scam calls in Kuwait കുവൈത്ത് സിറ്റി: കഴിഞ്ഞ കുറച്ച് ദിവസങ്ങളായി കുവൈത്തിലെ പൗരന്മാർക്കും താമസക്കാർക്കും സംശയാസ്പദമായ അന്താരാഷ്ട്ര ഫോൺ കോളുകൾ ലഭിക്കുന്നത് വർദ്ധിച്ചുവരികയാണെന്നും ഇത് സംഘടിത സൈബർ തട്ടിപ്പിന്റെ ഭാഗമാണെന്നും സുരക്ഷാ ഉദ്യോഗസ്ഥർ സ്ഥിരീകരിച്ചു. പ്രധാനമായും ഒരു തവണ ബെല്ലടിച്ച ശേഷം ഉടൻ കട്ടാകുന്ന ‘വാംഗിരി സ്കാം’ എന്ന തന്ത്രമാണ് തട്ടിപ്പുകാർ ഇതിനായി ഉപയോഗിക്കുന്നത്. ഓട്ടോമേറ്റഡ് സംവിധാനങ്ങൾ ഉപയോഗിച്ച് ലോകമെമ്പാടുമുള്ള ആയിരക്കണക്കിന് ആളുകളെയാണ് തട്ടിപ്പുകാർ ഇത്തരത്തിൽ ബന്ധപ്പെടുന്നത്. മിസ്ഡ് കോൾ കണ്ട് തിരിച്ചുവിളിക്കുന്നവരെ ഉയർന്ന നിരക്കുള്ള അന്താരാഷ്ട്ര നമ്പറുകളിലേക്ക് റീഡയറക്ട് ചെയ്യും. വോയ്‌സ് മെസ്സേജുകളിലൂടെയോ മറ്റോ കോൾ ദീർഘിപ്പിച്ച് ഒരു മിനിറ്റിന് കുവൈത്ത് ദിനാറുകൾ വരെ ചിലവാകുന്ന രീതിയിലാണ് ഈ തട്ടിപ്പ് ക്രമീകരിച്ചിരിക്കുന്നത്. ചിലപ്പോൾ വിളിക്കുന്നയാളുടെ ശബ്ദം റെക്കോർഡ് ചെയ്യുകയും പിന്നീട് അത് വ്യാജ സാമ്പത്തിക ഇടപാടുകൾക്കോ മറ്റ് അനുമതികൾക്കോ വേണ്ടി ഉപയോഗിക്കുകയും ചെയ്യുന്നു. കൊറിയർ സർവീസ്, ബാങ്ക് അക്കൗണ്ട് അപ്‌ഡേറ്റ് എന്നിവയുടെ പേരിൽ വ്യാജ ലിങ്കുകൾ അയച്ച് ഫോൺ ഹാക്ക് ചെയ്യാനോ വ്യക്തിഗത വിവരങ്ങൾ മോഷ്ടിക്കാനോ ശ്രമിക്കാറുണ്ട്. വിദേശത്ത് ബന്ധുക്കളോ സുഹൃത്തുക്കളോ ഇല്ലാത്തവർ അപരിചിതമായ അന്താരാഷ്ട്ര നമ്പറുകളിൽ നിന്നുള്ള കോളുകൾ അറ്റൻഡ് ചെയ്യരുത്. ഒരു തവണ മാത്രം ബെല്ലടിച്ച് കട്ടാകുന്ന വിദേശ കോളുകൾ അവഗണിക്കുക. ഇത്തരം നമ്പറുകളിലേക്ക് യാതൊരു കാരണവശാലും തിരിച്ചുവിളിക്കരുത്. അപരിചിതമായ നമ്പറുകളിൽ നിന്ന് വരുന്ന സന്ദേശങ്ങളിലെ ലിങ്കുകളിൽ ക്ലിക്ക് ചെയ്യുന്നത് ഒഴിവാക്കുക. സംശയാസ്പദമായ നമ്പറുകൾ ശ്രദ്ധയിൽപ്പെട്ടാൽ അവ ഉടൻ തന്നെ ബ്ലോക്ക് ചെയ്യുക.

കുവൈത്തിലെ പുതിയ ജോലി അവസരങ്ങൾക്കായി ഇവിടെ ക്ലിക്ക് ചെയ്യാം

‘വ്യാജ സോഷ്യൽ മീഡിയ അക്കൗണ്ടുകൾ’; മുന്നറിയിപ്പുമായി കുവൈത്ത് പെട്രോളിയം കോർപ്പറേഷൻ

Kuwait Petroleum Corporation കുവൈത്ത് സിറ്റി: കുവൈത്ത് പെട്രോളിയം കോർപ്പറേഷൻ (KPC) ചീഫ് എക്സിക്യൂട്ടീവ് ഓഫീസറുടെ പേരിൽ വിവിധ സോഷ്യൽ മീഡിയ പ്ലാറ്റ്‌ഫോമുകളിൽ വ്യാജ അക്കൗണ്ടുകൾ പ്രചരിക്കുന്നതായി അധികൃതർ മുന്നറിയിപ്പ് നൽകി. ഇത്തരം അക്കൗണ്ടുകളുമായി കോർപ്പറേഷന് യാതൊരു ബന്ധവുമില്ലെന്നും ഇവ വഴി നടക്കുന്ന ഇടപാടുകൾക്ക് കെപിസി ഉത്തരവാദിയായിരിക്കില്ലെന്നും അധികൃതർ വ്യക്തമാക്കി. പൊതുജനങ്ങളെ കബളിപ്പിക്കാനും വ്യക്തിഗത വിവരങ്ങൾ കൈക്കലാക്കാനും ലക്ഷ്യമിട്ടുള്ള ഇത്തരം വ്യാജ അക്കൗണ്ടുകൾക്കെതിരെ ജാഗ്രത പാലിക്കണമെന്ന് കോർപ്പറേഷൻ അഭ്യർത്ഥിച്ചു. വ്യാജ അക്കൗണ്ടുകൾ വഴിയുള്ള ആശയവിനിമയങ്ങൾക്കോ സാമ്പത്തിക ഇടപാടുകൾക്കോ കുവൈത്ത് പെട്രോളിയം കോർപ്പറേഷൻ നിയമപരമായി ബാധ്യസ്ഥരല്ല. ഔദ്യോഗിക വിവരങ്ങൾക്കായി കെപിസിയുടെ അംഗീകൃത കമ്മ്യൂണിക്കേഷൻ ചാനലുകൾ മാത്രം ഉപയോഗിക്കണം. സോഷ്യൽ മീഡിയ വഴിയുള്ള തട്ടിപ്പുകൾ ഒഴിവാക്കാനും വ്യാജ സന്ദേശങ്ങളിൽ നിന്ന് പൊതുജനങ്ങളെ സംരക്ഷിക്കാനുമാണ് ഈ അടിയന്തര മുന്നറിയിപ്പ്.