Dubai Back-to-School Traffic; യുഎഇയിൽ വേനലവധി കഴിഞ്ഞ് സ്കൂളുകൾ തുറക്കുന്നതോടെ റോഡുകളിൽ വരും ദിവസങ്ങളിൽ വലിയ രീതിയിലുള്ള ഗതാഗത തിരക്ക് അനുഭവപ്പെടുമെന്ന് ടാക്സി ഡ്രൈവർമാർ മുന്നറിയിപ്പ് നൽകുന്നു. സ്കൂൾ മേഖലകളിലൂടെ യാത്ര ചെയ്യുന്നവർ പതിവിലും നേരത്തെ ഇറങ്ങിയില്ലെങ്കിൽ കുറഞ്ഞത് 15 മുതൽ 30 മിനിറ്റ് വരെ വൈകാൻ സാധ്യതയുണ്ടെന്നാണ് റോഡിലെ സ്ഥിരം യാത്രികരായ ടാക്സി ഡ്രൈവർമാർ പറയുന്നത്. അവധി കഴിഞ്ഞ് പ്രവാസികൾ മടങ്ങിയെത്തിയതോടെ നഗരത്തിലെ തിരക്ക് ഇപ്പോൾ തന്നെ വർദ്ധിച്ചു തുടങ്ങിയിട്ടുണ്ട്. കരാമ, ബർ ദുബായ്, ഔദ് മേത്ത, ഗർഹൂദ്, അൽ തവാർ, അൽ നഹ്ദ, അൽ ബർഷ, അൽ ഖൂസ് തുടങ്ങിയ മേഖലകളിലാകും തിരക്ക് ഏറ്റവും കൂടുതൽ ബാധിക്കുക. പ്രധാന റോഡുകളേക്കാൾ സ്കൂളുകളിലേക്കുള്ള ചെറിയ റോഡുകളിലും താമസമേഖലകളിലുമായിരിക്കും ആദ്യം വാഹനങ്ങൾ കുടുങ്ങുക. രാവിലെ 6 മണി മുതൽ 8 മണി വരെയും പിന്നീട് ഉച്ചയ്ക്ക് 2 മണിക്ക് ശേഷവുമാണ് ഗതാഗതക്കുരുക്ക് രൂക്ഷമാകാൻ സാധ്യതയുള്ള സമയം. അൽ തവാർ, ഗർഹൂദ്, ഔദ് മേത്ത തുടങ്ങിയ ഇടങ്ങളിൽ രാവിലെ 6.30 മുതൽ തന്നെ തിരക്ക് അനുഭവപ്പെട്ടേക്കാം. ഒരു റോഡ് ഒഴിവാക്കി മറ്റൊരു വഴി തിരഞ്ഞെടുത്താലും മിക്കവാറും എല്ലാ റോഡുകളിലും ഒരുപോലെ തിരക്ക് അനുഭവപ്പെടാനാണ് സാധ്യതയെന്ന് വർഷങ്ങളായി ടാക്സി ഓടിക്കുന്ന മുഷ്താഖ് പറയുന്നു. ഷാർജയിൽ നിന്ന് ദുബായിലേക്ക് വരുന്നവർക്ക് കടുത്ത ജാഗ്രതാ നിർദ്ദേശമാണ് ഡ്രൈവർമാർ നൽകുന്നത്. രാവിലെ 6 മണിക്ക് മുൻപായി ദുബായിൽ പ്രവേശിക്കാൻ കഴിഞ്ഞാൽ കുരുക്ക് ഒരു പരിധിവരെ ഒഴിവാക്കാം. എന്നാൽ 7 മണിക്ക് ശേഷമാണ് യാത്രയെങ്കിൽ കുറഞ്ഞത് ഒരു മണിക്കൂർ എങ്കിലും അധികമായി കയ്യിൽ കരുതേണ്ടി വരും. കുറുക്കുവഴികൾ തേടി ചെറിയ റോഡുകളിലേക്ക് പോകുന്നത് എപ്പോഴും ഗുണകരമാകില്ലെന്നും സ്കൂൾ സോണുകളിൽ ഈ വഴികൾ കൂടുതൽ സ്തംഭിക്കാൻ സാധ്യതയുണ്ടെന്നും ഡ്രൈവർമാർ ഓർമ്മിപ്പിക്കുന്നു. അതേസമയം, വേനലവധിക്കാലത്ത് ദുബായിൽ തുറന്ന പുതിയ ഫ്ലൈ ഓവറുകളും പാലങ്ങളും ഗതാഗതക്കുരുക്ക് കുറയ്ക്കാൻ സഹായിക്കുമെന്ന പ്രതീക്ഷയുമുണ്ട്. യാത്ര തുടങ്ങുന്നതിന് മുൻപ് ഗൂഗിൾ മാപ്പ് പരിശോധിക്കുന്നത് ഏറ്റവും അനുയോജ്യമായ റൂട്ട് കണ്ടെത്താൻ സഹായിക്കും. സ്കൂൾ തുറക്കുന്ന ആദ്യ മൂന്ന് ദിവസങ്ങളിൽ ഡ്രൈവർമാരും ബസ് ജീവനക്കാരും പുതിയ രീതികളുമായി പൊരുത്തപ്പെട്ടു വരുന്നതേ ഉണ്ടാവൂ എന്നതിനാൽ ഈ ദിവസങ്ങളിൽ കൂടുതൽ കരുതൽ വേണം. തിരക്കുള്ള സമയങ്ങളിൽ ക്ഷമയോടെ വാഹനം ഓടിക്കുക എന്നതാണ് ഏറ്റവും പ്രധാനമെന്ന് ഡ്രൈവർമാർ പറയുന്നു. ഫോൺ ഉപയോഗിക്കുന്നതും അനാവശ്യമായി ധൃതി കാണിക്കുന്നതും അപകടങ്ങൾക്കും അതുവഴി മണിക്കൂറുകൾ നീളുന്ന ഗതാഗതക്കുരുക്കിനും കാരണമാകും. ശരിയായ പ്ലാനിംഗും കൃത്യസമയത്തുള്ള യാത്രയുമാണ് ഈ ട്രാഫിക് സീസണിൽ രക്ഷയെന്ന് അനുഭവസ്ഥരായ ഈ ഡ്രൈവർമാർ സാക്ഷ്യപ്പെടുത്തുന്നു.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

വാടകയുടെ വലിയ തുക ഒരുമിച്ച് വേണ്ട; ദുബായിൽ ഇനി ‘പ്രതിമാസ ഗഡു’ക്കളായി അടയ്ക്കാം

Dubai introduces flexi rent ദുബായ്: വീട്ടുവാടകയുടെ വലിയ തുക ഒന്നോ രണ്ടോ ചെക്കുകളായി ഒരുമിച്ച് നൽകേണ്ടിവരുന്ന ബുദ്ധിമുട്ടിന് ആശ്വാസമേകാൻ ദുബായിൽ പുതിയ പദ്ധതി. ദുബായ് ലാൻഡ് ഡിപ്പാർട്ട്മെന്റിന്റെ ‘ഫ്ലെക്സി റെന്റ്’ പദ്ധതിയിലൂടെ വാടക പ്രതിമാസം, ത്രൈമാസം അല്ലെങ്കിൽ വാർഷികമായി അടയ്ക്കാനുള്ള സൗകര്യം ലഭിക്കും. വർഷം മുഴുവൻ താമസിക്കാൻ ആഗ്രഹമുണ്ടെങ്കിലും വാടകയുടെ വലിയ തുക മുൻകൂറായി കണ്ടെത്താൻ കഴിയാത്തതിനാൽ പല കുടുംബങ്ങളും ചെലവേറിയ ഹ്രസ്വകാല താമസസൗകര്യങ്ങളെ ആശ്രയിക്കേണ്ടിവരുന്നുണ്ട്. പുതിയ സംവിധാനം നിലവിൽ വരുന്നതോടെ വാർഷിക വാടക കരാറിൽ തന്നെ പ്രതിമാസ ഗഡുക്കളായി വാടക അടയ്ക്കാൻ കഴിയുമെന്നാണ് പ്രതീക്ഷ. ഇതോടെ വലിയ തുക ഒരുമിച്ച് കണ്ടെത്തേണ്ട സാഹചര്യം ഒഴിവാക്കാനാകും. പദ്ധതി പങ്കാളികളായ റിയൽ എസ്റ്റേറ്റ് കമ്പനികൾ വഴിയായിരിക്കും നടപ്പാക്കുക. പ്രതിമാസ അടവിന്റെ സൗകര്യത്തോടൊപ്പം രജിസ്റ്റർ ചെയ്ത ഇജാരി വാടകക്കരാറിന്റെ നിയമപരമായ പരിരക്ഷയും വാടകക്കാർക്ക് ലഭിക്കും. വാടകക്കാരനും വീട്ടുടമയ്ക്കുമിടയിൽ തർക്കങ്ങൾ ഉണ്ടായാൽ റിയൽ എസ്റ്റേറ്റ് റെഗുലേറ്ററി അതോറിറ്റിയുടെ നിയമപരമായ സംരക്ഷണം തേടാനും ഇതിലൂടെ സാധിക്കും.സാധാരണക്കാരും ഇടത്തരക്കാരുമായ കുടുംബങ്ങൾക്ക് പദ്ധതി ഏറെ സഹായകരമാകുമെന്നാണ് റിയൽ എസ്റ്റേറ്റ് മേഖലയിലെ വിലയിരുത്തൽ. വലിയ തുക ഒരുമിച്ച് നൽകാൻ കഴിയാത്തതിനാൽ ഹ്രസ്വകാല താമസത്തിന് അധിക വാടക നൽകുന്നവരിൽ പലരും ഇനി വാർഷിക വാടക കരാറിലേക്ക് മാറാൻ സാധ്യതയുണ്ട്. വാടകക്കാരുടെ സാമ്പത്തിക ബാധ്യത കുറയ്ക്കുന്നതിനൊപ്പം കുടുംബ ബജറ്റ് കൂടുതൽ കാര്യക്ഷമമായി ആസൂത്രണം ചെയ്യാനും സഹായിക്കുന്ന പദ്ധതിയായതിനാൽ ‘ഫ്ലെക്സി റെന്റിന്’ വലിയ സ്വീകാര്യത ലഭിക്കുമെന്നാണ് പ്രതീക്ഷ.