UAE Weather Alert; യുഎഇയിൽ വരും ദിവസങ്ങളിൽ ചൂടിനൊപ്പം മഴയ്ക്കും ശക്തമായ കാറ്റിനും സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. ബുധനാഴ്ച രാജ്യത്തിന്റെ ചില ഉൾനാടൻ പ്രദേശങ്ങളിൽ താപനില 45 ഡിഗ്രി മുതൽ 49 ഡിഗ്രി സെൽഷ്യസ് വരെ ഉയർന്നേക്കാമെന്നാണ് റിപ്പോർട്ടുകൾ സൂചിപ്പിക്കുന്നത്. തീരപ്രദേശങ്ങളിൽ 39 മുതൽ 45 ഡിഗ്രി വരെയും മലയോര മേഖലകളിൽ 33 മുതൽ 38 ഡിഗ്രി വരെയുമായിരിക്കും താപനില അനുഭവപ്പെടുക. അന്തരീക്ഷം ഭാഗികമായി മേഘാവൃതമായിരിക്കുമെങ്കിലും ഉച്ചകഴിഞ്ഞ് രാജ്യത്തിന്റെ കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാൻ സാധ്യതയുണ്ട്. സാധാരണ ഗതിയിൽ കാറ്റ് മിതമായിരിക്കുമെങ്കിലും മഴമേഘങ്ങൾ രൂപപ്പെടുന്നതോടെ കാറ്റിന്റെ വേഗത വർദ്ധിച്ചേക്കാം. ഇത് പൊടിക്കാറ്റിനും ദൂരക്കാഴ്ച കുറയാനും ഇടയാക്കും. ഉൾനാടൻ പ്രദേശങ്ങളിൽ കാറ്റിന്റെ വേഗത മണിക്കൂറിൽ 55 കിലോമീറ്റർ വരെയും തീരപ്രദേശങ്ങളിൽ 45 കിലോമീറ്റർ വരെയും ഉയരാൻ സാധ്യതയുണ്ട്. ബുധനാഴ്ച രാത്രിയും വ്യാഴാഴ്ച പുലർച്ചെയും പടിഞ്ഞാറൻ തീരപ്രദേശങ്ങളിൽ അന്തരീക്ഷ ഈർപ്പം കൂടാനും മൂടൽമഞ്ഞിനും സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു. അതേസമയം അറേബ്യൻ ഗൾഫിലും ഒമാൻ കടലിലും കടൽ ശാന്തമായിരിക്കും. വരും ദിവസങ്ങളിലും രാജ്യത്ത് അസ്ഥിരമായ കാലാവസ്ഥ തുടരാനാണ് സാധ്യത. വ്യാഴാഴ്ചയും കിഴക്കൻ, തെക്കൻ മേഖലകളിൽ മഴ പെയ്തേക്കാം. വെള്ളി മുതൽ ഞായർ വരെ രാജ്യത്തിന്റെ വിവിധ ഭാഗങ്ങളിൽ ഉച്ചകഴിഞ്ഞ് മഴ ലഭിക്കാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രത്തിന്റെ റിപ്പോർട്ടിൽ പറയുന്നു.

യുഎഇയിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

നബിദിനം; യുഎഇയിൽ അവധി പ്രഖ്യാപിച്ച് ഈ എമിറേറ്റ്

UAE Prophet’s Birthday Holiday; നബിദിനത്തോടനുബന്ധിച്ച് അജ്മാനിലെ സർക്കാർ ജീവനക്കാർക്ക് ഓഗസ്റ്റ് 28 വെള്ളിയാഴ്ച പൊതുഅവധി പ്രഖ്യാപിച്ചു. അജ്മാൻ ഗവൺമെന്റ് ഹ്യൂമൻ റിസോഴ്‌സ് ഡിപ്പാർട്ട്‌മെന്റാണ് ഈ ഔദ്യോഗിക അറിയിപ്പ് നൽകിയത്. എമിറേറ്റിലെ എല്ലാ സർക്കാർ വകുപ്പുകൾക്കും സ്ഥാപനങ്ങൾക്കും അവധി ബാധകമായിരിക്കും. അവധിക്ക് ശേഷം ഓഗസ്റ്റ് 31 തിങ്കളാഴ്ചയാണ് ഓഫീസുകൾ വീണ്ടും തുറന്ന് പ്രവർത്തിക്കുക. നബിദിനം പ്രമാണിച്ച് യുഎഇയിലെ പൊതു-സ്വകാര്യ മേഖലകൾക്ക് ഓഗസ്റ്റ് 28 വെള്ളിയാഴ്ച നേരത്തെ തന്നെ അവധി സ്ഥിരീകരിച്ചിരുന്നു. വെള്ളി അവധിയായി ലഭിക്കുന്നതോടെ, ശനിയും ഞായറും വാരാന്ത്യ അവധി ലഭിക്കുന്ന മിക്ക ജീവനക്കാർക്കും തുടർച്ചയായ മൂന്ന് ദിവസത്തെ വിശ്രമം ലഭിക്കും. ഷാർജയിലെ സർക്കാർ ജീവനക്കാർക്ക് നിലവിൽ വെള്ളിയാഴ്ച അവധിയായതിനാൽ ഇത് അവരുടെ പതിവ് അവധി ദിനങ്ങളുടെ ഭാഗമായിരിക്കും. വേനലവധിക്ക് ശേഷം ഓഗസ്റ്റ് 31 തിങ്കളാഴ്ച സ്കൂളുകൾ തുറക്കാനിരിക്കെ ലഭിക്കുന്ന ഈ നീണ്ട വാരാന്ത്യം പ്രവാസികൾക്കും കുടുംബങ്ങൾക്കും വലിയ ആശ്വാസമാകും.നഹിജ്രി കലണ്ടറിലെ റബീനഉൽ അവ്വൽ 12-നാണ് നബിദിനമായി ആചരിക്കുന്നത്. ചന്ദ്രപ്പിറവി നിരീക്ഷിച്ചാണ് യുഎഇയിൽ ഓരോ വർഷവും ഇത്തരം ഇസ്‌ലാമിക അവധി ദിനങ്ങൾ ഔദ്യോഗികമായി നിശ്ചയിക്കുന്നത്. നബിദിനത്തിന് ശേഷം ഈ വർഷം ഇനി വരാനിരിക്കുന്ന വലിയ അവധി ഡിസംബറിലെ യുഎഇ ദേശീയ ദിനത്തോടനുബന്ധിച്ചുള്ളതാണ് (ഈദ് അൽ ഇതിഹാദ്). ഡിസംബർ രണ്ട്, മൂന്ന് തീയതികൾ ബുധൻ, വ്യാഴം ദിവസങ്ങളിൽ വരുന്നതിനാൽ നാല് മുതൽ അഞ്ച് ദിവസം വരെ നീളുന്ന അവധി അന്ന് ലഭിക്കാൻ സാധ്യതയുണ്ട്. 2025 മുതൽ പ്രാബല്യത്തിൽ വന്ന പുതിയ നിയമപ്രകാരം, ആഴ്ചയുടെ മധ്യത്തിൽ വരുന്ന പൊതുഅവധികൾ വാരാന്ത്യത്തോടടുപ്പിച്ച് മാറ്റാൻ യുഎഇ മന്ത്രിസഭയ്ക്ക് അധികാരമുണ്ട്. പെരുന്നാൾ ഒഴികെയുള്ള അവധികൾക്കാണ് ഈ മാറ്റം ബാധകമാകുക. ഇത്തരം തീരുമാനങ്ങൾ വഴി രാജ്യത്തെ താമസക്കാർക്ക് കൂടുതൽ നീണ്ട അവധി ദിനങ്ങൾ ആസ്വദിക്കാൻ സാധിക്കും. ഓരോ ഹിജ്രി മാസത്തിന്റെയും 29-ാം ദിവസം ചന്ദ്രപ്പിറവി നിരീക്ഷിച്ചാണ് മാസപ്പിറവിയും മറ്റ് വിശേഷ ദിവസങ്ങളും ഔദ്യോഗികമായി പ്രഖ്യാപിക്കുന്നത്.