Ramadan അബുദാബി: 2027 ലെ റമദാൻ, ഈദുൽ ഫിത്ർ, ഈദുൽ അദ്ഹ തുടങ്ങിയ പ്രധാന ഇസ്ലാമിക വിശേഷദിവസങ്ങളുടെ സാധ്യതാ തീയതികൾ പുറത്തുവിട്ട് യുഎഇ ജ്യോതിശാസ്ത്ര കേന്ദ്രം. അടുത്ത ഹിജ്‌റ വർഷമായ 1448ലെ റമസാൻ, ഈദുൽ ഫിത്ർ, ഈദുൽ അദ്ഹ തുടങ്ങിയവയ്ക്കുള്ള സാധ്യതാ തീയതികളാണ് പുറത്തുവിട്ടത്. ഔദ്യോഗികമായി ചന്ദ്രദർശനം സ്ഥിരീകരിക്കുന്നതിന് മുമ്പ് യാത്രകളും മറ്റ് പരിപാടികളും ആസൂത്രണം ചെയ്യാൻ ഈ കണക്കുകൂട്ടലുകൾ സഹായിക്കുമെന്നാണ് വിലയിരുത്തപ്പെടുന്നത്.

റമസാൻ

യുഎഇയിൽ റമസാൻ വ്രതാരംഭം 2027 ഫെബ്രുവരി 8 തിങ്കളാഴ്ചയാകാനാണ് കൂടുതൽ സാധ്യത. ഷഅ്ബാൻ മാസപ്പിറവി ഫെബ്രുവരി 6 ശനിയാഴ്ചയോ 7 ഞായറാഴ്ചയോ ദൃശ്യമാകേണ്ടതുണ്ട്. എന്നാൽ ഫെബ്രുവരി 6ന് യുഎഇ ഉൾപ്പെടെയുള്ള ലോകത്തിന്റെ ഭൂരിഭാഗം പ്രദേശങ്ങളിലും ചന്ദ്രൻ അസ്തമിച്ചതിന് ശേഷമായിരിക്കും സൂര്യാസ്തമയം. അതിനാൽ അന്ന് മാസപ്പിറവി ദൃശ്യമാകാൻ സാധ്യതയില്ല. തുടർന്ന് ഷഅ്ബാൻ 30 ദിവസം പൂർത്തിയാക്കി ഫെബ്രുവരി 8ന് റമസാൻ ഒന്ന് ആരംഭിക്കാനാണ് സാധ്യത.

ഈദുൽ ഫിത്ർ

റമസാൻ 29-ാം ദിവസം മാർച്ച് 8 തിങ്കളാഴ്ചയായിരിക്കും. അന്ന് ശവ്വാൽ മാസപ്പിറവി ദൃശ്യമാകുകയാണെങ്കിൽ മാർച്ച് 9 ചൊവ്വാഴ്ച ഈദുൽ ഫിത്ർ ആഘോഷിക്കാം. മാർച്ച് 8ന് മാസപ്പിറവി കാണാൻ സാധിക്കാത്ത പക്ഷം റമസാൻ 30 ദിവസം പൂർത്തിയാക്കി മാർച്ച് 10 ബുധനാഴ്ച പെരുന്നാൾ ആഘോഷിക്കാനാണ് സാധ്യത.

ഈദുൽ അദ്ഹ

2027 മേയ് 6 വ്യാഴാഴ്ചയോ മേയ് 7 വെള്ളിയാഴ്ചയോ ദുൽഹജ് മാസപ്പിറവി ദൃശ്യമാകാനാണ് സാധ്യത. ഇതനുസരിച്ച് ദുൽഹജ് ഒന്ന് മേയ് 7നോ 8നോ ആയിരിക്കും. അതിനനുസരിച്ച് അറഫാ ദിനം മേയ് 15 ശനിയാഴ്ചയോ 16 ഞായറാഴ്ചയോ വരാൻ സാധ്യതയുണ്ട്. തുടർന്ന് ഈദുൽ അദ്ഹ മേയ് 16 ഞായറാഴ്ചയോ 17 തിങ്കളാഴ്ചയോ ആഘോഷിക്കുമെന്ന് പ്രതീക്ഷിക്കുന്നു.

മുഹ്‌റം 2027

ദുൽഹജ് മാസപ്പിറവിയുടെ അടിസ്ഥാനത്തിൽ ഹിജ്‌റ വർഷം 1449ന്റെ തുടക്കമായ മുഹറം ഒന്ന് 2027 ജൂൺ 5 ശനിയാഴ്ച, 6 ഞായറാഴ്ച, 7 തിങ്കളാഴ്ച എന്നിവയിൽ ഏതെങ്കിലും ദിവസമായിരിക്കാം. ശാസ്ത്രീയ കണക്കുകൂട്ടലുകളുടെ അടിസ്ഥാനത്തിലുള്ള സാധ്യതാ തീയതികളാണ് ഇവയെന്നും കൃത്യമായ തീയതികൾ യുഎഇ ചന്ദ്രദർശന സമിതിയുടെ ഔദ്യോഗിക പ്രഖ്യാപനത്തിന് ശേഷമേ സ്ഥിരീകരിക്കുകയുള്ളൂവെന്നും യുഎഇ ജ്യോതിശാസ്ത്ര കേന്ദ്രം കൂട്ടിച്ചേർത്തു.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

യുഎഇയിലെ പ്രവാസി മലയാളികളുടെ പ്രിയപ്പെട്ട മാൾ പ്രവർത്തനം അവസാനിപ്പിക്കുന്നു; പൂട്ടിയിടലിന് മുൻപ് വൻ വിലക്കിഴിവ്

Shopping Mall ഷാർജ: യുഎഇയിലെ പ്രവാസി മലയാളികളുടെ പ്രിയപ്പെട്ട മാൾ പ്രവർത്തനം അവസാനിപ്പിക്കുന്നു. ദുബായ്-ഷാർജ അതിർത്തിയിൽ ഇത്തിഹാദ് റോഡിലെ പ്രധാന അടയാളമായ അൻസാർ മാൾ ആണ് ചരിത്രത്തിലേക്ക് വഴിമാറുന്നത്. നീണ്ട 23 വർഷത്തെ സേവനത്തിന് ശേഷമാണ് ഷാർജയിലെ പ്രശസ്തമായ അൻസാർ മാളും ദുബായിലെ ദെയ്‌റ, കരാമ എന്നിവിടങ്ങളിലെ അൻസാർ ഗാലറികളും പ്രവർത്തനം അവസാനിപ്പിക്കുന്നത്. കൂടുതൽ സാധ്യതകളുള്ള പുതിയ കേന്ദ്രങ്ങളിലേക്ക് ഘട്ടംഘട്ടമായി കടകൾ മാറ്റുന്നതിന്റെ ഭാഗമായാണ് നടപടി. ഷെയ്ഖ് സായിദ് റോഡ്, അൽ ബർഷ, അബുദാബി, അൽ ഐൻ തുടങ്ങിയ പ്രധാന മേഖലകളിൽ പുതിയ ശാഖകൾ ഉടൻ ആരംഭിക്കുമെന്ന് അൻസാർ മാൾ മാർക്കറ്റിങ് മാനേജർ ഹസൻ ഷാ വ്യക്തമാക്കി.

അതേസമയം, പൂട്ടിയിടുന്നതിന് മുന്നോടിയായി മാളുകളിൽ വലിയ വിലക്കിഴിവ് ഒരുക്കിയിട്ടുണ്ട്. 50 ശതമാനം വരെ വിലക്കുറവിൽ സാധനങ്ങൾ സ്വന്തമാക്കാനുള്ള അവസരമാണുള്ളത്. ആയിരക്കണക്കിനാളുകൾ ദിവസേന ഇവിടെ സാധനങ്ങൾ വാങ്ങാൻ വേണ്ടി എത്താറുണ്ട്. 2003-ൽ ഷാർജയിലാണ് അൻസാർ ഗ്രൂപ്പ് യുഎഇയിൽ ആദ്യമായി മാൾ ആരംഭിക്കുന്നത്. തുടർന്ന് 2012-ൽ ദൈറയിലും 2013-ൽ കരാമയിലും ഗാലറികൾ തുറന്നു.