expat worker recruitment in Kuwait കുവൈത്ത് സിറ്റി: തൊഴിൽ വിപണി കൂടുതൽ കാര്യക്ഷമമാക്കുന്നതിനും വിദേശ തൊഴിലാളികളുടെ റിക്രൂട്ട്മെന്റ് കൃത്യമായി നിയന്ത്രിക്കുന്നതിനുമായി കുവൈത്ത് പബ്ലിക് അതോറിറ്റി ഫോർ മാൻപവർ, ആഭ്യന്തര മന്ത്രാലയത്തിന്റെ സഹകരണത്തോടെ സൗദി ആസ്ഥാനമായ തകാമുൽ ഹോൾഡിംഗുമായി ധാരണാപത്രത്തിൽ ഒപ്പുവെച്ചു. തൊഴിൽ വിപണിയുമായി ബന്ധപ്പെട്ട അറിവും പരിചയസമ്പത്തും പങ്കുവെക്കുന്നതിനൊപ്പം തത്സമയ സാങ്കേതിക സഹകരണം ശക്തിപ്പെടുത്തുകയുമാണ് ധാരണാപത്രത്തിന്റെ പ്രധാന ലക്ഷ്യം. ഡിജിറ്റൽ സംവിധാനങ്ങളും കൃത്രിമബുദ്ധിയും പ്രയോജനപ്പെടുത്തി വിദേശ തൊഴിലാളികളുടെ നൈപുണ്യ നിലവാരം വിലയിരുത്തുന്നതിനുള്ള പുതിയ പരീക്ഷാ ശൃംഖല കുവൈറ്റിൽ നടപ്പാക്കുമെന്ന് പബ്ലിക് അതോറിറ്റി ഫോർ മാൻപവർ ഡയറക്ടർ ജനറൽ റബാബ് അൽ ഒസൈമി അറിയിച്ചു. കുവൈത്തിലേക്ക് റിക്രൂട്ട് ചെയ്യുന്നതിന് മുമ്പുതന്നെ തൊഴിലാളികളുടെ പ്രൊഫഷണൽ യോഗ്യതയും തൊഴിൽ നൈപുണ്യവും പരിശോധിക്കുന്ന കർശനമായ മാനദണ്ഡങ്ങൾ ഇതിലൂടെ നടപ്പാക്കും. ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ യൂസഫിന്റെ പ്രത്യേക നിർദേശപ്രകാരമാണ് ധാരണാപത്രം ഒപ്പുവെച്ചത്. കമ്പനികൾക്ക് ആവശ്യമായ കൃത്യമായ പ്രൊഫഷണൽ നൈപുണ്യമുള്ള തൊഴിലാളികളെ മാത്രം തിരഞ്ഞെടുക്കാൻ പുതിയ സംവിധാനം സഹായിക്കുമെന്ന് അധികൃതർ വ്യക്തമാക്കി. ഇതിലൂടെ ആവശ്യകതയില്ലാത്ത റിക്രൂട്ട്മെന്റുകൾ പരമാവധി ഒഴിവാക്കാൻ കഴിയുമെന്നാണ് പ്രതീക്ഷ. അതോടൊപ്പം വിസ കച്ചവടവും റിക്രൂട്ട്മെന്റിലെ ക്രമക്കേടുകളും തടയാനും, തൊഴിൽ വിപണിയുടെ യഥാർഥ ആവശ്യങ്ങൾക്ക് അനുസൃതമായി വിദേശ തൊഴിലാളികളുടെ നിയമനം കൂടുതൽ സുതാര്യവും കാര്യക്ഷമവുമാക്കാനും പുതിയ സംവിധാനം സഹായിക്കുമെന്ന് അധികൃതർ അറിയിച്ചു.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

കുവൈത്തിൽ തൊഴിൽ കരാർ അവസാനിപ്പിക്കൽ: തൊഴിലുടമകൾക്കും തൊഴിലാളികൾക്കും നിർദേശങ്ങള്‍

employment Termination contracts Kuwait കുവൈത്ത് സിറ്റി: തൊഴിലുടമകൾക്കും തൊഴിലാളികൾക്കും തൊഴിൽ നിയമപ്രകാരം ലഭിക്കുന്ന അവകാശങ്ങളും ബാധ്യതകളും ഓർമ്മിപ്പിച്ച് പബ്ലിക് അതോറിറ്റി ഫോർ മാൻപവർ പുതിയ നിർദേശങ്ങൾ പുറപ്പെടുവിച്ചു. തൊഴിൽ കരാറുകൾ നിയമപരമായി അവസാനിപ്പിക്കാവുന്ന സാഹചര്യങ്ങളും പാലിക്കേണ്ട നടപടിക്രമങ്ങളുമാണ് അതോറിറ്റി വിശദീകരിച്ചത്. നിയമത്തിൽ നിർദേശിച്ചിരിക്കുന്ന ചില സാഹചര്യങ്ങളിൽ പ്രത്യേക നടപടികളില്ലാതെ തന്നെ തൊഴിൽ കരാർ അവസാനിക്കും. ഇതിൽ തൊഴിലാളിയുടെ മരണം, ജോലി ചെയ്യാൻ കഴിയാത്ത തരത്തിലുള്ള സ്ഥിരമായ ശാരീരിക അപ്രാപ്തി, നിയമപരമായി അനുവദിച്ചിട്ടുള്ള രോഗാവധി കാലാവധി പൂർത്തിയാകുക, സ്ഥാപനം പൂർണമായും അടച്ചുപൂട്ടുക, തൊഴിലുടമ പാപ്പരായതായി കോടതി അന്തിമ വിധി പുറപ്പെടുവിക്കുക എന്നിവ ഉൾപ്പെടുന്നു. തൊഴിൽ നിയമത്തിലെ പ്രത്യേക വ്യവസ്ഥകൾ പ്രകാരം, ചില സാഹചര്യങ്ങളിൽ മുൻകൂട്ടി നോട്ടീസ് നൽകാതെയും തൊഴിലാളിക്ക് തൊഴിൽ കരാർ അവസാനിപ്പിക്കാനും ജോലി ഉപേക്ഷിക്കാനും അവകാശമുണ്ട്. ഇത്തരം സാഹചര്യങ്ങളിലും അർഹതയുള്ള സർവീസ് ആനുകൂല്യങ്ങൾ ലഭിക്കാൻ തൊഴിലാളിക്ക് അവകാശമുണ്ടാകും. തൊഴിലുടമ കരാർ വ്യവസ്ഥകളോ തൊഴിൽ നിയമത്തിലെ വ്യവസ്ഥകളോ ലംഘിക്കുക, തൊഴിലാളിക്കെതിരെ ശാരീരിക ആക്രമണം നടത്തുക, തൊഴിലാളിയുടെ ജീവനും ആരോഗ്യത്തിനും ഗുരുതരമായ ഭീഷണി സൃഷ്ടിക്കുന്ന സാഹചര്യം ഉണ്ടാക്കുക തുടങ്ങിയവ ഇതിൽ ഉൾപ്പെടുന്നു. ഗുരുതരമായ നിയമലംഘനങ്ങൾ തൊഴിലാളിയുടെ ഭാഗത്തുനിന്നുണ്ടായാൽ, ചില സാഹചര്യങ്ങളിൽ മുൻകൂട്ടി നോട്ടീസ് നൽകാതെ തന്നെ തൊഴിലാളിയെ പിരിച്ചുവിടാൻ തൊഴിലുടമയ്ക്ക് നിയമപരമായ അവകാശമുണ്ട്. അനിശ്ചിതകാല തൊഴിൽ കരാറുകളുടെ കാര്യത്തിൽ, നിയമം നിർദേശിക്കുന്ന നോട്ടീസ് കാലാവധി പാലിച്ചുകൊണ്ട് തൊഴിലുടമയ്ക്ക് കരാർ അവസാനിപ്പിക്കാനും കഴിയും. തങ്ങളെ അന്യായമായാണ് ജോലിയിൽ നിന്ന് പിരിച്ചുവിട്ടതെന്ന് കരുതുന്ന തൊഴിലാളികൾക്ക് പിരിച്ചുവിടൽ നടപടിയെ നിയമപരമായി ചോദ്യം ചെയ്യാനുള്ള അവകാശമുണ്ട്. അതിനാൽ തൊഴിലുടമകളും തൊഴിലാളികളും കരാർ അവസാനിപ്പിക്കുന്നതിനുള്ള നിയമപരമായ നടപടിക്രമങ്ങൾ കൃത്യമായി പാലിക്കണമെന്ന് അധികൃതർ ഓർമ്മിപ്പിച്ചു. കുവൈത്ത് തൊഴിൽ നിയമത്തിലെ 41, 44, 46, 48, 49, 50 എന്നീ വകുപ്പുകൾ അടിസ്ഥാനമാക്കിയാണ് പബ്ലിക് അതോറിറ്റി ഫോർ മാൻപവർ ഈ വിവരങ്ങൾ പങ്കുവെച്ചത്.