കുവൈത്തിൽ വേനൽക്കാലം അവസാനിക്കുന്നതായി അൽ അജരി സൈന്റിഫിക് സെന്റർ അറിയിച്ചു. പ്രാദേശികമായി ‘കലിബീൻ കാലം’ എന്നറിയപ്പെടുന്ന ഈ സീസൺ ഈ മാസം 11 മുതൽ ആരംഭിക്കും, 13 ദിവസമാണ് ഇതിന്റെ ദൈർഘ്യം.

കലിബീൻ കാലം വേനലിന്റെ തീവ്രത കുറയാനെത്തുന്ന ഒറ്റപ്പെട്ട കാലാവസ്ഥാ ഘട്ടമാണ്. ശൈത്യകാലത്തിലേക്കുള്ള കാലാവസ്ഥ മാറ്റം കൂടിയാണിത്. ഇനി കുറച്ച് ആഴ്ചകൾക്കകം തീവ്രമായ ചൂട് കുറ‍ഞ്ഞ് തണുപ്പിന്റെ സാന്നിധ്യം രാജ്യത്ത് അനുഭവപ്പെട്ടി തുടങ്ങും. കലിബീനിന്റെ അവസാനം, ശെെത്യാരംഭത്തിന് തുടക്കം കുറിച്ച് ‘സുഹെയ്ൽ’ നക്ഷത്രം ഉടൻ ദൃശ്യമാകുമെന്നും അധികൃതർ അറിയിച്ചു.

ഈ സീസണിൽ കനത്ത ചൂടിനൊപ്പം അന്തരീക്ഷ ഈർപ്പം കൂടും. താപനില ക്രമാതീതമായി കുറയാൻ തുടങ്ങും, അതിനൊപ്പം തെക്ക് കിഴക്കൻ ദിശകളിലും കാറ്റ് ശക്തിപ്രാപിക്കും. ഇത് അൽ സുമൂം എന്ന പേരിലാണ് അറിയപ്പെടുന്നത്. കലിബീൻ സീസൺ അവസാനിക്കുമ്പോൾ കാലാവസ്ഥ കൂടുതൽ മിതമാവുകയും, പകൽ താപനില ഗണ്യമായി കുറയുകയും ചെയ്യും. ശൈത്യകാലം ക്രമേണ ശക്തിപ്രാപിക്കും. ഇതോടൊപ്പം രാത്രികളുടെ ദൈർഘ്യവും വർദ്ധിക്കുന്നതായാണ് സൈന്റിഫിക് സെന്ററിന്റെ റിപ്പോർട്ട്.

Tag: Summer is ending in Kuwait; ‘Qalibeen season’ will begin from the 11th of this month