UAE Weather fog അബുദാബി: യുഎഇയിൽ കടുത്ത വേനൽക്കാലം പൂർണ്ണമായും അവസാനിച്ചിട്ടില്ലെങ്കിലും, അന്തരീക്ഷത്തിൽ പ്രകടമായ മാറ്റങ്ങൾ കണ്ടുതുടങ്ങി. റോഡുകളിൽ കാഴ്ചപരിധി കുറയ്ക്കുന്ന രീതിയിൽ മൂടൽമഞ്ഞ് തിരിച്ചെത്തുന്നതിന്റെ സൂചനയായി ദേശീയ കാലാവസ്ഥാ നിരീക്ഷണ കേന്ദ്രം ജാഗ്രതാ നിർദ്ദേശം നൽകി. സെപ്റ്റംബർ 2 ബുധനാഴ്ച പുലർച്ചെ 1 മണി മുതൽ 8:30 വരെ രാജ്യത്തിന്റെ വിവിധ തീരദേശ-ഉൾനാടൻ മേഖലകളിൽ മൂടൽമഞ്ഞ് ജാഗ്രത നിലനിൽക്കും. സെപ്റ്റംബർ പിറന്നതോടെ അന്തരീക്ഷത്തിലെ ആർദ്രത രാത്രികാലങ്ങളിൽ 90 ശതമാനത്തോളം ഉയരുന്നതാണ് മൂടൽമഞ്ഞിന് കാരണമാകുന്നത്. പകൽ സമയത്തെ കടുത്ത ചൂടിന് ശേഷം രാത്രിയിൽ മരുഭൂമിയിലെ ഉപരിതലം പെട്ടെന്ന് തണുക്കുന്നു. അറേബ്യൻ ഗൾഫിൽ നിന്നും അറബിക്കടലിൽ നിന്നും എത്തുന്ന ഈർപ്പമുള്ള കാറ്റ് ഈ തണുത്ത ഉപരിതലവുമായി സമ്പർക്കത്തിൽ വരുമ്പോൾ ഖനീഭവിച്ച് മഞ്ഞായി മാറുന്നു. യുഎഇയിൽ കാണപ്പെടുന്ന മൂടൽമഞ്ഞിൽ 95 ശതമാനവും ഇത്തരത്തിലുള്ള ‘റേഡിയേഷൻ ഫോഗ്’ ആണ്. ബുധനാഴ്ച ആകാശം തെളിഞ്ഞതോ ഭാഗികമായി മേഘാവൃതമായതോ ആയിരിക്കും. ഉൾനാടൻ പ്രദേശങ്ങളിൽ പകൽ താപനില 40 മുതൽ 45 ഡിഗ്രി സെൽഷ്യസ് വരെ തുടരും. ഉച്ചയ്ക്ക് ശേഷം രാജ്യത്തിന്റെ കിഴക്കൻ മേഖലകളിൽ മഴമേഘങ്ങൾ രൂപപ്പെടാൻ സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു. മൂടൽമഞ്ഞിന്റെ തീവ്രതയനുസരിച്ച് കാലാവസ്ഥാ കേന്ദ്രം മൂന്ന് തരത്തിലുള്ള മുന്നറിയിപ്പുകളാണ് നൽകുന്നത്: മഞ്ഞ: ജാഗ്രത പാലിക്കണമെന്നും ശ്രദ്ധയോടെ വാഹനമോടിക്കണമെന്നും സൂചിപ്പിക്കുന്നു. ഓറഞ്ച്: കൂടുതൽ ജാഗ്രതയും തയ്യാറെടുപ്പുകളും ആവശ്യമാണ്. ചുവപ്പ്: അതീവ അപകടകരമായ അവസ്ഥ. കാഴ്ചപരിധി പാടെ കുറയുന്ന സാഹചര്യമാണിത്. നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് അതോറിറ്റിയുമായി സഹകരിച്ച് താമസക്കാരുടെ ഫോണുകളിലേക്ക് നേരിട്ട് മുന്നറിയിപ്പ് സന്ദേശങ്ങൾ അയക്കുന്നുണ്ട്. മൂടൽമഞ്ഞുള്ള സമയത്ത് വാഹനങ്ങൾക്കിടയിൽ കൃത്യമായ അകലം പാലിക്കണമെന്നും വേഗത കുറയ്ക്കണമെന്നും ലോ ബീം ഹെഡ്‌ലൈറ്റുകൾ ഉപയോഗിക്കണമെന്നും അധികൃതർ ഡ്രൈവർമാരോട് അഭ്യർത്ഥിച്ചു.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

സോഷ്യൽ മീഡിയ പരസ്യങ്ങൾക്ക് പിടിവീണു; ഡോക്ടർമാർക്കും ഇൻഫ്ലുവൻസർമാർക്കും കർശന നിയന്ത്രണങ്ങളുമായി ദുബായ്!

Dubai Medical Ads ദുബായ്: സോഷ്യൽ മീഡിയ വഴി രോഗികളെ തെറ്റിദ്ധരിപ്പിക്കുന്ന തരത്തിലുള്ള പരസ്യങ്ങൾക്കും വാഗ്ദാനങ്ങൾക്കും മൂക്കുകയറിട്ട് ദുബായ് ഹെൽത്ത് അതോറിറ്റി (ഡിഎച്ച്എ). ഡോക്ടർമാർ, ക്ലിനിക്കുകൾ, ആശുപത്രികൾ എന്നിവർക്കായി സോഷ്യൽ മീഡിയയിൽ പിന്തുടരേണ്ട കർശനമായ ഉള്ളടക്ക മാനദണ്ഡങ്ങൾ അതോറിറ്റി പുറപ്പെടുവിച്ചു. ഇൻസ്റ്റാഗ്രാം, ടിക്‌ടോക്, വാട്‌സ്ആപ്പ് തുടങ്ങി എല്ലാ പ്ലാറ്റ്‌ഫോമുകളിലും ഈ നിയമങ്ങൾ ബാധകമാണ്. രോഗികളിൽ അനാവശ്യ പ്രതീക്ഷകൾ നൽകുന്നതും ശാസ്ത്രീയമായി തെളിയിക്കപ്പെടാത്തതുമായ ചില വാക്കുകൾ പരസ്യങ്ങളിൽ ഉപയോഗിക്കുന്നത് അതോറിറ്റി പൂർണ്ണമായും നിരോധിച്ചു. ‘അത്ഭുതകരമായ’ (Miracle), ‘മാന്ത്രിക’ (Magic), ‘ഏറ്റവും മികച്ചത്’ (Best). ‘100 ശതമാനം ഉറപ്പ്’, ‘വിജയം ഉറപ്പ്’ (Guaranteed success). ‘പാർശ്വഫലങ്ങൾ ഇല്ലാത്തത്’ (No side effects), ‘പണം തിരികെ നൽകും’, ‘ഉടനടി ഫലം ലഭിക്കും’ തുടങ്ങിയ വാഗ്ദാനങ്ങൾ എന്നീ വാക്കുകള്‍ ഇനി ഉപയോഗിക്കാന്‍ പാടില്ല. ആരോഗ്യ കേന്ദ്രങ്ങളെ പ്രൊമോട്ട് ചെയ്യുന്ന സോഷ്യൽ മീഡിയ ഇൻഫ്ലുവൻസർമാർക്കും ഈ നിയമം ബാധകമാണ്. ഇൻഫ്ലുവൻസർമാർ ക്ലിനിക്കിന്റെ പേര് പരാമർശിക്കുന്ന പോസ്റ്റുകൾ ഇടുന്നതിന് മുൻപ് അതത് സ്ഥാപനത്തിലെ മെഡിക്കൽ ഡയറക്ടറുടെ അനുമതി വാങ്ങിയിരിക്കണം. ഇൻഫ്ലുവൻസർമാർ സ്വന്തം ഫോണിൽ ഷൂട്ട് ചെയ്ത് പോസ്റ്റ് ചെയ്യുന്ന ഉള്ളടക്കങ്ങളുടെ പൂർണ്ണ ഉത്തരവാദിത്തം ബന്ധപ്പെട്ട ആരോഗ്യ സ്ഥാപനങ്ങൾക്കായിരിക്കും. ഡിഎച്ച്എ ലൈസൻസിൽ ഇല്ലാത്ത ‘കോസ്മെറ്റിക് സ്പെഷ്യലിസ്റ്റ്’, ‘ബ്യൂട്ടി എക്സ്പർട്ട്’ തുടങ്ങിയ പദവികൾ ഉപയോഗിക്കാൻ പാടില്ല. എംബിബിഎസ്/ഡെന്റൽ ബിരുദമുള്ളവർക്കും അംഗീകൃത പിഎച്ച്ഡി ഉള്ളവർക്കും മാത്രമേ ‘ഡോക്ടർ’ എന്ന് ഉപയോഗിക്കാൻ അനുവാദമുള്ളൂ. ചികിത്സയ്ക്ക് മുൻപും ശേഷവുമുള്ള ചിത്രങ്ങൾ എഡിറ്റ് ചെയ്യാൻ പാടില്ല. രോഗികളുടെ ചിത്രങ്ങളോ വിഡിയോകളോ ഉപയോഗിക്കാൻ അവരുടെ രേഖാമൂലമുള്ള അനുമതി വേണം. ഏറ്റവും പ്രധാനമായി, ശസ്ത്രക്രിയകൾക്കിടയിലോ അനസ്ത്യേഷ്യ നൽകിയിരിക്കുന്ന സമയത്തോ പ്രമോഷണൽ ആവശ്യങ്ങൾക്കായി ചിത്രീകരണമോ ലൈവ് സ്ട്രീമിങ്ങോ നടത്തുന്നത് പൂർണ്ണമായും നിരോധിച്ചു.
യുഎഇ സംസ്കാരത്തിനും ഇസ്‌ലാമിക മൂല്യങ്ങൾക്കും വിരുദ്ധമായ ഉള്ളടക്കങ്ങൾ പാടില്ലെന്നും അതോറിറ്റി വ്യക്തമാക്കി. നിയമങ്ങൾ ലംഘിക്കുന്നവർക്കെതിരെ കടുത്ത പിഴയും ലൈസൻസ് റദ്ദാക്കുന്നത് ഉൾപ്പെടെയുള്ള നിയമനടപടികളും ഉണ്ടാകും. ദുബായ് ആരോഗ്യ മേഖലയുടെ സുതാര്യതയും രോഗികളുടെ സുരക്ഷയും മുൻനിർത്തിയാണ് 2026 വരെയുള്ള തന്ത്രപ്രധാന ലക്ഷ്യത്തിന്റെ ഭാഗമായി ഈ നീക്കം.