Flight Suspension Update Kuwait; പശ്ചിമേഷ്യയിലെ നിലവിലെ സംഘർഷ സാഹചര്യങ്ങളും അനിശ്ചിതത്വവും കണക്കിലെടുത്ത് വിവിധ നഗരങ്ങളിലേക്കുള്ള വിമാന സർവീസുകൾ റദ്ദാക്കുന്നത് പ്രമുഖ വിമാനക്കമ്പനി നീട്ടി. നവംബർ 30 വരെയുള്ള സർവീസുകളാണ് ഇപ്പോൾ റദ്ദാക്കിയിരിക്കുന്നത്. ഡിസംബർ മാസത്തിന് ശേഷമേ സർവീസുകൾ പുനരാരംഭിക്കുന്ന കാര്യം പരിഗണിക്കുകയുള്ളൂ എന്ന് കാഥേ പസഫിക് എയർലൈൻ അറിയിച്ചു. ദുബായ്, റിയാദ് നഗരങ്ങളിലേക്കുള്ള വിമാനങ്ങളാണ് നിലവിൽ റദ്ദാക്കിയിരിക്കുന്നത്. മേഖലയിലെ ഏറ്റവും പുതിയ സംഭവവികാസങ്ങളുടെ പശ്ചാത്തലത്തിലാണ് ഈ തീരുമാനമെന്ന് എയർലൈൻ വ്യക്തമാക്കി. സർവീസുകൾ റദ്ദാക്കിയത് മൂലം ടിക്കറ്റ് ബുക്ക് ചെയ്ത യാത്രക്കാർക്ക് തുക തിരികെ നൽകുക, അല്ലെങ്കിൽ മറ്റ് റൂട്ടുകളിലേക്ക് ടിക്കറ്റ് മാറ്റുക തുടങ്ങിയ ഓപ്ഷനുകൾ ലഭ്യമാണെന്നും കമ്പനി അറിയിച്ചു. ഈ വർഷം ഫെബ്രുവരി മുതൽ കമ്പനി ഈ റൂട്ടുകളിൽ ഭാഗികമായി സർവീസുകൾ നിർത്തിവെച്ചിരുന്നു. സെപ്റ്റംബറിൽ പുനരാരംഭിക്കുമെന്ന് ആദ്യം അറിയിച്ചിരുന്നെങ്കിലും പിന്നീട് അത് ഒക്ടോബറിലേക്കും ഇപ്പോൾ നവംബർ അവസാനത്തേക്കും നീട്ടുകയായിരുന്നു. ചരക്ക് വിമാന സർവീസുകളും തൽക്കാലം പുനരാരംഭിക്കില്ല. മേഖലയിലെ സാഹചര്യം നിരന്തരം നിരീക്ഷിച്ചുവരികയാണെന്നും സുരക്ഷിതമായ സാഹചര്യം ഒരുങ്ങിയാൽ മാത്രമേ സർവീസുകൾ വീണ്ടും ആരംഭിക്കുകയുള്ളൂ എന്നും അധികൃതർ വ്യക്തമാക്കി. അതേസമയം, എമിറേറ്റ്സ്, ഖത്തർ എയർവേയ്‌സ് തുടങ്ങിയ മറ്റ് ചില അന്താരാഷ്ട്ര വിമാനക്കമ്പനികൾ ഈ മേഖലകളിലേക്ക് നിലവിൽ സർവീസുകൾ തുടരുന്നുണ്ട്.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

യുദ്ധഭീതി: കുവൈത്തിൽ മിസൈൽ ആക്രമണ ശ്രമം; ഗൾഫിൽ വിമാന സർവീസുകൾ താളംതെറ്റി

Kuwait Flight Delays; പശ്ചിമേഷ്യൻ സംഘർഷം രൂക്ഷമായതോടെ ഗൾഫ് മേഖലയിൽ വിമാന സർവീസുകൾ വൻതോതിൽ തടസ്സപ്പെടുന്നു. രണ്ടു ദിവസത്തെ കടുത്ത പോരാട്ടത്തിന് നേരിയ ശമനമുണ്ടായെങ്കിലും ആശങ്ക ഒഴിയുന്നില്ല. അതിരാവിലെ കുവൈത്തിലെ യുഎസ് സേനാതാവളത്തിന് നേരെ മിസൈൽ, ഡ്രോൺ ആക്രമണങ്ങളുണ്ടായെങ്കിലും കുവൈത്ത് സേന ഇവ ആകാശത്തുവെച്ച് തന്നെ വിജയകരമായി പ്രതിരോധിച്ചു. സംഘർഷം കടുത്തതോടെ ആഗോള വിപണിയിൽ എണ്ണവില കുതിച്ചുയരുകയാണ്. ബ്രെന്റ് ക്രൂഡ് വില ബാരലിന് 97.2 ഡോളറിലെത്തി. ഒരാഴ്ചയ്ക്കിടെ ആറ് ശതമാനത്തിന്റെ വർധനവാണ് രേഖപ്പെടുത്തിയത്. ഹോർമുസ് കടലിടുക്കിലൂടെയുള്ള കപ്പൽ ഗതാഗതവും ഗണ്യമായി കുറഞ്ഞു. സംഭവത്തിൽ യുഎസ് പ്രസിഡന്റ് ഡോണൾഡ് ട്രംപ് യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി ഫോണിൽ ചർച്ച നടത്തി. യുദ്ധസാഹചര്യം കാരണം കേരളത്തിലേതടക്കമുള്ള വിമാന സർവീസുകളെ ബാധിച്ചു. യുഎഇ, കുവൈത്ത്, ബഹ്‌റൈൻ എന്നിവിടങ്ങളിൽ നിന്നുള്ള വിമാനങ്ങൾ മണിക്കൂറുകളോളം വൈകിയാണ് സർവീസ് നടത്തുന്നത്.

• യുഎഇ: അബുദാബി, ദുബായ് എന്നിവിടങ്ങളിൽ നിന്നുള്ള വിമാനങ്ങൾ പലതും ഷെഡ്യൂൾ തെറ്റി. എമിറേറ്റ്സിന്റെ ബെംഗളൂരു, ഹൈദരാബാദ് സർവീസുകൾ വൈകി.
• കേരള സർവീസുകൾ: കൊച്ചിയിൽ നിന്നുള്ള എയർ ഇന്ത്യ എക്സ്പ്രസ്, സ്പൈസ് ജെറ്റ് എന്നിവ വൈകിയാണ് പുറപ്പെട്ടത്. കണ്ണൂർ, കോഴിക്കോട് എന്നിവിടങ്ങളിൽ നിന്നുള്ള എയർ ഇന്ത്യ എക്സ്പ്രസ് വിമാനങ്ങളും സമയക്രമം പാലിക്കാനായില്ല.
• മറ്റ് രാജ്യങ്ങൾ: കുവൈത്ത് എയർവേയ്‌സിന്റെ കൊച്ചി സർവീസും ബഹ്‌റൈനിൽ നിന്നുള്ള വിവിധ സർവീസുകളും താളംതെറ്റിയ നിലയിലാണ്.

ഇറാനും ഇസ്രയേലും നിലപാട് കടുപ്പിച്ചതോടെ പശ്ചിമേഷ്യൻ മേഖല വരും ദിവസങ്ങളിലും കനത്ത ജാഗ്രതയിലായിരിക്കും. വിമാനങ്ങൾ വൈകുന്നത് പ്രവാസികളടക്കമുള്ള ആയിരക്കണക്കിന് യാത്രക്കാരെയാണ് ദുരിതത്തിലാഴ്ത്തിയിരിക്കുന്നത്.