Kuwait Fake Traffic Fine Scams കുവൈത്ത് സിറ്റി: ട്രാഫിക് പിഴകൾ കുടിശ്ശികയുണ്ടെന്ന് കാണിച്ച് വാഹന ഉടമകൾക്ക് ലഭിക്കുന്ന വ്യാജ സന്ദേശങ്ങൾക്കും വെബ്‌സൈറ്റുകൾക്കുമെതിരെ കുവൈറ്റ് ആഭ്യന്തര മന്ത്രാലയം ജാഗ്രതാ നിർദ്ദേശം നൽകി. പിഴകൾ ഉടൻ അടയ്ക്കണമെന്ന് ആവശ്യപ്പെട്ട് തട്ടിപ്പ് സംഘങ്ങൾ അയക്കുന്ന ഇത്തരം സന്ദേശങ്ങളിൽ വീഴരുതെന്ന് മന്ത്രാലയം വ്യക്തമാക്കി. അമിതവേഗത കണ്ടെത്തുന്ന റഡാർ വഴി നിയമലംഘനം പിടിക്കപ്പെട്ടെന്നും 48 മണിക്കൂറിനുള്ളിൽ പിഴ അടച്ചില്ലെങ്കിൽ കൂടുതൽ ശിക്ഷാ നടപടികൾ നേരിടേണ്ടി വരുമെന്നുമാണ് ഇത്തരം സന്ദേശങ്ങളിൽ ഉണ്ടാവുക. ഇതിന് പുറമെ കോടതി നടപടികൾ, കനത്ത പിഴ, ഡ്രൈവിംഗ് ലൈസൻസ് റദ്ദാക്കൽ, വാഹനവുമായി ബന്ധപ്പെട്ട ഔദ്യോഗിക ഇടപാടുകൾക്കുള്ള നിയന്ത്രണം തുടങ്ങിയവ ഭീഷണിപ്പെടുത്തിയും തട്ടിപ്പുകാർ മെസ്സേജുകൾ അയക്കാറുണ്ട്. ഇത്തരത്തിൽ ലഭിക്കുന്ന സന്ദേശങ്ങൾ ഔദ്യോഗികമല്ലെന്നും അപരിചിതമായ സ്രോതസ്സുകളിൽ നിന്നുള്ള ലിങ്കുകളിലോ വെബ്‌സൈറ്റുകളിലോ ക്ലിക്ക് ചെയ്യരുതെന്നും മന്ത്രാലയം ആവശ്യപ്പെട്ടു. ട്രാഫിക് നിയമലംഘനങ്ങൾ പരിശോധിക്കുന്നതിനും പിഴകൾ അടയ്ക്കുന്നതിനും സർക്കാർ അംഗീകരിച്ചിട്ടുള്ള ഔദ്യോഗിക ചാനലുകൾ (ഉദാഹരണത്തിന് സാഹെൽ ആപ്പ് അല്ലെങ്കിൽ മന്ത്രാലയത്തിന്റെ വെബ്‌സൈറ്റ്) മാത്രം ഉപയോഗിക്കുക. യാതൊരു കാരണവശാലും വ്യക്തിഗത വിവരങ്ങളോ ബാങ്ക് വിവരങ്ങളോ സംശയാസ്പദമായ ലിങ്കുകൾ വഴി കൈമാറരുത്. ഇത്തരം തട്ടിപ്പുകളെക്കുറിച്ച് വാഹന ഉടമകൾ അതീവ ജാഗ്രത പാലിക്കണമെന്നും ആഭ്യന്തര മന്ത്രാലയം അറിയിച്ചു.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

കുവൈത്തിൽ അഞ്ഞൂറിലധികം മരുന്നുകൾക്ക് കൂടി വില കുറച്ചു; ഇവയ്ക്ക് ഇനി ചെലവ് കുറയും

medicines price cuts kuwait കുവൈത്ത് സിറ്റി: കുവൈത്തിൽ രോഗികൾക്ക് വലിയ ആശ്വാസം നൽകിക്കൊണ്ട് 517 മരുന്നുകളുടെയും ഫാർമസ്യൂട്ടിക്കൽ ഉൽപ്പന്നങ്ങളുടെയും വില കുറയ്ക്കാൻ ആരോഗ്യ മന്ത്രാലയം തീരുമാനിച്ചു. ആരോഗ്യ മന്ത്രി ഡോ. അഹമ്മദ് അബ്ദുൽ വഹാബ് അൽ അവാദി ഇത് സംബന്ധിച്ച ഔദ്യോഗിക ഉത്തരവ് പുറപ്പെടുവിച്ചു. പുതിയ തീരുമാനത്തോടെ കഴിഞ്ഞ മൂന്ന് വർഷത്തിനിടെ കുവൈറ്റിൽ വില കുറച്ച ആകെ മരുന്നുകളുടെ എണ്ണം 2,760 ആയി ഉയർന്നു. ഇതോടെ ഗൾഫ് സഹകരണ കൗൺസിൽ രാജ്യങ്ങളിൽ ഏറ്റവും കുറഞ്ഞ മരുന്ന് വില കുവൈത്തിലാണെന്ന് മന്ത്രാലയം വ്യക്തമാക്കി.

വില കുറയുന്ന പ്രധാന മരുന്നുകൾ:

ക്യാൻസർ ചികിത്സയ്ക്കുള്ള മരുന്നുകൾ, കൊളസ്ട്രോൾ കുറയ്ക്കാനുള്ള ആധുനിക ഔഷധങ്ങൾ, അപസ്മാരം, അലർജി, വിവിധതരം വേദനസംഹാരികൾ, ആന്റിബയോട്ടിക്സ്, ഫംഗസ് അണുബാധയ്ക്കുള്ള മരുന്നുകൾ, പുകവലി നിർത്താൻ സഹായിക്കുന്ന മരുന്നുകൾ എന്നിവ പുതിയ വിലക്കുറവിന്റെ പട്ടികയിൽ ഉൾപ്പെടുന്നു.

ശാസ്‌ത്രീയമായ പഠനങ്ങൾക്കും അന്താരാഷ്ട്ര-മേഖലാ നിലവാരത്തിലുള്ള വില പരിശോധനകൾക്കും ശേഷമാണ് പുതിയ നിരക്കുകൾ നിശ്ചയിച്ചിരിക്കുന്നത്. മരുന്നുകളുടെ ഗുണനിലവാരത്തിലും ഫലപ്രാപ്തിയിലും വിട്ടുവീഴ്ച ചെയ്യാതെ തന്നെ, രോഗികൾക്ക് മിതമായ നിരക്കിൽ അവ ലഭ്യമാക്കുകയാണ് മന്ത്രാലയത്തിന്റെ ലക്ഷ്യം. വിപണിയിലെ കൃത്യമായ വില നിലവാരം ഉറപ്പാക്കാൻ മരുന്ന് വില നയങ്ങൾ മന്ത്രാലയം നിരന്തരം അവലോകനം ചെയ്തുവരികയാണെന്നും അധികൃതർ അറിയിച്ചു.