Diesel theft telecom towers Kuwait കുവൈത്ത് സിറ്റി: ജാബർ അൽ അഹ്മദ് മേഖലയിലെ ടെലികമ്മ്യൂണിക്കേഷൻ ടവറുകളിൽ നിന്ന് ഡീസൽ മോഷ്ടിക്കുകയും നശീകരണ പ്രവർത്തനങ്ങൾ നടത്തുകയും ചെയ്തെന്ന കേസിൽ നാല് ഇന്ത്യൻ പ്രവാസികളെ കുവൈത്ത് അധികൃതർ അറസ്റ്റ് ചെയ്തു. സംഭവവുമായി ബന്ധപ്പെട്ട നാല് കേസുകൾ കണ്ടെത്തിയതായി ആഭ്യന്തര മന്ത്രാലയം അറിയിച്ചു. ക്രിമിനൽ സെക്യൂരിറ്റി സെക്ടറിന് കീഴിലെ ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷനിലെ ക്യാപിറ്റൽ ഗവർണറേറ്റ് ഇൻവെസ്റ്റിഗേഷൻ വിഭാഗമാണ് പ്രതികളെ പിടികൂടിയത്. ആധുനിക സാങ്കേതികവിദ്യ ഉപയോഗിച്ചുള്ള അന്വേഷണവും ടെലികോം ടവറുകളിലെ നിരീക്ഷണം ശക്തമാക്കിയതുമാണ് പ്രതികളെ തിരിച്ചറിയാൻ സഹായിച്ചത്. ടെലികമ്മ്യൂണിക്കേഷൻ ടവറുകളുടെ അറ്റകുറ്റപ്പണികൾക്കായി കരാർ നേടിയ കമ്പനിയിലെ ജീവനക്കാരാണ് അറസ്റ്റിലായ നാലുപേരെന്നും അന്വേഷണത്തിൽ കണ്ടെത്തി. ജോലിയുടെ ഭാഗമായി ലഭിച്ച അവസരം മുതലെടുത്ത് ടവറുകൾക്കായി അനുവദിച്ച അളവിൽ കൂടുതൽ ഡീസൽ കൈവശപ്പെടുത്തി മോഷണം നടത്തിയെന്നാണ് ആരോപണം. അധികമായി ലഭിച്ച ഡീസിലിന്റെ ഒരു ഭാഗം മറ്റ് ടവറുകളിലെ കുറവ് നികത്താൻ ഉപയോഗിക്കുകയും ശേഷിക്കുന്ന ഡീസൽ മോഷ്ടിച്ച് വിൽക്കുകയും ചെയ്തതായി ആഭ്യന്തര മന്ത്രാലയം വ്യക്തമാക്കി. ചോദ്യം ചെയ്യലിനിടെ കഴിഞ്ഞ രണ്ട് വർഷമായി വിവിധ പ്രദേശങ്ങളിൽ സമാനമായ മോഷണങ്ങളും നശീകരണ പ്രവർത്തനങ്ങളും നടത്തിയതായി പ്രതികൾ സമ്മതിച്ചതായും അധികൃതർ അറിയിച്ചു. മറ്റ് ഗവർണറേറ്റുകളിൽ റിപ്പോർട്ട് ചെയ്ത സമാന സംഭവങ്ങളുമായും ഇവർക്ക് ബന്ധമുണ്ടെന്ന് അന്വേഷണത്തിൽ കണ്ടെത്തിയിട്ടുണ്ട്. കേസിൽ അന്വേഷണം തുടരുകയാണ്. തുടർ നിയമനടപടികൾക്കായി പ്രതികളെ ബന്ധപ്പെട്ട അധികൃതർക്ക് കൈമാറുന്നതിനുള്ള നടപടികൾ പുരോഗമിക്കുകയാണ്.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

കുവൈത്തിൽ മയക്കുമരുന്ന് കേസിൽ മൂന്ന് പേർ അറസ്റ്റിൽ; സ്വർണവും ആഡംബര വാച്ചുകളും പിടിച്ചെടുത്തു

drug case Kuwait gold seized കുവൈത്ത് സിറ്റി: മയക്കുമരുന്നുകളും സൈക്കോട്രോപിക് ഗുളികകളും മദ്യവും വിൽപ്പനയ്ക്കും വ്യക്തിഗത ഉപയോഗത്തിനുമായി കൈവശം വെച്ചെന്ന കേസിൽ മൂന്ന് പേരെ കുവൈത്ത് ജനറൽ ഡയറക്ടറേറ്റ് ഫോർ ഡ്രഗ് കൺട്രോൾ അറസ്റ്റ് ചെയ്തു. പ്രതികളെ കേന്ദ്രീകരിച്ച് നടത്തിയ നിരീക്ഷണത്തിനും വിശദമായ അന്വേഷണത്തിനും ശേഷമാണ് അറസ്റ്റ്. അനധികൃത ഇടപാടുകളിലൂടെ ലഭിച്ച പണം മറച്ചുവയ്ക്കുന്നതിനായി അതിന്റെ ഒരു ഭാഗം സ്വർണമായും വിലകൂടിയ ആഡംബര വാച്ചുകളായും മാറ്റിയതായി അന്വേഷണത്തിൽ കണ്ടെത്തിയതായി ആഭ്യന്തര മന്ത്രാലയം അറിയിച്ചു. പ്രതികളിൽ നിന്ന് 120 ലിറിക്ക ക്യാപ്സൂളുകൾ, 150 ഗ്രാം ലിറിക്ക പൗഡർ, 60 സൈക്കോട്രോപിക് ഗുളികകൾ, മൂന്ന് കുപ്പി മദ്യം, ഒരു ഡിജിറ്റൽ തൂക്കയന്ത്രം എന്നിവ പിടിച്ചെടുത്തു. കൂടാതെ, അനധികൃത വിൽപ്പനയിലൂടെ ലഭിച്ചതായി കരുതുന്ന 40,000 കുവൈത്ത് ദിനാർ പണവും അധികൃതർ കണ്ടെടുത്തു. ഏകദേശം 50,000 ദിനാർ വിലമതിക്കുന്ന നാല് ആഡംബര വാച്ചുകളും ഏകദേശം 3.11 ലക്ഷം കുവൈത്ത് ദിനാർ വിലവരുന്ന ഏഴ് കിലോഗ്രാം സ്വർണവും പിടിച്ചെടുത്തവയിൽ ഉൾപ്പെടുന്നു. മയക്കുമരുന്ന്, മദ്യവ്യാപാരത്തിലൂടെ ലഭിച്ച അനധികൃത വരുമാനം ഉപയോഗിച്ചാണ് ഇവ വാങ്ങിയതെന്നാണ് അധികൃതരുടെ കണ്ടെത്തൽ. മയക്കുമരുന്ന് വ്യാപാരം തടയുന്നതിനൊപ്പം അതിലൂടെ ലഭിക്കുന്ന അനധികൃത സമ്പാദ്യത്തിന്റെ ഉറവിടവും പണം മറച്ചുവയ്ക്കാൻ സ്വീകരിക്കുന്ന മാർഗങ്ങളും കണ്ടെത്തുന്നതിനുള്ള നടപടികൾ ശക്തമായി തുടരുമെന്ന് ആഭ്യന്തര മന്ത്രാലയം വ്യക്തമാക്കി. അറസ്റ്റിലായ മൂന്ന് പേരെയും പിടിച്ചെടുത്ത വസ്തുക്കളോടൊപ്പം തുടർ നിയമനടപടികൾക്കായി ബന്ധപ്പെട്ട അധികൃതർക്ക് കൈമാറി.