Government Housing in Taima കുവൈത്ത് സിറ്റി: ഈസ്റ്റ് തൈമ മേഖലയിലെ സർക്കാർ ഭവനങ്ങൾ തിരിച്ചെടുക്കാനുള്ള പബ്ലിക് അതോറിറ്റി ഫോർ ഹൗസിങ് വെൽഫെയറിന്റെ തീരുമാനത്തിന് കുവൈത്തിലെ അഡ്മിനിസ്ട്രേറ്റീവ് കോടതി അംഗീകാരം നൽകി. നിയമപരമായ സാധുതയില്ലാതെ സർക്കാർ ഉടമസ്ഥതയിലുള്ള ഭവനം കൈവശം വയ്ക്കാൻ താമസക്കാർക്ക് സമ്പൂർണ അവകാശമില്ലെന്ന് കോടതി വ്യക്തമാക്കി. കൗൺസിലർ അബ്ദുൽ അസീസ് അൽ ഖയ്യാത്തിന്റെ അധ്യക്ഷതയിലുള്ള ബെഞ്ചാണ് വിധി പ്രസ്താവിച്ചത്. സർക്കാർ ഭവനം വാടകയ്ക്കോ ഉപയോഗാവകാശത്തിന്റെ അടിസ്ഥാനത്തിലോ ലഭിക്കുന്നത് നിയമം നിശ്ചയിച്ചിട്ടുള്ള വ്യവസ്ഥകൾക്കും ചട്ടങ്ങൾക്കും വിധേയമായ അവകാശമാണെന്നും, അതുമാത്രം കൊണ്ട് ഭവനത്തിൽ സ്വതന്ത്രമായ നിയമപരമായ അവകാശം ലഭിക്കില്ലെന്നും കോടതി നിരീക്ഷിച്ചു. സർക്കാർ ഭവനം തുടർന്നും കൈവശം വയ്ക്കാൻ ഹർജിക്കാരൻ ആശ്രയിച്ചിരുന്ന നിയമപരമായ അടിസ്ഥാനം പിന്നീട് ഇല്ലാതായതായി കോടതി കണ്ടെത്തി. നിലവിലുള്ള നിയമപ്രകാരം സർക്കാർ ഭവനങ്ങൾ വാടകയ്ക്കോ ഉപയോഗാവകാശത്തിന്റെ അടിസ്ഥാനത്തിലോ അനുവദിക്കാൻ ഹൗസിങ് വെൽഫെയർ അതോറിറ്റിക്ക് അധികാരമുണ്ടെന്നും കോടതി വ്യക്തമാക്കി.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

കുവൈത്തിൽ ടെലികോം ടവറുകളിൽ നിന്ന് ഡീസൽ മോഷണം; ഇന്ത്യക്കാര്‍ അറസ്റ്റിൽ

Diesel theft telecom towers Kuwait കുവൈത്ത് സിറ്റി: ജാബർ അൽ അഹ്മദ് മേഖലയിലെ ടെലികമ്മ്യൂണിക്കേഷൻ ടവറുകളിൽ നിന്ന് ഡീസൽ മോഷ്ടിക്കുകയും നശീകരണ പ്രവർത്തനങ്ങൾ നടത്തുകയും ചെയ്തെന്ന കേസിൽ നാല് ഇന്ത്യൻ പ്രവാസികളെ കുവൈത്ത് അധികൃതർ അറസ്റ്റ് ചെയ്തു. സംഭവവുമായി ബന്ധപ്പെട്ട നാല് കേസുകൾ കണ്ടെത്തിയതായി ആഭ്യന്തര മന്ത്രാലയം അറിയിച്ചു. ക്രിമിനൽ സെക്യൂരിറ്റി സെക്ടറിന് കീഴിലെ ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷനിലെ ക്യാപിറ്റൽ ഗവർണറേറ്റ് ഇൻവെസ്റ്റിഗേഷൻ വിഭാഗമാണ് പ്രതികളെ പിടികൂടിയത്. ആധുനിക സാങ്കേതികവിദ്യ ഉപയോഗിച്ചുള്ള അന്വേഷണവും ടെലികോം ടവറുകളിലെ നിരീക്ഷണം ശക്തമാക്കിയതുമാണ് പ്രതികളെ തിരിച്ചറിയാൻ സഹായിച്ചത്. ടെലികമ്മ്യൂണിക്കേഷൻ ടവറുകളുടെ അറ്റകുറ്റപ്പണികൾക്കായി കരാർ നേടിയ കമ്പനിയിലെ ജീവനക്കാരാണ് അറസ്റ്റിലായ നാലുപേരെന്നും അന്വേഷണത്തിൽ കണ്ടെത്തി. ജോലിയുടെ ഭാഗമായി ലഭിച്ച അവസരം മുതലെടുത്ത് ടവറുകൾക്കായി അനുവദിച്ച അളവിൽ കൂടുതൽ ഡീസൽ കൈവശപ്പെടുത്തി മോഷണം നടത്തിയെന്നാണ് ആരോപണം. അധികമായി ലഭിച്ച ഡീസിലിന്റെ ഒരു ഭാഗം മറ്റ് ടവറുകളിലെ കുറവ് നികത്താൻ ഉപയോഗിക്കുകയും ശേഷിക്കുന്ന ഡീസൽ മോഷ്ടിച്ച് വിൽക്കുകയും ചെയ്തതായി ആഭ്യന്തര മന്ത്രാലയം വ്യക്തമാക്കി. ചോദ്യം ചെയ്യലിനിടെ കഴിഞ്ഞ രണ്ട് വർഷമായി വിവിധ പ്രദേശങ്ങളിൽ സമാനമായ മോഷണങ്ങളും നശീകരണ പ്രവർത്തനങ്ങളും നടത്തിയതായി പ്രതികൾ സമ്മതിച്ചതായും അധികൃതർ അറിയിച്ചു. മറ്റ് ഗവർണറേറ്റുകളിൽ റിപ്പോർട്ട് ചെയ്ത സമാന സംഭവങ്ങളുമായും ഇവർക്ക് ബന്ധമുണ്ടെന്ന് അന്വേഷണത്തിൽ കണ്ടെത്തിയിട്ടുണ്ട്. കേസിൽ അന്വേഷണം തുടരുകയാണ്. തുടർ നിയമനടപടികൾക്കായി പ്രതികളെ ബന്ധപ്പെട്ട അധികൃതർക്ക് കൈമാറുന്നതിനുള്ള നടപടികൾ പുരോഗമിക്കുകയാണ്.