Kuwait employee theft hard disks കുവൈത്ത് സിറ്റി: സർക്കാർ ഓഫീസിൽ നിന്ന് ഡാറ്റ അടങ്ങിയ സ്റ്റോറേജ് ഹാർഡ് ഡിസ്കുകൾ മോഷ്ടിച്ച് കമ്പ്യൂട്ടർ ഷോപ്പിൽ വിൽപ്പന നടത്തിയ സംഭവത്തിൽ കുവൈത്ത് സ്വദേശിയായ ജീവനക്കാരനെ ക്രിമിനൽ സെക്യൂരിറ്റി വിഭാഗം അറസ്റ്റ് ചെയ്തു. മന്ത്രാലയത്തിൽ നടത്തിയ ആഭ്യന്തര പരിശോധനയ്ക്കിടെയാണ് കോടിക്കണക്കിന് ഡാറ്റ അടങ്ങിയ സ്റ്റോറേജ് ഡിസ്കുകൾ കാണാതായതായി കണ്ടെത്തിയത്. തുടർന്ന് ക്യാപിറ്റൽ ഗവർണറേറ്റ് ഇൻവെസ്റ്റിഗേഷൻ ഡിപ്പാർട്ട്മെന്റ് നടത്തിയ വിശദമായ അന്വേഷണത്തിലാണ് പ്രതിയെ തിരിച്ചറിഞ്ഞ് പിടികൂടിയത്. ഓഫീസിൽ ജീവനക്കാരോ സന്ദർശകരോ ഇല്ലാത്ത സമയം മുതലെടുത്താണ് പ്രതി ഹാർഡ് ഡിസ്കുകൾ മോഷ്ടിച്ചതെന്നാണ് അന്വേഷണത്തിൽ വ്യക്തമായത്. ആധുനിക സാങ്കേതിക സംവിധാനങ്ങളുടെ സഹായത്തോടെ സംശയാസ്പദമായ നീക്കങ്ങൾ നിരീക്ഷിച്ച അന്വേഷണ സംഘം പ്രതിയിലേക്ക് എത്തുകയായിരുന്നു. ചോദ്യം ചെയ്യലിൽ പ്രതി കുറ്റം സമ്മതിച്ചു. ഹാർഡ് ഡിസ്കുകൾ കമ്പ്യൂട്ടർ ഷോപ്പിൽ വിൽക്കുക മാത്രമായിരുന്നു ലക്ഷ്യമെന്നും അതിലുള്ള രഹസ്യ വിവരങ്ങൾ ചോർത്താൻ ഉദ്ദേശിച്ചിരുന്നില്ലെന്നും ഇയാൾ അന്വേഷണ ഉദ്യോഗസ്ഥരോട് പറഞ്ഞതായി അധികൃതർ അറിയിച്ചു. പ്രതി നേരത്തെയും സമാനമായ നിരവധി മോഷണക്കേസുകളിൽ ഉൾപ്പെട്ടിട്ടുള്ളയാളാണെന്ന് പോലീസ് വ്യക്തമാക്കി. അടുത്തിടെയാണ് ശിക്ഷാകാലാവധി പൂർത്തിയാക്കി ഇയാൾ സെൻട്രൽ ജയിലിൽ നിന്ന് പുറത്തിറങ്ങിയത്. ഹാർഡ് ഡിസ്കുകൾ വിൽപ്പന നടത്തിയ കമ്പ്യൂട്ടർ ഷോപ്പിൽ നിന്ന് മോഷ്ടിക്കപ്പെട്ട ചില സാധനങ്ങൾ പോലീസ് കണ്ടെത്തി വീണ്ടെടുത്തു.
കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക
ഷെയ്ഖ് ജാബർ അൽ-അഹമ്മദ് കോസ്വേ: ടെൻഡർ സമർപ്പിക്കാനുള്ള സമയപരിധി നീട്ടി
Sheikh Jaber Al-Ahmad causeway കുവൈത്ത് സിറ്റി: ഷെയ്ഖ് ജാബർ അൽ-അഹമ്മദ് കോസ്വേയുടെ മാനേജ്മെന്റ്, പ്രവർത്തനം, അറ്റകുറ്റപ്പണി എന്നിവയ്ക്കായുള്ള ടെൻഡർ സമർപ്പിക്കുന്നതിനുള്ള അവസാന തീയതി ഓഗസ്റ്റ് 25ൽ നിന്ന് സെപ്റ്റംബർ 22 വരെ നീട്ടിയതായി സെൻട്രൽ ഏജൻസി ഫോർ പബ്ലിക് ടെൻഡേഴ്സ് അറിയിച്ചു. കോസ്വേയുടെയും അതുമായി ബന്ധപ്പെട്ട സൗകര്യങ്ങളുടെയും അടിസ്ഥാന സൗകര്യങ്ങളുടെയും മാനേജ്മെന്റ്, പ്രവർത്തനം, പരിപാലനം എന്നിവ ഉറപ്പാക്കുകയാണ് ടെൻഡറിന്റെ പ്രധാന ലക്ഷ്യം. ഇതിനായി ആവശ്യമായ സാമഗ്രികൾ, ഉപകരണങ്ങൾ, തൊഴിലാളികൾ, സാങ്കേതിക വിദഗ്ധർ, പ്രത്യേക പരിശീലനം നേടിയ ജീവനക്കാർ എന്നിവ ലഭ്യമാക്കുകയും കരാറിലെ നിബന്ധനകളും സാങ്കേതിക നിർദേശങ്ങളും അനുസരിച്ച് പ്രവർത്തനങ്ങൾ നടപ്പാക്കുകയും വേണം. കോസ്വേയുടെ പ്രവർത്തനത്തിനും പരിപാലനത്തിനും ആവശ്യമായ താൽക്കാലിക, അധിക, അനുബന്ധ, പരിഷ്കരണ ജോലികളും പദ്ധതിയുടെ ഭാഗമായിരിക്കും. ഇതിന് പുറമെ കോസ്വേയുമായി ബന്ധപ്പെട്ട കെട്ടിടങ്ങളുടെയും മറ്റ് സൗകര്യങ്ങളുടെയും പ്രവർത്തനവും പരിപാലനവും കരാറിൽ ഉൾപ്പെടും. ഇതിൽ ട്രക്ക് വെയിംഗ് സ്റ്റേഷനുകൾ, സന്ദർശക കേന്ദ്രം, കോസ്വേയുമായി ബന്ധപ്പെട്ട മറ്റ് സൗകര്യങ്ങൾ എന്നിവയും ഉൾപ്പെടുന്നു. സമർപ്പിക്കുന്ന ടെൻഡർ രേഖകൾ മന്ത്രാലയം വിശദമായി പരിശോധിക്കും. ആവശ്യമായ എല്ലാ നിബന്ധനകളും പാലിക്കുന്ന ഏറ്റവും അനുയോജ്യമായ ബിഡ് കണ്ടെത്തിയ ശേഷം അതുസംബന്ധിച്ച ശുപാർശ സമർപ്പിക്കും. തുടർന്ന് നടപടിക്രമങ്ങൾ പൂർത്തിയാക്കി ടെൻഡർ അന്തിമമായി അനുവദിക്കുന്നതിനുള്ള നടപടികളിലേക്ക് കടക്കും.
