Sharjah Jaywan card ഷാർജയിലെ തഹ്സീൽ സർക്കാർ പിരിവ് സംവിധാനത്തിൽ പേയ്മെന്റ് സൗകര്യങ്ങൾ വിപുലീകരിച്ചു. യുഎഇയുടെ ദേശീയ പേയ്മെന്റ് കാർഡായ ജയ്വാൻ ഇനി ഡിജിറ്റൽ ചാനലുകളിലും തഹ്സീൽ സേവന കേന്ദ്രങ്ങളിലും ഉപയോഗിക്കാമെന്ന് ഷാർജ സെൻട്രൽ ഫിനാൻസ് ഡിപ്പാർട്ട്മെന്റ് അറിയിച്ചു. തഹ്സീലിന്റെ വെബ്സൈറ്റിലൂടെയും സ്മാർട്ട് ആപ്ലിക്കേഷനിലൂടെയും എല്ലാ തഹ്സീൽ സേവന കേന്ദ്രങ്ങളിലൂടെയും ഉപഭോക്താക്കൾക്ക് ജയ്വാൻ ഉപയോഗിച്ച് സർക്കാർ പേയ്മെന്റുകൾ നടത്താം. ഇതോടെ വീട്ടിലിരുന്നും നേരിട്ടെത്തിയും സർക്കാർ ഇടപാടുകൾ പൂർത്തിയാക്കാൻ സാധിക്കും. സർക്കാർ പേയ്മെന്റുകൾ കൂടുതൽ സൗകര്യപ്രദവും സുരക്ഷിതവുമാക്കുന്നതിനും, ഇടപാടുകൾ ലളിതമാക്കുന്നതിനും ഉപഭോക്താക്കൾക്ക് കൂടുതൽ പേയ്മെന്റ് മാർഗങ്ങൾ ലഭ്യമാക്കുന്നതിനുമാണ് പുതിയ സംവിധാനം ലക്ഷ്യമിടുന്നതെന്ന് അധികൃതർ വ്യക്തമാക്കി. 2025 സെപ്റ്റംബർ 20ന് ജയ്വാൻ ഉപയോഗിച്ചുള്ള ആദ്യ പേയ്മെന്റ് തഹ്സീലിൽ നടപ്പാക്കിയതിന് ശേഷം, 2026ന്റെ ആദ്യ പകുതി അവസാനിക്കുമ്പോഴേക്കും 558ലധികം ഇടപാടുകൾ ജയ്വാൻ വഴി പൂർത്തിയാക്കിയിട്ടുണ്ട്. തഹ്സീൽ ഷാർജയുടെ സർക്കാർ ഡിജിറ്റൽ സാമ്പത്തിക അടിസ്ഥാന സൗകര്യത്തിലെ പ്രധാന ഘടകമാണെന്ന് ഫിനാൻഷ്യൽ സിസ്റ്റം ഡിപ്പാർട്ട്മെന്റ് ഡയറക്ടർ ഹുദ അൽ യാസി പറഞ്ഞു. പേയ്മെന്റ് മാർഗങ്ങൾ വിപുലീകരിക്കുന്നത് പിരിവ് കാര്യക്ഷമതയും ഉപഭോക്തൃ അനുഭവവും മെച്ചപ്പെടുത്തുമെന്നും അവർ വ്യക്തമാക്കി. തഹ്സീലിന്റെ വിവിധ ചാനലുകളിൽ ജയ്വാൻ ലഭ്യമാക്കുന്നത് പുതിയൊരു പേയ്മെന്റ് മാർഗം കൂട്ടിച്ചേർക്കുന്നതിൽ മാത്രം ഒതുങ്ങുന്നില്ലെന്നും, ദേശീയ തലത്തിൽ വികസിപ്പിച്ച പേയ്മെന്റ് സംവിധാനങ്ങളുടെ വൈവിധ്യം ശക്തിപ്പെടുത്തുന്ന നടപടിയാണിതെന്നും അൽ യാസി പറഞ്ഞു. തഹ്സീലിന്റെ ശേഷികൾ തുടർച്ചയായി വികസിപ്പിക്കുകയും ഡിജിറ്റൽ സംവിധാനങ്ങൾ ഉപയോഗിച്ച് പേയ്മെന്റുകൾ ലളിതമാക്കുകയും പ്രവർത്തന കാര്യക്ഷമത വർധിപ്പിക്കുകയും ഉപഭോക്താക്കളുടെ മാറിവരുന്ന ആവശ്യങ്ങൾ നിറവേറ്റുകയും ചെയ്യുമെന്ന് അവർ കൂട്ടിച്ചേർത്തു. യുഎഇയിൽ വികസിപ്പിച്ച പേയ്മെന്റ് സംവിധാനത്തെ സർക്കാർ സാമ്പത്തിക സേവനങ്ങളുമായി സംയോജിപ്പിക്കുന്നതിലൂടെ ഷാർജയുടെ വിപുലമായ ഡിജിറ്റൽ പരിവർത്തന പദ്ധതികൾക്കും പുതിയ നീക്കം പിന്തുണ നൽകുന്നു.
യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക
വിമാനസര്വീസുകള് പഴയ സാഹചര്യത്തിലേയ്ക്ക്; യാത്രകള് വീണ്ടും സജീവമാകുന്നു
GCC travel bookings വിമാന സർവീസുകളും യാത്രാ സാഹചര്യങ്ങളും ക്രമേണ സാധാരണ നിലയിലേക്ക് മടങ്ങുന്നതോടെ ഗൾഫ് രാജ്യങ്ങൾക്കിടയിലെ യാത്രകൾ യുദ്ധത്തിന് മുമ്പുണ്ടായിരുന്ന നിലവാരത്തിലേക്ക് തിരിച്ചുവരുന്നതായി ട്രാവൽ ഏജൻസികൾ അറിയിച്ചു. അന്താരാഷ്ട്ര യാത്രക്കാർ ഇപ്പോഴും മേഖലയിൽ യാത്ര ചെയ്യുന്നതിൽ പൊതുവെ ജാഗ്രത പുലർത്തുന്നുണ്ടെങ്കിലും, ഗൾഫ് രാജ്യങ്ങൾക്കിടയിലെ യാത്രകൾ മുൻകാല നിലയിലേക്ക് തിരിച്ചുവരുന്നതിന്റെ സൂചനകൾ ശക്തമാണെന്ന് ക്യാപിറ്റൽ ഇക്കണോമിക്സ് വിലയിരുത്തുന്നു. യുദ്ധത്തിന് മുമ്പുണ്ടായിരുന്ന യാത്രാ നിലവാരത്തിലേക്ക് പൂർണമായി തിരിച്ചെത്തിയിട്ടില്ലെങ്കിലും, ആ വിടവ് ഓരോ ആഴ്ചയും കുറയുകയാണെന്ന് പിനോയ് ടൂറിസം സിഇഒ ഇംതിയാസ് ഹുസൈൻ നാസിർ പറഞ്ഞു. യാത്രാപദ്ധതികളിൽ ചിലർ ഇപ്പോഴും ജാഗ്രത പുലർത്തുന്നുണ്ടെങ്കിലും ആവശ്യക്കാർ കുറവായിട്ടില്ലെന്നും അദ്ദേഹം വ്യക്തമാക്കി. “ജിസിസി യാത്രാ വിപണി ശക്തമായി നിലകൊള്ളുകയും പ്രതീക്ഷിച്ചതിനേക്കാൾ വേഗത്തിൽ വീണ്ടെടുക്കുകയും ചെയ്യുകയാണ്. ജാഗ്രത ഇപ്പോഴും നിലനിൽക്കുന്നുണ്ടെങ്കിലും യാത്ര ചെയ്യാനുള്ള താൽപര്യം ആളുകൾക്ക് നഷ്ടപ്പെട്ടിട്ടില്ല. വലിയൊരു വിഭാഗം യാത്രാ ആവശ്യങ്ങൾ ഇല്ലാതായതല്ല, മാറ്റിവെച്ചതാണെന്ന് പറയാം,” നാസിർ പറഞ്ഞു. യുദ്ധത്തിലേർപ്പെട്ട കക്ഷികൾ തമ്മിൽ സ്ഥിരമായ വെടിനിർത്തൽ കരാർ നിലവിൽ വന്നാൽ, അടുത്ത ഏതാനും മാസങ്ങളിലെ ജിസിസിയുടെ പ്രധാന ശൈത്യകാല ടൂറിസം സീസണിൽ മികച്ച തിരിച്ചുവരവുണ്ടാകുമെന്ന പ്രതീക്ഷയും അദ്ദേഹം പങ്കുവച്ചു. ജിയോഫ് ട്രാവൽ സ്ഥാപകനും സിഇഒയുമായ ജെഫ്രി സലാത്തൻ പറയുന്നത്, യാത്രക്കാർ കുറഞ്ഞ ദൈർഘ്യമുള്ളതും കൂടുതൽ സൗകര്യപ്രദവുമായ യാത്രകൾ തിരഞ്ഞെടുക്കുന്നതിനാൽ ജിസിസി രാജ്യങ്ങൾക്കിടയിലെയും മേഖലയിലെയും യാത്രകൾ വേഗത്തിൽ വീണ്ടെടുക്കുന്നതായി തോന്നുന്നു എന്നാണ്. യുദ്ധം ആരംഭിച്ച ഉടൻ ഉണ്ടായിരുന്ന സാഹചര്യവുമായി താരതമ്യം ചെയ്യുമ്പോൾ യാത്രാ ബുക്കിംഗുകളിൽ വ്യക്തമായ പുരോഗതിയുണ്ട്. യാത്രക്കാരുടെ ആത്മവിശ്വാസം തിരിച്ചുവരുന്നതോടെ കൂടുതൽ അന്വേഷണങ്ങളും സ്ഥിരീകരിച്ച ബുക്കിംഗുകളും ലഭിക്കുന്നുണ്ടെന്നും സലാത്തൻ പറഞ്ഞു. വിനോദയാത്രകളും ബന്ധുക്കളെയും സുഹൃത്തുക്കളെയും സന്ദർശിക്കുന്നതിനുള്ള യാത്രകളും യുദ്ധത്തിന് മുമ്പുണ്ടായിരുന്ന നിലയുടെ ഏകദേശം 85 ശതമാനത്തിലെത്തിയതായി മുസാഫിർ ഡോട്ട് കോം ഓപ്പറേഷൻസ് വൈസ് പ്രസിഡന്റ് റാഷിദ സായിദ് പറഞ്ഞു.
