Kuwait Private Clinic Closure; കുവൈത്തിൽ ആരോഗ്യ സുരക്ഷാ നിയമങ്ങളും ലൈസൻസ് വ്യവസ്ഥകളും ലംഘിച്ച നാല് സ്വകാര്യ ക്ലിനിക്കുകൾക്കെതിരെ കർശന നടപടിയുമായി ആരോഗ്യ മന്ത്രാലയം. മന്ത്രാലയത്തിന് കീഴിലുള്ള ഹെൽത്ത് ലൈസൻസിങ് വിഭാഗം നടത്തിയ പരിശോധനകൾക്കും ഓഡിറ്റിംഗിനും പിന്നാലെയാണ് ഈ ക്ലിനിക്കുകൾ അടച്ചുപൂട്ടാൻ ഉത്തരവിട്ടത്. സ്വകാര്യ ആരോഗ്യ മേഖലയിലെ സേവനങ്ങളുടെ ഗുണനിലവാരം ഉറപ്പുവരുത്തുന്നതിനും നിയമലംഘനങ്ങൾ തടയുന്നതിനുമായി മന്ത്രാലയം നടത്തിവരുന്ന പരിശോധനകളുടെ ഭാഗമായാണ് ഈ നടപടി. പരിശോധനയിൽ ഗുരുതരമായ ക്രമക്കേടുകളാണ് കണ്ടെത്തിയത്. ഇതിൽ ഒരു സ്വകാര്യ ക്ലിനിക്കിന്റെ ലൈസൻസ് പൂർണ്ണമായും റദ്ദാക്കി. ഈ ക്ലിനിക്കിന്റെ ലൈസൻസ് ഉപയോഗിച്ച് മറ്റൊരു മൂന്നാം കക്ഷി സ്ഥാപനത്തിൽ നിക്ഷേപം നടത്തുകയും ചൂഷണം ചെയ്യുകയും ചെയ്തതായി കണ്ടെത്തിയിരുന്നു. ഇത് രാജ്യത്തെ നിയമങ്ങളുടെ നഗ്നമായ ലംഘനമാണെന്ന് മന്ത്രാലയം ചൂണ്ടിക്കാട്ടി. ഹെൽത്ത് ലൈസൻസുകൾ അനധികൃതമായി മറ്റൊരാൾക്ക് മറിച്ചുനൽകുന്നതിനോ, മൂന്നാം കക്ഷികളെ നിക്ഷേപം നടത്താൻ അനുവദിക്കുന്നതിനോ യാതൊരു വിട്ടുവീഴ്ചയും ഉണ്ടാകില്ലെന്ന് ആരോഗ്യ മന്ത്രാലയം വ്യക്തമാക്കി. നിയമം ലംഘിക്കുന്ന സ്ഥാപനങ്ങൾക്കെതിരെ കർശനമായ നിയമനടപടികൾ തുടരും. സ്വകാര്യ ആരോഗ്യ കേന്ദ്രങ്ങളുടെ മേൽനോട്ടം ശക്തമാക്കുന്നതിലൂടെ രോഗികളുടെ അവകാശങ്ങൾ സംരക്ഷിക്കാനും മികച്ചതും സുരക്ഷിതവുമായ ചികിത്സാ സേവനങ്ങൾ ഉറപ്പാക്കാനുമാണ് ഇത്തരം നടപടികളിലൂടെ ലക്ഷ്യമിടുന്നതെന്ന് കുവൈത്ത് ആരോഗ്യ മന്ത്രാലയം പ്രസ്താവനയിൽ അറിയിച്ചു.
കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക
യുദ്ധഭീതി: കുവൈത്തിൽ മിസൈൽ ആക്രമണ ശ്രമം; ഗൾഫിൽ വിമാന സർവീസുകൾ താളംതെറ്റി
Kuwait Flight Delays; പശ്ചിമേഷ്യൻ സംഘർഷം രൂക്ഷമായതോടെ ഗൾഫ് മേഖലയിൽ വിമാന സർവീസുകൾ വൻതോതിൽ തടസ്സപ്പെടുന്നു. രണ്ടു ദിവസത്തെ കടുത്ത പോരാട്ടത്തിന് നേരിയ ശമനമുണ്ടായെങ്കിലും ആശങ്ക ഒഴിയുന്നില്ല. അതിരാവിലെ കുവൈത്തിലെ യുഎസ് സേനാതാവളത്തിന് നേരെ മിസൈൽ, ഡ്രോൺ ആക്രമണങ്ങളുണ്ടായെങ്കിലും കുവൈത്ത് സേന ഇവ ആകാശത്തുവെച്ച് തന്നെ വിജയകരമായി പ്രതിരോധിച്ചു. സംഘർഷം കടുത്തതോടെ ആഗോള വിപണിയിൽ എണ്ണവില കുതിച്ചുയരുകയാണ്. ബ്രെന്റ് ക്രൂഡ് വില ബാരലിന് 97.2 ഡോളറിലെത്തി. ഒരാഴ്ചയ്ക്കിടെ ആറ് ശതമാനത്തിന്റെ വർധനവാണ് രേഖപ്പെടുത്തിയത്. ഹോർമുസ് കടലിടുക്കിലൂടെയുള്ള കപ്പൽ ഗതാഗതവും ഗണ്യമായി കുറഞ്ഞു. സംഭവത്തിൽ യുഎസ് പ്രസിഡന്റ് ഡോണൾഡ് ട്രംപ് യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനുമായി ഫോണിൽ ചർച്ച നടത്തി. യുദ്ധസാഹചര്യം കാരണം കേരളത്തിലേതടക്കമുള്ള വിമാന സർവീസുകളെ ബാധിച്ചു. യുഎഇ, കുവൈത്ത്, ബഹ്റൈൻ എന്നിവിടങ്ങളിൽ നിന്നുള്ള വിമാനങ്ങൾ മണിക്കൂറുകളോളം വൈകിയാണ് സർവീസ് നടത്തുന്നത്.
- യുഎഇ: അബുദാബി, ദുബായ് എന്നിവിടങ്ങളിൽ നിന്നുള്ള വിമാനങ്ങൾ പലതും ഷെഡ്യൂൾ തെറ്റി. എമിറേറ്റ്സിന്റെ ബെംഗളൂരു, ഹൈദരാബാദ് സർവീസുകൾ വൈകി.
- കേരള സർവീസുകൾ: കൊച്ചിയിൽ നിന്നുള്ള എയർ ഇന്ത്യ എക്സ്പ്രസ്, സ്പൈസ് ജെറ്റ് എന്നിവ വൈകിയാണ് പുറപ്പെട്ടത്. കണ്ണൂർ, കോഴിക്കോട് എന്നിവിടങ്ങളിൽ നിന്നുള്ള എയർ ഇന്ത്യ എക്സ്പ്രസ് വിമാനങ്ങളും സമയക്രമം പാലിക്കാനായില്ല.
- മറ്റ് രാജ്യങ്ങൾ: കുവൈത്ത് എയർവേയ്സിന്റെ കൊച്ചി സർവീസും ബഹ്റൈനിൽ നിന്നുള്ള വിവിധ സർവീസുകളും താളംതെറ്റിയ നിലയിലാണ്.
ഇറാനും ഇസ്രയേലും നിലപാട് കടുപ്പിച്ചതോടെ പശ്ചിമേഷ്യൻ മേഖല വരും ദിവസങ്ങളിലും കനത്ത ജാഗ്രതയിലായിരിക്കും. വിമാനങ്ങൾ വൈകുന്നത് പ്രവാസികളടക്കമുള്ള ആയിരക്കണക്കിന് യാത്രക്കാരെയാണ് ദുരിതത്തിലാഴ്ത്തിയിരിക്കുന്നത്.
