Embezzling Money Kuwait ഹവല്ലി: കെട്ടിടത്തിലെ താമസക്കാരിൽ നിന്ന് വാടക പിരിച്ചെടുത്ത് ഉടമയ്ക്ക് കൈമാറാതെ തട്ടിയെടുത്ത സെക്യൂരിറ്റി ജീവനക്കാരനെ (ഹാരിസ്) ഹവല്ലി പോലീസ് അറസ്റ്റ് ചെയ്തു. വിശ്വാസ വഞ്ചന, സാമ്പത്തിക തട്ടിപ്പ് എന്നീ കുറ്റങ്ങൾ ചുമത്തി ഇയാളെ പബ്ലിക് പ്രോസിക്യൂഷന് കൈമാറി. രണ്ട് ഈജിപ്ഷ്യൻ പ്രവാസികൾ നൽകിയ പരാതിയെത്തുടർന്നാണ് ഞെട്ടിക്കുന്ന തട്ടിപ്പ് പുറത്തുവന്നത്. തങ്ങൾ കൃത്യമായി വാടക നൽകിയിട്ടും കുടിശ്ശിക ആവശ്യപ്പെട്ട് ഉടമ രംഗത്തെത്തിയതോടെയാണ് തങ്ങൾ വഞ്ചിക്കപ്പെട്ട വിവരം ഇവർ തിരിച്ചറിഞ്ഞത്. ഏകദേശം രണ്ട് പതിറ്റാണ്ടോളമായി ഇതേ കെട്ടിടത്തിൽ താമസിക്കുന്നവരാണ് പരാതിക്കാരായ പ്രവാസികൾ. വർഷങ്ങളായി കെട്ടിടത്തിൽ ജോലി ചെയ്യുന്ന പ്രായമായ സെക്യൂരിറ്റി ജീവനക്കാരനെ വിശ്വസിച്ചാണ് ഇവർ പണം കൈമാറിയിരുന്നത്. മറ്റൊരു താമസക്കാരൻ പണം നൽകുന്നതിന് സാക്ഷിയാണെന്നും ഇവർ പോലീസിനെ അറിയിച്ചു. പരാതി ലഭിച്ചതിനെത്തുടർന്ന് ക്രിമിനൽ സെക്യൂരിറ്റി സെക്ടർ നടത്തിയ അന്വേഷണത്തിൽ പ്രതി കുടുങ്ങുകയായിരുന്നു. ചോദ്യം ചെയ്യലിൽ, താൻ താമസക്കാരിൽ നിന്ന് പണം വാങ്ങിയെന്നും എന്നാൽ അത് ഉടമയ്ക്ക് നൽകാതെ സ്വന്തമാക്കിയെന്നും പ്രതി സമ്മതിച്ചു. ഏകദേശം 3,150 കുവൈത്ത് ദിനാർ (എട്ട് ലക്ഷത്തിലധികം രൂപ) ഇത്തരത്തിൽ ഇയാൾ തട്ടിയെടുത്തതായാണ് അന്വേഷണത്തിൽ വ്യക്തമായത്. പ്രതിയെ നിലവിൽ നിയമനടപടികൾക്കായി ബന്ധപ്പെട്ട അധികൃതർക്ക് കൈമാറി.

കുവൈത്തിലെ പുതിയ ജോലി അവസരങ്ങൾക്കായി ഇവിടെ ക്ലിക്ക് ചെയ്യാം

പ്രവാസികൾക്ക് വലിയ ആശ്വാസം; കാലാവധി കഴിഞ്ഞ പാസ്‌പോർട്ടിലും കുവൈത്തിൽ വിസ നടപടികൾ തുടരാം

expired passports കുവൈത്ത് സിറ്റി: പാസ്‌പോർട്ട് കാലാവധി കഴിഞ്ഞ പ്രവാസികൾക്ക് ആശ്വാസമായി കുവൈത്ത് താമസകാര്യ വകുപ്പിന്റെ പുതിയ സർക്കുലർ. നിലവിലെ പ്രാദേശിക സാഹചര്യം പരിഗണിച്ച്, പാസ്‌പോർട്ട് പുതുക്കാൻ കഴിയാത്തവർക്ക് എംബസികൾ വഴി ലഭിച്ച കാലാവധി നീട്ടൽ രേഖകൾ ഔദ്യോഗികമായി സ്വീകരിക്കാൻ താമസകാര്യ വകുപ്പ് ഡയറക്ടർ ജനറൽ ബ്രിഗേഡിയർ ജനറൽ ഫരീദ് അൽ മുതൈരി ഉത്തരവിട്ടു. മേഖലയിലെ അസാധാരണ സാഹചര്യം കണക്കിലെടുത്ത് അപേക്ഷകരുടെ നടപടിക്രമങ്ങൾ സുഗമമാക്കുന്നതിനും സേവനങ്ങൾ തടസ്സമില്ലാതെ ലഭ്യമാക്കുന്നതിനുമാണ് ഈ മാനുഷിക നടപടി. പാസ്‌പോർട്ട് പുതുക്കാൻ സാധിക്കാതെ വരികയും എന്നാൽ സ്വന്തം എംബസി വഴി കാലാവധി നീട്ടിക്കിട്ടുകയും ചെയ്ത പ്രവാസികളുടെ അപേക്ഷകൾ താമസകാര്യ വകുപ്പിന് കീഴിലെ എല്ലാ വിഭാഗങ്ങളും സ്വീകരിക്കണം. പാസ്‌പോർട്ടിന്റെ കാലാവധി നീട്ടിയത് പാസ്‌പോർട്ടിൽ തന്നെ സ്റ്റാമ്പ് ചെയ്തിരിക്കണം. കൂടാതെ, കുവൈത്തിലെ പ്രവാസി എംബസി നൽകുന്ന കത്ത് കുവൈത്ത് വിദേശകാര്യ മന്ത്രാലയം സാക്ഷ്യപ്പെടുത്തിയിരിക്കുകയും വേണം. പാസ്‌പോർട്ട് കാലാവധി നീട്ടിയത് സാധുവാണെന്ന് ഇതിലൂടെ ഉറപ്പാക്കും. ഈ നിർദ്ദേശങ്ങൾ കർശനമായി പാലിക്കണമെന്നും നടപടിക്രമങ്ങളിൽ നിന്ന് വ്യതിചലിക്കരുതെന്നും എല്ലാ ജീവനക്കാർക്കും ബ്രിഗേഡിയർ ജനറൽ നിർദ്ദേശം നൽകി.