കാലാവസ്ഥ തുടരുന്നു; യുഎഇയിൽ മഴ തുടരും

Unstable weather UAE ദുബായ്: ഗൾഫ് മേഖലയിൽ ഈ ആഴ്ചയും അസ്ഥിര കാലാവസ്ഥ തുടരുമെന്ന് കാലാവസ്ഥാ കേന്ദ്രങ്ങൾ മുന്നറിയിപ്പ് നൽകി. യുഎഇയിൽ ഓഗസ്റ്റ് 6 വരെ വിവിധ ഭാഗങ്ങളിൽ മഴയ്ക്ക് സാധ്യതയുണ്ടെന്നും, സൗദി അറേബ്യയിലും ഒമാനിലും ഇടിമിന്നലോടുകൂടിയ മഴ തുടരുമെന്നും അധികൃതർ അറിയിച്ചു. യുഎഇ ദേശീയ കാലാവസ്ഥാ കേന്ദ്രം പ്രകാരം, കിഴക്കുനിന്നുള്ള ഉപരിതല ന്യൂനമർദവും ദുർബലമായ ഉയർന്നതല ന്യൂനമർദ സംവിധാനവും രാജ്യത്തെ കാലാവസ്ഥയെ സ്വാധീനിക്കുന്നുണ്ട്. ഓഗസ്റ്റ് 2 മുതൽ 6 വരെ രാജ്യത്തിന്റെ വിവിധ ഭാഗങ്ങളിൽ സംവഹന മേഘങ്ങൾ രൂപപ്പെടുകയും ഉച്ചയ്ക്ക് ശേഷമുള്ള സമയങ്ങളിൽ മഴ ലഭിക്കാനുമാണ് സാധ്യത. സമീപകാലത്ത് ഖലീജ് ടൈംസിനോട് സംസാരിച്ച എൻസിഎം കാലാവസ്ഥാ വിദഗ്ധൻ അഹമ്മദ് ഹബീബ്, നിലവിലുള്ള എൽ നിനോ പ്രതിഭാസമാണ് വേനൽക്കാലത്ത് അസാധാരണമായി മഴ ലഭിക്കുന്നതിന് കാരണമായേക്കാമെന്ന് വ്യക്തമാക്കി. ഓഗസ്റ്റ് 2 ഞായറാഴ്ച ഫുജൈറയിലെ മസാഫിയിൽ ശക്തമായ മഴ പെയ്യുന്ന ദൃശ്യങ്ങളും സ്റ്റോം സെന്റർ പുറത്തുവിട്ടിരുന്നു.അതേസമയം, രാജ്യത്ത് കനത്ത ചൂടും തുടരുകയാണ്. ഓഗസ്റ്റ് 1-ന് ഉച്ചയ്ക്ക് 2.30-ന് അബുദാബിയിലെ അൽ ഷവാമഖിൽ 50 ഡിഗ്രി സെൽഷ്യസ് താപനില രേഖപ്പെടുത്തിയിരുന്നു. ഇതിനിടെ, സൗദി അറേബ്യയുടെ ദേശീയ കാലാവസ്ഥാ കേന്ദ്രം ആസിർ, ജസാൻ, അൽ ബാഹ, മക്ക മേഖലയിലെ ഉയർന്ന പ്രദേശങ്ങൾ, നജ്‌റാൻ എന്നിവിടങ്ങളിൽ ആഴ്ചാവസാനം വരെ ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് അറിയിച്ചു. കാലാവസ്ഥാ മുന്നറിയിപ്പുകളും ഏറ്റവും പുതിയ വിവരങ്ങളും ഔദ്യോഗിക വെബ്സൈറ്റ്, അൻവാ ആപ്പ്, സാമൂഹിക മാധ്യമ അക്കൗണ്ടുകൾ എന്നിവയിലൂടെ നിരന്തരം പരിശോധിക്കണമെന്ന് സൗദി അധികൃതർ പൊതുജനങ്ങളോട് നിർദേശിച്ചു.

ക്രൂഡ് ഓയിൽ വിലനിർണയത്തിൽ നിർണായക മാറ്റം; നവംബർ മുതൽ പുതിയ സംവിധാനവുമായി അഡ്നോക്

Adnoc Dubai അബുദാബി: അബുദാബി നാഷണൽ ഓയിൽ കമ്പനി (അഡ്നോക്) നവംബർ 1 മുതൽ എല്ലാ ക്രൂഡ് ഓയിൽ ഗ്രേഡുകളുടെയും ഔദ്യോഗിക പ്രതിമാസ വിൽപ്പന വില നിശ്ചയിക്കുന്ന രീതിയിൽ മാറ്റം വരുത്തുമെന്ന് പ്രഖ്യാപിച്ചു. നിലവിൽ ഉപയോഗിക്കുന്ന മുർബാൻ ക്രൂഡ് ഫ്യൂച്ചേഴ്സിന് പകരം, പ്രോംപ്റ്റ്-മന്ത് പ്ലാറ്റ്സ് ദുബായ് വിലയെ അടിസ്ഥാനമാക്കിയായിരിക്കും ഇനി വില നിർണയം. മുർബാൻ, ദാസ്, ഉംം ലുലു, അപ്പർ സകും എന്നിവ ഉൾപ്പെടെയുള്ള അബുദാബിയിലെ കര-കടൽ എണ്ണപ്പാടങ്ങളിലെ എല്ലാ ക്രൂഡ് ഗ്രേഡുകൾക്കും പുതിയ സംവിധാനം ബാധകമാകും. ചരക്ക് കയറ്റുമതി നടക്കുന്ന മാസവുമായി കൂടുതൽ യോജിച്ച രീതിയിൽ വില നിർണയിക്കാനാണ് ഈ മാറ്റമെന്ന് അഡ്നോക് അറിയിച്ചു. ഓരോ ചരക്ക് കയറ്റുമതിക്കും മുൻമാസം ദുബായ് ബെഞ്ച്മാർക്ക് വിലയുമായി താരതമ്യപ്പെടുത്തിയുള്ള വില വ്യത്യാസവും കമ്പനി പ്രഖ്യാപിക്കും. വളർന്നുവരുന്ന ഉപഭോക്തൃ-നിക്ഷേപക ശൃംഖലയ്ക്ക് കൂടുതൽ സുതാര്യമായ വിലനിർണയ സംവിധാനം ഉറപ്പാക്കുന്നതിന്റെ ഭാഗമായാണ് പുതിയ തീരുമാനമെന്ന് അഡ്നോക് വ്യക്തമാക്കി. അബുദാബിയിലെ കര-കടൽ എണ്ണഗ്രേഡുകളുടെ വിതരണം സംബന്ധിച്ച എല്ലാ ബാധ്യതകളും മുൻപുപോലെ പാലിക്കുമെന്നും കമ്പനി അറിയിച്ചു. അമേരിക്ക–ഇസ്രയേൽ–ഇറാൻ സംഘർഷത്തെ തുടർന്ന് ഹോർമുസ് കടലിടുക്കിലൂടെയുള്ള എണ്ണക്കയറ്റുമതി തടസപ്പെട്ടതും അബുദാബി ക്രൂഡിൽ വ്യാപാരം നടത്തുന്ന ട്രേഡർമാർക്ക് വലിയ സാമ്പത്തിക നഷ്ടമുണ്ടായതുമാണ് പുതിയ മാറ്റത്തിന് പശ്ചാത്തലമായതെന്ന് റിപ്പോർട്ടുകൾ സൂചിപ്പിക്കുന്നു. ജൂൺ മാസം മുതൽ വിലനിർണയ സംവിധാനത്തിലെ മാറ്റങ്ങളെക്കുറിച്ച് ഉപഭോക്താക്കളുമായി അഡ്നോക് ചർച്ചകൾ നടത്തിയിരുന്നു. അതേസമയം, ജൂൺ മുതൽ സ്പോട്ട് ടെൻഡറുകളിലൂടെയും ദുബായ് ബെഞ്ച്മാർക്ക് വിലയെ അടിസ്ഥാനമാക്കി ക്രൂഡ് ഓയിൽ വിൽപ്പന നടത്തിയുവരികയായിരുന്നു. അഡ്നോകിന്റെ പ്രഖ്യാപനത്തിന് പിന്നാലെ ICE Futures Abu Dhabi (IFAD), നിലവിൽ ഓപ്പൺ ഇന്ററസ്റ്റ് ഉള്ള മുർബാൻ ക്രൂഡ് ഫ്യൂച്ചേഴ്സ് കരാറുകളുടെ വ്യാപാരം തുടരുമെന്നും, മറ്റ് കരാറുകൾ വെള്ളിയാഴ്ച മുതൽ താൽക്കാലികമായി നിർത്തിവെക്കുമെന്നും അറിയിച്ചു. ഈ വിലനിർണയ മാറ്റം അഡ്നോകിന്റെ ലിസ്റ്റ് ചെയ്ത ധനകാര്യ ഉപകരണങ്ങളെയോ മുർബാൻ GMTN, സുകുക് പദ്ധതികളെയോ കാര്യമായി ബാധിക്കില്ലെന്നും കമ്പനി വ്യക്തമാക്കി.

ഒമാനിൽ 14 ദിവസത്തെ സൗജന്യ ടൂറിസ്റ്റ് വിസ; വിദേശ സഞ്ചാരികളെ ആകർഷിക്കാൻ പുതിയ തീരുമാനം

free tourist visa in Oman മസ്‌കത്ത്: വിനോദസഞ്ചാര മേഖലയെ കൂടുതൽ ശക്തിപ്പെടുത്താനും വിദേശ സന്ദർശകരുടെ എണ്ണം വർധിപ്പിക്കാനുമായി ഒമാൻ 14 ദിവസത്തെ പുതിയ സൗജന്യ ടൂറിസ്റ്റ് വീസ പ്രഖ്യാപിച്ചു. ഇതുസംബന്ധിച്ച ഉത്തരവ് റോയൽ ഒമാൻ പൊലീസ് പുറത്തിറക്കി. വിദേശികളുടെ താമസനിയമത്തിന്റെ എക്‌സിക്യൂട്ടീവ് ചട്ടങ്ങളിൽ ഭേദഗതി വരുത്തിയാണ് പുതിയ സംവിധാനം നടപ്പാക്കുന്നത്. ഔദ്യോഗിക ഗസറ്റിൽ പ്രസിദ്ധീകരിച്ചതിന്റെ പിറ്റേദിവസം മുതൽ ഇത് പ്രാബല്യത്തിൽ വരും. ബന്ധപ്പെട്ട അധികാരികൾ നിർദേശിക്കുന്ന രാജ്യങ്ങളിലെ പൗരന്മാർക്കാണ് 14 ദിവസത്തെ സൗജന്യ ടൂറിസ്റ്റ് വീസ ലഭിക്കുക. അപേക്ഷകരുടെ യോഗ്യതയും നിശ്ചിത മാനദണ്ഡങ്ങളും പരിശോധിച്ച ശേഷമായിരിക്കും വീസ അനുവദിക്കുക. ഈ പദ്ധതിയുടെ മറ്റൊരു പ്രത്യേകത, 14 ദിവസത്തെ സൗജന്യ വീസയുടെ കാലാവധി അവസാനിക്കുന്നതിന് മുമ്പ് നിലവിലെ നിയമങ്ങളും ഫീസും പാലിച്ച് മറ്റ് ടൂറിസ്റ്റ് വീസകളിലേക്ക് മാറാൻ അവസരമുണ്ടെന്നതാണ്. രാജ്യാന്തര വിനോദസഞ്ചാരികളെ കൂടുതൽ ആകർഷിക്കുകയും ടൂറിസം മേഖലയെ ഉത്തേജിപ്പിക്കുകയും ചെയ്യുക എന്ന ലക്ഷ്യത്തോടെയാണ് പുതിയ സൗജന്യ വീസ സംവിധാനം നടപ്പിലാക്കുന്നതെന്ന് ഒമാൻ അധികൃതർ അറിയിച്ചു.

യുഎഇയിൽ വിദ്യാഭ്യാസ സർട്ടിഫിക്കറ്റ് അറ്റസ്റ്റേഷൻ ഇനി പൂർണമായും ഡിജിറ്റൽ; രണ്ട് മണിക്കൂറിനകം സേവനം

UAE educational document attestation ദുബായ്: വിദ്യാഭ്യാസ സർട്ടിഫിക്കറ്റുകളുടെയും അനുബന്ധ രേഖകളുടെയും അറ്റസ്റ്റേഷൻ സേവനം ഇനി പൂർണമായും ഡിജിറ്റൽ സംവിധാനത്തിലാക്കിയതായി യുഎഇ വിദേശകാര്യ മന്ത്രാലയം അറിയിച്ചു. ഔദ്യോഗിക പ്രവൃത്തി സമയങ്ങളിൽ അപേക്ഷകൾക്ക് പരമാവധി രണ്ട് മണിക്കൂറിനകം നടപടികൾ പൂർത്തിയാക്കുമെന്നും മന്ത്രാലയം വ്യക്തമാക്കി. വിദ്യാർഥികൾക്കും ബിരുദധാരികൾക്കും വേഗത്തിലും എളുപ്പത്തിലും സേവനം ലഭ്യമാക്കുക എന്ന ലക്ഷ്യത്തോടെയാണ് പുതിയ സംവിധാനം നടപ്പിലാക്കിയത്. 2025–2026 അധ്യയന വർഷത്തിലെ ബിരുദധാരികൾക്ക് മന്ത്രാലയത്തിന്റെ ഔദ്യോഗിക വെബ്സൈറ്റ് അല്ലെങ്കിൽ സ്മാർട്ട് ആപ്ലിക്കേഷൻ വഴി ഓൺലൈനായി അപേക്ഷ സമർപ്പിക്കാമെന്ന് അധികൃതർ അറിയിച്ചു. വിദ്യാഭ്യാസ മന്ത്രാലയത്തിന്റെ പാഠ്യപദ്ധതി പ്രകാരമുള്ള സർട്ടിഫിക്കറ്റുകൾ, രാജ്യാന്തര സ്കൂൾ യോഗ്യതാ രേഖകൾ, അംഗീകൃത വിദ്യാഭ്യാസ സ്ഥാപനങ്ങൾ നൽകുന്ന മറ്റ് വിദ്യാഭ്യാസ രേഖകൾ എന്നിവയ്ക്ക് ഡിജിറ്റൽ അറ്റസ്റ്റേഷൻ ലഭ്യമാകും. വിദ്യാഭ്യാസ മന്ത്രാലയം, അബുദാബിയുടെ ഏകീകൃത സർക്കാർ സേവന പ്ലാറ്റ്ഫോമായ TAMM, ഷാർജ പ്രൈവറ്റ് എജ്യുക്കേഷൻ അതോറിറ്റി എന്നിവ വഴി ലഭിക്കുന്ന വിദ്യാഭ്യാസ സർട്ടിഫിക്കറ്റുകൾ മന്ത്രാലയത്തിന്റെ ഡിജിറ്റൽ പ്ലാറ്റ്ഫോം ഉപയോഗിച്ച് അറ്റസ്റ്റ് ചെയ്യാം. യുഎഇയിൽ ഡിജിറ്റലായി നൽകിയ രേഖകൾ രണ്ട് മണിക്കൂറിനകം അറ്റസ്റ്റ് ചെയ്യുമെങ്കിലും, കൊറിയർ സേവനം വഴി സമർപ്പിക്കുന്ന രേഖകൾക്ക് തിരഞ്ഞെടുക്കുന്ന കൊറിയർ കമ്പനിയും ലക്ഷ്യസ്ഥാനവും അനുസരിച്ച് ഒന്ന് മുതൽ മൂന്ന് പ്രവൃത്തി ദിവസങ്ങൾ വരെ വേണ്ടിവരുമെന്ന് മന്ത്രാലയം അറിയിച്ചു. QR കോഡ്, ബാർകോഡ്, റഫറൻസ് നമ്പർ തുടങ്ങിയ പരിശോധനാ സംവിധാനങ്ങൾ ഉൾക്കൊള്ളുന്ന യുഎഇയിൽ നൽകിയ ഇലക്ട്രോണിക് രേഖകൾക്കാണ് ഈ ഡിജിറ്റൽ അറ്റസ്റ്റേഷൻ സേവനം ബാധകമാകുക. വിദ്യാഭ്യാസ സർട്ടിഫിക്കറ്റുകൾക്ക് പുറമെ ജനന-മരണ സർട്ടിഫിക്കറ്റുകളും പോലീസ് ക്ലിയറൻസ് സർട്ടിഫിക്കറ്റുകളും ഇതിലൂടെ അറ്റസ്റ്റ് ചെയ്യാൻ കഴിയും. തെറ്റായ വിവരങ്ങൾ ഉൾപ്പെട്ട അപേക്ഷകൾ, തിരുത്തലുകൾ വരുത്തിയതോ യഥാർത്ഥമല്ലാത്തതോ സേവന മാനദണ്ഡങ്ങൾ പാലിക്കാത്തതോ ആയ രേഖകൾ നിരസിക്കുമെന്ന് മന്ത്രാലയം മുന്നറിയിപ്പ് നൽകി. അറ്റസ്റ്റേഷൻ നടപടികൾ പൂർത്തിയായ ശേഷം മന്ത്രാലയത്തിന്റെ വെബ്സൈറ്റിലെ “My Applications” വിഭാഗത്തിൽ നിന്ന് ഡിജിറ്റലായി അറ്റസ്റ്റ് ചെയ്ത രേഖകൾ ഡൗൺലോഡ് ചെയ്യാനും സാധിക്കും.

യുഎഇയിൽ ഇന്നും കൊടുംചൂട്; 50°C വരെ താപനില, ചില പ്രദേശങ്ങളിൽ മഴയ്ക്കും സാധ്യത

UAE weather forecast Temperatures ദുബായ്: യുഎഇയിൽ ഇന്ന് താപനില 50 ഡിഗ്രി സെൽഷ്യസ് വരെ ഉയരാൻ സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ചു. ഉച്ചയ്ക്കുശേഷം കിഴക്കൻ, തെക്കൻ മേഖലകളിൽ സംവഹന മേഘങ്ങൾ രൂപപ്പെടുകയും ചിലയിടങ്ങളിൽ മഴ ലഭിക്കാനും സാധ്യതയുണ്ട്. രാജ്യത്ത് പൊതുവേ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും അനുഭവപ്പെടുക. തെക്ക്-കിഴക്കൻ ദിശയിൽ നിന്ന് വടക്ക്-കിഴക്കൻ ദിശയിലേക്ക് മണിക്കൂറിൽ 10 മുതൽ 25 കിലോമീറ്റർ വരെ വേഗത്തിൽ കാറ്റ് വീശും. ചില സമയങ്ങളിൽ ഉൾപ്രദേശങ്ങളിൽ കാറ്റിന്റെ വേഗം 40 കിലോമീറ്റർ വരെ ഉയരുകയും തുറന്ന സ്ഥലങ്ങളിൽ പൊടിക്കാറ്റിന് സാധ്യതയുണ്ടാകുകയും ചെയ്യും. അറേബ്യൻ ഉൾക്കടലിലും ഒമാൻ കടലിലും കടൽ പൊതുവേ ശാന്തമായിരിക്കും. ഉൾപ്രദേശങ്ങളിൽ താപനില 45 മുതൽ 50 ഡിഗ്രി സെൽഷ്യസ് വരെയും തീരദേശങ്ങളിലും ദ്വീപുകളിലും 42 മുതൽ 47 ഡിഗ്രി സെൽഷ്യസ് വരെയും മലനിരകളിൽ 33 മുതൽ 39 ഡിഗ്രി സെൽഷ്യസ് വരെയും ഉയരുമെന്നാണ് പ്രവചനം. കിഴക്കുനിന്ന് വ്യാപിക്കുന്ന ഉപരിതല ന്യൂനമർദവും മുകളിലത്തെ അന്തരീക്ഷത്തിലെ ന്യൂനമർദ സംവിധാനവും ചേർന്നാണ് ഉച്ചയ്ക്കുശേഷം സംവഹന മേഘങ്ങൾ രൂപപ്പെടാൻ അനുകൂല സാഹചര്യം സൃഷ്ടിക്കുന്നതെന്ന് എൻസിഎം വ്യക്തമാക്കി. വെള്ളിയാഴ്ച വരെ സമാനമായ കാലാവസ്ഥ തുടരുമെന്നും കിഴക്കൻ, തെക്കൻ മേഖലകൾക്കൊപ്പം ചിലപ്പോൾ പടിഞ്ഞാറൻ, ഉൾപ്രദേശങ്ങളിലും മഴ ലഭിക്കാൻ സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു. ബുധനാഴ്ചയും വ്യാഴാഴ്ചയും കാറ്റിന്റെ വേഗം മണിക്കൂറിൽ 50 കിലോമീറ്റർ വരെ ഉയരാൻ സാധ്യതയുള്ളതിനാൽ പൊടിക്കാറ്റിനും സാധ്യതയുണ്ട്. ഈ ദിവസങ്ങളിലും അറേബ്യൻ ഉൾക്കടലിലും ഒമാൻ കടലിലും കടൽ പൊതുവേ ശാന്തമായിരിക്കുമെന്നാണ് പ്രവചനം.