Kuwait Unlicensed Products കുവൈത്ത് സിറ്റി: വാണിജ്യ തട്ടിപ്പ് നിയമം ലംഘിച്ച് ഉൽപന്നങ്ങളുടെ ലേബലുകളും കാലാവധി തീയതികളും മാറ്റിയിരുന്ന ഗോഡൗൺ കണ്ടെത്തി പരിശോധനാ സംഘം നൂറുകണക്കിന് ലൈസൻസില്ലാത്ത സൗന്ദര്യവർധക ഉൽപന്നങ്ങളും മെഡിക്കൽ ക്രീമുകളും പിടിച്ചെടുത്തു. നിരീക്ഷണവും രഹസ്യാന്വേഷണവും ശക്തമാക്കിയതിനെ തുടർന്നാണ് ക്യാപിറ്റൽ ഗവർണറേറ്റിലെ ഗോഡൗൺ കണ്ടെത്തിയത്. ഇവിടെ നിന്ന് 411 ലൈസൻസില്ലാത്ത സൗന്ദര്യവർധക ഉൽപന്നങ്ങളും മെഡിക്കൽ ക്രീമുകളും, കൂടാതെ 3,500 ലേബലുകളും അധികൃതർ പിടിച്ചെടുത്തു. ഗോഡൗണിലെ തൊഴിലാളികൾ ഉൽപന്നങ്ങളുടെ തരം, കാലാവധി തീയതി തുടങ്ങിയ വിവരങ്ങൾ ഉൾപ്പെടുന്ന ലേബലുകൾ മാറ്റി പുതിയവ പതിപ്പിച്ച് ഉപഭോക്താക്കളെ തെറ്റിദ്ധരിപ്പിക്കാൻ ശ്രമിച്ചതായി അന്വേഷണത്തിൽ കണ്ടെത്തി. ഈ പ്രവൃത്തി 2019-ലെ നിയമം നമ്പർ 20 പ്രകാരമുള്ള ജിസിസി ഏകീകൃത വാണിജ്യ തട്ടിപ്പ് വിരുദ്ധ നിയമത്തിലെ ആർട്ടിക്കിൾ 2 (ഖണ്ഡിക 2) ലംഘിക്കുന്നതാണെന്ന് അധികൃതർ വ്യക്തമാക്കി. ഗോഡൗണിനെതിരെ നിയമലംഘന റിപ്പോർട്ട് തയ്യാറാക്കിയതായും സംഭവത്തിൽ ഉത്തരവാദികളായവർക്കെതിരെ നിയമനടപടികൾ ആരംഭിച്ചതായും അധികൃതർ അറിയിച്ചു. വാണിജ്യ തട്ടിപ്പുകൾ തടയുന്നതിനും ഉപഭോക്താക്കളുടെ സുരക്ഷ ഉറപ്പാക്കുന്നതിനും വിപണിയിൽ വിൽക്കുന്ന ഉൽപന്നങ്ങൾ ആരോഗ്യ-സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തുന്നതിനുമായി പരിശോധനകൾ കൂടുതൽ ശക്തമാക്കുമെന്ന് അധികൃതർ ആവർത്തിച്ചു.

കുവൈത്തിൽ ഡിജിറ്റൽ ഒപ്പ് നിർബന്ധത്തിലേക്ക്; സർക്കാർ-ബാങ്കിങ് സേവനങ്ങൾ ഇനി കൂടുതൽ എളുപ്പത്തിൽ

Kuwaitis Expats Digital Signature കുവൈത്ത് സിറ്റി: സർക്കാർ സേവനങ്ങളും ബാങ്കിങ് ഇടപാടുകളും കൂടുതൽ വേഗത്തിലും സുരക്ഷിതമായും ലഭ്യമാക്കുന്നതിനായി അംഗീകൃത ഡിജിറ്റൽ ഒപ്പ് (സജീവമാക്കാൻ കുവൈത്തികളോടും പ്രവാസികളോടും നീതിന്യായ മന്ത്രാലയവും പബ്ലിക് അതോറിറ്റി ഫോർ സിവിൽ ഇൻഫർമേഷനും അഭ്യർഥിച്ചു. തിങ്കളാഴ്ച പുറത്തിറക്കിയ സംയുക്ത പ്രസ്താവനയിൽ, സർക്കാർ സേവനങ്ങൾ ലളിതമാക്കുകയും ഡിജിറ്റൽ സംവിധാനങ്ങൾ കൂടുതൽ കാര്യക്ഷമമാക്കുകയും ചെയ്യുന്നതിനുള്ള സംയുക്ത നീക്കങ്ങളുടെ ഭാഗമായാണ് ഈ പദ്ധതി നടപ്പാക്കുന്നതെന്ന് അധികൃതർ അറിയിച്ചു. ഡിജിറ്റൽ ഒപ്പ് ഉപയോഗിച്ച് പേപ്പർ രേഖകളിൽ ഒപ്പിടുകയോ ഓഫീസുകളിൽ നേരിട്ട് ഹാജരാകുകയോ ചെയ്യാതെ തന്നെ മൊബൈൽ ഫോണിലൂടെയോ മറ്റ് ഡിജിറ്റൽ ഉപകരണങ്ങളിലൂടെയോ രേഖകളും ഇടപാടുകളും നിയമപരമായി അംഗീകരിക്കാൻ സാധിക്കും. നിലവിലെ നിയമങ്ങൾക്കും ചട്ടങ്ങൾക്കും അനുസൃതമായി ഈ ഡിജിറ്റൽ ഒപ്പിന് പൂർണ നിയമസാധുതയുണ്ടെന്നും അധികൃതർ വ്യക്തമാക്കി. നീതിന്യായ മന്ത്രാലയം ഉടൻ ആരംഭിക്കുന്ന ഓൺലൈൻ നോട്ടറി സേവനങ്ങൾ, പവർ ഓഫ് അറ്റോർണി നൽകൽ, റദ്ദാക്കൽ തുടങ്ങിയ സേവനങ്ങൾ ഡിജിറ്റൽ ഒപ്പിലൂടെ ലഭ്യമാകും. കൂടാതെ, കമ്പനികളും സ്ഥാപനങ്ങളും രജിസ്റ്റർ ചെയ്യൽ, വാണിജ്യ മന്ത്രാലയത്തിലെ ലൈസൻസിങ് നടപടികൾ, ചില ബാങ്കിങ് ഇടപാടുകൾ, കരാർ ഒപ്പിടൽ എന്നിവയും ഇനി നേരിട്ട് ഓഫീസുകളിൽ പോകാതെ ഓൺലൈനായി പൂർത്തിയാക്കാനാകും. കുവൈത്ത് പൗരന്മാർക്ക് “My Kuwait ID” ആപ്ലിക്കേഷൻ വഴിയോ സ്വയംസേവന (Self-service) കിയോസ്‌കുകൾ വഴിയോ ഡിജിറ്റൽ ഒപ്പ് സജീവമാക്കാം. പ്രവാസികൾക്ക് രാജ്യത്തെ വിവിധ കേന്ദ്രങ്ങളിൽ സ്ഥാപിച്ചിരിക്കുന്ന സ്വയംസേവന ഉപകരണങ്ങൾ ഉപയോഗിച്ച് രജിസ്ട്രേഷൻ പൂർത്തിയാക്കാം. നിലവിലുള്ളതും ഭാവിയിൽ ആരംഭിക്കുന്നതുമായ ഡിജിറ്റൽ സർക്കാർ-ബാങ്കിങ് സേവനങ്ങൾ എളുപ്പത്തിലും സുരക്ഷിതമായും പ്രയോജനപ്പെടുത്താൻ എല്ലാവരും എത്രയും വേഗം ഡിജിറ്റൽ ഒപ്പ് സജീവമാക്കണമെന്ന് നീതിന്യായ മന്ത്രാലയവും PACIയും അഭ്യർഥിച്ചു.