UAE national death kerala കോഴിക്കോട്: നഗരത്തിലെ ടൂറിസ്റ്റ് ഹോമിൽ മുറിയെടുത്ത് താമസിച്ചിരുന്ന യുഎഇ സ്വദേശിനിയായ 40കാരിയെ മരിച്ച നിലയിൽ കണ്ടെത്തി. സൈനബ് അലി ജുമാ മുഹമ്മദ് അൽ മർസുകിയാണ് മരിച്ചത്. മുറിയിൽ അബോധാവസ്ഥയിൽ കിടന്ന യുവതിയെ മകനാണ് ആദ്യം കണ്ടത്. തുടർന്ന് ടൂറിസ്റ്റ് ഹോം അധികൃതരെ വിവരം അറിയിക്കുകയും ഡോക്ടറെ എത്തിച്ച് പരിശോധിക്കുകയും ചെയ്തു. പരിശോധനയിൽ മരണം സ്ഥിരീകരിച്ചതിനെ തുടർന്ന് നടക്കാവ് പൊലീസിൽ വിവരം അറിയിച്ചു. യുവതിയുൾപ്പെടെ അഞ്ചംഗ കുടുംബമാണ് കേരളത്തിലെത്തിയത്. ഓഗസ്റ്റ് ഏഴിന് പ്ലാനറ്റോറിയത്തിന് സമീപമുള്ള എക്സ്പ്ലോറ ടൂറിസ്റ്റ് ഹോമിൽ ഇവർ മുറിയെടുത്തു. മരിച്ച യുവതിയുടെ മാതാപിതാക്കളും മറ്റ് ബന്ധുക്കളും ഉൾപ്പെടെയുള്ളവർ അഞ്ച് മുറികളിലായാണ് താമസിച്ചിരുന്നത്. യുവതിയുടെ മകനും ഇവരോടൊപ്പം അതേ മുറിയിലുണ്ടായിരുന്നു. ഉച്ചവരെ ഉറങ്ങുമെന്ന് അധികൃതരെ അറിയിച്ചിരുന്നു കഴിഞ്ഞ ദിവസം രാത്രി ഉറങ്ങാൻ പോകുമ്പോൾ ഉച്ചയോടെയേ എഴുന്നേൽക്കുകയുള്ളൂ എന്ന് യുവതി ടൂറിസ്റ്റ് ഹോം അധികൃതരെ അറിയിച്ചിരുന്നു. രാവിലെ ഇവരുമായി ബന്ധപ്പെടാതിരുന്നതിനെ തുടർന്നാണ് പിന്നീട് മുറിയിൽ പരിശോധിച്ചതെന്ന് പൊലീസ് അറിയിച്ചു.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക