Dubai Media Office ദുബായ്: സോഷ്യൽ മീഡിയ വഴി പ്രചരിക്കുന്ന അടിസ്ഥാനരഹിതമായ വാർത്തകളിൽ പൊതുജനങ്ങൾ വഞ്ചിതരാകരുതെന്ന് ദുബായ് മീഡിയ ഓഫീസ്. നഗരത്തിലെ ജനജീവിതം സാധാരണ നിലയിലാണെന്നും ദുബായ് മീഡിയാ ഓഫീസ് അറിയിച്ചു. വിമാനത്താവളങ്ങൾ അടച്ചുപൂട്ടിയെന്നും ബാങ്ക് അക്കൗണ്ടുകൾ മരവിപ്പിച്ചെന്നുമുള്ള തരത്തിൽ ഓൺലൈനിൽ പ്രചരിക്കുന്ന പ്രചാരണങ്ങൾ അധികൃതർ തള്ളിക്കളഞ്ഞു.

ദുബായ് സാധാരണപോലെ പ്രവർത്തിക്കുന്നുണ്ടെന്നും ഇത്തരം വ്യാജ റിപ്പോർട്ടുകൾ ജനങ്ങളിൽ ഭീതി പടർത്താൻ ലക്ഷ്യമിട്ടുള്ളതാണെന്നും ദുബായ് മീഡിയാ ഓഫീസ് ഔദ്യോഗിക കുറിപ്പിൽ വ്യക്തമാക്കി. കൂട്ട ഒഴിപ്പിക്കൽ, സൂപ്പർമാർക്കറ്റുകളിൽ ഭക്ഷ്യക്ഷാമം, വസ്തു വിപണിയുടെ തകർച്ച, വിദേശ നിക്ഷേപകർ രാജ്യം വിടുന്നു തുടങ്ങിയ തെറ്റായ അവകാശവാദങ്ങൾക്കെതിരെ ജാഗ്രത പാലിക്കണമെന്ന് അധികൃതർ അറിയിച്ചു.

പഴയ വീഡിയോ ദൃശ്യങ്ങളും ആർട്ടിഫിഷ്യൽ ഇന്റലിജൻസ് (AI), ഡീപ് ഫേക്ക് സാങ്കേതികവിദ്യകളും ഉപയോഗിച്ച് യുഎഇയിലെ സംഭവങ്ങൾ എന്ന രീതിയിൽ ദൃശ്യങ്ങൾ കെട്ടിച്ചമയ്ക്കുകയാണ്. വിമാനത്താവളങ്ങൾ, ബാങ്കുകൾ, മാർക്കറ്റുകൾ എന്നിവയുൾപ്പെടെയുള്ള എല്ലാ പൊതുസേവനങ്ങളും യാതൊരു തടസ്സവുമില്ലാതെ പതിവുപോലെ പ്രവർത്തിക്കുന്നുണ്ടെന്ന് മീഡിയ ഓഫീസ് സ്ഥിരീകരിക്കുകയും ചെയ്തു. വ്യാജ വാർത്തകൾ പ്രചരിപ്പിക്കുന്നത് യുഎഇ നിയമപ്രകാരം ഗുരുതരമായ കുറ്റമാണെന്ന് അധികൃതർ മുന്നറിയിപ്പ് നൽകി.

സ്ഥിരീകരിക്കാത്ത വിവരങ്ങളും ദൃശ്യങ്ങളും സോഷ്യൽ മീഡിയയിൽ പങ്കുവെക്കുന്നവർക്ക് കുറ്റത്തിന്റെ തീവ്രതയനുസരിച്ച് ഒന്ന് മുതൽ രണ്ട് വർഷം വരെ തടവും ഒരു ലക്ഷം മുതൽ രണ്ട് ലക്ഷം ദിർഹം വരെ പിഴയും ശിക്ഷയായി ലഭിക്കാം. വിവരങ്ങൾ പങ്കുവെക്കുന്നതിന് മുൻപ് അവയുടെ തീയതിയും ഉറവിടവും പരിശോധിക്കേണ്ടത് ഓരോ വ്യക്തിയുടെയും ഉത്തരവാദിത്തമാണെന്നും വിശ്വസനീയമല്ലാത്ത പേജുകളിൽ നിന്നുള്ള വിവരങ്ങൾ ഷെയർ ചെയ്യരുതെന്നും അധികൃതർ നിർദ്ദേശം നൽകി. പ്രൊഫഷണൽ രീതിയിലാണ് നിലവിലെ സാഹചര്യങ്ങൾ അധികൃതർ കൈകാര്യം ചെയ്യുന്നത്. രാജ്യത്തിന്റെ സുരക്ഷയും സ്ഥിരതയും ഉറപ്പാക്കാൻ എല്ലാ സർക്കാർ സ്ഥാപനങ്ങളും ഏകോപനത്തോടെ പ്രവർത്തിക്കുന്നുണ്ട്. പൊതുജന സുരക്ഷ നിലനിർത്തുന്നതിന് ഔദ്യോഗിക സർക്കാർ ചാനലുകളെ മാത്രം വിവരങ്ങൾക്കായി ആശ്രയിക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.

യുഎഇയിലെ പുതിയ ജോലി അവസരങ്ങൾക്കായി ഇവിടെ ക്ലിക്ക് ചെയ്യാം

Thunder And Rain യുഎഇയിൽ അസ്ഥിരമായ കാലാവസ്ഥ തുടരും; ശക്തമായ മഴയും ഇടിമിന്നലും ഉണ്ടാകുമെന്ന് മുന്നറിയിപ്പ്

Thunder And Rain അബുദാബി: യുഎഇയിൽ അസ്ഥിരമായ കാലാവസ്ഥ തുടരുമെന്ന് മുന്നറിയിപ്പ്. രാജ്യത്തുടനീളം ഘട്ടം ഘട്ടമായി മഴ, ഇടിമിന്നൽ, ശക്തമായ കാറ്റ് എന്നിവ ഉണ്ടാകുമെന്ന് അധികൃതർ പ്രവചിക്കുന്നു. അബുദാബിയിലെ അൽ ദഫ്ര മേഖലയുൾപ്പെടെയുള്ള ഇടങ്ങളിൽ മണിക്കൂറിൽ 74 കിലോമീറ്റർ വേഗത്തിൽ വരെ ശക്തമായ കാറ്റ് വീശിയതായും റിപ്പോർട്ടുകളുണ്ട്.

ശനിയാഴ്ചയോടെ ആകാശം തെളിയുമെന്നാണ് കാലാവസ്ഥാ പ്രവചനം. എങ്കിലും വടക്കുപടിഞ്ഞാറൻ ദിശയിൽ നിന്നുള്ള ശക്തമായ കാറ്റ് തുടരാൻ സാധ്യതയുള്ളതിനാൽ പൊടിപടലങ്ങൾ ഉയരാനും ദൂരക്കാഴ്ച കുറയാനും ഇടയുണ്ട്. താപനില 20 ഡിഗ്രി സെൽഷ്യസിനും 30 ഡിഗ്രി സെൽഷ്യസിനും ഇടയിലായിരിക്കും. ശനിയാഴ്ച മുതൽ ഔട്ട്ഡോർ പ്രവർത്തനങ്ങൾ പുനരാരംഭിക്കാമെങ്കിലും കടൽ അതീവ പ്രക്ഷുബ്ധമായി തുടരുന്നതിനാൽ കടലിൽ ഇറങ്ങുന്നതിനും നീന്തുന്നതിനും നിയന്ത്രണമുണ്ടാകും.

കനത്ത മഴ, മങ്ങിയ ദൃശ്യപരത, ശക്തമായ കാറ്റ് എന്നിവയുള്ള സമയങ്ങളിൽ, ഔദ്യോഗിക മാർഗങ്ങളിലൂടെ അറിയിപ്പുകൾ പിന്തുടരണമെന്നും ജാഗ്രത പാലിക്കണമെന്നും അധികൃതർ താമസക്കാരോട് നിർദ്ദേശിച്ചു.