Kuwait Airport Expansion; കുവൈത്ത് അന്താരാഷ്ട്ര വിമാനത്താവളത്തെ മേഖലയിലെ പ്രധാന വ്യോമയാന ഹബ്ബാക്കി മാറ്റുന്നതിനും വിദേശ നിക്ഷേപകരെ ആകർഷിക്കുന്നതിനുമായി വൻ പദ്ധതികളുമായി കുവൈത്ത് സർക്കാർ രംഗത്ത്. വിമാനത്താവള വികസനത്തിൽ ആഗോള പങ്കാളിത്തം ഉറപ്പാക്കുന്നതിനൊപ്പം നിക്ഷേപകർക്ക് മുമ്പെങ്ങുമില്ലാത്ത വിധത്തിലുള്ള ആനുകൂല്യങ്ങളും സൗകര്യങ്ങളും നൽകാനാണ് സർക്കാർ ലക്ഷ്യമിടുന്നത്. അയൽരാജ്യങ്ങളായ സൗദി അറേബ്യയും യുഎഇയും വ്യോമയാന മേഖലയിൽ കോടിക്കണക്കിന് ഡോളറിന്റെ വികസന പദ്ധതികളുമായി മുന്നേറുന്ന പശ്ചാത്തലത്തിൽ, ആഗോള തലത്തിലുള്ള മത്സരം നേരിടാൻ കുവൈത്തും സജ്ജമാകുകയാണെന്ന് ഔദ്യോഗിക വൃത്തങ്ങൾ അറിയിച്ചു. പരമ്പരാഗതമായി സർക്കാർ നേരിട്ട് നടത്തുന്ന പ്രവർത്തന രീതിയിൽ നിന്ന് മാറി, പൊതു-സ്വകാര്യ പങ്കാളിത്ത മാതൃകയിലേക്ക് മാറാനാണ് കുവൈത്ത് ആലോചിക്കുന്നത്. പുതിയ വിമാനത്താവളത്തെ വെറുമൊരു യാത്രാ കേന്ദ്രം എന്നതിലുപരി ഒരു സംയോജിത സാമ്പത്തിക നഗരമായി വികസിപ്പിക്കും. പുതിയ പാസഞ്ചർ ടെർമിനലുകളുടെ നടത്തിപ്പും മാനേജ്‌മെന്റും അന്താരാഷ്ട്ര തലത്തിൽ വൈദഗ്ധ്യമുള്ള കമ്പനികൾക്ക് കൈമാറുന്നതിലൂടെ മികച്ച സേവനവും കാര്യക്ഷമതയും ഉറപ്പാക്കാൻ സാധിക്കും. കൂടാതെ, ഗ്രൗണ്ട് ഹാൻഡ്ലിംഗ്, മെയിന്റനൻസ്, കാറ്ററിംഗ് തുടങ്ങിയ മേഖലകളിൽ നിലവിലുള്ള കുത്തകകൾ അവസാനിപ്പിച്ച് അന്താരാഷ്ട്ര കമ്പനികൾക്കായി തുറന്നു നൽകുന്നതിലൂടെ മത്സരാധിഷ്ഠിതമായ സേവനം ലഭ്യമാക്കാനും ലക്ഷ്യമിടുന്നു. നിക്ഷേപകരെ പ്രോത്സാഹിപ്പിക്കുന്നതിനായി വിമാനത്താവളത്തിന് ചുറ്റും സ്വതന്ത്ര സാമ്പത്തിക മേഖലകൾ സ്ഥാപിക്കും. ഇവിടെ പ്രവർത്തിക്കുന്ന വിദേശ കമ്പനികൾക്ക് നികുതികളിൽ നിന്നും കസ്റ്റംസ് ഡ്യൂട്ടിയിൽ നിന്നും ഇളവ് നൽകും. നിക്ഷേപകർക്ക് അവരുടെ ലാഭത്തിന് മേൽ 10 വർഷം വരെ നികുതിയിളവ് നൽകുന്ന കാര്യവും പരിഗണനയിലുണ്ട്. സ്മാർട്ട് എയർ കാർഗോ മേഖലകൾ വികസിപ്പിക്കുകയും കുവൈത്തിലെ തുറമുഖങ്ങളെ വിമാനത്താവളവുമായി ബന്ധിപ്പിക്കുകയും ചെയ്യുന്നതിലൂടെ ചരക്ക് നീക്കത്തിലും വൻ മുന്നേറ്റം ഉണ്ടാക്കാൻ സാധിക്കുമെന്നാണ് സർക്കാർ പ്രതീക്ഷിക്കുന്നത്. അത്യാധുനിക സാങ്കേതിക വിദ്യകളും എയർ നാവിഗേഷൻ സംവിധാനങ്ങളും നടപ്പിലാക്കാൻ വൻതോതിലുള്ള വിദേശ മൂലധനം ഇതിലൂടെ രാജ്യത്തേക്ക് ഒഴുകുമെന്നും അധികൃതർ വിലയിരുത്തുന്നു.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

കുവൈത്തിൽ ഗതാഗത നിയമലംഘനങ്ങൾ ആവർത്തിച്ചാൽ കോടതി കയറേണ്ടി വരും; മുന്നറിയിപ്പ് നൽകി അധികൃതർ

Kuwait Traffic Law; കുവൈത്തിൽ ഗതാഗത നിയമങ്ങൾ ആവർത്തിച്ച് ലംഘിക്കുന്നവർക്കെതിരെ കർശന മുന്നറിയിപ്പുമായി ആഭ്യന്തര മന്ത്രാലയത്തിന് കീഴിലുള്ള ജനറൽ ട്രാഫിക് ഡിപ്പാർട്ട്മെന്റ്. ഓവർടേക്കിംഗ് നിയമങ്ങൾ പാലിക്കാതിരിക്കുക, പൊതുനിരത്തുകളിൽ മനഃപൂർവം ഗതാഗത തടസ്സം സൃഷ്ടിക്കുക തുടങ്ങിയ നിയമലംഘനങ്ങൾ ആവർത്തിക്കുന്ന സാഹചര്യമുണ്ടായാൽ വാഹന ഉടമകളെ കോടതിയിലേക്ക് റഫർ ചെയ്യുമെന്ന് അധികൃതർ വ്യക്തമാക്കി. ഇത്തരം നിയമലംഘനങ്ങൾ നിസ്സാരമായി കാണരുതെന്നും ആവർത്തിച്ചുള്ള നിയമലംഘനങ്ങൾക്ക് കടുത്ത നിയമനടപടികൾ നേരിടേണ്ടി വരുമെന്നുമാണ് മുന്നറിയിപ്പ്. റോഡുകളിൽ മനഃപൂർവം ഗതാഗത തടസ്സം സൃഷ്ടിക്കുന്നത് ഗതാഗത നിയമത്തിലെ 36-ാം വകുപ്പിന്റെ ലംഘനമാണ്. ഇതിനുള്ള പിഴയായി 20 കുവൈത്ത് ദിനാറാണ് നിശ്ചയിച്ചിരിക്കുന്നത്. കൃത്യമായ നിയമങ്ങൾ പാലിക്കാതെ ഓവർടേക്കിംഗ് നടത്തുന്നവർക്കെതിരെ (വകുപ്പ് 37) 15 കുവൈത്ത് ദിനാറാണ് പിഴ ഈടാക്കുക. എന്നാൽ ഈ പിഴയൊടുക്കി നിയമനടപടികളിൽ നിന്ന് ഒഴിയാമെന്ന് കരുതരുതെന്നും നിയമലംഘനങ്ങൾ ആവർത്തിച്ചാൽ കേസ് കോടതിയിലേക്ക് കൈമാറുമെന്നും ട്രാഫിക് ഡിപ്പാർട്ട്മെന്റ് ഓർമ്മിപ്പിച്ചു. ഗതാഗത നിയമത്തിലെ എക്സിക്യൂട്ടീവ് റെഗുലേഷൻസ് 207-ാം വകുപ്പ് പ്രകാരം നിയമലംഘനം നടത്തുന്നവരുടെ വാഹനങ്ങൾ രണ്ട് മാസം വരെ പിടിച്ചെടുക്കാനും (impound) അധികൃതർക്ക് അധികാരമുണ്ട്. റോഡുകളിൽ സുഗമമായ ഗതാഗതം ഉറപ്പാക്കുന്നതിനും അപകടങ്ങൾ ഒഴിവാക്കുന്നതിനുമായി ഡ്രൈവർമാർ നിയമങ്ങൾ കർശനമായി പാലിക്കണമെന്ന് ആഭ്യന്തര മന്ത്രാലയം ആവശ്യപ്പെട്ടു. വരും ദിവസങ്ങളിൽ റോഡുകളിൽ പരിശോധന ശക്തമാക്കാനാണ് ട്രാഫിക് വിഭാഗത്തിന്റെ തീരുമാനം.