Kuwait International Airport; കുവൈത്ത് അന്താരാഷ്ട്ര വിമാനത്താവളത്തിന്റെ വികസന പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും ആഗോളതലത്തിൽ രാജ്യത്തിന്റെ സാന്നിധ്യം ശക്തമാക്കുന്നതിനുമായി കുവൈത്ത് സിവിൽ ഏവിയേഷൻ ഡയറക്ടറേറ്റ് ജനറൽ (ഡി.ജി.സി.എ) അന്താരാഷ്ട്ര വിമാനത്താവള സംഘടനയായ എയർപോർട്ട് കൗൺസിൽ ഇന്റർനാഷണലിൽ (എ.സി.ഐ) അംഗത്വം നേടി. ലോകത്തെ 160-ലധികം രാജ്യങ്ങളിലായി 2,200-ഓളം വിമാനത്താവളങ്ങളെ പ്രതിനിധീകരിക്കുന്ന ആഗോള കൂട്ടായ്മയാണിത്. ഈ അംഗത്വത്തിലൂടെ വിമാനത്താവള നടത്തിപ്പിലെ അന്താരാഷ്ട്ര നിലവാരത്തിലുള്ള മികച്ച മാതൃകകളും വൈദഗ്ധ്യവും കുവൈത്തിന് ലഭ്യമാകുമെന്ന് അധികൃതർ അറിയിച്ചു.
വിമാനത്താവളങ്ങളുടെ സുരക്ഷ, പ്രവർത്തനക്ഷമത, സുസ്ഥിരത, സേവന നിലവാരം എന്നിവ മെച്ചപ്പെടുത്തി യാത്രക്കാർക്ക് മികച്ച അനുഭവം ഉറപ്പാക്കാനാണ് എ.സി.ഐ ലക്ഷ്യമിടുന്നത്. ഇതിന്റെ ഭാഗമാകുന്നതോടെ രാജ്യാന്തര തലത്തിലുള്ള പഠനങ്ങളും ഡാറ്റകളും വിശകലനം ചെയ്യാനും വിവിധ സമിതികളിൽ പങ്കുചേരാനും കുവൈത്തിന് അവസരം ലഭിക്കും. ഡിജിറ്റൽ പരിവർത്തനം, സൈബർ സുരക്ഷ തുടങ്ങിയ ആധുനിക സാങ്കേതികവിദ്യകൾ സ്വായത്തമാക്കുന്നതിനൊപ്പം വ്യോമയാന മേഖലയിലെ സ്വദേശി ജീവനക്കാർക്ക് അന്താരാഷ്ട്ര നിലവാരത്തിലുള്ള പരിശീലനം നൽകാനും ഇതിലൂടെ സാധിക്കും. കുവൈത്ത് വിമാനത്താവളത്തിന്റെ അടിസ്ഥാന സൗകര്യങ്ങൾ നവീകരിക്കാനും ആഗോള വ്യോമയാന വ്യവസായത്തിലെ മാറ്റങ്ങൾക്കൊപ്പം മുന്നേറാനുമുള്ള ഡി.ജി.സി.എയുടെ തന്ത്രപരമായ നീക്കമായാണ് ഈ അംഗത്വത്തെ കാണുന്നത്. അന്താരാഷ്ട്ര തലത്തിലുള്ള സഹകരണം ശക്തമാക്കുന്നതിലൂടെ യാത്രക്കാർക്ക് ലോകോത്തര നിലവാരത്തിലുള്ള സേവനങ്ങൾ ലഭ്യമാക്കാനാണ് സിവിൽ ഏവിയേഷൻ ലക്ഷ്യമിടുന്നത്.

കുവൈത്തിലെ പുതിയ ജോലി അവസരങ്ങൾ പുതിയ അറിയുവാൻ ഇവിടെ ക്ലിക്ക് ചെയ്യുക

കുവൈത്തിൽ ഡ്രൈവിംഗിനിടെ ഫോൺ കൈയിലെടുത്താൽ, പിഴ മാത്രമല്ല… ജയിൽ ശിക്ഷയും

Kuwait Traffic violation penalties;വാഹനമോടിക്കുമ്പോൾ മൊബൈൽ ഫോൺ ഉപയോഗിക്കുന്നവർ ജാഗ്രതൈ! പിടിക്കപ്പെട്ടാൽ 75 ദിനാർ മുതൽ 300 ദിനാർ വരെ പിഴയോ അല്ലെങ്കിൽ തടവ് ശിക്ഷയോ ലഭിക്കുമെന്ന് ആഭ്യന്തര മന്ത്രാലയം മുന്നറിയിപ്പ് നൽകി. ആഭ്യന്തര മന്ത്രാലയത്തിലെ സെക്യൂരിറ്റി മീഡിയ ഡിപ്പാർട്ട്‌മെന്റ് ടെലിവിഷൻ വിഭാഗം തലവൻ ലെഫ്റ്റനന്റ് കേണൽ ഷഹീൻ അൽ-ഗരീബ് ആണ് ഇക്കാര്യം വ്യക്തമാക്കിയത്. പുതിയ ട്രാഫിക് നിയമപ്രകാരം നിയമലംഘനങ്ങൾക്കുള്ള ശിക്ഷാ നടപടികൾ വിപുലീകരിച്ചിട്ടുണ്ട്. റോഡ് സുരക്ഷ വർധിപ്പിക്കുക, അപകടങ്ങൾ കുറയ്ക്കുക, വിലപ്പെട്ട ജീവനുകൾ സംരക്ഷിക്കുക എന്നിവയാണ് പുതിയ നിയമത്തിന്റെ പ്രധാന ലക്ഷ്യമെന്ന് അദ്ദേഹം പറഞ്ഞു.

പിഴയും ശിക്ഷയും ഇങ്ങനെ

വാഹനമോടിക്കുമ്പോൾ മൊബൈൽ ഫോൺ ഉപയോഗിക്കുന്നവർക്ക് താഴെ പറയുന്ന ശിക്ഷകൾ ലഭിക്കാം

• 75 ദിനാർ: ഉടൻ അടച്ചു തീർക്കാവുന്ന പിഴ.
• 150 ദിനാർ വരെ: കേസ് ട്രാഫിക് കോടതിയിലേക്ക് റഫർ ചെയ്താൽ ലഭിക്കാവുന്ന പിഴ.
• 300 ദിനാർ വരെ: കോടതി ചുമത്തുന്ന പരമാവധി പിഴ.
• 3 മാസം വരെ തടവ്: പിഴയ്ക്ക് പുറമെ കോടതിക്ക് വിധിക്കാവുന്ന തടവ് ശിക്ഷ.

മിക്ക ട്രാഫിക് നിയമലംഘനങ്ങളും നിശ്ചിത തുക പിഴയടച്ച് തീർപ്പാക്കാം. എന്നാൽ, അതീവ ഗുരുതരമായ നിയമലംഘനങ്ങൾ നേരിട്ട് ട്രാഫിക് കോടതിയിലേക്കാണ് അയക്കുക. ഇത്തരം കേസുകളിൽ പിഴയടച്ച് ഒത്തുതീർപ്പാക്കാൻ അനുവദിക്കില്ല. കോടതി കുറ്റക്കാരനാണെന്ന് കണ്ടെത്തിയാൽ നിയമം അനുശാസിക്കുന്ന കനത്ത പിഴയോ തടവോ ലഭിക്കും. പിഴ ഈടാക്കി പണം സമാഹരിക്കുക എന്നതല്ല സർക്കാർ ലക്ഷ്യമെന്നും മറിച്ച് ഡ്രൈവർമാരുടെ മോശം പെരുമാറ്റം മാറ്റിയെടുക്കാനും അപകടങ്ങൾ കുറയ്ക്കാനുമാണ് നിയമം കടുപ്പിക്കുന്നതെന്നും അധികൃതർ വ്യക്തമാക്കി. ഫോൺ ഉപയോഗം ഡ്രൈവറുടെ ശ്രദ്ധ തിരിക്കുകയും വലിയ അപകടങ്ങൾക്ക് കാരണമാവുകയും ചെയ്യുന്നു. അതിനാൽ എല്ലാ വാഹന ഉടമകളും ട്രാഫിക് നിയമങ്ങൾ കർശനമായി പാലിക്കണമെന്ന് ആഭ്യന്തര മന്ത്രാലയം അഭ്യർത്ഥിച്ചു.