Dubai gas cylinder blast ദുബായ്: ഷെയ്ഖ് സായിദ് റോഡിന് സമീപത്തെ കാർ ഷോറൂമിൽ ഉണ്ടായ ഗ്യാസ് സിലിണ്ടർ സ്ഫോടനത്തിൽ മലയാളി യുവാവ് മരിച്ചതിന് പിന്നാലെ, ദുരന്തത്തിന്‍റെ നടുകുന്ന നിമിഷങ്ങള്‍ പങ്കുവെച്ച് സഹപ്രവര്‍ത്തകര്‍. കൊല്ലം കൊട്ടാരക്കര സ്വദേശി ഷിജിൻ പോൾ (27) ആണ് മരിച്ചത്. ഇന്ത്യൻ പൗരനായ ഷിജിന്‍റെ മരണവിവരം ദുബായിലെ ഇന്ത്യൻ കോൺസുലേറ്റ് സ്ഥിരീകരിച്ചു. മൃതദേഹം നാട്ടിലെത്തിക്കുന്നതിനുള്ള നടപടികൾ പൂർത്തിയാക്കാൻ കുടുംബാംഗങ്ങളുമായും പ്രാദേശിക അധികൃതരുമായും കോൺസുലേറ്റ് ബന്ധപ്പെടുന്നുണ്ടെന്നും അറിയിച്ചു. ഷോറൂമിലെ സോഷ്യൽ മീഡിയയും വീഡിയോ ചിത്രീകരണവും കൈകാര്യം ചെയ്തിരുന്ന ഷിജിൻ, കഴിഞ്ഞ നവംബറിലാണ് സ്ഥാപനത്തിൽ ജോലിയിൽ പ്രവേശിച്ചത്. ഷിജിനൊപ്പം ഫോട്ടോഗ്രാഫറായി ജോലി ചെയ്യുന്ന അബിദാണ് അപകടസമയത്തെ സംഭവങ്ങൾ പങ്കുവെച്ചത്. “തീപിടിത്തമുണ്ടായതായി സഹപ്രവർത്തകർ അറിയിച്ചതിനെ തുടർന്ന് ഞാനും ഷിജിനും ഉൾപ്പെടെ പലരും ഷോറൂമിന് പുറത്തേക്ക് ഓടി. ഞങ്ങളുടെ സ്ഥാപനത്തിൽ നിന്നുള്ളവർ മാത്രമല്ല, സമീപത്തെ മറ്റ് സ്ഥാപനങ്ങളിലുണ്ടായിരുന്നവരും തീ കണ്ടയുടൻ സഹായത്തിനായി എത്തി,” അബിദ് പറഞ്ഞു. സംഭവസ്ഥലത്ത് എത്തിയപ്പോൾ ഷിജിന് തൊട്ടുപിന്നിലായാണ് താൻ നിന്നിരുന്നതെന്ന് അബിദ് പറഞ്ഞു. “ഞാൻ ഏകദേശം മൂന്ന് മീറ്റർ പിന്നിലായിരുന്നു. സിലിണ്ടർ കൃത്യമായി എവിടെയാണെന്ന് അറിയില്ല. ഷോറൂമിന്റെ ഒരു കോണിലെ ഗേറ്റിന് സമീപത്താണ് തീപിടിത്തമുണ്ടായത്. അടുത്തുള്ള ഓട്ടോ സർവീസ് സ്ഥാപനങ്ങളുടെ ഭാഗത്തായിരുന്നു തീ,” അദ്ദേഹം പറഞ്ഞു. തീപിടിത്തം നിയന്ത്രണവിധേയമാക്കാൻ ആളുകൾ അഗ്നിശമന ഉപകരണങ്ങൾ ഉപയോഗിച്ച് ശ്രമിക്കുന്നതിനിടെയാണ് സ്ഫോടനം ഉണ്ടായതെന്ന് അബിദ് പറഞ്ഞു. “എല്ലാവരും തീ അണയ്ക്കാൻ ശ്രമിക്കുകയായിരുന്നു. അതിനിടെയാണ് സ്ഫോടനം ഉണ്ടായത്. പിന്നാലെ എല്ലാവരും ജീവൻ രക്ഷിക്കാൻ ഓടി.” സ്ഫോടനത്തിന് പിന്നാലെയുള്ള പരിഭ്രാന്തിക്കിടെ ഷിജിനും അപകടത്തിൽപ്പെട്ടതായി തനിക്ക് ഉടൻ മനസ്സിലായില്ലെന്നും പിന്നീട് മരണവിവരം അറിഞ്ഞപ്പോഴാണ് ഞെട്ടലുണ്ടായതെന്നും അബിദ് കൂട്ടിച്ചേർത്തു. സഹപ്രവർത്തകർക്ക് ഏറെ പ്രിയങ്കരനായിരുന്ന ഷിജിൻ ജോലിയിൽ വളരെ സജീവമായിരുന്നുവെന്നും എല്ലാ കാര്യങ്ങളും മികച്ച രീതിയിൽ ഏകോപിപ്പിക്കാറുണ്ടായിരുന്നുവെന്നും അബിദ് അനുസ്മരിച്ചു. ഷിജിന്റെ മുൻ റൂംമേറ്റായ നിസാർ പറഞ്ഞു, ഒരു മാസം മുമ്പ് ഷിജിൻ തനിക്കും മറ്റ് നാല് പേർക്കുമൊപ്പം താമസിച്ചിരുന്നുവെന്നും ഏതാനും ദിവസങ്ങൾക്ക് മുമ്പാണ് ജോലിസ്ഥലത്തേക്ക് യാത്രാസൗകര്യം മെച്ചപ്പെടുത്താൻ മറ്റൊരു താമസസ്ഥലത്തേക്ക് മാറിയതെന്നും. “ജുമൈറയിൽ നിന്ന് ഷോറൂമിലെത്താൻ രണ്ട് ബസുകൾ മാറിക്കയറേണ്ടി വന്നിരുന്നു. ഈ കടുത്ത വേനലിൽ അത് അദ്ദേഹത്തിന് ഏറെ ബുദ്ധിമുട്ടായിരുന്നു. അതിനാലാണ് അടുത്തിടെ മറ്റൊരു താമസസ്ഥലത്തേക്ക് മാറിയത്,” നിസാർ പറഞ്ഞു. 2025-ൽ വിവാഹിതനായ ഷിജിൻ ഭാര്യയെ ഏറെ സ്നേഹിച്ചിരുന്നുവെന്നും ആദ്യ അവധിക്കാലത്ത് നാട്ടിലെത്തി ഭാര്യയെ ദുബായിലേക്ക് കൊണ്ടുവരാനായിരുന്നു അദ്ദേഹത്തിന്റെ ആഗ്രഹമെന്നും നിസാർ ഓർത്തെടുത്തു. എട്ട് വർഷത്തെ പ്രണയത്തിന് ശേഷമാണ് ഇരുവരും വിവാഹിതരായതെന്ന് ഷിജിന്റെ സോഷ്യൽ മീഡിയ പോസ്റ്റുകൾ വ്യക്തമാക്കുന്നു. “ഒരു മാസം മാത്രമാണ് ഞങ്ങളോടൊപ്പം താമസിച്ചത്. എന്നാൽ ആ സമയത്തിനുള്ളിൽ തന്നെ വളരെ അടുത്ത സുഹൃത്തായി മാറി. ഇപ്പോൾ ഞങ്ങളുടെ വാട്‌സ്ആപ്പ് ഗ്രൂപ്പിലെ സംഭാഷണങ്ങളൊന്നും ഷിജിനെക്കുറിച്ചല്ലാതെ മറ്റൊന്നുമല്ല,” നിസാർ പറഞ്ഞു. അതേസമയം, ഷിജിന്റെ മൃതദേഹം നാട്ടിലെത്തിക്കുന്നതിനുള്ള നടപടിക്രമങ്ങൾ പുരോഗമിക്കുകയാണെന്നും രേഖാപരമായ നടപടികൾ പൂർത്തിയാകുന്നതിനായി കുടുംബം കാത്തിരിക്കുകയാണെന്നും ബന്ധുക്കൾക്കൊപ്പമുള്ള അജ്മൽ അറിയിച്ചു.

യുഎഇയിൽ വീട്ടുജോലിക്കാരെ നിയമിക്കാനൊരുങ്ങുന്നവർക്ക് മുന്നറിയിപ്പ്; ഏജൻസി വഴിയോ നേരിട്ടോ? പ്രധാന വ്യത്യാസങ്ങൾ വ്യക്തമാക്കി മന്ത്രാലയം

Hiring domestic workers UAE ദുബായ്: യുഎഇയിൽ വീട്ടുജോലിക്കാരെ നിയമിക്കാൻ പദ്ധതിയിടുന്നവർക്ക് ലൈസൻസുള്ള റിക്രൂട്ട്മെന്റ് ഏജൻസിയിലൂടെ നിയമിക്കുന്നതും നേരിട്ട് നിയമിക്കുന്നതും തമ്മിലുള്ള പ്രധാന വ്യത്യാസങ്ങൾ തൊഴിൽ-എമിററ്റൈസേഷൻ മന്ത്രാലയം വ്യക്തമാക്കി. ഇരു മാർഗങ്ങളും തൊഴിലുടമകൾക്ക് ലഭ്യമാണെങ്കിലും, നിയമപരമായ സംരക്ഷണം, ഉത്തരവാദിത്തങ്ങൾ, ഉറപ്പുകൾ എന്നിവയിൽ കാര്യമായ വ്യത്യാസമുണ്ടെന്ന് മന്ത്രാലയം ചൂണ്ടിക്കാട്ടി. ലൈസൻസുള്ള റിക്രൂട്ട്മെന്റ് ഏജൻസിയിലൂടെ വീട്ടുജോലിക്കാരെ നിയമിക്കുമ്പോൾ, തൊഴിലുടമയും റിക്രൂട്ട്മെന്റ് ഓഫീസും തമ്മിൽ കരാർ ഒപ്പിടുകയും യുഎഇയിലെ ഗാർഹിക തൊഴിലാളി നിയമം പ്രകാരമുള്ള എല്ലാ നിയമപരമായ ആനുകൂല്യങ്ങളും സംരക്ഷണങ്ങളും തൊഴിലുടമയ്ക്ക് ലഭിക്കുകയും ചെയ്യും. അതേസമയം, നേരിട്ടുള്ള നിയമന രീതിയിൽ റിക്രൂട്ട്മെന്റ് ഏജൻസിയുടെ ഇടപെടലില്ലാതെ തൊഴിലുടമ തന്നെ തൊഴിലാളിയെ നിയമിക്കാം. എന്നാൽ ഇതിനായി മന്ത്രാലയം അംഗീകരിച്ച പ്രത്യേക ഉത്തരവാദിത്തപത്രത്തിൽ ഒപ്പുവെച്ച് നിയമനത്തിന്റെ പൂർണ ഉത്തരവാദിത്തവും തൊഴിലുടമ ഏറ്റെടുക്കേണ്ടതുണ്ട്. നേരിട്ടുള്ള നിയമനത്തിന് ഗാർഹിക തൊഴിലാളി നിയമത്തിലെ ഉറപ്പുകളോ നിയമപരമായ ഗ്യാരന്റികളോ ബാധകമല്ലെന്നും, തൊഴിലാളിയുമായി ബന്ധപ്പെട്ട മുൻകാലമോ ഭാവിയിലേതോ ആയ കരാറുകളുടെ അടിസ്ഥാനത്തിൽ തൊഴിലുടമയ്ക്ക് യാതൊരു ഗ്യാരന്റിയും ആവശ്യപ്പെടാനാകില്ലെന്നും മന്ത്രാലയം വ്യക്തമാക്കി. അതേസമയം, റിക്രൂട്ട്മെന്റ് ഏജൻസികൾക്കെതിരായ പരിശോധനകൾ മന്ത്രാലയം ശക്തമാക്കിയിട്ടുണ്ട്. 2026-ന്റെ ആദ്യ പകുതിയിൽ 42 റിക്രൂട്ട്മെന്റ് ഓഫീസുകൾക്കെതിരെ 135 നിയമ-ഭരണപരമായ ലംഘനങ്ങൾ കണ്ടെത്തി പിഴ ചുമത്തിയതായി ജൂലൈ 27-ന് മന്ത്രാലയം അറിയിച്ചിരുന്നു.