Indian passport services in UAE Consulate അബുദാബി: പാസ്‌പോർട്ട്, വിസ, സാക്ഷ്യപ്പെടുത്തൽ (അറ്റസ്റ്റേഷൻ), മറ്റ് കോൺസുലർ സേവനങ്ങൾ എന്നിവയ്ക്കായി എത്തുന്ന അപേക്ഷകർക്ക് നേരിട്ടെത്തിയുള്ള (വാക്ക്-ഇൻ) പ്രവേശനം ദുബായിലെ ഇന്ത്യൻ കോൺസുലേറ്റ് നിർലാക്കിയതായി തിങ്കളാഴ്ച വൈകിട്ട് മിഷൻ അറിയിച്ചു. കോൺസുലേറ്റിൽ ഇനി മുതൽ വാക്ക്-ഇൻ സൗകര്യം ഉണ്ടായിരിക്കില്ല. എന്നാൽ അബുദാബിയിലെ എംബസി പരിസരത്ത് രാവിലെ 9 മണി മുതൽ 11 മണി വരെ പരിമിതമായ തോതിൽ വാക്ക്-ഇൻ സേവനങ്ങൾ ലഭ്യമായിരിക്കും. അൽഹിന്ദ് ടൂർസ് ആൻഡ് ട്രാവൽസ് എൽ.എൽ.സി വഴി ഇന്ത്യൻ കോൺസുലർ ആപ്ലിക്കേഷൻ സെന്ററുകൾ ആരംഭിക്കുന്നതിലുണ്ടായ താമസം കണക്കിലെടുത്ത്, സേവനങ്ങൾ കാര്യക്ഷമമാക്കുന്നതിനായാണ് മിഷന്റെ ഈ പുതിയ തീരുമാനം. ഇത് പ്രകാരം, പുതുതായി ആരംഭിച്ച പോർട്ടൽ വഴി മുൻകൂട്ടി അപ്പോയിന്റ്മെന്റ് എടുത്തവർക്ക് മാത്രമേ കോൺസുലേറ്റിലേക്ക് പ്രവേശനം അനുവദിക്കൂ. കഴിഞ്ഞ കുറച്ചു ദിവസങ്ങളായി അപേക്ഷകരുടെ എണ്ണത്തിൽ വൻ വർധനവുണ്ടായതിനെ തുടർന്ന്, മിഷനുകൾ തങ്ങളുടെ പരിസരത്ത് നിന്നുള്ള കോൺസുലർ സേവനങ്ങളിൽ കൂടുതൽ പരിഷ്കാരങ്ങൾ പ്രഖ്യാപിച്ചിട്ടുണ്ട്. അപേക്ഷകർക്ക് ഞായറാഴ്ച ആരംഭിച്ച book.passportindiauae.com എന്ന പോർട്ടൽ വഴി അപ്പോയിന്റ്മെന്റ് ബുക്ക് ചെയ്യാമെന്ന് മിഷനുകൾ അറിയിച്ചു. അടുത്ത ദിവസത്തെ സേവനങ്ങൾക്കുള്ള അപ്പോയിന്റ്മെന്റ് സ്ലോട്ടുകൾ തലേദിവസം രാത്രി 8 മണിക്ക് പോർട്ടലിൽ ലഭ്യമാകും. രാവിലെ 9 മണി മുതൽ ഉച്ചയ്ക്ക് 1 മണി വരെയുള്ള സ്ലോട്ടുകളിലേക്കാണ് അപ്പോയിന്റ്മെന്റുകൾ നൽകുന്നത്. മുൻകൂട്ടി അപ്പോയിന്റ്മെന്റ് ഉള്ള അപേക്ഷകരെ അവരുടെ അപ്പോയിന്റ്മെന്റ് സമയത്തിന് 15 മിനിറ്റ് മുമ്പ് മാത്രമേ ഉള്ളിലേക്ക് പ്രവേശിപ്പിക്കൂ. തിരക്ക് ഒഴിവാക്കാൻ, അപേക്ഷകർക്ക് മാത്രമേ എംബസി, കോൺസുലേറ്റ് പരിസരങ്ങളിൽ പ്രവേശനം അനുവദിക്കൂ. എന്നാൽ മാതാപിതാക്കൾ രണ്ടുപേരുടെയും സാന്നിധ്യം ആവശ്യമുള്ള പ്രായപൂർത്തിയാകാത്ത കുട്ടികളുടെ അപേക്ഷകളുടെ കാര്യത്തിൽ ഇതിൽ ഇളവുണ്ടാകും. അപേക്ഷകർ പൂർണ്ണമായി പൂരിപ്പിച്ച അപേക്ഷാ ഫോമുകളും അനുബന്ധ രേഖകളും സഹിതം വേണം സന്ദർശിക്കാൻ. പാസ്‌പോർട്ട് അപേക്ഷാ ഫോം mportal.passportindia.gov.in/mission/ എന്ന വെബ്‌സൈറ്റിൽ പൂരിപ്പിക്കാവുന്നതാണ്. ഫോം പൂരിപ്പിക്കുന്നതിനും ചിത്രങ്ങൾ, ഒപ്പ്, രേഖകൾ എന്നിവ അപ്‌ലോഡ് ചെയ്യുന്നതിനും മുൻപായി നിർദ്ദേശങ്ങൾ ശ്രദ്ധിച്ചു വായിക്കണമെന്ന് മിഷനുകൾ ആവശ്യപ്പെട്ടു. രേഖകൾ ഡെലിവറി ചെയ്യുന്നത് ഉൾപ്പെടെയുള്ള എല്ലാത്തരം ചോദ്യങ്ങൾക്കും വ്യക്തത വരുത്തുന്നതിനും അബുദാബിയിലെ ഗാർഡിയൻ ടവർ (ടെക്നിപ് ബിൽഡിംഗ്), അൽ ഇഷിറ സ്ട്രീറ്റ്, ഒന്നാം നില, യൂണിറ്റ് നമ്പർ 101-ൽ പ്രവർത്തിക്കുന്ന കോൺസുലർ വിംഗുമായി ബന്ധപ്പെടേണ്ടതാണ്. പാസ്‌പോർട്ട്, വിസ, അറ്റസ്റ്റേഷൻ സേവനങ്ങൾക്കായി ദുബായിലെ കോൺസുലേറ്റ് ജനറൽ ഓഫ് ഇന്ത്യയിലേക്കുള്ള പ്രവേശനം ഗേറ്റ് നമ്പർ 1 വഴി ആയിരിക്കും. അബുദാബി എംബസിയിൽ കോൺസുലർ, പാസ്‌പോർട്ട്, വിസ സേവനങ്ങൾക്കായി അപേക്ഷിക്കുന്നവർക്ക് അൽ സഫാറാത്ത് സ്ട്രീറ്റിലുള്ള എംബസിയുടെ പ്രധാന ഗേറ്റ് വഴിയാണ് പ്രവേശനം. നവജാതശിശുക്കൾക്കും പാസ്‌പോർട്ട് ഇല്ലാത്തവർക്ക് നാട്ടിലേക്ക് മടങ്ങാൻ നൽകുന്ന ഒറ്റത്തവണ യാത്രാ രേഖയായ എമർജൻസി സർട്ടിഫിക്കറ്റിന് അപേക്ഷിക്കുന്നവർക്കും മുൻഗണന നൽകും.

സാങ്കേതിക തകരാർ പരിഹരിച്ചു; ബാങ്കിങ് സേവനങ്ങൾ പൂർണമായും പുനസ്ഥാപിച്ചതായി എഡിസിബി

ADCB bank അബുദാബി: സാങ്കേതിക തകരാറിനെ തുടർന്ന് തടസ്സപ്പെട്ട ബാങ്കിങ് സേവനങ്ങൾ പൂർണമായും പുനസ്ഥാപിച്ചതായി അബൂദബി കൊമേഴ്സ്യൽ ബാങ്ക് (എ.ഡി.സി.ബി.) അധികൃതർ അറിയിച്ചു. ഉയർന്ന തോതിൽ ഇടപാടുകൾ നടന്നിട്ടും കഴിഞ്ഞ നാല് ദിവസമായി ബാങ്കിൻ്റെ കോർ ബാങ്കിങ് സംവിധാനങ്ങൾ പൂർണമായും സുസ്ഥിരമാണെന്ന് അധികൃതർ വ്യക്തമാക്കി. കഴിഞ്ഞ ദിവസങ്ങളിൽ ഏതാനും മണിക്കൂറുകൾ മാത്രമാണ് തടസ്സം നേരിട്ടതെന്നും ഇത് പ്രധാനമായും മൊബൈൽ ആപ്ലിക്കേഷൻ വഴിയുള്ള പേയ്മെന്റുകളെയും പണം കൈമാറ്റങ്ങളെയുമാണ് ബാധിച്ചതെന്നും ബാങ്ക് വിശദീകരിച്ചു. സാങ്കേതിക തകരാറുകൾ ഉണ്ടായ സമയത്തും ഉപഭോക്താക്കളുടെ വിവരങ്ങളോ അക്കൗണ്ട് ബാലൻസോ യാതൊരുവിധത്തിലും ചോർന്നിട്ടില്ലെന്നും പൂർണ സുരക്ഷിതമാണെന്നും ബാങ്ക് മാനേജ്മെന്റ് വ്യക്തമാക്കി. ആഗോള സാങ്കേതിക വിദഗ്‌ധരുടെയും സപ്ലയർമാരുടെയും സഹായത്തോടെ ബാങ്കിലെ പ്രത്യേക സംഘം ഇരുപത്തിനാല് മണിക്കൂറും പ്രവർത്തിച്ചാണ് സേവനങ്ങൾ പൂർവസ്ഥിതിയിലാക്കിയത്. എഡിസിബിയുടെ താഴെ പറയുന്ന സേവനങ്ങളെല്ലാം നിലവിൽ സാധാരണ നിലയിൽ പ്രവർത്തിക്കുന്നുണ്ട്: കോർ ബാങ്കിങ് സിസ്റ്റം, ബാങ്ക് ശാഖകൾ, എടിഎം, സിഡിഎം ശൃംഖലകൾ, ഡെബിറ്റ് – ക്രെഡിറ്റ് കാർഡ് സേവനങ്ങൾ, കോർപറേറ്റ് ബാങ്കിങ്. ഭൂരിഭാഗം ഉപഭോക്താക്കൾക്കും മൊബൈൽ ആപ്പ് സേവനം ലഭ്യമായിട്ടുണ്ടെങ്കിലും, ‘ആസ്പയർ’ റീട്ടെയ്ൽ ബാങ്കിങ് വിഭാഗത്തിലെ ചെറിയ ശതമാനം ഉപഭോക്താക്കൾക്ക് മാത്രമാണ് ഇനി ആപ്പ് സേവനം പൂർണമായി ലഭിക്കാനുള്ളത്. ഇതും ഉടൻ പരിഹരിക്കും. സാങ്കേതിക തകരാർ നേരിട്ട ദിവസങ്ങളിൽ ഇടപാടുകൾ മുടങ്ങാതിരിക്കാൻ ബാങ്ക് താഴെ പറയുന്ന നടപടികൾ സ്വീകരിച്ചിരുന്നു: വാരാന്ത്യ അവധി ദിവസങ്ങളിലുൾപ്പെടെ ബാങ്ക് ശാഖകളുടെ പ്രവർത്തന സമയം നീട്ടി നൽകി, ഏത് ഉപകരണത്തിൽ നിന്നും സുരക്ഷിതമായി ഇടപാടുകൾ നടത്താൻ പാകത്തിന് മൊബൈലിന് ഇൻ്റർനെറ്റ് ബാങ്കിങ് പതിപ്പ് അവതരിപ്പിച്ചു, തടസങ്ങളിൽ ഉപഭോക്താക്കളോട് ഖേദം പ്രകടിപ്പിച്ച ബാങ്ക് അധികൃതർ, ബാക്കിയുള്ള ചെറിയ പ്രശ്‌നങ്ങൾ കൂടി ഉടൻ പരിഹരിക്കുമെന്നും വ്യക്തമാക്കി.