UAE Global Environmental Performance Index ദുബായ്: ആഗോള പരിസ്ഥിതി പ്രകടന സൂചികയിൽ (Environmental Performance Index – EPI) അറബ് രാജ്യങ്ങളിൽ യുഎഇ ഒന്നാം സ്ഥാനം സ്വന്തമാക്കി. കാലാവസ്ഥാ വ്യതിയാന പ്രതിരോധം, പരിസ്ഥിതി ആരോഗ്യം, ആവാസവ്യവസ്ഥയുടെ സംരക്ഷണം എന്നിവയിൽ രാജ്യം നടപ്പാക്കിയ സമഗ്രവും ഏകോപിതവുമായ പ്രവർത്തനങ്ങൾക്കുള്ള വലിയൊരു അംഗീകാരമായാണ് ഈ നേട്ടം. പരിസ്ഥിതി മലിനീകരണ നിയന്ത്രണം, കാലാവസ്ഥാ വ്യതിയാനം ഉൾപ്പെടെ 12 വിഭാഗങ്ങളിലായി 47 സൂചകങ്ങൾ വിലയിരുത്തിയാണ് സൂചിക തയാറാക്കിയത്. പരിസ്ഥിതി അടിസ്ഥാന സൗകര്യങ്ങളിലെ നിക്ഷേപം, കർശനമായ നിയമനിർമാണങ്ങൾ, അത്യാധുനിക സാങ്കേതികവിദ്യയുടെ ഉപയോഗം എന്നിവയാണ് യുഎഇയുടെ ഈ വലിയ മുന്നേറ്റത്തിന് കാരണമായത്. യുഎഇ രാഷ്ട്രപിതാവ് ഷെയ്ഖ് സായിദ് ബിൻ സുൽത്താൻ അൽ നഹ്യാൻ വിഭാവനം ചെയ്ത പരിസ്ഥിതി സംരക്ഷണ മൂല്യങ്ങൾ മുൻനിർത്തി, സർക്കാർ സ്ഥാപനങ്ങളും സ്വകാര്യ മേഖലയും പൊതുസമൂഹവും ഒരുമിച്ച് നടത്തിയ പ്രവർത്തനങ്ങളുടെ ഫലമാണിതെന്ന് കാലാവസ്ഥാ വ്യതിയാന പരിസ്ഥിതി മന്ത്രി ഡോ. ആംന ബിൻത് അബ്ദുല്ല അൽ ദഹാക് വ്യക്തമാക്കി. മാലിന്യ സംസ്കരണത്തിൽ നൂറ് ശതമാനം മാർക്കോടെ യുഎഇ ആഗോളതലത്തിൽ ഒന്നാം സ്ഥാനം നേടി. കടൽ ജീവികളുടെ സുരക്ഷ ഉറപ്പാക്കിക്കൊണ്ടുള്ള സുസ്ഥിര മത്സ്യബന്ധന രീതികൾ പിന്തുടരുന്നതിലും രാജ്യത്തിന് മുഴു മാർക്കുണ്ട്. മലിനജല ശുദ്ധീകരണത്തിൽ 94.99 ശതമാനം മാർക്കോടെ ആഗോളതലത്തിൽ 19-ാം സ്ഥാനത്താണ് രാജ്യം. കടൽ ജീവജാലങ്ങളുടെയും സമുദ്ര ആവാസവ്യവസ്ഥയുടെയും സംരക്ഷണത്തിൽ യുഎഇ മേഖലയിൽ ഒന്നാമതും ആഗോളതലത്തിൽ ഒമ്പതാമതുമാണ്. നിലവിൽ രാജ്യത്തിന്റെ കര, കടൽ മേഖലകളുടെ 19 ശതമാനത്തിലധികവും സംരക്ഷിത പ്രദേശങ്ങളായി പ്രഖ്യാപിച്ചിട്ടുണ്ട്. നെറ്റ് സീറോ 2050 തന്ത്രത്തിന്റെ ഭാഗമായി കാർബൺ ഉദ്‌വമനം കുറയ്ക്കുന്നതിൽ യുഎഇ വലിയ പുരോഗതി കൈവരിച്ചു. നൂർ അബുദാബി, മുഹമ്മദ് ബിൻ റാഷിദ് അൽ മക്തും സോളാർ പാർക്ക് തുടങ്ങിയ പദ്ധതികളിലൂടെ 2022 നും 2025 നും ഇടയിൽ രാജ്യത്തെ പുനരുപയോഗ ഊർജ ഉൽപാദന ശേഷി 117 ശതമാനമാണ് വർധിച്ചത്. യുഎഇ ഊർജ തന്ത്രം 2050 അനുസരിച്ച് 2030 ഓടെ ഹരിത ഊർജ നിക്ഷേപം 15,000 കോടി മുതൽ 20,000 കോടി ദിർഹം വരെയായി ഉയർത്തും. അബുദാബിക്ക് സമീപം മസ്ദാറും ഇഡബ്ല്യുഇസിയും (EWEC) ചേർന്ന് നിർമിക്കുന്ന 5.2 ജിഗാവാട്ട് ശേഷിയുള്ള ലോകത്തിലെ ഏറ്റവും വലിയ സോളാർ പ്ലാന്റും ഇതിൽ ഉൾപ്പെടുന്നു. ഗ്രീൻ ഹൈഡ്രജൻ ഉൽപാദനത്തിലും കയറ്റുമതിയിലും ആഗോള കേന്ദ്രമാകാനുള്ള തയാറെടുപ്പിലാണ് രാജ്യം. അത്യാധുനിക സാങ്കേതികവിദ്യയിലൂടെയും ‘അൽ തവീല’ പോലെയുള്ള ലോകത്തിലെ ഏറ്റവും വലിയ റിവേഴ്സ് ഓസ്മോസിസ് പ്ലാന്റുകളിലൂടെയും സുസ്ഥിരമായ ജലശുദ്ധീകരണം ഉറപ്പാക്കാൻ യുഎഇക്ക് സാധിക്കുന്നുണ്ട്. നാഷനൽ എയർ ക്വാളിറ്റി അജണ്ട 2031 വഴി വായുവിന്റെ ഗുണനിലവാരം ഉറപ്പാക്കാനും സർക്കുലർ ഇക്കോണമി പോളിസി 2031 വഴി ഹരിത വികസനം പ്രോത്സാഹിപ്പിക്കാനും കർശനമായ നടപടികളാണ് സ്വീകരിക്കുന്നത്.

LATEST JOB IN UAE-DAILY UPDATING…	APPLY NOW
HOSPITAL JOBS IN UAE-DAILY UPDATING…	APPLY NOW
AIRPORT AND AIRLINE JOB IN UAE -DAILY UPDATING…	APPLY NOW
TEACHING JOB IN UAE -DAILY UPDATING…	APPLY NOW
LOGISTICS JOB IN UAE-DAILY UPDATING…	APPLY NOW
ACCOUNTING JOB IN UAE-DAILY UPDATING…	APPLY NOW

ഇന്ത്യൻ പാസ്‌പോർട്ട് പുതുക്കൽ: യുഎഇയില്‍ ഓൺലൈനായി എങ്ങനെ അപ്പോയിന്റ്മെന്റ് ബുക്ക് ചെയ്യാം?

Indian passport renewal appointment UAE ദുബായ് / അബുദാബി: യുഎഇയിലെ ഇന്ത്യൻ പ്രവാസികൾക്ക് പാസ്‌പോർട്ട് പുതുക്കുന്നതിനുള്ള അപ്പോയിന്റ്മെന്റുകൾ ഇനി എങ്ങനെ ബുക്ക് ചെയ്യാമെന്ന് വ്യക്തമാക്കി ജൂലൈ 10 വെള്ളിയാഴ്ച ഇന്ത്യൻ കോൺസുലേറ്റ് പുതിയ അറിയിപ്പ് പുറത്തിറക്കി. പുറംകരാർ ലഭിച്ച ടൂർസ് ആൻഡ് ട്രാവൽസ് കമ്പനി നിയമപോരാട്ടത്തിൽ അകപ്പെട്ടതിനെത്തുടർന്ന്, യുഎഇയിലെ കോൺസുലർ, പാസ്‌പോർട്ട്, വിസ സേവനങ്ങളുടെ ചുമതല താൽക്കാലികമായി മാറ്റിവെച്ചതായി അബുദാബിയിലെ ഇന്ത്യൻ എംബസി അറിയിച്ചിരുന്നു. ജൂലൈ 1 മുതൽ ആരംഭിക്കേണ്ടിയിരുന്ന ഈ സേവനങ്ങൾ ചില ഭരണപരമായ കാരണങ്ങളാൽ മാറ്റിവെക്കുകയായിരുന്നു. കൂടാതെ, പാസ്‌പോർട്ട് പുതുക്കൽ സേവനങ്ങൾക്കായി മുൻകൂട്ടി അപ്പോയിന്റ്മെന്റ് എടുക്കാതെ നേരിട്ടെത്തുന്നവരെ (walk-ins) ഇനി മുതൽ സ്വീകരിക്കില്ലെന്നും ഈ മാസം ആദ്യം പുറത്തിറക്കിയ നോട്ടീസിൽ ഇന്ത്യൻ മിഷൻ വ്യക്തമാക്കിയിരുന്നു.

ഓൺലൈനായി എങ്ങനെ അപ്പോയിന്റ്മെന്റ് ബുക്ക് ചെയ്യാം?

യുഎഇയിലെ പ്രവാസികൾക്ക് താഴെ പറയുന്ന ലളിതമായ ഘട്ടങ്ങളിലൂടെ ഓൺലൈൻ അപ്പോയിന്റ്മെന്റ് ബുക്ക് ചെയ്യാവുന്നതാണ്:

book.passportindiauae.com എന്ന ഔദ്യോഗിക വെബ്‌സൈറ്റ് സന്ദർശിക്കുക.

നിങ്ങളുടെ പേര്, ഇമെയിൽ വിലാസം, ഒരു പാസ്‌വേഡ് എന്നിവ നൽകി വെബ്‌സൈറ്റിൽ രജിസ്റ്റർ ചെയ്യുക.

നിങ്ങളുടെ ഇമെയിൽ വിലാസം വെരിഫൈ (Verify) ചെയ്യുക.

വെബ്‌സൈറ്റിൽ ലോഗിൻ ചെയ്യുക.

നിങ്ങളുടെ കോൺസുലർ പരിധി തിരഞ്ഞെടുക്കുക — ഇതിനായി ദുബായിലെ ഇന്ത്യൻ കോൺസുലേറ്റ് ജനറൽ അല്ലെങ്കിൽ അബുദാബിയിലെ ഇന്ത്യൻ എംബസി എന്നിവയിൽ അനുയോജ്യമായത് തിരഞ്ഞെടുക്കാനുള്ള ഓപ്ഷൻ ലഭിക്കും.

നിങ്ങളുടെ വ്യക്തിഗത വിവരങ്ങൾ പൂരിപ്പിച്ച ശേഷം ലഭ്യമായ സമയവും തീയതിയും (slot) തിരഞ്ഞെടുക്കുക.

ബുക്കിങ് സ്ഥിരീകരിക്കുക.

ബിഎൽഎസ് ഇന്റർനാഷനൽ, എസ്ജിവീഎസ് ഗ്ലോബൽ എന്നീ ഏജൻസികൾക്ക് ഇനി മുതൽ യാതൊരുവിധ കോൺസു ലർ സേവനങ്ങളും നൽകാൻ അധികാരമില്ലെന്ന് ജൂലൈ 10-ന് ഇറക്കിയ നോട്ടീസിൽ അധികൃതർ പ്രത്യേകം ഊന്നിപ്പറഞ്ഞിട്ടുണ്ട്.അപ്പോയിന്റ്മെന്റ് ബുക്ക് ചെയ്യുന്നതിന് മുൻപായി, അപേക്ഷകർ ഓൺലൈനിൽ ലഭ്യമായ പാസ്‌പോർട്ട് പുതുക്കൽ ഫോം നിർബന്ധമായും പൂരിപ്പിക്കേണ്ടതുണ്ട്. അപ്പോയിന്റ്മെന്റ് ദിവസം ഈ ഫോമിന്റെ പകർപ്പ് കൈയിൽ കരുതുകയും വേണം.

സിറ്റി വോക്കിൽ ഇനി തടസ്സങ്ങളില്ലാത്ത ‘ടിക്കറ്റില്ലാതെ’ പാർക്കിങ് സംവിധാനം; ആദ്യ ഒരു മണിക്കൂർ സൗജന്യമെന്ന് പാർക്കിൻ

Dubai City Walk Parking ദുബായ്: ദുബായിലെ പ്രമുഖ വിനോദസഞ്ചാര കേന്ദ്രമായ സിറ്റി വോക്കിൽ ഇനി മുതൽ ബാരിയറുകളും ടിക്കറ്റുകളുമില്ലാത്ത അത്യാധുനിക സ്മാർട്ട് പാർക്കിങ് സംവിധാനം ഏർപ്പെടുത്തിയതായി പാർക്കിൻ അറിയിച്ചു. സന്ദർശകർക്ക് കൂടുതൽ എളുപ്പത്തിൽ വാഹനം പാർക്ക് ചെയ്യുന്നതിനാണ് പുതിയ മാറ്റം. സിറ്റി വോക്കിൽ ആദ്യത്തെ ഒരു മണിക്കൂറും, ദ ബൊളിവാർഡിൽ ആദ്യ 30 മിനിറ്റും പാർക്കിങ് പൂർണ്ണമായും സൗജന്യമായിരിക്കും. സൗജന്യ സമയത്തിന് ശേഷം ഓരോ മണിക്കൂറിനും (അല്ലെങ്കിൽ മണിക്കൂറിന്റെ ഭാഗത്തിനും) 5 ദിർഹം വീതം ഈടാക്കും. ഈ തുക വാഹന ഉടമയുടെ ‘പാർക്കിൻ’ അക്കൗണ്ടിൽ നിന്ന് സ്വയമേവ കുറയ്ക്കും. അക്കൗണ്ട് ഇല്ലാത്തവർക്കും ആവശ്യത്തിന് പണമില്ലാത്തവർക്കും പണമടയ്ക്കാനുള്ള ലിങ്ക് മൊബൈലിൽ സന്ദേശമായി ലഭിക്കും. റോക്സി സിനിമാസ്, ദ ഗ്രീൻ പ്ലാനറ്റ് എന്നിവടങ്ങളിലും തിരഞ്ഞെടുത്ത മറ്റ് ഔട്ട്‌ലെറ്റുകളിലും എത്തുന്നവർക്ക് പാർക്കിങ് ടിക്കറ്റ് വാലിഡേറ്റ് ചെയ്യാനുള്ള (സൗജന്യ നിരക്ക് നീട്ടി ലഭിക്കാനുള്ള) സൗകര്യമുണ്ട്. ആദ്യ 30 മിനിറ്റിന് ശേഷം വരുന്ന ഓരോ മണിക്കൂറിനും 20 ദിർഹം വീതമാണ് നിരക്ക്. സിറ്റി വോക്ക് വെബ്‌സൈറ്റ് പ്രകാരം ഈ തുക സന്ദർശകരുടെ ‘സാലിക്’ അക്കൗണ്ടിൽ നിന്നാണ് ഈടാക്കുക. ഇതുകൂടാതെ, പങ്കാളികളായ ഔട്ട്‌ലെറ്റുകളിൽ നിന്ന് കുറഞ്ഞത് 50 ദിർഹത്തിന് സാധനങ്ങൾ വാങ്ങുകയോ സേവനങ്ങൾ ഉപയോഗിക്കുകയോ ചെയ്യുന്നവർക്ക് ആദ്യത്തെ മൂന്ന് മണിക്കൂർ പാർക്കിങ് തികച്ചും സൗജന്യമായിരിക്കും. ഇതിനായി വാങ്ങൽ നടത്തിയ കൗണ്ടറിൽ വെച്ച് പാർക്കിങ് ടിക്കറ്റ് വാലിഡേറ്റ് ചെയ്യേണ്ടതുണ്ട്. അടുത്തിടെ അൽ ഗുറൈർ സെന്ററുമായും പാർക്കിൻ അഞ്ച് വർഷത്തെ കരാറിൽ ഒപ്പുവെച്ചിരുന്നു. അവിടെ തിങ്കൾ മുതൽ ശനി വരെ ആദ്യത്തെ മൂന്ന് മണിക്കൂർ പാർക്കിങ് സൗജന്യമാണ്. ഞായറാഴ്ചകളിലും പൊതുഅവധി ദിവസങ്ങളിലും പാർക്കിങ് പൂർണ്ണമായും സൗജന്യമായിരിക്കും.

വ്യാജ ആപ്പുകൾ ഡൗൺലോഡ് ചെയ്യരുത്; ബാങ്ക് വിവരങ്ങൾ ചോരുമെന്ന് മുന്നറിയിപ്പുമായി ദുബായ് പോലീസ്

Dubai Police over fake apps ദുബായ്: സുരക്ഷിതമല്ലാത്തതും ഔദ്യോഗികമല്ലാത്തതുമായ ഉറവിടങ്ങളിൽ നിന്ന് ആപ്പുകൾ ഡൗൺലോഡ് ചെയ്യുന്നതിനെതിരെ പൊതുജനങ്ങൾക്ക് കർശന മുന്നറിയിപ്പുമായി ദുബായ് പോലീസ്. ദുബായ് പോലീസിന്റെ ജനറൽ ഡിപ്പാർട്ട്‌മെന്റ് ഓഫ് ക്രിമിനൽ ഇൻവെസ്റ്റിഗേഷന് കീഴിലുള്ള ഇ-ക്രൈംസ് ആൻഡ് സൈബർ സെക്യൂരിറ്റി വിഭാഗമാണ് ഈ മുന്നറിയിപ്പ് നൽകിയത്. ഇത്തരം ആപ്പുകളിൽ അടങ്ങിയിരിക്കുന്ന മലിഷ്യസ് സോഫ്റ്റ്‌വെയറുകൾ വഴി തട്ടിപ്പുകാർക്ക് സ്മാർട്ട്‌ഫോണുകളിലേക്ക് കടന്നുകയറാനും, വ്യക്തിഗത-ബാങ്കിങ് വിവരങ്ങൾ ചോർത്തി ബാങ്ക് അക്കൗണ്ടുകളിൽ നിന്ന് പണം തട്ടിയെടുക്കാനും സാധിക്കുമെന്ന് പോലീസ് വ്യക്തമാക്കി. പൊതുജനങ്ങളിൽ അവബോധം വളർത്തുന്നതിനായി ദുബായ് പോലീസ് ഒരു വീഡിയോയും പുറത്തുവിട്ടിട്ടുണ്ട്. ബാങ്കിങ്, നിക്ഷേപങ്ങൾ, ഡെലിവറി സർവീസുകൾ, സെക്യൂരിറ്റി അപ്‌ഡേറ്റുകൾ എന്നിങ്ങനെ ജനങ്ങൾക്ക് ഏറെ ആവശ്യമുള്ളതും താല്പര്യമുള്ളതുമായ മേഖലകളെ മുൻനിർത്തിയാണ് തട്ടിപ്പുകാർ വ്യാജ ആപ്പുകൾ നിർമ്മിക്കുന്നത്. ഇത്തരം ആകർഷകമായ വ്യാജ പരസ്യങ്ങളിലും ലിങ്കുകളിലും ക്ലിക്ക് ചെയ്ത് ജനങ്ങൾ ആപ്പുകൾ ഡൗൺലോഡ് ചെയ്യുന്നതോടെ തട്ടിപ്പുകാരുടെ കെണിയിൽ വീഴുകയാണെന്ന് പോലീസ് ചൂണ്ടിക്കാണിക്കുന്നു. ആപ്പുകൾ ഡൗൺലോഡ് ചെയ്യുന്ന നിമിഷം തന്നെ ഫോണിലെ വിവരങ്ങൾ പൂർണ്ണമായും നിയന്ത്രിക്കാൻ തട്ടിപ്പുകാർക്ക് സാധിക്കും. തുടർന്ന് ഉടമ അറിയാതെ തന്നെ വ്യക്തിഗത വിവരങ്ങളും പണവും ഇവർ അപഹരിക്കുന്നു.

സൈബർ സുരക്ഷയ്ക്കായി ദുബായ് പോലീസ് നൽകുന്ന നിർദേശങ്ങൾ:

ആപ്പുകൾ എപ്പോഴും ഔദ്യോഗികവും അംഗീകൃതവുമായ ആപ്പ് സ്റ്റോറുകളിൽ നിന്ന് മാത്രം ഡൗൺലോഡ് ചെയ്യുക.

ബാങ്കിങ് പാസ്‌വേഡുകളോ ഒടിപി പോലുള്ള സുരക്ഷാ കോഡുകളോ ആരുമായും പങ്കുവെക്കരുത്.

സ്മാർട്ട്‌ഫോണുകളിൽ വിശ്വസനീയമായ സെക്യൂരിറ്റി സോഫ്റ്റ്‌വെയറുകൾ ഉപയോഗിക്കുക.

അക്കൗണ്ടിലെ മാറ്റങ്ങൾ ഉടനടി അറിയാൻ ബാങ്കിങ് അലേർട്ടുകൾ എപ്പോഴും ആക്റ്റിവ് ആക്കി വെക്കുക.

സംശയാസ്പദമായ ലിങ്കുകളിൽ ക്ലിക്ക് ചെയ്യുന്നത് പൂർണ്ണമായും ഒഴിവാക്കുക.

ഡിജിറ്റൽ സുരക്ഷയെക്കുറിച്ചുള്ള ബോധമാണ് ഇത്തരം തട്ടിപ്പുകൾക്കെതിരെയുള്ള ആദ്യ പ്രതിരോധമെന്ന് പോലീസ് ഓർമ്മിപ്പിച്ചു. എന്തെങ്കിലും തരത്തിലുള്ള സൈബർ തട്ടിപ്പ് ശ്രമങ്ങൾ ശ്രദ്ധയിൽ പെട്ടാൽ ദുബായ് പോലീസിന്റെ സ്മാർട്ട് ആപ്പ് വഴിയോ, 901 എന്ന നമ്പറിൽ വിളിച്ചോ, അല്ലെങ്കിൽ പോലീസിന്റെ ഇ-ക്രൈം പ്ലാറ്റ്‌ഫോം വഴിയോ ഉടനടി റിപ്പോർട്ട് ചെയ്യണമെന്നും അധികൃതർ ആവശ്യപ്പെട്ടു.

യുഎസ് – ഇറാൻ സംഘർഷം: യുഎഇ നിവാസികള്‍ അറിഞ്ഞിരിക്കേണ്ട കാര്യങ്ങള്‍

US-Iran war വാഷിങ്‌ടൺ / ടെഹ്‌റാൻ: വാഷിങ്‌ടണും ടെഹ്‌റാനും തമ്മിൽ വീണ്ടും വാക്പോരുകളും നീക്കങ്ങളും ശക്തമായതോടെ യുഎസ്-ഇറാൻ സംഘർഷം മേഖലയിൽ വലിയ ആശങ്കയായി തുടരുന്നു. സ്ഥിതിഗതികൾ കൂടുതൽ വഷളാകാതിരിക്കാൻ നയതന്ത്ര ശ്രമങ്ങൾ സജീവമാണ്. ഹോർമുസ് കടലിടുക്കിന്റെ സുരക്ഷ, കപ്പൽ ഗതാഗതം, ഊർജ്ജ വിപണി, ആണവ ചർച്ചകളുടെ ഭാവി എന്നിവയെ മുൻനിർത്തി യുഎഇ ഉൾപ്പെടെയുള്ള ഗൾഫ് രാജ്യങ്ങൾ ഈ നീക്കങ്ങളെ അതീവ ജാഗ്രതയോടെയാണ് വീക്ഷിക്കുന്നത്. ഇറാൻ കൂടുതൽ ചർച്ചകൾക്ക് താല്പര്യം പ്രകടിപ്പിച്ചതായും അതുമായി മുന്നോട്ട് പോകാൻ വാഷിങ്‌ടൺ സമ്മതിച്ചതായും യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കി. ശാശ്വതമായി സംഘർഷം അവസാനിപ്പിക്കുകയാണ് ചർച്ചകളുടെ ലക്ഷ്യം. എന്നാൽ ഇരുവിഭാഗങ്ങളും തമ്മിലുള്ള ‘വെടിനിർത്തൽ’ അവസാനിച്ചുവെന്നും നയതന്ത്ര ശ്രമങ്ങൾ പരാജയപ്പെട്ടാൽ മറ്റ് മാർഗങ്ങൾ തേടുമെന്നും ട്രംപ് മുന്നറിയിപ്പ് നൽകി. തന്ത്രപ്രധാനമായ ഈ ജലപാതയിലൂടെ വാണിജ്യ കപ്പലുകൾക്ക് സുരക്ഷിതമായി കടന്നുപോകാൻ കഴിയുമെന്ന പരസ്യമായ ഉറപ്പ് ഇറാൻ നൽകണമെന്ന് യുഎസ് ആവശ്യപ്പെടുന്നുണ്ട്. ആഗോള ഊർജ്ജ വിതരണത്തിലും സമുദ്ര വ്യാപാരത്തിലും നിർണായക പങ്കുവഹിക്കുന്ന പാതയാണിത്. സംഘർഷം ലഘൂകരിക്കാൻ ഒമാൻ, ഖത്തർ, പാകിസ്ഥാൻ എന്നീ രാജ്യങ്ങൾ നയതന്ത്ര നീക്കങ്ങൾ ശക്തമാക്കിയിട്ടുണ്ട്. ഇറാൻ വിദേശകാര്യമന്ത്രി അബ്ബാസ് അരാഗ്ചി ഒമാൻ സന്ദർശിച്ച് ചർച്ചകൾ നടത്തുമെന്നാണ് വിവരം. സമുദ്ര സുരക്ഷയും മേഖലയിലെ സ്ഥിരതയും മുൻനിർത്തി സൗദി അറേബ്യയും വാഷിങ്‌ടണുമായി ചർച്ചകൾ നടത്തുന്നുണ്ട്. തങ്ങൾ കീഴടങ്ങാൻ തയാറല്ലെന്നും ആവശ്യമായി വന്നാൽ ‘പൂർണ്ണമായ പ്രതിരോധത്തിന്’ സജ്ജമാണെന്നും ഇറാൻ വ്യക്തമാക്കി. അതേസമയം യുഎസിനോടുള്ള അവിശ്വാസം അവർ വീണ്ടും പ്രകടിപ്പിച്ചു. മുൻപ് ആക്രമണങ്ങളിൽ തകർന്ന ആണവ-മിസൈൽ കേന്ദ്രങ്ങൾ ഇറാൻ പുനർനിർമ്മിക്കുകയോ അറ്റകുറ്റപ്പണികൾ നടത്തുകയോ ചെയ്യുന്നതായി സിഎൻഎൻ, ഇൻസ്റ്റിറ്റ്യൂട്ട് ഫോർ സയൻസ് ആൻഡ് ഇന്റർനാഷണൽ സെക്യൂരിറ്റി എന്നിവ വിശകലനം ചെയ്ത ഉപഗ്രഹ ചിത്രങ്ങൾ സൂചിപ്പിക്കുന്നു. മിഡിൽ ഈസ്റ്റിലെ സംഘർഷങ്ങളും കപ്പൽ ഗതാഗത തടസ്സങ്ങളും ആഗോള ഊർജ്ജ വിപണിയെ എങ്ങനെ ബാധിക്കുമെന്ന് നിക്ഷേപകർ ഉറ്റുനോക്കുന്നതിനാൽ സ്വർണ്ണ, എണ്ണ വിലകളിൽ പ്രകടമായ ചലനങ്ങൾ നിരീക്ഷിക്കപ്പെടുന്നുണ്ട്.

യുഎഇ പ്രവാസികൾ ശ്രദ്ധിക്കുക: വ്യാജ പാസ്‌പോർട്ട്, വിസ അപ്പോയിന്റ്മെന്റ് തട്ടിപ്പുകാർക്കെതിരെ ജാഗ്രതാ നിർദേശം

fake passport visa appointment agencies അബുദാബി / ദുബായ്: യുഎഇയിലെ ഇന്ത്യൻ പാസ്‌പോർട്ട്, വിസ, അറ്റസ്റ്റേഷൻ സേവനങ്ങൾക്കായി അപ്പോയിന്റ്മെന്റ് എടുത്തുനൽകാമെന്ന് അവകാശപ്പെട്ട് പൊതുജനങ്ങളെ പറ്റിക്കുന്ന വ്യാജ ഏജൻസികൾക്കും ഇടനിലക്കാർക്കുമെതിരെ കർശന മുന്നറിയിപ്പുമായി ഇന്ത്യൻ നയതന്ത്ര കാര്യാലയങ്ങൾ രംഗത്ത്. എംബസിയുടെയോ കോൺസുലേറ്റിന്റെയോ പേരിൽ അപ്പോയിന്റ്മെന്റ് വാഗ്ദാനം ചെയ്ത് ചില വ്യക്തികളും ഏജൻസികളും നടത്തുന്ന പ്രചാരണങ്ങൾ പൂർണമായും വ്യാജവും അനധികൃതവുമാണെന്ന് അധികൃതർ വ്യക്തമാക്കി. പാസ്‌പോർട്ട്, വീസ സംബന്ധമായ ആവശ്യങ്ങൾക്കായി ആളുകളെ തെറ്റായ വിവരങ്ങൾ നൽകി വഴിതെറ്റിക്കുകയോ, അപ്പോയിന്റ്മെന്റിന്റെ പേരിൽ അമിത തുക ഈടാക്കുകയോ ചെയ്യുന്നതായി ശ്രദ്ധയിൽ പെട്ടാൽ പൊതുജനങ്ങൾ ഉടനടി അബുദാബിയിലെ ഇന്ത്യൻ എംബസിയിലോ ദുബായിലെ കോൺസുലേറ്റിലോ ഔദ്യോഗിക ചാനലുകൾ വഴി വിവരം റിപ്പോർട്ട് ചെയ്യണം. ഇത്തരം തട്ടിപ്പുകളിൽ വീഴാതെ ഔദ്യോഗിക അറിയിപ്പുകളെ മാത്രം ആശ്രയിക്കണമെന്നും പൊതുജനങ്ങൾ ജാഗ്രത പാലിക്കണമെന്നും അധികൃതർ അഭ്യർഥിച്ചു. കോൺസുലർ സേവനങ്ങൾ നൽകിവന്നിരുന്ന ബിഎൽഎസ് ഇന്റർനാഷനൽ, എസ്ജിവീഎസ് ഗ്ലോബൽ എന്നീ പുറംകരാർ ഏജൻസികളുമായുള്ള പങ്കാളിത്തം അവസാനിപ്പിച്ച പശ്ചാത്തലത്തിലാണ് ഈ പുതിയ ജാഗ്രതാ നിർദേശം. ജൂലൈ ഒന്നു മുതൽ ഈ സേവനങ്ങളെല്ലാം അബുദാബിയിലെ ഇന്ത്യൻ എംബസിയും ദുബായിലെ ഇന്ത്യൻ കോൺസുലേറ്റും സ്വന്തം കാര്യാലയങ്ങൾ വഴി നേരിട്ടാണ് കൈകാര്യം ചെയ്യുന്നത്. പാസ്‌പോർട്ട്, വീസ, അറ്റസ്റ്റേഷൻ സേവനങ്ങൾക്കായുള്ള അപ്പോയിന്റ്മെന്റുകൾ ബുക്ക് ചെയ്യുന്നതിന് യാതൊരുവിധ ഫീസും ആർക്കും നൽകേണ്ടതില്ല. പൊതുജനങ്ങൾക്ക് ഔദ്യോഗിക വെബ്‌സൈറ്റ് പോർട്ടൽ വഴി തികച്ചും സൗജന്യമായി നേരിട്ട് അപ്പോയിന്റ്മെന്റുകൾ സ്വന്തമാക്കാവുന്നതാണ്. ഇതിനായി മൂന്നാം കക്ഷികളെയോ മറ്റ് ഏജൻസികളെയോ ചുമതലപ്പെടുത്തിയിട്ടില്ലാത്തതിനാൽ അപ്പോയിന്റ്മെന്റ് ബുക്കിങ്ങിനായി ആർക്കും പണം നൽകരുതെന്നും എംബസി വ്യക്തമാക്കി.

ഭക്ഷണവും സ്പായും വിനോദസൗകര്യങ്ങളും; യാത്രക്കാർക്ക് അത്യുഗ്രന്‍ ഓഫറുമായി ഇത്തിഹാദ് റെയില്‍

etiha l offersഫുജൈറ: ഇത്തിഹാദ് റെയിൽ വഴി ഫുജൈറയിലേക്ക് യാത്ര ചെയ്യുന്നവർക്കായി ഹോട്ടൽ താമസം, ഭക്ഷണം, സ്പാ, വിനോദ സൗകര്യങ്ങൾ എന്നിവയ്ക്ക് പ്രത്യേക ഇളവുകളും ഓഫറുകളും പ്രഖ്യാപിച്ചു. യാത്ര ചെയ്ത ശേഷം സാധുവായ ഇത്തിഹാദ് റെയിൽ ടിക്കറ്റ് ഹാജരാക്കുന്നവർക്കാണ് ഫുജൈറയിലെ പ്രമുഖ ഹോട്ടലുകളിൽ ഈ ആനുകൂല്യങ്ങൾ ലഭിക്കുകയെന്ന് കമ്പനി ഔദ്യോഗിക ഇൻസ്റ്റാഗ്രാം പേജിലൂടെ അറിയിച്ചു. ഫുജൈറയിലെ പ്രമുഖ ഹോട്ടലുകളായ ഡബിൾട്രീ ബൈ ഹിൽട്ടൺ ഫുജൈറ സിറ്റി, ഇന്റർകോണ്ടിനെന്റൽ ഫുജൈറ റിസോർട്ട്, ലെ മെറിഡിയൻ അൽ അഖ ബീച്ച് റിസോർട്ട്, റാഡിസൺ ബ്ലൂ റിസോർട്ട്, ഫെയർമോണ്ട് ഫുജൈറ ബീച്ച് റിസോർട്ട്, ഫുജൈറ റൊട്ടാന റിസോർട്ട് ആൻഡ് സ്പാ, റോയൽ എം ഹോട്ടൽ ബൈ ഗെവാൻ, അൽ ബഹാർ ഹോട്ടൽ ആൻഡ് റിസോർട്ട് തുടങ്ങിയ ഇടങ്ങളിൽ താമസത്തിനും ഭക്ഷണത്തിനും സ്പാ സൗകര്യങ്ങൾക്കും 25 ശതമാനം വരെ വിലക്കിഴിവ് ലഭിക്കും. കൂടാതെ, ഹോട്ടലുകളിലെ ലഭ്യതയ്ക്കനുസരിച്ച് സൗജന്യ റൂം അപ്‌ഗ്രേഡ്, നേരത്തെയുള്ള ചെക്ക്-ഇൻ, വൈകിയുള്ള ചെക്ക്-ഔട്ട് സൗകര്യങ്ങൾ, കുട്ടികൾക്ക് സൗജന്യ താമസവും ഭക്ഷണവും, പൂൾ-ബീച്ച് പ്രവേശനങ്ങൾക്ക് പ്രത്യേക ഇളവുകൾ, ഒന്നിലേറെ ദിവസത്തെ താമസത്തിനുള്ള പാക്കേജുകൾ എന്നിവയും ചില ഹോട്ടലുകൾ വാഗ്ദാനം ചെയ്യുന്നുണ്ട്. ട്രെയിൻ യാത്രക്കാർക്ക് ഫുജൈറയിലെ ടൂറിസം, അതിഥി സൽക്കാര മേഖലകൾ കൂടുതൽ അടുത്തറിയാനും യാത്രാനുഭവം മെച്ചപ്പെടുത്താനും ലക്ഷ്യമിട്ടാണ് ഈ പദ്ധതി. ഓഗസ്റ്റ് 31 വരെയാണ് ഈ ഓഫറുകളിൽ ഭൂരിഭാഗവും ലഭ്യമാകുക.

ഈ വേനൽക്കാലത്ത് ഏറ്റവും വിലകുറഞ്ഞ വിമാന സർവീസുകൾ യുഎഇയിലെ ഈ വിമാനത്താവളത്തില്‍

cheapest flights uae അബുദാബി: യാത്ര പുറപ്പെടുന്നതിന് തൊട്ടടുത്തുള്ള എയർപോർട്ട് തിരഞ്ഞെടുക്കുന്നത് എപ്പോഴും നിങ്ങൾക്ക് ഏറ്റവും കുറഞ്ഞ നിരക്കിലുള്ള ടിക്കറ്റ് നൽകിക്കൊള്ളണമെന്നില്ല. ദുബായ്, അബുദാബി, ഷാർജ എന്നിവിടങ്ങളിൽ നിന്നുള്ള മടക്കയാത്ര വിമാനക്കൂലികൾ പരിശോധിച്ചുകൊണ്ട് ഖലീജ് ടൈംസ് നടത്തിയ വിശകലനത്തിൽ, പുറപ്പെടുന്ന എയർപോർട്ട് മാറ്റുന്നതിലൂടെ മാത്രം യാത്രക്കാർക്ക് ചില റൂട്ടുകളിൽ നൂറുകണക്കിന് ദിർഹം ലാഭിക്കാൻ കഴിയുമെന്ന് കണ്ടെത്തി. ഇന്ത്യ, പാകിസ്ഥാൻ, ഈജിപ്ത്, കൂടാതെ വിനോദസഞ്ചാര കേന്ദ്രങ്ങളായ ഇസ്താംബുൾ, ബാക്കു, ത്ബിലിസി എന്നിവയുൾപ്പെടെയുള്ള 13 ജനപ്രിയ റൂട്ടുകളിലെ ഒരേ യാത്രാ തീയതികളിലെ വിമാനക്കൂലികളാണ് ഇവിടെ താരതമ്യം ചെയ്തത്. പരിശോധിച്ച ഭൂരിഭാഗം ലക്ഷ്യസ്ഥാനങ്ങളിലേക്കും അബുദാബിയാണ് ഏറ്റവും കുറഞ്ഞ നിരക്കുകൾ വാഗ്ദാനം ചെയ്തത്. എന്നാൽ മറ്റ് ചില റൂട്ടുകളിൽ ഷാർജയും ദുബായുമാണ് ഏറ്റവും വിലക്കുറവുള്ളവയായി മാറിയത്. ഒരേ തീയതികളിൽ യാത്ര ചെയ്യുന്ന ഒരു മുതിർന്ന വ്യക്തിക്ക് Booking.com-ൽ ലഭ്യമായ ഏറ്റവും കുറഞ്ഞ റിട്ടേൺ ഇക്കോണമി നിരക്കുകളെ അടിസ്ഥാനമാക്കിയായിരുന്നു ഈ താരതമ്യം. ജൂലൈ 10-നാണ് ഈ വിവരങ്ങൾ തിരഞ്ഞത്. വിമാനക്കൂലികൾ എപ്പോഴും മാറിക്കൊണ്ടിരിക്കുന്നതിനാൽ, ഡിമാൻഡും സീറ്റുകളുടെ ലഭ്യതയും അനുസരിച്ച് വിലയിൽ വ്യത്യാസമുണ്ടാകാം. പല റൂട്ടുകളിലും ഒരു യാത്രക്കാരന് എയർപോർട്ടുകൾ തമ്മിലുള്ള നിരക്കിലെ വ്യത്യാസം നൂറുകണക്കിന് ദിർഹമായിരുന്നു. കുടുംബമായി യാത്ര ചെയ്യുന്നവർക്ക് ഈ ലാഭം ഇതിലും വലുതായിരിക്കും. ഉദാഹരണത്തിന്, ഒരു ടിക്കറ്റിൽ 250 ദിർഹത്തിന്റെ വ്യത്യാസമുണ്ടെങ്കിൽ, നാലംഗ കുടുംബത്തിന് അത് 1,000 ദിർഹത്തിന്റെ ലാഭമായി മാറും. എയർലൈനുകൾ എല്ലാ എയർപോർട്ടുകളിൽ നിന്നും ഒരേ റൂട്ടുകളിലേക്ക് സർവീസ് നടത്താത്തതാണ് ഈ വില വ്യത്യാസത്തിന് പ്രധാന കാരണം. ചില സ്ഥലങ്ങളിലേക്ക് കൂടുതൽ എയർലൈനുകൾ മത്സരിക്കാനുണ്ടാകും, അതേസമയം ബജറ്റ് എയർലൈനുകൾ (കുറഞ്ഞ നിരക്കുള്ള വിമാനങ്ങൾ) പ്രധാനമായും ചില നിർദ്ദിഷ്ട എയർപോർട്ടുകളിൽ നിന്നാണ് സർവീസ് നടത്തുന്നത്. ഇതാണ് തിരഞ്ഞെടുത്ത റൂട്ടുകളിൽ നിരക്ക് കുറയാൻ കാരണം. പരിശോധിച്ച ഭൂരിഭാഗം ഇന്ത്യൻ റൂട്ടുകളിലും അബുദാബിയാണ് ഏറ്റവും കുറഞ്ഞ നിരക്കുകൾ വാഗ്ദാനം ചെയ്തതെന്ന് വിശകലനത്തിൽ കണ്ടെത്തി. മുംബൈയിലേക്കുള്ള മടക്കയാത്ര ടിക്കറ്റിന് അബുദാബിയിൽ നിന്ന് 1,206 ദിർഹം മുതൽ നിരക്കുകൾ ആരംഭിച്ചപ്പോൾ ദുബായിൽ നിന്ന് ഇത് 1,500 ദിർഹത്തിനടുത്തായിരുന്നു. കൊച്ചിയിലേക്ക് അബുദാബിയിൽ നിന്ന് 1,376 ദിർഹം മുതൽ നിരക്കുകൾ ആരംഭിച്ചപ്പോൾ ദുബായിൽ നിന്നുള്ള ഏറ്റവും കുറഞ്ഞ നിരക്ക് 1,959 ദിർഹത്തിനടുത്തായിരുന്നു. എന്നാൽ ഡൽഹി റൂട്ടിൽ ഷാർജയാണ് ഏറ്റവും ലാഭകരമായ ഓപ്ഷനായി മാറിയത്. ഇവിടെ മടക്കയാത്രാ നിരക്ക് 1,171 ദിർഹം മുതൽ ആരംഭിച്ചപ്പോൾ ദുബായ്, അബുദാബി എന്നിവിടങ്ങളിൽ നിന്ന് ഇതിലും ഉയർന്ന നിരക്കായിരുന്നു. ചെന്നൈ, കോഴിക്കോട്, ബംഗളൂരു തുടങ്ങിയ മറ്റ് ഇന്ത്യൻ റൂട്ടുകളിലും അബുദാബി തന്നെയായിരുന്നു ഏറ്റവും കുറഞ്ഞ നിരക്കുകൾ വാഗ്ദാനം ചെയ്തത്. പാകിസ്ഥാൻ റൂട്ടുകളിലെ ചിത്രം വ്യത്യസ്തമായിരുന്നു. കറാച്ചിയിലേക്ക് ഏറ്റവും കുറഞ്ഞ മടക്കയാത്രാ നിരക്ക് ദുബായിൽ നിന്ന് 1,083 ദിർഹം മുതൽ ആരംഭിച്ചപ്പോൾ, ലാഹോറിലേക്ക് ഷാർജയാണ് ഏറ്റവും കുറഞ്ഞ നിരക്ക് (1,450 ദിർഹം മുതൽ) നൽകിയത്. മറ്റ് ജനപ്രിയ ലക്ഷ്യസ്ഥാനങ്ങളിൽ കെയ്‌റോയിലേക്ക് അബുദാബിയാണ് ഏറ്റവും കുറഞ്ഞ നിരക്ക് വാഗ്ദാനം ചെയ്തത്. ജിദ്ദയിലേക്ക് ദുബായിൽ നിന്നായിരുന്നു ഏറ്റവും കുറഞ്ഞ നിരക്ക്—ഇവിടെ മടക്കയാത്രാ നിരക്കുകൾ 1,001 ദിർഹം മുതലാണ് ആരംഭിച്ചത്.